ပီၼႆႉ ၸဝ်ႈၼႃးၼႂ်းထုင်ႉပူင်း ၸိုင်ႈတႆးပွတ်းၸၢၼ်း ယၢပ်ႇၽိုတ်ႇငိုၼ်းတိုၼ်းလၢင်းလႄႈ ထိုင်လႆႈပွႆႇၼႃးႁၢမ်းပႅတ်ႈတင်းၼမ်- ၵူၼ်းထုင်ႉပူင်းလၢတ်ႈၼင်ႇၼႆ။

တင်ႈတႄႇၺႃးၼမ်ႉၼွင်းထူမ်ႈႁၢဝ်ႈႁႅင်းပီၵၢႆ  2024 ယဝ်ႉမႃးၼၼ်ႉသေ ၸဝ်ႈၼႃးထုင်ႉပူင်း သုမ်းတိုၼ်းလၢင်းတင်းၼမ် ၼမ်ႉၼွင်းထူမ်ႈတူင်ႈၼႃး ၼပ်ႉႁူဝ်ႁဵင်ဢေႊၶိူဝ်ႊ။  

ၾၢႆႇသိုၵ်းမၢၼ်ႈပိုၼ်ၽၢဝ်ႇဝႃႈ တေၸွႆႈထႅမ်ပၼ်ၶိုၼ်းတွၼ်ႈတႃႇၸဝ်ႈၼႃးထုင်ႉပူင်း ၼိုင်ႈဢေႊၶိူဝ်ႊ 1 သႅၼ်ပျႃးဝႃႈၼႆသေတႃႉ ထိုင်မႃးၶၢဝ်းတၢင်းပီပၢႆထိုင်ဝၼ်းမိူဝ်ႈၼႆႉၵေႃႈ ၵမ်ႈၽွင်ႈၵမ်ႈၼမ်ယင်းပႆႇလႆႈ။

 ၸဝ်ႈၼႃးထုင်ႉပူင်းၵေႃႉၼိုင်ႈလၢတ်ႈဝႃႈ  ထိုင်မႃး ၼႂ်းလိူၼ် ၵျႃၼ်ႊ ပီ 2025 ၼႆႉ ၵၢင်ႉၵႄႇၸင်ႇ တႄႇၸႅၵ်ႇပၼ်ငိုၼ်းၵႂႃႇၵမ်းဢိတ်းဢိတ်း။ ၸဝ်ႈၼႃးၼႂ်းဢိူင်ႇ ဢတူင်းတေႃႇ တႄႉ လႆႈငိုၼ်းၸွႆႈတဵမ် 1 သႅၼ်ပျႃးယူႇသေတႃႉ ၸဝ်ႈၼႃးၼႂ်းဢိူင်ႇထုင်ႉပူင်း လႆႈ 3 မိုၼ်ႇပျႃး၊ ၼႂ်းဢိူင်ႇဝၢၼ်ႈယဵၼ်ႇ လႆႈ 6 မိုၼ်ႇပျႃးၵူၺ်း ဝႃႈၼႆ။

“ မၼ်းပိူင်ႈၵႂႃႇၸိူင်ႉႁိုဝ်လႄႈ ဢမ်ႇလႆႈၽဵင်ႇၵၼ်ဢမ်ႇႁူႉ ၊ မၼ်းတူၵ်းႁူင်ႈ တူၵ်းႁၢႆၵႂႃႇတီႈလႂ်ၵေႃႈ ဢမ်ႇလႆႈႁူႉ ၊ မိူဝ်ႈတၢင်ႇတႄႉဢဝ်ၸိုဝ်ႈၵူၼ်းမိူင်းတၢင်ႇၵႂႃႇသေ ၽိူဝ်ႇလႆႈငိုၼ်းမႃး ၵူၼ်းမိူင်းသမ်ႉ ဢမ်ႇလႆႈတဵမ် ၼႆႉပဵၼ်လွင်ႈႁဵတ်းၵိၼ်ၵူၺ်း ၊ ၼိုင်ႈသႅၼ်ၼႆႉ လႆႈသၢမ်မိုၼ်ႇၵူၺ်းဝႃႇ။ မၼ်းႁၢင်ႈၸႃႉၼႃႇ 7 မိုၼ်ႇၼႆႉႁၢႆၵႂႃႇတၢင်းလႂ် ဢမ်ႇႁူႉ ၊ ၵူၼ်းပိုၼ်ႉတီႈ ယၢပ်ႇၽိုတ်ႇလၢႆလွင်ႈ မီးၵူၼ်းမႃးၵမ်ႉၸွႆႈၵေႃႈ ဢမ်ႇလႆႈတဵမ်”- ဝႃႈၼႆ ။

တူင်ႈၼႃးဢၼ်လႆႈလူႉသုမ်းၵႂႃႇ ၽွင်းၼမ်ႉထူမ်ႈ ၼႂ်းထုင်ႉပူင်း တင်းမူတ်း မီး 3000 ဢေႊၶိူဝ်ႊပၢႆ ။ ၼႃးမၢင်တူင်ႈ တီႈမီးတႅမ်ႇၸိူဝ်းၼၼ်ႉ ထိုင်ယၢမ်းလဵဝ် ၼမ်ႉဢမ်ႇယွမ်း/ႁႅင်ႈၶိုၼ်းတင်းသဵင်ႈ ၊ ၸဝ်ႈၼႃးဢမ်ႇမီးတိုၼ်းလၢင်း ဢမ်ႇၸၢင်ႈၽုၵ်ႇသွမ်ႈ လႆႈပွႆႇတူင်ႈၼႃးႁၢမ်းလၢႆ ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ဢမ်ႇမီးတိုၼ်းလၢင်းသိုပ်ႇႁဵတ်းလႄႈ လႆႈပွႆႇႁၢမ်းၼမ်ၼႃႇ  ၊ ပေႃးၽုၵ်ႇသွမ်ႈယဝ်ႉၵေႃႈ ၼမ်ႉထူမ်ႈ တိုၼ်းလၢင်းသုမ်းပႅတ်ႈၸိူင်ႉၼၼ် သွင်ပီယဝ်ႉ ၊ ၼႃးၼႆႉ ႁၢမ်းၵႂႃႇ ႁူဝ်ပၢၵ်ႇပႅတ်ႇသိပ်းယဝ်ႉ ၊ တလဵဝ်ၼႆႉ ပေႃးၵူၼ်း10 ၵေႃႉၼႆႉ တေႁဵတ်း ၼႃးမွၵ်ႈ 2 ၵေႃႉ ၵူၺ်းယဝ်ႉ ၊ ပေႃးမီး 100 ဢေႊၶိူဝ်ႊၼႆႉၵေႃႈ ႁဵတ်း 20 ဢေႊၶိူဝ်ႊ ၸိူဝ်းၼႆႉၵူၺ်းယဝ်ႉ ဢမ်ႇၸၢင်ႈႁဵတ်းၵိၼ်ၵၢၼ်သင်ယဝ်ႉ” ၵမ်းၼႆႉ ။

တူင်ႈၼႃးဢၼ် လႆႈပွႆႇႁၢမ်းဝႆႉလၢႆလၢႆၼၼ်ႉ ပဵၼ်တၢင်း ဝၢၼ်ႈပၢင်လူၼ်ႇ ၊  ဝၢၼ်ႈၼွင်ၸၢင်ႉ ၊ ဝၢၼ်ႈသၢႆလေး ၊ ၵုင်းလၢင်း ။ ပေႃးပွႆႇတိူၵ်ႇႁႆႈလွၵ်းၼႃး ႁၢမ်း ဢမ်ႇၽုၵ်ႇသွမ်ႈ ထိုင်3 ပီၼႆႉ သိုၵ်းမၢၼ်ႈၸၢင်ႈ ယိုတ်းဢဝ်လၢႆလႄႈ ႁဵတ်းႁႂ်ႈ ၸဝ်ႈသူၼ်ၼႃး မႆႈၸႂ်ဝႆႉပႃးလွင်ႈၼႆႉ – ၵူၼ်းပိုၼ်ႉတီႈလၢတ်ႈ ။

ယၢမ်းလဵဝ် လိူဝ်သေ ၵူၼ်းမိူင်းဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉယဝ်ႉၵူၼ်းပိုၼ်ႉတီႈ  လႆႈသႂ်ႇငိုၼ်း တႃႇၵမ်ႉထႅမ် ၵူၼ်းၵႂႃႇႁၢပ်ႇၵၢၼ်သိုၵ်း 1 မိုၼ်ႇ ထိုင် 3 မိုၼ်ႇပျႃး ၵူႈလိူၼ် ။ လိူဝ်ၼၼ်ႉဢမ်ႇၵႃး တႃႇၵမ်ႉထႅမ် ပျီႇတူႉၸိတ်ႉ PNO ၵေႃႈ လႆႈပၼ်ငိုၼ်း 6 လိူၼ်ၼိုင်ႈပွၵ်ႈ။  ၼိုင်ႈပွၵ်ႈ 1 မိုၼ်ႇပျႃးထႅင်ႈ ႁဵတ်းႁႂ်ႈၵူၼ်းပိုၼ်ႉတီႈယူႇယၢပ်ႇၵိၼ်းၸႂ် ၼႆယဝ်ႉ ။