ၵူၼ်းဝၢၼ်ႈ ၼႂ်းၸႄႈဝဵင်း ၵျွၵ်ႉမႄး ႁူပ်ႉႁၼ် မၢၵ်ႇပီၵူၺ်ႈလူင်သွင်လုၵ်ႈ မီးဝႆႉၼႂ်းၵွင်ယုၵ်းယၢၵ်း၊ ႁဵတ်းႁႂ်ႈၵူၼ်းဝၢၼ်ႈတူၵ်းၸႂ်၊ ၵႂႃႇမွၵ်ႇသိုၵ်းမၢၼ်ႈမႃးတူၺ်း “ဝႃႈဢမ်ႇၸႂ်ႈမၢၵ်ႇၶဝ်” – ၼႆ လႅင်ႇၶၢဝ်ႇပိုၼ်ႉတီႈ လၢတ်ႈၼႄၼင်ႇၼႆ။
မိူဝ်ႈဝၼ်းတီႈ 14/10/2020 ၵၢင်ၶမ်ႈမွၵ်ႈယၢမ်း 6 မူင်းပၢႆ၊ တီႈဝၢၼ်ႈပုင်ႇဝူဝ်း ဢိူင်ႇပုင်ႇဝူဝ်း ၸၢႆးသၢင်ႇဢွင်ႇ ၵႂႃႇၸုတ်ႇၽဝ်ၵွင်ယုၵ်းယၢၵ်း ၵွင်ယိူဝ်ႈယႃႈ တီႈဢၼ်တီႇၽဵဝ်ႈၵွင်ဝႆႉ (ႁိမ်းႁေႃၶဵင်ႇၸဝ်ႈဝၢၼ်ႈ) ၼႃႈဝၢင်း ႁိူၼ်းမၼ်းၸၢႆး (ပွၵ်ႉ 4)တီႈၼႂ်းဝၢၼ်ႈပုင်ႇဝူဝ်း၊ မိူဝ်ႈယုၵ်းယၢၵ်းမႆႈၸမ်မူတ်းၼၼ်ႉ လႆႈငိၼ်းသဵင်တႅၵ်ႇ ၵမ်းၼိုင်ႈသေ မၼ်းၸၢႆးၼႅတ်ႈၵႂႃႇဢဝ်ၼမ်ႉၵႂႃႇႁူတ်း၊ ၽိူဝ်ႇႁူတ်းယဝ်ႉ လႆႈႁၼ်မႅၼ်ႈမၢၵ်ႇပီၵူၺ်ႈလူင် သွင်လုၵ်ႈ မူၵ်းဝႆႉၼႂ်းၵွင်ယုၵ်းယၢၵ်း ယင်းပႆႇတႅၵ်ႇ။
လုင်းၸၢႆးသူႉ ၵူၼ်းဝၢၼ်ႈပုင်ႇဝူဝ်း လၢတ်ႈတီႈၽူႈတွႆႇႁွၵ်ႈဝႃႈ- “လွင်ႈၼႆႉၵူၼ်းလူင်ဝၢၼ်ႈ ၵႂႃႇလၢတ်ႈ တီႈသိုၵ်းမၢၼ်ႈ ဢၼ်ပၵ်းတီႈၼႂ်းဝၢၼ်ႈၼႆႉဢေႃႈ၊ ၶဝ်မႃးတူၺ်းယဝ်ႉလၢတ်ႈဝႃႈ ဢမ်ႇတိူဝ်ႉလႆႈ။ ပေႃးတိူဝ်ႉ မၼ်းလူဝ်ႇတႅၵ်ႇၵူၺ်းယဝ်ႉ၊ မၢၵ်ႇၼႆႉဢမ်ႇၸႂ်ႈၶွင်ႁဝ်း ႁဝ်းဢမ်ႇႁတ်းၵဵပ်း ၶဝ်ဝႃႈၼႆ။ ၶဝ်ၵႂႃႇယွၼ်းဢဝ် မၢၵ်ႇတႃႇယႃႇယွၵ်းပိူၼ်ႈ မႃးတမ်းဝႆႉၼိူဝ်မၼ်းသေ ဢဝ်ပႅၼ်ႈႁူမ်ႇ၊ မၢၵ်ႇဢုတ်ႇတဵင်ဝႆႉ ၸိူင်ႉၼၼ်ၵူၺ်း” ဝႃႈၼႆ။
ဝၢၼ်ႈပုင်ႇဝူဝ်း ဢိူင်ႇပုင်ႇဝူဝ်းၼႆႉ မီးၸဵင်ႇၸၢၼ်းဝၼ်းဢွၵ်ႇ ဝဵင်းၵျွၵ်ႉမႄး၊ ယၢၼ်ဝဵင်းမွၵ်ႈ 35 လၵ်း၊ ယူႇၼႂ်းၸႄႈဝဵင်းၵျွၵ်ႉမႄး ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
တင်ႈတႄႇၽွင်းႁၢင်လိူၼ်သႅပ်ႊထႅမ်ႊပိူဝ်ႊမႃး သိုၵ်းလူင်ပွင်ၸိုင်ႈမၢၼ်ႈ လၢႆတပ်ႉၸုမ်း၊ လၢႆတပ်ႉၵွင်၊ ပႃးၸဵမ် တပ်ႉလူမ်း ႁႅၼ်းသိုၵ်းလေႃႇတိုၵ်း ၶွင်ႇသီႇ ဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/ SSA) ၼႂ်းၸႄႈဝဵင်းၵျွၵ်ႉမႄး ႁၢဝ်ႈႁႅင်း၊ ၵူၼ်းမိူင်း 3,500 ပၢႆ လႆႈပၢႆႈယၢၼ် ႁိူၼ်းယေးတီႈယူႇ၊ ပိုင်ႈဢိင် ယူႇသဝ်းၸွမ်းဝတ်ႉမုၼ်ၸဝ်ႈ ၸိူဝ်းၼႆႉ။ ၼႂ်းၼၼ်ႉ ပဵၼ်လုၵ်ႈဢွၼ်ႇ၊ ၼၢင်းယိင်း၊ ၵူၼ်းထဝ်ႈ ၵမ်ႈၼမ်။
