သိုၵ်း RCSS တင်း သိုၵ်း TNLA ယိုဝ်းၵၼ်၊ ၶဵင်ႈၶႅင်ၵၢၼ်သိုၵ်းတေႃႇၵၼ်မႃး သိပ်းဝၼ်းပၢႆ လႄႈ ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းၵျွၵ်ႉမႄး ႁိမ်း 3,000 ၵေႃႉ လႆႈပၢႆႈယၢၼ်ႁိူၼ်းယေးတီႈယူႇ ၵႂႃႇယူႇတီႈၵျွင်းမုၼ်ၸဝ်ႈ၊ ပၢႆႈၶဝ်ႈဝဵင်းၸိူဝ်းၼႆႉ။

သိုၵ်း RCSS တင်း သိုၵ်း TNLA ယိုဝ်းၵၼ်၊ ၶဵင်ႈၶႅင်ၵၢၼ်သိုၵ်းတေႃႇၵၼ် တၢင်းၾၢႆႇၸဵင်ႇႁွင်ႇဝၼ်းတူၵ်းဝဵင်း ၼႂ်းၸႄႈ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ သွင်ၾၢႆႇတုမ်ႉလေႃႇၵၼ်၊ ငႃၵၼ်မႃး တင်ႈတႄႇ ဝၼ်းတီႈ 25/12/2020 တေႃႇထိုင် ယၢမ်းလဵဝ်။ ယွၼ်ႉသိုၵ်းသွင်ၾၢႆႇယိုဝ်းၵၼ်သေ ၵူၼ်းဝၢၼ်ႈ ၼႂ်းဢိူင်ႇမိူင်းတၢင်ႈ တၢင်းဢိူင်ႇတေႃႉသၢင်ႈ  ၼပ်ႉႁူဝ် ႁဵင်ၵေႃႉလႆႈပၢႆႈယၢၼ်ႁိူၼ်းယေးတီႈယူႇ။

ၸဝ်ႈၶူးၺႃႇၼဝရ (ထမ်ႇၸရိယ) B.A M.A ၵႅမ်ၽူႈၵွၼ်းဝတ်ႉၼမ်ႉၸဵတ်းလိၼ်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ၼႆႉသင်ၶၸဝ်ႈတင်း ၸုမ်းၼမ်ႉၶူင်းပရႁိတ လႆႈမိူဝ်းၸွႆႈထႅမ် ၵူၼ်းပၢႆႈၽေးသိုၵ်းတၢင်းတေႃႉသၢင်းၼၼ်ႉ သဵင်ၵွင်ႈၵေႃႈ ယင်းပႆႇယဵၼ် တိုၵ်ႉလႆႈငိၼ်းယူႇ။ ယၢမ်းလဵဝ်ပဵၼ်ၶၢဝ်းၵတ်းလႄႈ ၵူၼ်းပၢႆႈ ၽေးသိုၵ်း လူဝ်ႇၽႃႈႁူမ်ႇ သိူဝ်ႈၶူဝ်းၼႃ ၸိူဝ်းၼႆႉဢေႃႈ။ ဢၼ်ယၢပ်ႇၽိုတ်ႇတႄႉ ပဵၼ်ၼၢင်းယိင်းယဝ်ႉ ယၢပ်ႇတႃႇ ၶိူင်ႈၸႂ်ႉၶူဝ်းသွႆၶဝ်ၼၼ်ႉ ၼႃႇၼေႃႈ” – ဝႃႈၼႆ။

ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈၼႂ်းဢိူင်ႇတေႃႉသၢင်ႇ တင်းမူတ်းမီး 1,846 ၵေႃႉ – တီႈ ဝတ်ႉၵျွင်းႁွင်ႇ တင်း ၵျွင်းၶမ်း မီး 816 ၵေႃႉ၊ တီႈဝတ်ႉပႃႇၶႃး 422 ၵေႃႉ၊ တီႈဝတ်ႉပၢင်မၢၵ်ႇမိုဝ်း မီး 608 ၵေႃႉ၊ ပဵၼ်ၵူၼ်း ဝၢၼ်ႈလူင်၊ ဝၢၼ်ႈပၢင်မၢၵ်ႇမိုဝ်း၊ ဝၢၼ်ႈယႂႃႇမ၊ ဝၢၼ်ႈပွၵ်ႉၵၢတ်ႇလႄႈ ဝၢၼ်ႈၺွင်ႇပၢင်ႇလႃႉ ၸိူဝ်းၼႆႉ။

လိူဝ်ၼၼ်ႉ ၼႂ်းဝဵင်းၵျွၵ်ႉမႄးၵေႃႈ ၵူၼ်းပၢႆႈၽေးသိုၵ်း ဢမ်ႇယွမ်းႁဵင်၊ ပဵၼ်ၵူၼ်းဝၢၼ်ႈ တၢင်းလွႆဢၢၼ်၊ ၵွင်းၶႃးၸိူဝ်းၼႆႉ။

ၸၢႆးဢွင်ႇမိၼ်ႉ ၽူႈတႅၼ်းသၽႃးၵူၼ်းမိူင်း ဢၼ်ဢွင်ႇပေႉပၢင်လိူၵ်ႈတင်ႈပီ 2020 တီႈၵျွၵ်ႉမႄး လၢတ်ႈဝႃႈ – “တီႈဝဵင်းၵျွၵ်ႉမႄးႁဝ်းၶႃႈ ဢၼ်လႆႈႁပ်ႉသဵၼ်ႈမၢႆ ထိုင်မိူဝ်ႈပူၼ်ႉမႃးသွင် ဝၼ်းၼႆႉ တေမီးႁူဝ်ၵူၼ်းတင်းမူတ်း 1,007 ၵေႃႉ။ ပဵၼ်ၵူၼ်းဝၢၼ်ႈတၢင်း ပွတ်း လွႆဢၢၼ်၊ ၵွင်းၶႃး ယဝ်ႉၵေႃႈ ပီႈၼွင်ႉႁဝ်း ၸွမ်းသဵၼ်ႈတၢင်းၵႃးမိူင်းတၢင်ႈ ၾၢႆႇပုၼ်ႉၼမ်ႉသၢင်ႈ ၸိူဝ်းၼႆႉ” – ဝႃႈၼႆ။

ယၢမ်းလဵဝ် သိုၵ်းတင်းသွင်ၾၢႆႇ တိုၵ်ႉၶဵင်ႈၶႅင် ထႅမ်ႁႅင်းသိုၵ်း မုင်ႈၼႃႈတေႃႇၵၼ် သဵင်ၵွင်ႈၵၢင်ႇ မၢင်တီႈ ယင်းပႆႇယဵၼ်၊ ၵူၼ်းဝၢၼ်ႈၵေႃႈဝႃႈ တိုၵ်ႉလႆႈငိၼ်း သဵင်ၵွင်ႈ သဵင်မၢၵ်ႇတႅၵ်ႇ ပဵၼ်တီႈပဵၼ်ၵမ်းယူႇ  ဝႃႈၼႆ။ ၸိူင်ႉၼၼ်ၼင်ႇၵဝ်ႇ တၢင်းပွတ်းၸႄႈဝဵင်းၼမ်ႉတူႈၵေႃႈပဵၼ်ပၢင်တိုၵ်းၵၼ်၊ ႁဵတ်းႁႂ်ႈၵူၼ်းဝၢၼ်ႈၼႂ်းဢိူင်ႇၼႃးသၢႆး၊ ဢိူင်ႇပၢင်ၶႅမ်၊ ဢိူင်ႇၼမ်ႉတွင်ႈၵူင်း၊ ႁိမ်းႁဵင် လႆႈပၢႆႈယၼ်ႁိူၼ်းယေးတီႈယူႇ ၼပ်ႉႁူဝ်ပၢၵ်ႇ။

သိုၵ်း RCSS/SSA ၼႆႉပဵၼ်ၸုမ်းလူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၊ သိုၵ်း PSLF/TNLA သမ်ႉပဵၼ်လုၵ်ႈၸုမ်း ဢူၺ်းလီသိုၵ်းပွတ်းႁွင်ႇ 7 ၸုမ်း/ ၶွမ်ႊမတီႊဢုပ်ႇဢူဝ်းလွင်ႈငမ်းယဵၼ်မိူင်းႁူမ်ႈတုမ် FPNCC ဢၼ်တပ်ႉသိုၵ်းဝႃႉUWSA ဢွၼ်ႁူဝ်ဝႆႉ။