မိူဝ်ႈၼႆႉ ဝၼ်းတီႈ 13 လိူၼ်မၢတ်ႉၶျ် တင်ႈတႄႇယၢမ်းၵၢင်ၼႂ်ၸဝ်ႉ သိုၵ်းၵဝ်ႈၵၢင်ႉ ပႂ်ႉၵူတ်ႇထတ်း ရူတ်ႉၵႃး ၵူႈသႅၼ်းသႅၼ်း ၸိူဝ်းလတ်းၶဝ်ႈၵႂႃႇၼႂ်းဝဵင်းသႅၼ်ဝီ တီႈတၢင်းၶဝ်ႈဝဵင်း ႁိမ်းၶူဝ်လူင်ၶၢမ်ႈၼမ်ႉတူႈၼၼ်ႉလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ လႄႈ ၸဝ်ႈရူတ်ႉၵႃးၸိူဝ်းဢွၵ်ႇၶၢဝ်းတၢင်းၵႂႃႇ လႃႈသဵဝ်ႈ၊ ၵူတ်ႉၶၢႆ၊ မူႇၸေႊ၊ လၢဝ်ႇၵၢႆး (ၵၢတ်ႇၵဝ်ႇ) ၸိူဝ်းၼႆႉ ႁူပ်ႉတၢင်းယၢပ်ႇ ။

ၵူၼ်းမိူင်းပိုၼ်ႉတီႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “တီႈတၢင်းၶဝ်ႈဝဵင်းၼႆႉ ၶဝ်ဢမ်ႇမႃးပႂ်ႉထတ်းၼႆႉ ၸမ်မီးမွၵ်ႈ 1 ဝူင်ႈယဝ်ႉ။ မိူဝ်ႈၼႆႉ (13/3/2026) ၵၢင်ၼႂ်ၸဝ်ႉ ၽိူဝ်ႇႁဝ်း ၵႂႃႇၵၢတ်ႇ ၵိုင်ႉၵၢင်ႉႁၼ်ၶဝ်ပႂ်ႉဝႆႉ ထတ်း ဝႂ်လၢႆႊသိၼ်ႊ ဢၼ်ၶဝ်ႁဵတ်းဢွၵ်ႇဝႆႉပၼ်ၼၼ်ႉ။ ထႅဝ်ၵႃးမၼ်းယၢဝ်းႁႅင်းၼႃႇ တႃႇလတ်းၶဝ်ႈၵႂႃႇၼႂ်း ဝဵင်းလႆႈၼႆႉ လႆႈပႂ်ႉႁိုင်ပဵၼ် 2-3 ၸူဝ်ႈမူင်း။ ၼႂ်ၼႆႉၾူၼ်ၵေႃႈတူၵ်း ၶဝ်ၵေႃႈ သႂ်ႇသိူဝ်ႈၽႃႈယၢင်ႁႄ ပႂ်ႉထတ်း ။ မိူဝ်ႈဝၼ်းပုၼ်ႉတႄႉ ၶဝ်ဝႃႈႁင်းသိုၵ်းမၢၼ်ႈ၊ ၵမ်းၼႆႉတႄႉ တၢမ်တူဝ်ၶဝ် ၶိုၼ်းႁဵတ်းႁႂ်ႈၵူၼ်း မိူင်းလႆႈႁူပ်ႉ တၢင်းယၢပ်ႇၸွမ်းၶဝ်” ဝႃႈၼႆ။

တင်ႈတႄႇသိုၵ်းတဢၢင်း တင်း သိုၵ်းၵဝ်ႈၵၢင်ႉ ၽိတ်းမေႃး ပေႃႉထုပ်ႉ လိုပ်ႈလမ်းၵၼ်မႃး သိုၵ်းၵဝ်ႈၵၢင်ႉ ၸိူဝ်းတူင်ႉၼိုင်ယူႇသဝ်းပၼ်ႇၵၢၼ် ၽွင်းငမ်း ယူႇၼႂ်းၸႄႈဝဵင်းသႅၼ်ဝီ တင်ႈၵဵတ်ႉလၢၼ်ႇ ၽိူမ်ႉၼမ်မႃးႁႅင်း လိူဝ်ၵဝ်ႇသေ ပႂ်ႉၵူတ်ႇထတ်း ၵူၼ်းၶဝ်ႈၵူၼ်းဢွၵ်ႇ လႄႈ ဝႂ်လၢႆႇၸိၼ်ႇရူတ်ႉၵႃး ၼိူဝ်သဵၼ်ႈတၢင်းလူင်ႁၢႆးဝေး သႅၼ်ဝီ-ၵူတ်ႉၶၢႆ ၼႆယဝ်ႉ။

ဝၢႆးလင်မႃး ပၼ်ႁႃသိုၵ်းတင်းသွင်ၸုမ်း ဢမ်ႇလူတ်းယွမ်းလူင်းၵႂႃႇသေ ယိုင်ႈဝၼ်းႁိုင် ၵူၼ်းသိုၵ်းတင်းသွင် ၸုမ်း ၸိူဝ်းယူႇၼႂ်းပိုၼ်ႉတီႈ ၶဵင်ႈၶႅင်ၵၢၼ်သိုၵ်းတေႃႇၵၼ်ဢမ်ႇထၢတ်ႇလႄႈ ၾၢႆႇသိုၵ်းၵဝ်ႈၵၢင်ႉ သိုပ်ႇဢိုတ်း ႁေႉႁၢမ်ႈ ၵၢၼ်တေႃႉၶူဝ်းၵုၼ်ႇ လုၵ်ႉတၢင်းဝဵင်းသႅၼ်ဝီ ၶိုၼ်ႈၵႂႃႇတၢင်းဝဵင်းၵူတ်ႉၶၢႆ သဵၼ်ႈၼိုင်ႈ၊ လုၵ်ႉတၢင်း ဝဵင်းလႃႈသဵဝ်ႈ ၵႂႃႇတၢင်း ဝဵင်းၼမ်ႉတူႈသဵၼ်ႈၼိုင်ႈ ၼႆယဝ်ႉ။

ၵဵဝ်ႇလူၺ်ႈၵၢၼ်တေႃႉၶူဝ်းၵုၼ်ႇ လတ်းၸွမ်းၵဵတ်ႉလၢၼ်ႇ သိုၵ်းၵဝ်ႈၵၢင်ႉ ၼႂ်းၸႄႈဝဵင်းသႅၼ်ဝီၼၼ်ႉ ၸဝ်ႈရူတ်ႉၸဝ်ႈၵႃးၶဝ် လႆႈတၢင်ႇၵုၼ်ႇလတ်းၶၢမ်ႈၵဵတ်ႉၵႂႃႇ ဢေႇသုတ်း ၼိုင်ႈဝူင်ႈလႂ် ၼိုင်ႈပွၵ်ႈၵူၺ်း ႁၢၼ်ႉတေႃႇထိုင်ယၢမ်းလဵဝ်ၵေႃႈ သိုၵ်းၵဝ်ႈၵၢင်ႉၶဝ် ပႆႇပၼ်ရူတ်ႉၵႃးတၢင်ႇၵုၼ်ႇ လတ်းၽၢၼ်ႇၵႂႃႇလွတ်ႈ လႅဝ်းၶိုၼ်းမိူၼ်ၵဝ်ႇၼႆ – ၵူၼ်းမိူင်းၸဝ်ႈရူတ်ႉၵႃးၼႂ်းပိုၼ်ႉတီႈၵေႃႉတၢင်ႇၶူဝ်းၵုၼ်ႇလုၵ်ႉတၢင်းဝဵင်းသႅၼ်ဝီ ၵႂႃႇဝဵင်းၵူတ်ႉၶၢႆလၢတ်ႈ။

ရူတ်ႉၵႃးတၢင်ႇၶူဝ်းၵုၼ်ႇ ၸိူဝ်းၵိုတ်းၶင်ႉၶမ်ဝႆႉ ၵႄႈၵၢင်ဝဵင်းလႃႈသဵဝ်ႈ- ဝဵင်းၼမ်ႉတူႈ တီႈၶူဝ်ဢီႇၼၢႆးၼၼ်ႉတႄႉ ၾၢႆႇသိုၵ်းၵဝ်ႈၵၢင်ႉ တႄႇပၼ်လတ်းၶၢမ်ႈပူၼ်ႉၵႂႃႇ မိူဝ်ႈၼႆႉ (13/3/ 2026) ၶိုၼ်းယဝ်ႉၼႆ ႁွင်ႈၵၢၼ်သိုဝ်ႇၶၢဝ်ႇတဢၢင်း လႄႈ ၵူၼ်းၸမ်ၸႂ်ၵၼ်တင်းသိုၵ်းတဢၢင်း တႅမ်ႈတၢင်ႇပိုၼ်ၽၢဝ်ႇဝႆႉၼိူဝ်သိုဝ်ႇတူင်ႇဝူင်းၵူၼ်းဝႆႉ။

လႆႈႁူႉဝႃႈ သိုၵ်းၵဝ်ႈၵၢင်ႉၶဝ် ႁေႉႁၢမ်ႈဢမ်ႇပၼ်ၸဝ်ႈရူတ်ႉၸဝ်ႈၵႃးၶဝ် တေႃႉၶူဝ်းၵုၼ်ႇ ၶိူင်ႈၵေႃႇသၢင်ႈႁိူၼ်း၊ ၶိူင်ႈၸႂ်ႉၶူဝ်းသွႆၵူႈလွင်ႈလွင်ႈ ဢၼ်ၵူၼ်းမိူင်းလူဝ်ႇၸႂ်ႉတိုဝ်း၊ ၶိူင်ႈၾႆး ၾႃႉ လႄႈ ၵုၼ်ႇၵိၼ်ယႅမ်ႉ မိူၼ်ၼင်ႇ ၶဝ်ႈသၢၼ်၊ ၼမ်ႉမၼ်းၵိၼ် လႄႈ ၼမ်ႉမၼ်းၸၢၵ်ႈၸဵမ်ၸိူဝ်းၼႆႉ ၼႆယဝ်ႉ။

ယွၼ်ႉသိုၵ်းၵဝ်ႈၵၢင်ႉ တင်း သိုၵ်းတဢၢင်း ပဵၼ်ပၼ်ႁႃၵၼ်သေ ၵူၼ်းမိူင်း ၸဝ်ႈၵႃႉၶူဝ်းၵုၼ်ႇမိူင်းတႆးပွတ်းႁွင်ႇ ဢမ်ႇမီးသုၼ်ႇလႆႈ တေႃႉၶူဝ်းၵုၼ်ႇ ၵႃႉၶၢႆ လွတ်ႈလွတ်ႈလႅဝ်းလႅဝ်းလႄႈ ႁဵတ်းႁႂ်ႈၵႃႈၶၼ်ၼမ်ႉမၼ်း၊ ၵႃႈၶၼ်ၵုၼ်ႇၵိၼ်ယႅမ်ႉ ၵိုင်ႉၵၢင်ႉပုင်ႈၶိုၼ်ႈၵႂႃႇလိူဝ်ၵဝ်ႇ ၼႆယဝ်ႉ။

ၼင်ႇႁိုဝ်တေၵႄႈလိတ်ႈလႆႈ ပၼ်ႁႃၵူၼ်းသိုၵ်းတင်းသွင်ၸုမ်း ၽိတ်းမေႃးပေႃႉထုပ်ႉလိုပ်ႈလမ်းၵၼ်ၼၼ်ႉ ၾၢႆႇသိုၵ်းတဢၢင်း တႅမ်ႈလိၵ်ႈယိုၼ်ႈထိုင်ၵႂႃႇတီႈ ၽူႈၼမ်းၸုမ်းသိုၵ်း ၵဝ်ႈၵၢင်ႉ MNDAA ၵူၺ်းဢမ်ႇၵႃး သူင်ႇထိုင်ပႃးတီႈ ႁူဝ်ပဝ်ႈၸုမ်းသိုၵ်းဢူၺ်းလီပွတ်းႁွင်ႇ FPNCC ၊ ယိုၼ်ႈၵႂႃႇထိုင်ပႃးတီႈ လူင်ပွင်ၸိုင်ႈမိူင်းၶႄႇ ႁႂ်ႈၶဝ်ႈၵၢင် ၸွႆႈၵႄႈလိတ်ႈပၼ်ၼႆသေတႃႉ ဢမ်ႇဢွင်ႇမၢၼ်မႃး။

လိူဝ်ၼၼ်ႉ တႄႇႁူဝ်လိူၼ်မၢတ်ႉၶျ်ၼႆႉမႃး သိုၵ်းမိူင်းဢမေႇရိၵၼ်ႇ တင်း သိုၵ်းမိူင်းဢီႇရၼ်ႇၵေႃႈ ယိုဝ်းၵၼ်ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇယဝ်ႉတူဝ်ႈ၊ ပႆႇယဵၼ် တိုၵ်ႉ ၶဵင်ႈၶႅင် တိုၵ်းၵၼ်ယူႇဢမ်ႇထၢတ်ႇလႄႈ ႁဵတ်းႁႂ်ႈၶၼ်ၼမ်ႉမၼ်းမဵၼ်လုမ်ႈၾႃႉ ပုင်ႈၶိုၼ်ႈသုင်ႁႅင်း၊ ထိုင်တီႈ ၼမ်ႉမၼ်းၸၢၵ်ႈၸမ်ၶၢတ်ႇ ၵူၼ်းမိူင်းၵူႈတီႈၼႂ်းလုမ်ႈၾႃႉ ႁူပ်ႉပၼ်ႁႃယူႇႁၢဝ်ႈႁႅင်း ၼႆယဝ်ႉ။