မိူင်းတႆးၼႆႉ ပဵၼ်မိူင်းဢၼ် လိၼ်ၸမ်ႉၼမ်ႉလီ ၽုၵ်ႇသင်ၵေႃႈ မၢၵ်ႇပူင်းႁူင်းၵွၼ်ႈၼႆ ၵူၼ်းမိူင်းတႆးပၢၼ်သိုပ်ႇပၢၼ် ယၢမ်ႈတႅမ်ႈပိုၼ်းဝႆႉ။ ယၢမ်းလဵဝ် ဢိင်ၼိူဝ် ၵၢၼ်မိူင်းၵၢၼ်သိုၵ်းယုင်ႈၵေႃႈပိူင်ၼိုင်ႈ ၊ ဢိင်ၼိူဝ်ၾိင်ႈၾႃႉရႃႇသီႇၵေႃႈ ပိူင်ၼိုင်ႈသေ ၸဝ်ႈႁႆႈၸဝ်ႈၼႃး ဢမ်ႇမိူၼ်ၼင်ႇၸႂ်ၶႂ်ႈပဵၼ် ႁဵတ်းဢမ်ႇပေႉ ၵိၼ်ဢမ်ႇပေႃး ။ မိူၼ်ၼင်ႇ တီႈဝဵင်းမိူင်းၼၢႆးၸိုင်ႈတႆးပွတ်းၸၢၼ်းၼႆႉ ၸဝ်ႈၼႃးၵိၼ်းၸႂ်ယွၼ်ႉလႆႈလူင်းတိုၼ်းလၢင်းၼမ် ၼမ်ႉမျၢတ်ႈၼမ်ႉတွၼ်းဢေႇ ။ ၾၢႆႇၵူၼ်းၵိၼ်ၸၢင်ႈၵေႃႈ ယွၼ်ႉဝၢၼ်ႈမိူင်းလူႉ ၶၼ်ၵုၼ်ႇသုင် လႄႈၶႂ်ႈႁဵတ်းၵၢၼ်ဢၼ်လႆႈငိုၼ်း လၢႆးဝၼ်းသုင် ။ ပၼ်ႁႃၸိူဝ်းၼႆႉ ပဵၼ်လွင်ႈၶွင်ႈၶမ်ႈလႄႈ လွင်ႈၶဵင်ႇတႃႉတႄႉတႄႉ။ ဢိင်ၼိူဝ်လွင်ႈၸိူဝ်းၼႆႉသေ ၸဝ်ႈၼႃး ၼႂ်းၸႄႈဝဵင်းမိူင်းၼၢႆး ၸိုင်ႈတႆးပွတ်းၸၢၼ်း ၸင်ႇႁွင်ႉထူပ်းဢုပ်ႇတူၵ်းလူင်းၵၼ် တမ်းပိူင် ၼႂ်းတွၼ်ႈႁဵတ်းၵၢၼ်ၽုၵ်ႇသွမ်ႈၼႃး  ။  

သိုၵ်းမၢၼ်ႈယိုတ်းမိူင်းလႄႈ  ပၢႆးမၢၵ်ႇမီးၸိုင်ႈမိူင်းတူၵ်းၵေႃႈပိူင်ၼိုင်ႈ ၾိင်ႈၾႃႉရႃႇသီႇဢမ်ႇလီသေ ၼမ်ႉထူမ်ႈၼမ်ႉၼွင်းၼႃႇဢႃးလႃးၵေႃႈပိူင်ၼိုင်ႈလႄႈ ၸဝ်ႈၼႃး ၼႂ်းမိူင်းၼၢႆး ဢွၼ်ၵၼ်ၵိၼ်းၸႂ် ၵွပ်ႈဢမ်ႇလႆႈတိုၼ်းလၢင်းၶိုၼ်းလၢႆပီယဝ်ႉ။

 ဝၼ်းတီႈ 21/10/2025 ၼႆႉ ၸဝ်ႈၼႃး မိူင်းၼၢႆး ႁူပ်ႉထူပ်းၵၼ် တီႈ ႁူင်းႁဵၼ်းပရႁိတတုမ်ႇမူဝ် ႁူဝ်ဝဵင်းမိူင်းၼၢႆး ။ ဢုပ်ႇၵုမ်ၵၼ် သပ်းလႅင်း  ၼႂ်းတွၼ်ႈၽုၵ်ႇသွမ်ႈ လႄႈ တႃႇၵိၼ်ၸၢင်ႈ  ႁႂ်ႈမီးပၵ်းမီးပိူင် ။ၽူႈၶဝ်ႈႁူမ်ႈ မီးၸမ် 400 ၵေႃႉ ။

ပိူင်လူင်ၵေႃႈ ဢုပ်ႇၵၼ်လွင်ႈ ၵႃႈၸၢင်ႈလၢႆးဝၼ်း ၊ ပိူင်ဢၼ်တေလႆႈမီးတေႃႇၵူၼ်းမႃးၵိၼ်ၸၢင်ႈလၢႆးဝၼ်း ၊ ၽွင်းႁဵတ်းၼႃးယူႇၼၼ်ႉၵေႃႈ ၸဝ်ႈၼႃးၼင်ႇၵၼ် တေလႆႈမေႃပိၼ်ႇပၢႆႇၸွႆႈထႅမ်ၵၼ် ႁႂ်ႈပဵၼ်ၽူႈႁူမ်ႈၽၢၵ်ႈ ဢၼ်လီတေႃႇၵၼ် ၼႆၸိူဝ်းၼႆႉ။

ၵႃႈၵွၼ်ႇပူၼ်ႉမႃး ၸဝ်ႈတူင်ႈၸဝ်ႈၼႃး ၼႂ်းမိူင်းၼၢႆး လႄႈ လၢႆဝဵင်းၼႂ်းမိူင်းတႆး ဢမ်ႇသူႈႁဵတ်းၸွမ်းပၵ်း ၸွမ်းပိူင် ၽဵၼ်ႈမၢၼ်ႇ ။

 ဢမ်ႇမီးပိူင်တၢႆဝႃႈ ႁဵတ်းၵၢၼ်ၶၢဝ်းလႂ် တေလႆႈၸၢင်ႈငိုၼ်းၵႃႈႁိုဝ်ၼႆၸိူဝ်းၼႆႉ ။ ၽႂ်မီးငိုၼ်းၸၢင်ႈၼမ်ၵေႃႈ ပၼ်ၼမ်။ ၽႂ်ဢမ်ႇပွင်ပဵၼ်လႆႈၵေႃႈ ႁႃၵူၼ်းၵိၼ်ၸၢင်ႈယၢပ်ႇ ။ ပေႃးႁႃၵူၼ်းယၢပ်ႇၵေႃႈ ဢွၼ်ၵၼ် လူတ်းယွမ်းၵၢၼ်ၽုၵ်ႇသွမ်ႈ ၸိူင်ႉၼႆမႃး  ။

မၢင်ၸိူဝ်းၵေႃႈ တင်ႈၸႂ်ပွႆႇၼႃးႁၢမ်းပႅတ်ႈလၢႆလၢႆၵေႃႈမီး ။ ဝၢႆးၼၼ်ႉ ဢၼ်တုမ်ႉတိူဝ်ႉထႅင်ႈၵေႃႈ သမ်ႉပဵၼ်ၸဝ်ႈၼႃး ဢၼ်ယၢမ်ႈပၼ်ငိုၼ်းၵႃႈၸၢင်ႈသုင် ၸိူဝ်းၼၼ်ႉၶိုၼ်း ။ ၵွပ်ႈဝႃႈ ၵူၼ်းၵိၼ်ၸၢင်ႈမၢင်ၸိူဝ်းၼႆႉ လႆႈသုင်ယဝ်ႉ ၶႂ်ႈသုင်ထႅင်ႈသေ ယႃႇဝႃႈၸဝ်ႈၼႃးတေလႆႈၼမ်ႉမျၢတ်ႈၶိုၵ်ႉ ၸၢင်ႈႁဵတ်းႁႂ်ႈၸဝ်ႈၼႃးသုမ်းတိုၼ်းလၢင်းလူးၵွၼ်ႇ ဝႃႈၼႆ။

ၸဝ်ႈၼႃးမၢင်ၸိူဝ်းၵေႃႈ မၢင်ႇၵိူဝ်းဝႃႈ ၶႂ်ႈယဝ်ႉၵၢၼ်ၸဝ်ႉၶႂ်ႈၸဵဝ်းယဝ်ႉလႄႈ ပၼ်ၵႃႈၸၢင်ႈၼမ် ၊ ၵူၼ်းႁႃၵိၼ်ၸၢင်ႈၵေႃႈ မၢင်ႇၵိူဝ်းလႆႈငိုၼ်းလၢႆးဝၼ်းၼမ်သေ ပႂ်ႉႁဵတ်းတီႈ ၸဝ်ႈၼႃးဢၼ်မီးငိုၼ်းပူင်ႇၼၼ်ႉၵူၺ်း ။ ဢၼ်ယၢပ်ႇသမ်ႉ ပဵၼ်ၸဝ်ႈၼႃးၸိူဝ်းဢမ်ႇပေႃးပွင်ပဵၼ်လႆႈ ၼႆ ၼၢင်းယိင်း ၵူၼ်းဝဵင်းမိူင်းၼၢႆး လၢတ်ႈၼႄဝႆႉၼင်ႇၼႆ –

တူပ်းမိုဝ်းၾၢႆႇလဵဝ် မၼ်းဢမ်ႇလင် မၢင်မဵဝ်းၼႆႉ။မၢင်ၸိူဝ်းသမ်ႉ ၸဝ်ႈႁႆႈၸဝ်ႈၼႃးၶဝ်ပဵၼ်လႆႈ ၶဝ်မီးၶိူင်ႈမၼ်းၸေး ၊ မၢၵ်ႇၶဝ်ႈတဝ်ႈၼမ်ႉၶဝ်ၵေႃႈၶႅမ်ႉၼႆလႄႈ ၶဝ်တေလၢတ်ႈဝႃႈ ဢိူဝ်ႈ မႃးႁဵတ်းမႃးဢဝ်ပၼ်ႁဝ်းႁႂ်ႈၶႅမ်ႉၶႅမ်ႉလႄႈ ႁဝ်းတေပၼ်သူႁမ်ႉၼမ် ၼႆၼၼ်ႉၼႃႇ ။ ၾၢႆႇၸဝ်ႈႁႆႈၸဝ်ႈၼႃးမၼ်းၵေႃႉယႃႉၶၼ်ၵႃႈၸၢင်ႈမၼ်းၵေႃႈ ၸၢင်ႈပဵၼ်လႆႈ ။ မၢင်ၸိူဝ်းၵေႃႈ ၾၢႆႇၵူၼ်းၵိၼ်ၸၢင်ႈယႃႉၶၼ်မၼ်းၵေႃႈ ၸၢင်ႈပဵၼ်လႆႈၼၼ်ႉၼႃႇ

ၸဝ်ႈၼႃးမၢင်ၵေႃႉ ၸၢင်ႈၵူၼ်းမႃးႁဵတ်းၵၢၼ် ပူၼ်ႉၶိင်ႇၶၢဝ်းမၼ်းၵေႃႈ ပႆႇပၼ်လိုဝ်ႈၵေႃႈမီး ။ လွင်ႈၸိူဝ်းၼႆႉ ပွၵ်ႈလဵဝ်ၵူၺ်းတႄႉ ဢမ်ႇပဵၼ်သင်သေတႃႉ ပေႃးႁိုင်ၵႂႃႇၶၢဝ်းယၢဝ်း ၵူၼ်းၵိၼ်ၸၢင်ႈလၢႆးဝၼ်းၵေႃႈ ၸၢင်ႈတုမ်ႉတိူဝ်ႉပူၼ်ႉပႅၼ်သုၼ်ႇလႆႈၵၼ် ။

ၼႂ်းၵႄႈၵူၼ်းၵိၼ်ၸၢင်ႈလႄႈ ၸဝ်ႈသူၼ်ၸဝ်ႈၼႃး ၼႆႉ  ယူႇတီႈတင်းသွင်ၾၢႆႇတူၵ်းလူင်းလႆႈၸႂ်ၵၼ်ၵူၺ်းလႄႈ  ဢမ်ႇမီးပၼ်ႁႃသင်ယဝ်ႉဝႃႈၼႆ သေတႃႉ ပေႃးဢမ်ႇမီးပၵ်းပိူင်တႅတ်ႈၼႅတ်ႈဝႆႉၸိုင် ၸၢင်ႈမီးပၼ်ႁႃၸွမ်းၸဝ်ႈႁႆႈၸဝ်ႈၼႃးတၢင်ႇၵေႃႉ ႁိုဝ်ဢမ်ႇၼၼ် ႁိုင်မႃး ၸၢင်ႈမီးပၼ်ႁႃ ၼႂ်းၵၢၼ်ႁဵတ်းတူင်ႈႁဵတ်းၼႃး ။

တႄႇၼႆႇၵႂႃႇ သင်ဝႃႈ ၵူၼ်းၵိၼ်ၸၢင်ႈ လူင်းႁဵတ်းၵၢၼ် 8 မူင်းၵၢင်ၼႂ်ၼႆ ပေႃးထိုင် 4 မူင်းႁူဝ်ၶမ်ႈၵေႃႈ ႁႂ်ႈပွႆႇလိုဝ်ႈ ၊ ၵူၼ်းၵိၼ်ၸၢင်ႈလႄႈ ၸဝ်ႈၼႃး ယႃႇႁႂ်ႈၵိၼ်ၸိၵ်းတွၵ်ႇၸွၵ်းၼိူဝ်ၵၼ် ၼႆ ၽူႈတူင်ႉၼိုင်ၼႂ်းၸုမ်းပွင်ၵၢၼ်ၸဝ်ႈႁႆႈၸဝ်ႈၼႃး ၸႄႈဝဵင်းမိူင်းၼၢႆး လၢတ်ႈၼႄဝႆႉၼင်ႇၼႆ –

 ၸဝ်ႈၼႃးၼႆႉ ဢမ်ႇဝႃႈ မိူင်းပိူၼ်ႈမိူင်းႁဝ်း ဢမ်ႇမီးပၵ်းပိူင်ၶႃႈၼေႈ။ၵူၼ်းႁဵတ်းၵၢၼ် ၼင်ႇၵၼ်ၵေႃႈ ဢမ်ႇမီးပၵ်းမီးပိူင် ၊ ၸဝ်ႈၼႃးၼင်ႇၵၼ်ၵေႃႈ ဢမ်ႇမီးပၵ်းမီးပိူင် ။ တႄႇဢဝ်ၽႄၼမ်ႉၵေႃႈ ဢမ်ႇမီးပၵ်းပိူင် ။ ဢၼ်ၼႆႉ ႁဝ်းၶႃႈ ဝူၼ်ႉႁၼ်ထိုင် လွၵ်းယွႆႈမၼ်း ။ လွင်ႈဢၼ် တေပဵၼ်လွင်ႈၶဵင်ႇတႃႉၸိူဝ်းၼႆႉ ႁဝ်းၶႃႈ မႃးဢဝ်ႁုပ်ႈၵၼ်သေ  ၶိုၼ်းမႃးတႅမ်ႈပဵၼ်ပၵ်းပိူင်ဝႆႉဢေႃႈ ။

ၼႂ်းပိူင် ဢၼ်တေဢဝ်မႃးတိုဝ်းၵမ်ဝႆႉတႄ လိူဝ်သေၵႃႈၸၢင်ႈလၢႆးဝၼ်းယဝ်ႉ မိူၼ်ၼင်ႇ တႃႇၵႄႈလိတ်ႈပၼ်ႁႃတူင်ႈၼႃးတိတ်းၸပ်းၵၼ် ၊ တႄႇဢဝ်လွင်ႈၸႅၵ်ႇၼမ်ႉလဵင်ႉၼႃး ၊ လွင်ႈတဵင်ၾၢႆၼမ်ႉၸိူဝ်းၼႆႉ။

ၼင်ႇႁိုဝ် ၸဝ်ႈၼႃး ပေႃးတေသိုပ်ႇပဵၼ် ၸဝ်ႈၼႃးၵႂႃႇ ၊  ၼင်ႇႁိုဝ် ၸဝ်ႈၼႃးၼင်ႇၵၼ် ပေႃးတေမီးၸႂ်ႁၵ်ႉသႃ တူၺ်းထိုင်လုမ်းလႃးတူင်ႈၼႃးၵႂႃႇၸွမ်းၵၼ်လႆႈ ။ ပေႃးၵုမ်ႇႁဵတ်းၽႂ်ႁဵတ်းမၼ်းသေ ဢမ်ႇမေႃတူၺ်းထိုင်ၵၼ် တႄႉ ၼႃးၼမ်ၵေႃႈ တေယဵၼ်းပဵၼ်ၼႃးဢေႇ ၊ ၼႃးဢေႇၵေႃႈ တေယဵၼ်းပဵၼ်ၼႃးႁၢမ်းယဝ်ႉ ဝႃႈၼႆ။

ဢၼ်ယူႇတီႈ ၸုမ်းပွင်ၵၢၼ်ၸဝ်ႈႁႆႈၸဝ်ႈၼႃး ၸႄႈဝဵင်းမိူင်းၼၢႆး ဢွၼ်ၼမ်းတမ်းပိူင်ၸိူဝ်းၼႆႉၵေႃႈ ဢမ်ႇၸႂ်ႈလွင်ႈငၢႆႈ ၊ ၸဝ်ႈၼႃးၵူႈၸဝ်ႈလႄႈ ၵူၼ်းႁဵတ်းၵၢၼ်ၵူႈၵေႃႉ ပၢႆးဝူၼ်ႉဢမ်ႇမိူၼ်ၵၼ် ။ ၼင်ႇႁိုဝ် ၾၢႆႇလႂ်ၵေႃႈ ပေႃးတေဢမ်ႇသႃႇဢမ်ႇၼႃႇၼၼ်ႉ လႆႈဝူၼ်ႉၽိူဝ်ႇပၼ် တင်းသွင်ၾၢႆႇ ၊ သင်ဝႃႈ တမ်းဝၢင်းၵႃႈၸၢင်ႈမၼ်းဝႆႉယဝ်ႉသေ သမ်ႉဢမ်ႇႁဵတ်းၸွမ်းၵေႃႈ တေဢဝ်တၢင်းၽိတ်း ဝႃႈၼႆ။

သင်ဝႃႈ ဢမ်ႇမီးပၵ်းမီးပိူင်သင်တိုဝ်းၵမ်ဝႆႉၸိုင် ၸဝ်ႈၼႃးၸိူဝ်းၼႆႉ တေႁဵတ်းၵၢၼ်ယၢပ်ႇ ၊ ၵမ်းလိုၼ်းတေဢမ်ႇမီးၽႂ်ၶႂ်ႈၽုၵ်ႇၶဝ်ႈ ၊ ၽူႈမၢၵ်ႈၵူၼ်းမီးၼႂ်းပိုၼ်ႉတီႈၵေႃႈ တေႁႃသိုဝ်ႉၵိၼ်ၶဝ်ႈယၢပ်ႇ ၊ ဢၼ်လိူဝ်ၼၼ်ႉၵေႃႈ ၵူၼ်းပိုၼ်ႉတီႈ ဢၼ်ႁႃၸဝ်ႉၵိၼ်ၶမ်ႈ တေဢမ်ႇမီးၵၢၼ်ႁဵတ်း ။

ၵွပ်ႈဝၢၼ်ႈမိူင်း ဢမ်ႇမီးပၵ်းမီးပိူင်လီလီ ဢၼ်ႁူမ်ႇငမ်းဝႆႉပၼ်လႄႈ လွင်ႈၵၢၼ်ၵႃႉၵၢၼ်ၶၢႆဢၼ်ၵဵဝ်ႇၶွင်ႈၸဝ်ႈၼႃးၵေႃႈ မီးလွင်ႈၶွင်ႈၶမ်မႃး ။ မိူၼ်ၼင်ႇ တီႈမိူင်းၼၢႆးၼႆႉ  ၵူၼ်းၵႃႉၵူၼ်းၶၢႆ မၢင်ၸိူဝ်းၵေႃႈ ဢဝ်ၶဝ်ႈတၢင်ႇတီႇတၢင်ႇလႅၼ် မႃးဝၢင်းၶၢႆၼႂ်းမိူင်းၼၢႆးလႄႈ ၸဝ်ႈၶဝ်ႈၸဝ်ႈၼႃး ၼႂ်းပိုၼ်ႉတီႈ ဢမ်ႇမီးလွၵ်းၵၢတ်ႇၵမ်းသိုဝ်ႈ တႃႇၶၢႆၶဝ်ႈ  ။

 ဝၢႆးၼႆႉတႄႉ တေဢမ်ႇႁႂ်ႈဢဝ်ၶဝ်ႈတၢင်ႇတီႈမႃးဝၢင်းၶၢႆသေ တေႁႂ်ႈပၼ်ႁႅင်းၸဝ်ႈၼႃးၼႂ်းပိုၼ်ႉတီႈၶိုၼ်းၵူၺ်းယဝ်ႉ ၼႆ –  ၽူႈတူင်ႉၼိုင်ၼႂ်းၸုမ်းပွင်ၵၢၼ်ၸဝ်ႈႁႆႈၸဝ်ႈၼႃး ၸႄႈဝဵင်းမိူင်းၼၢႆးသိုပ်ႇလၢတ်ႈ ။

ၸဝ်ႈၼႃးဝဵင်းမိူင်းၼၢႆး ဢွၼ်ၵၼ်ဢုပ်ႇဢူဝ်းၵၼ်သေ တူၵ်းလူင်းၵၼ်ဝႆႉဝႃႈ တေၶိုၼ်ႈၵႃႈလၢႆးဝၼ်းပၼ် ၵူၼ်းၵိၼ်ၸၢင်ႈၼႂ်းတူင်ႈၼႂ်းၼႃး တႃႇ 5000 ပျႃး ၊ တူဝ်ယၢင်ႇမၼ်း ၵၢၼ်ဢၼ်မိူဝ်ႈပီၵၢႆ ၼိုင်ႈဝၼ်းလႂ် 15000 ပျႃးၼၼ်ႉ တေၶိုၼ်ႈပဵၼ် 20000 ပျႃး။

သင်ဝၢၼ်ႈမိူင်းၵေႃႈၼိမ်သဝ်း ၊ ၶုၼ်မိူင်းၵေႃႈလီ ၵူၼ်းမိူင်းထၢင်ႇႁၢင်ႈလႆႈၸတ်းပွင်ၼႆတႄႉ ၸိူဝ်းပဵၼ်ၸဝ်ႈႁႆႈၸဝ်ႈၼႃး ပႃးၸဵမ် ၵူၼ်းၵိၼ်ၸၢင်ႈလၢႆးဝၼ်း ၊ ၵူၼ်းၵႃႉၶၢႆၶဝ်ႈ ၸိူဝ်းၼႆႉ  ၽူႈၵဵဝ်ႇၶွင်ႈၶဝ်  တေၸၢင်ႈတူၺ်းထိုင်ပၼ်လႆႈလီယူႇ ။ ၵူၺ်းၵႃႈ မိူဝ်ႈလဵဝ် ၵူၼ်းမိူင်း လႆႈဢဝ်တူဝ်လွတ်ႈႁင်းၵူၺ်းၼႆ ၵူၼ်းၼုမ်ႇမိူင်းၼၢႆးၵေႃႉၼိုင်ႈလၢတ်ႈ ။

ဝဵင်းမိူင်းၼၢႆးၼႆႉ ပဵၼ်ဝဵင်းဢၼ်မီးတူင်ႈၼႃးၼမ်သုတ်းထိသွင် ၼႂ်းမိူင်းတႆးပွတ်းၸၢၼ်း။ ၶဝ်ႈမိူင်းၼၢႆး လဵင်ႉလႆႈ ၵူၼ်းမိူင်းတႆးပွတ်းၸၢၼ်းတၢင်းထုင်ႉ။ ၵူၼ်းမိူင်းပိုၼ်ႉတီႈ  ၸႂ်ယႂ်ႇၵၢၼ်ၽုၵ်ႇသွမ်ႈသူၼ်ႁႆႈၼႃးပဵၼ်ပိူင်လူင်။ ၵူၺ်းၵႃႈ ၶၢဝ်းတၢင်းသၢမ်ပီမႃးၼႆႉ ၼမ်ႉထူမ်ႈတူင်ႈၼႃႈ၊ ၵႃႈၸၢင်ႈလၢႆးဝၼ်းသမ်ႉၵႃႈၶိုၼ်ႈ၊ ၶဝ်ႈသမ်ႉဢမ်ႇၶၢႆလီလႄႈ ၸဝ်ႈၼႃးၶဝ်ထူပ်းတင်းယၢပ်ႇလူႉသုမ်းတင်းၼမ် တူင်ႈၼႃးၵမ်ႈၽွင်ႈထိုင်တီႈ လႆႈပွႆႇႁၢမ်းလူးၵွၼ်ႇ ။