ပီၼႆႉ ၸဝ်ႈၼႃးထုင်ႉပူင်း ဢမ်ႇမီးတိုၼ်းလၢင်း တႃႇၽုၵ်ႇသွမ်ႈလႄႈ လႆႈပွႆႇတူင်ႈၼႃး 3 ႁဵင် ဢေႊၶိူဝ်ႊႁၢမ်းလၢႆ ၼႆယဝ်ႉ ။

ၵူႈပီပီၼႆႉ  ပေႃးထိုင်ၶၢဝ်းႁူဝ်လိူၼ်မတ်ႉၶျ် ပဵၼ်ၽွင်းၸဝ်ႈၼႃးၼႂ်းထုင်ႉပူင်း တႄႇၽုၵ်ႇ ၶဝ်ႈၼွင် ယဝ်ႉဝႃႈၼႆသေတႃႉ ယွၼ်ႉဢမ်ႇမီးတိုၼ်းလၢင်း ဢမ်ႇမီးၵူၼ်းႁဵတ်းၵၢၼ်လႄႈ ၸဝ်ႈၼႃး ၵမ်ႈၼမ် လႆႈပွႆႇၼႃးၸဝ်ႈၵဝ်ႇႁၢမ်းလၢႆတင်းၼမ်ဝႃႈၼႆ  ။

ၸဝ်ႈၼႃးထုင်ႉပူင်းၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ ပီၼႆႉ ၼႃးၼႆႉႁၢမ်းၵႂႃႇၼမ်ၼႃႇ ၊ ပေႃးၼပ်ႉတူၺ်းၼႆႉ ၼႃးဢၼ်ပွႆႇႁၢမ်းလၢႆလၢႆၼႆႉ မီးမွၵ်ႈ သၢမ်ႁဵင် ဢေႊၶိူဝ်ႊပၢႆ  လီ သေးလၢႆၼႃႇ” – ဝႃႈၼႆ ။

ဢၼ်လႆႈ ပွႆႇတူင်ႈၼႃးႁၢမ်းပႅတ်ႈလၢႆလၢႆၼႆႉၵေႃႈ ပဵၼ်ယွၼ်ႉ ၸဝ်ႈၼႃး သုမ်းတိုၼ်းလၢင်း ဢမ်ႇလႆႈၼမ်ႉမျၢတ်ႈၼမ်ႉတွၼ်း တင်ႈတႄႇၺႃးၼမ်ႉၼွင်းထူမ်ႈႁၢဝ်ႈႁႅင်းပီ 2024 မႃး ။ ၾၢႆႇၼိုင်ႈတၢင်းၼိုင်ႈၵေႃႈ ယွၼ်ႉၼမ်ႉၼွင်းထူမ်ႈၵႂႃႇ သွင်ပီယဝ်ႉလႄႈ ႁွင်ႈၼမ်ႉမိူင်ၼမ်ႉ ပဵၼ်ၶႅၵ်ႉပဵၼ်ယုၵ်းယၢၵ်းၶၢင်ႉၶမ်တဵမ်ထိုင်တီႈၽဵဝ်ႈဢမ်ႇၶိုတ်းတၼ်း။ ၸဝ်ႈၼႃးလႆႈၵႂႃႇႁႃ ႁဵတ်းၵၢၼ်ႁႃၵိၼ်လဵင်ႉတွင်ႉဝၼ်းလႂ်ဝၼ်းၼၼ်ႉ။

ယၢမ်းလဵဝ်တီႈၼႂ်းထုင်ႉပူင်း ပဵၼ်ၽွင်း ဢဝ်ထူဝ်ႇလႅင် ၊ ဢဝ်ၽၵ်းမီႇၶၢဝ် ၊ ၽုၵ်ႈၶဝ်ႈယဝ်ႉလႄႈ ၸဝ်ႈၼႃးဢွၼ်ၵၼ်ၵႂႃႇၵိၼ်ၸၢင်ႈ ဝၼ်းလႂ်ဝၼ်းၼၼ်ႉ ။ ၵႃႈႁႅင်းၼႂ်းထုင်ႉပူင်းၼႆႉ ၼၢင်းယိင်း လႆႈၼိုင်ႈဝၼ်း 15000 ပျႃး ၊ ၵူၼ်းၸၢႆးလႆႈ 20000 ပျႃး၊ ယွၼ်ႉၵူၼ်းဢမ်ႇၵုမ်ႇၵၼ်လႄႈ ၵမ်ႈၽွင်ႈ ၵိၼ်ၸၢင်ႈႁဵတ်းတႃႇသွင်ၵေႃႉ ၸိူဝ်းၼႆႉၵေႃႈမီး – ၸဝ်ႈၼႃးထုင်ႉပူင်းလၢတ်ႈ ။

လိူဝ်ၼၼ်ႉ  မီးတိုၼ်းလၢင်းတႃႇၽုၵ်ႇသွမ်ႈ ႁဵတ်းၶိုၼ်းယူႇသေတႃႉ ဢမ်ႇမီးၵူၼ်းတေႁဵတ်း ပဵၼ်ယွၼ်ႉဢမ်ႇမီးႁႅင်းၵူၼ်း ၊ ၵူၼ်းၼုမ်ႇပၢႆႈဢွၵ်ႇတၢင်ႇတီႈတၢင်ႇဝဵင်းတင်းၼမ် ၼႆယဝ်ႉ ။

ယၢမ်းလဵဝ် လိူဝ်သေ ၵူၼ်းမိူင်းဢမ်ႇၸၢင်ႈႁဵတ်းၵၢၼ် ႁႃၵိၼ်လဵင်ႉတွင်ႉယဝ်ႉ ၵူၼ်းပိုၼ်ႉ တီႈ  လႆႈသႂ်ႇငိုၼ်း တႃႇၵမ်ႉထႅမ် ၵူၼ်းၵႂႃႇႁၢပ်ႇၵၢၼ်သိုၵ်း 1 မိုၼ်ႇ ထိုင် 3 မိုၼ်ႇပျႃး ၵူႈလိူၼ် ။ လိူဝ်ၼၼ်ႉဢမ်ႇၵႃး တႃႇၵမ်ႉထႅမ် ပျီႇတူႉၸိတ်ႉ PNO ၵေႃႈ လႆႈပၼ်ငိုၼ်း 6 လိူၼ်ၼိုင်ႈ ပွၵ်ႈ။  ၼိုင်ႈပွၵ်ႈ 1 မိုၼ်ႇပျႃးထႅင်ႈ သင် ဢမ်ႇသႂ်ႇငိုၼ်းလွၵ်ႇငိုတ်ႈလၢတ်ႈဝႃႈ တေသူင်ႇၾိုၵ်း ၵၢၼ်သိုၵ်း ၼႆလႄႈ ႁဵတ်းႁႂ်ႈၵူၼ်းပၢၼ်ၵၢင်ၼႂ်းပိုၼ်ႉတီႈ ပၢႆႈဢွၵ်ႇႁဵတ်းၵၢၼ်တၢင်ႇတီႈ တၢင်ႇမိူင်းတၢင်းၼမ် ၼႆယဝ်ႉ ။

ၵူၼ်းၸၢႆးဢႃယု 50 ပီလၢတ်ႈၽူႈတွႆႇႁွၵ်ႈဝႃႈ -“ၼိုင်ႈလိူၼ်ၼႆႉဢၼ်လႆႈပၼ်ငိုၼ်းၼႆႉ မီးမွၵ်ႈ 4 မိုၼ်ႇၼႆႉဢေႃႈ ၊ သိုၵ်းမၢၼ်ႈၵေႃႈလႆႈပၼ် ပျီႇတူႉၸိတ်ႉပဢူဝ်းၵေႃႈလႆႈပၼ် ၊ ပေႃးပဵၼ်ပွႆးပဵၼ်လၢမ်းၼႆႉလႆႈသႂ်ႇထႅင်ႈ ၊လႆႈႁႃငိုၼ်းပၼ်ၶဝ်တိၵ်းတိၵ်း ၊ ၵမ်ႈၽွင်ႈၼႆႉ ဢမ်ႇပၼ်လႆႈၶႃႈ ယွၼ်ႉၼၼ် တလဵဝ်ၼႂ်းဝၢၼ်ႈတေမီးလုၵ်ႈဢွၼ်လဵၵ်ႉၼွႆႉသေ ၵူၼ်းထဝ်ႈၵူၼ်းၵေႇ ဢၼ်ဢမ်ႇၵႂႃႇလႂ်လႆႈ  ဢၼ်ဢမ်ႇႁဵတ်းသူၼ်ႁဵတ်းၼႃးလႆႈၼၼ်ႉၵူၺ်းယဝ်ႉပၢႆႈမူတ်းယဝ်ႉ”- ဝႃႈၼႆ ။

ၼႃးဢၼ်လႆႈပွႆႇႁၢမ်းၵႂႃႇတီႈၼႂ်းထုင်ႉပူင်းၼၼ်ႉ ပဵၼ်ၼႃးဢၼ်မီးၼႂ်းဝၢၼ်ႈ ဝၢၼ်ႈပၢင်လူၼ်ႇ ၊  ဝၢၼ်ႈၼွင်ၸၢင်ႉ ၊ ဝၢၼ်ႈသၢႆလေး ၊ ၵုင်းလၢင်း ။ ပေႃးပွႆႇတိူၵ်ႇႁႆႈလွၵ်းၼႃး ႁၢမ်း ဢမ်ႇၽုၵ်ႇသွမ်ႈ ထိုင်3 ပီၼႆႉ သိုၵ်းမၢၼ်ႈၸၢင်ႈ ယိုတ်းဢဝ်လၢႆလႄႈ ႁဵတ်းႁႂ်ႈ ၸဝ်ႈသူၼ်ၼႃး မႆႈၸႂ်ဝႆႉပႃးလွင်ႈၼႆႉ – ၵူၼ်းပိုၼ်ႉတီႈလၢတ်ႈ ။

ဢိင်ၼိူဝ် လွင်ႈၼမ်ႉထူမ်ႈ ၼႂ်းထုင်ႉပူင်း ႁၢဝ်ႈႁႅင်း ၸိူင်ႉၼႆၼႆႉ ယၢမ်းမီးမႃး 4 ပွၵ်ႈ ၼႆယဝ်ႉ။ မိူဝ်ႈပီ 2011 ၼၼ်ႉ ပွၵ်ႈ ၼိုင်ႈ။ ပီ 2021  ၼၼ်ႉ ပွၵ်ႈၼိုင်ႈလႄႈ ပီ 2024 လႄႈ 2025 ၼႆႉ ပွၵ်ႈၼိုင်ႈ။ ၼႂ်းၶၢဝ်းတၢင်း သွင်ပီ 2024-2025 ၼႆႉ ပဵၼ်ပီဢၼ်ၼမ်ႉထူမ်ႈ လိူဝ်ႁႅင်းသုတ်း ။ သူၼ်ႁႆႈၼႃး 7 ႁဵင်ပၢႆ ဢၼ်မီးၼႂ်းထုင်ႉပူင်းၼၼ်ႉ 3 ႁဵင်ပၢႆ ထုၵ်ႇၼမ်ႉထူမ်ႈၼမ်ႉၼွင်း ထိုင်ဝၼ်းမိူဝ်ႈၼႆႉ ပႂ်ႇၸၢင်ႈပူၵ်းပွင်ၶိုၼ်း ၼႆယဝ်ႉ ။