ပႃႇတီႇႁူဝ်သိူဝ် ၸႄႈဝဵင်းၼမ်ႉတူႈ တေဢမ်ႇလူင်းလဵပ်ႈဝဵင်း ၼႄဢဵၼ်ႁႅင်းယဝ်ႉ ယွၼ်ႉတၢင်းပဵၼ် ၶူဝ်ႊဝိတ်ႉ 19 တိုၵ်ႉ ၽႄႈလၢမ်းႁၢဝ်ႈႁႅင်းယူႇ ဝႃႈၼႆ။

ပေႃးထိုင်မႃး ဝၼ်းတီႈ 5/11/2020 ၼႆႉ ယူႇတီႈပႃႇတီႈႁူဝ်သိူဝ် ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မီးၽႅၼ်ၵၢၼ် တေၼႄဢဵၼ်ႁႅင်း သူၼ်းတုမ် ႁႃသဵင် လဵပ်ႈဝဵင်းဝႃႈၼႆသေတႃႉ တၢင်းပဵၼ်ၶူဝ်ႊဝိတ်ႉ 19 သမ်ႉ တိုၵ်ႉၽႄႈ လၢမ်းႁၢဝ်ႈႁႅင်းယူႇလႄႈ  တေဢမ်ႇပဵၼ်ယဝ်ႉ ဝႃႈၼႆ။  

ၽူႈၶဝ်ႈၸုမ်း တူင်ႉၼိုင် ၼႂ်းပႃႇတီႇႁူဝ်သိူဝ် ၸႄႈဝဵင်းၼမ်ႉတူႈ လၢတ်ႈဝႃႈ – “မိူဝ်ႈတႄႇ မၼ်းတႄႉ ႁဝ်းၶႃႈ တေဢွၵ်ႇၼႄ ဢဵၼ်ႁႅင်း ၼႂ်းဝၼ်းတီႈ 5 တေမႃးၼႆႉ ။ ၵမ်းၼႆႉ ယူႇတီႈပလိၵ်ႈၶဝ်သမ်ႉ ဢွၵ်ႇလိၵ်ႈဝႆႉဝႃႈ ႁၢမ်ႈၶွၼ်ႈတုမ်ၵူၼ်း 50 ၶိုၼ်ႈၼိူဝ်ၼႆလႄႈ  ယူႇတီႈငဝ်ႈငုၼ်းႁဝ်းၶႃႈၵေႃႈ သင်ႇလူင်းမႃးဝႃႈ ယႃႇပေဢွၵ်ႇၼႄဢဵၼ်ႁႅင်းယဝ်ႉ ဝႃႈၼႆၶႃႈဢေႃႈ။ သင်ဝႃႈ ႁဝ်းၶႃႈဢွၵ်ႇ ၼႄၼႆ ၵူဝ်ဢမ်ႇၸၢင်ႈၵုမ်းႁႅင်းၵူၼ်း ၊   ၵူဝ်ႁူဝ်ၵူၼ်းလူၼ်ႉလိူဝ် 50  ၵႂႃႇ၊  ၵူဝ်ၽိတ်းပၵ်းပိူင်မၢႆမီႈ ဢၼ်ဢွၵ်ႇ ဝႆႉ ၊ ၾၢႆႇၼိုင်ႈၵေႃႈ ၸမ်ပၢင်လိူၵ်ႈတင်ႈမႃးယဝ်ႉၵေႃႈပိူင်ၼိုင်ႈ” – ဝႃႈၼႆ။

ၼေႃႇၽူႈတႅၼ်းသၽႃး ပႃႇတီႇႁူဝ်သိူဝ် ၸႄႈဝဵင်းၼမ်ႉတူႈၼႆႉ-  ၼၢင်းၶမ်းဢေး ပဵၼ်ၼေႃႇၽူႈတႅၼ်းသၽႃးၵူၼ်းမိူင်း၊ ၼၢင်း ၸၢမ်ႁွမ် ၼေႃႇၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 လႄႈ ၸၢႆးၵျေႃႇၺုၼ်ႉ ၼေႃႇၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸဵမ်ၸိူဝ်းၼႆႉ။

ၼႂ်းၸႄႈဝဵင်းၼမ်ႉတူႈၼႆႉ ၵူၼ်းမီးသုၼ်ႇတွတ်ႈၶႅပ်းၵၢင်ၸႂ် တင်းမူတ်းမီး 33,185 ၵေႃႉ။ ၼႂ်းၼၼ်ႉ ၶဵတ်ႇသဵင်မၢႆ 1 မီး 15,545 ၵေႃႉ၊ မၢႆ 2 မီး 17,640 ၵေႃႉ ၼႆယဝ်ႉ။