သိုၵ်း TNLA တင်း RCSS တိုၵ်ႉၶဵင်ႈၶႅင်ၵၢၼ်သိုၵ်းၵၼ်ႁၢဝ်ႈႁႅင်း တင်းသွင်ၾၢႆႇ ၼႂ်းၸႄႈဝဵင်းၼမ်ႉတူႈ  ၽႂ်ၵေႃႈ ပႆႇထွႆထွၼ် သိုၵ်းလူင် ပွင်ၸိုင်ႈမၢၼ်ႈသမ်ႉ  ဢိူမ်ႈၸမ်ၽိုတ်ႉၸူးထႅင်ႈလႄႈ ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းၵၼ် ႁၢဝ်ႈႁႅင်း ဝႃႈၼႆ။

မိူဝ်ႈၼႆႉ ဝၼ်းတီႈ 8/12/2020 ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈ တႆး RCSS/SSA တင်း သိုၵ်းတဢၢင်း TNLA တိုၵ်ႉၶဵင်ႈၶႅင်ၵၼ်တၢင်းပွတ်းဝၼ်းတူၵ်းလႄႈ ဝၼ်းဢွၵ်ႇမၢၼ်ႈၸၢမ် ၼႂ်းဢိူင်ႇမၢၼ်ႈၸၢမ် မိူင်းမူႉ ၼႂ်းၸႄႈ ဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ သိုၵ်းတင်းသွင်ၾၢႆႇ ပႆႇထွႆထွၼ်ပၼ်ၵၼ် ။

ၵူၼ်းပိုၼ်ႉတီႈ ပွတ်းမၢၼ်ႈၸၢမ် လၢတ်ႈဝႃႈ – “မိူဝ်ႈလဵဝ်ၼႆႉ သၢႆသိုၵ်းမၢၼ်ႈၵေႃႈ မႃးႁွတ်ႈထိုင်ဝႆႉတီႈဝၢၼ်ႈပၢင်ၵုတ်ႇ ဢဵၼ် ႁႅင်းမွၵ်ႈ 60 ၵေႃႉၼႆႉ။ ငႃၵၼ်ဝႆႉ သၢမ်ငႃးၶႃႈဢေႃႈၼႆႉ။ သိုၵ်းမၢၼ်ႈၾၢႆႇၼိုင်ႈ၊ သိုၵ်းလွႆၾၢႆႇၼိုင်ႈလႄႈ သိုၵ်းတႆး ၾၢႆႇၼိုင်ႈ ၼႆၶႃႈဢေႃႈ။ တီႈၾၢႆႇဢွၵ်ႇမၢၼ်ႈၸၢမ် တၢင်းဝၢၼ်ႈပဵင်းလူင်ၵေႃႈ သိုၵ်းလွႆ တင်း သိုၵ်းၶူဝ်းၶဵဝ်ၵေႃႈ ႁွတ်ႈၽႅဝ်မႃးထႅင်ႈ မိူဝ်ႈဝႃး။ ႁဝ်းၶႃႈၵူၼ်းမိူင်းတႄႉ ဢွၼ်ၵၼ်မႆႈၸႂ် ၵူဝ်ပဵၼ်ပၢင်တိုၵ်းၵၼ်ႁၢဝ်ႈႁႅင်းၵူၺ်းၶႃႈယဝ်ႉ”- ဝႃႈၼႆ။

မိူဝ်ႈဝႃး ဝၼ်းတီႈ 7/12/2020 ယၢမ်းၵၢင်ၼႂ် မွၵ်ႈ 8 မူင်းၼႆႉ သိုၵ်း TNLA တင်း သိုၵ်း RCSS လႆႈပဵၼ်ပၢင်တိုၵ်းၵၼ် တီႈၶူဝ် ပၢင်တွင်း ၼႂ်းဢိူင်ႇမၢၼ်ႈၸၢမ် မိူင်းမူႉ တေႃႇထိုင် ယၢမ်းဝၢႆးဝၼ်း 2 မူင်းၶိုင်ႈပၢႆ ပၢင်တိုၵ်း ၸင်ႇတေယဵၼ်လူင်း ၼႆယဝ်ႉ။

ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈဝႃႈ – “ယၢမ်းလဵဝ် တိုၵ်ႉၶဵင်ႈၶႅင်ၵၼ်ယူႇ ၶဝ်ပႆႇထွႆၶႃႈ”- ဝႃႈၼႆ။

မိူဝ်ႈဝၼ်းတီႈ 25/10/2020 ယၢမ်းၵၢင်ဝၼ်း 11:20 မူင်း သိုၵ်း TNLA ႁႅင်းသိုၵ်း ဢမ်ႇယွမ်း 50 ၵေႃႉ ၶိုၼ်ႈတိုၵ်းတပ်ႉသိုၵ်း RCSS တီႈႁိမ်းဝၢၼ်ႈၼႃႈၵုၼ် ဢိူင်ႇၼႃးသၢႆး ၸႄႈဝဵင်းၼမ်ႉတူႈ မႃးၵမ်းၼိုင်ႈယဝ်ႉ ဝႃႈၼႆ။

ၽွင်းၶၢဝ်းသိုၵ်းတဢၢင်း ပိုၼ်ၽၢဝ်ႇ ၵိုတ်းတိုၵ်းၾၢႆႇလဵဝ်တေႃႇထိုင် ပီ 2020 သဵင်ႈၼႆသေ ၼႂ်းၶၢဝ်းယၢမ်းၵိုတ်းတိုၵ်းၼႆႉ ႁႅၼ်းသိုၵ်းလေႃႇတိုၵ်း RCSS ၼႆႉ မီး 2 ပွၵ်ႈယဝ်ႉ ၼႂ်းၸႄႈဝဵင်းၼမ်ႉတူႈ ယူႇတီႈႁွင်ႈၵၢၼ်ပိုၼ်ၽၢဝ်ႇၶွင်ႇ RCSS တႆး လွတ်ႈလႅဝ်း ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ၼႂ်းၸႄႈဝဵင်းၼမ်ႉတူႈၼႆႉ မီးၸုမ်းယိပ်းၵွင်ႈၵၢင်ႇ လၢႆမူႇလၢႆၸုမ်း တူင်ႉၼိုင်ယူႇဝႆႉ မိူၼ်ၼင်ႇ သိုၵ်းလူင်ပွင်ၸိုင်ႈ မၢၼ်ႈ၊ သိုၵ်းတဢၢင်း TNLA ၊ သိုၵ်း SSPP ၊ သိုၵ်း RCSS လႄႈ သိုၵ်းၶၢင် KIA ၸိူဝ်းၼႆႉ။