မိူဝ်ႈၼႆႉ ဝၼ်းတီႈ 9/12/2020 ယၢမ်းၵၢင်ၼႂ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA တင်း ၸုမ်း ဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ် ၼႂ်းဝၢၼ်ႈၼႃးၵေး ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ  ၵူၼ်းဝၢၼ်ႈ  လၢႆလၢႆဝၢၼ်ႈဢွၼ်ၵၼ်ပၢႆႈၽေးသိုၵ်းမႃးသွၼ်ႈတီႈၵျွင်းမုၼ်ၸဝ်ႈမၢၼ်ႈၸၢမ်။

ၵူၼ်းပၢႆႈၽေးသိုၵ်းႁွတ်ႈၼမ်ႉတူႈၵေႃႉၼိုင်ႈလၢတ်ႈဝႃႈ – “သဵင်ၵွင်ႈတႅၵ်ႇမိူဝ်ႈၵႆႈၼႆႉၶႃႈဢေႃႈ တီႈၼႂ်းဝၢၼ်ႈၼႃးၵေးၶႃႈ ၵူၼ်းမိူင်းၸိူဝ်းတၼ်း ပၢႆႈၵေႃႈမီး ၸိူဝ်းပႆႇတၼ်းပၢႆႈသေၶၢမ် ဝႆႉၼႂ်း ဝၢၼ်ႈၵေႃႈ တိုၵ်ႉမီးတင်းၼမ်ၶႃႈဢေႃႈ။ ”- ဝႃႈၼႆ။

ယၢမ်းလဵဝ် ၵူၼ်းဝၢၼ်ႈဢၼ်ပၢႆႈမႃးသွၼ်ႈယူႇသဝ်းဝႆႉတီႈဝတ်ႉၵျွင်းမၢၼ်ႈၸၢမ် ပဵၼ်ၵူၼ်းဝၢၼ်ႈ ၼႃးၵႅင်း၊ ၼႃးၵေး ၊ ၵုၼ်ၵျွင်း၊ ဝၢၼ်ႈပဵင်းလူင် ၸိူဝ်းၼႆႉ။ တေႃႇထိုင်ၶၢဝ်းယၢမ်းၵၢင်ဝၼ်းတဵင်ႈၼႆႉ ယင်းတိုၵ်ႉလႆၶဝ်ႈမႃးယူႇတိၵ်းတိၵ်း – ၵူၼ်းမိူင်းမၢၼ်ႈၸၢမ် ဢၼ်ၵႂႃႇပႂ်ႉၸွႆႈတူၺ်းၵူၼ်းပၢႆႈၽေးဝႆႉတီႈဝတ်ႉၵျွင်းၼၼ်ႉလၢတ်ႈၽူႈတွႆႇႁွၵ်ႈၼင်ႇၼႆ။  

ပၢင်တိုၵ်းဢၼ်ပဵၼ်ႁိမ်းဝၢၼ်ႈၼႃးၵေး ၼႂ်ၼႆႉ ပဵၼ်ၸုမ်းဢူၺ်းလီပွတ်းႁွင်ႇလႄႈ သိုၵ်း RCSS ယိုဝ်းၵၼ်။ သွင်ၾၢႆႇဢိူမ်ႈၸမ်ၵၼ်မႃးၸဵမ်မိူဝ်ႈဝႃးဝၼ်းသိုၼ်းလႄႈၵူၼ်းမိူင်းပေႃးတိုၼ်ႇတူဝ် ၾၢင်ႉၵႅမ်းဝႆႉယူႇယဝ်ႉဝႃႈၼႆ။

ၵူၼ်းပၢႆႈၽေးသိုၵ်း သိုပ်ႇလၢတ်ႈတီႈၽူႈတွႆႇႁွၵ်ႈထႅင်ႈဝႃႈ – တပ်ႉပွင်းၸု လႄႈသိုၵ်းၶူဝ်းလၢႆးၶႃႈဢေႃႈ ဢၼ်ယိုဝ်းၵၼ်ၼႆႉ။ မိူဝ်ႈၶမ်ႈဝႃး တပ်ႉပွင်းၸုၶဝ် ၶဝ်ႈမႃးၼွၼ်းလိုဝ်ႈၼႂ်းဝၢၼ်ႈ ၵုၼ်ၵျွင်း၊ ပဵင်းလူင်ၸိူဝ်းၼႆႉလူးၵွၼ်ႇဢေႃႈ။ –  ဝႃႈၼႆ။

ၼႂ်းၸုမ်းဢူၺ်းလီပွတ်းႁွင်ႇ (ဢၼ်ၵူၼ်းဝၢၼ်ႈႁွင်ႉဝႃႈ တပ်ႉပွင်းၸု)ၼၼ်ႉ ၵူၼ်းဝၢၼ်ႈဝႃႈ ပႃးတင်းသိုၵ်း SSPP/SSA ဝၢၼ်ႈႁႆးယူႇ။ ၾၢႆႇၼိုင်ႈ SSPP/SSA  ၵေႃႈ တႅမ်ႈတၢင်ႇဝႆႉတီႈၼႃႈဝႅပ်ႈပေႉၶျ်ၶဝ်ဢၼ်ပဵၼ် SSPP Info ၼၼ်ႉဝႃႈ လႆႈပဵၼ်ပၢင်တိုၵ်းၵၼ်တင်း RCSS တီႈၼႂ်းၸႄႈဝဵင်းၼမ်ႉတူႈ- ဝႃႈၼႆဝႆႉ။

ၵူၺ်းၵႃႈယူႇတီႈၽူႈတွႆႇႁွၵ်ႈၶတ်းၸႂ်တိတ်းတေႃႇတူၺ်းၸူးၽူႈၶၢၼ်ပၢၵ်ႇ တင်းသွင်ၸုမ်းၵေႃႈ တိတ်းတေႃႇ ဢမ်ႇလႆႈလႄႈ ဢမ်ႇၸၢင်ႈဢဝ်ၶေႃႈယိုၼ်ယၼ်။

“ယၢမ်းလဵဝ်ၼႆႉ ပဵၼ်ၶၢဝ်းဢွၵ်ႇၶဝ်ႈ ဢဝ်ၼမ်ႉ ဢဝ်ၶဝ်ႈၵၢပ်ႇၶႃႈဢေႃႈ ။ ၶဝ်သမ်ႉ မႃးပဵၼ် ပၢင်တိုၵ်းၵၼ်ၸိူင်ႉၼႆႉ တုမ်ႉ တိူဝ်ႉႁဝ်းၶႃႈ ၵူၼ်းဝၢၼ်ႈတႄႉတႄႉၶႃႈဢေႃႈ။ ယွၼ်ႉၸုမ်းလွႆတင်း ဝၢၼ်ႈႁႆး ၶဝ်ၶၢမ်ႈၼမ်ႉမီ မုင်ႈၼႃႈမႃးၸူးၶူဝ်းလၢႆးလႄႈ ၸင်ႇဝႃႈပဵၼ်ပၢင်တိုၵ်းၵၼ်ၶႃႈယဝ်ႉ” – ၵူၼ်းဝၢၼ်ႈပွတ်းဢိူင်ႇမၢၼ်ႈၸၢမ် ၵေႃႉၼိုင်ႈ လၢတ်ႈၼႄၼင်ႇၼႆ။

မိူဝ်ႈဝႃး ဝၼ်းတီႈ 8/12/2020 သိုၵ်း RCSS တင်း TNLA လႆႈၶဵင်ႈၶႅင်ၵၢၼ်သိုၵ်းတင်း ပွတ်းဢိူင်ႇမၢၼ်ႈၸၢမ် မိူင်းမူႉ တင်း ဝၼ်း ဝႃႈၼႆ။

ၶွင်ႇသီႇဢဝ်ၶိုၼ်းၸိုင်ႈတႆး RCSS ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA ၸုမ်းၼိုင်ႈ။ လိူဝ်ၼၼ်ႉ သိုၵ်း TNLA သမ်ႉ ပဵၼ်ၸုမ်း ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် တေႃႇထိုင်ပီ 2020 ၼႆႉသဵင်ႈ ဝႃႈၼႆ။