မိူင်းဢမေႊရိၵၼ်ႊ တင်း မိူင်းဢီႊရၼ်ႊ ယိုဝ်းၵၼ်မႃးႁိုင်ၶၢဝ်းတၢင်း 10 ဝၼ်းပၢႆယဝ်ႉလႄႈ သင်တေသိုပ်ႇပဵၼ်ၵႂႃႇႁိုင်လိူဝ်ၼၼ်ႉၸိုင် ၵၢၼ်ပၢႆးမၢၵ်ႈမီးလုမ်ႈၾႃႉ ၸၢင်ႈလူႉၵွႆ လႄႈ ႁၢႆႉၸႃႉႁႅင်းလိူဝ်ၼႆႉထႅင်ႈ ဝႃႈၼႆ။

မိူဝ်ႈဝၼ်းတီႈ 11 လိူၼ်မၢတ်ႉၶျ် ၽူႈၶၢၼ်ပၢၵ်ႇ သိုၵ်းမိူင်းဢီႊရၼ်ႊ ပၼ်ၾၢင်ႉ တူၵ်ႇတၵ်ႉထိုင် မိူင်းဢမႄႇရိၵၼ်ႇ ႁႂ်ႈႁၢင်ႈႁႅၼ်းတူဝ် ပႂ်ႉႁပ်ႉလွင်ႈၶဵင်ႇတႃႉလူင် ဢၼ်ၸၢင်ႈတုမ်ႉ တိူဝ်ႉပၢႆးမၢၵ်ႈမီးလုမ်ႈၾႃႉ ၼၼ်ႉ ၼႆယဝ်ႉ။

ၽူႈၶၢၼ်ပၢၵ်ႇ သိုၵ်းမိူင်းဢီႊရၼ်ႊ လၢတ်ႈဝႃႈ “ဢမေႊရိၵၼ်ႊ တႄႇယႃႉၵဝ်းႁႂ်ႈၸွမ်းၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ထိုင်တီႈလူႉၵွႆၵႂႃႇလႄႈ ၶၼ်ၼမ်ႉမၼ်းမဵၼ်ၼႆႉ ၸၢင်ႈ ၶိုင်ႈထိုင်ၵႂႃႇ ၼိုင်ႈပုင်း 200 တေႃႊလႃႊ။ ၵွပ်ႈၼၼ် ႁၢင်ႈႁႅၼ်းတူဝ်ပႂ်ႉယွမ်းႁပ်ႉႁႂ်ႈလႆႈၵူၺ်းလႃႈ” ဝႃႈၼႆ။

ၽူႈၵိူဝ်းၵုမ်တပ်ႉၸုမ်းလုၵ်ႉၽိုၼ်ႉမိူင်းဢီႊရၼ်ႊ (IRGC) ၵေႃႈ ထႅမ်လၢတ်ႈဝႃႈ – သင်ႁဵတ်းၼႆၵႂႃႇၶၢဝ်းႁိုင်တႄႉ ပၢင်တိုၵ်းၼႆႉ ၸၢင်ႈယႃႉလူႉၵွႆ ၵၢၼ်ပၢႆးမၢၵ်ႈမီးလုမ်ႈၾႃႉလႄႈ ဢမေႊရိၵၼ်ႊၵႂႃႇလႆႈတေႉတေႉယူႇၼႆ ထုၵ်ႇလီဝူၼ်ႉၶပ်ႉၼပ်ႉသွၼ်ႇပႃးဝႆႉ ၼႆယဝ်ႉ။

ယွၼ်ႉၾၢႆႇမိူင်းဢီႊရၼ်ႊ ပၼ်ၾၢင်ႉတူၵ်ႇတၵ်ႉဢွၵ်ႇမႃးၸိူင်ႉၼႆၵေႃႈပိူင်ၼိုင်ႈလႄႈ ယၢမ်းလဵဝ် ႁိူဝ်းသၢင်းၽေႃး ၸိူဝ်းတေႃႉၼမ်ႉမၼ်းမဵၼ် လႄႈ ၶူဝ်းၵုၼ်ႇၵူႈလွင်ႈလွင်ႈ ၵႂႃႇၸွမ်းသဵၼ်ႈတၢင်းၼမ်ႉ ၼၼ်ႉၵေႃႈ ၺႃးယိုဝ်းဝႆႉသေ ႁဵတ်းႁႂ်ႈတုမ်ႉတိူဝ်ႉထိုင် ၵၢၼ်ပၢႆးမၢၵ်ႈမီး ၵူႈၸိုင်ႈမိူင်း ၼႂ်းလုမ်ႈ ၾႃႉယူႇ။ ၶၼ်ၼမ်ႉမၼ်းမဵၼ်လုမ်ႈၾႃႉၵေႃႈ ၼိုင်ႈပုင်းလႂ် ၵိုင်ႉၵၢင်ႉ ၶိုၼ်ႈၵႂႃႇထိုင် 100 တေႃႊလႃႊပၢႆၸိူဝ်းၼႆႉလႄႈ လူင်ပွင်ၸိုင်ႈ ၵူႈၸိုင်ႈမိူင်း ဢွၼ်ၵၼ်မႆႈၸႂ်ၵူဝ်ပၢႆးမၢၵ်ႈမီးလုမ်ႈၾႃႉတူၵ်း ၼႆးထႅင်ႈယူႇ ၼႆယဝ်ႉ။

ပိူဝ်ႈတႃႇၵုမ်းၵႃႈၶၼ်ၼမ်ႉမၼ်းမဵၼ်လုမ်ႈၾႃႉလႆႈၼၼ်ႉ ယၢမ်းလဵဝ် မိူင်းဢမေႊရိၵၼ်ႊ၊ မိူင်းယူႊရူပ်ႊ လႄႈ ၸိုင်ႈမိူင်းဢေႊသျႃႊၶဝ် ဢွၼ်ၵၼ်ထူၵ်းဢွၵ်ႇၸႂ်ႉတိုဝ်း ၼမ်ႉမၼ်းမဵၼ်ဢၼ်ၵဵပ်းသိမ်းဝႆႉတႃႇၸႂ်ႉတိုဝ်းမိူဝ်ႈ ႁူပ်ႉၺႃးလွင်ႈၶိုၵ်ႉၶၵ်ႉၼၼ်ႉၵူၺ်းဢမ်ႇၵႃး ၶတ်းၸႂ်ငူပ်ႉငီႉပႃး ၸိုင်ႈမိူင်း ဢၼ်ႁဵတ်းဢွၵ်ႇၼမ်ႉမၼ်းမဵၼ်လႆႈၸိူဝ်း ၼၼ်ႉထႅင်ႈယူႇ ၼႆ ယဝ်ႉ။

ၼင်ႇႁိုဝ်ၵႃႈၶၼ်ၼမ်ႉမၼ်းမဵၼ်လုမ်ႈၾႃႉ တေလူတ်းလူင်းၵႂႃႇၼၼ်ႉ ၸိုင်ႈမိူင်းၵမ်ႈၼမ် ဢွၼ်ၵၼ်ၶတ်းၸႂ်ယူႇတေႉတေႉဝႃႈဝႃႈသေတႃႉ ၾၢႆႇတၢင်းမိူင်းဢီႊရၼ်ႊတႄႉ သိုပ်ႇလွၵ်ႇငိုတ်ႈဝႆႉယူႇၶိူဝ်းယႂ်းလႄႈ တႃႇၵႃႈၶၼ်ၼမ်ႉမၼ်းမဵၼ် တေလူတ်းလူင်းၵႂႃႇၼၼ်ႉ ဢမ်ႇပေႃးၸၢင်ႈႁၼ်သဵၼ်ႈ တၢင်းၼမ်ၵႃႈႁိုဝ်တေႉတေႉၼႆ ၽူႈသိုဝ်ႇၶၢဝ်ႇ မိူင်းၼွၵ်ႈၵမ်ႈၼမ် ဢွၼ်ၵၼ် ထတ်းသၢင်ဝႆႉၼင်ႇၼႆ။

လွင်ႈတၢင်းဢၼ်ႁဵတ်းႁႂ်ႈ ၶၼ်ၼမ်ႉမၼ်းမဵၼ် ပုင်ႈၶိုၼ်ႈသုင်ၵႂႃႇထိုင်လႆႈ ၼိုင်ႈပုင်း 200 တေႃႊလႃႊၼႆႉတႄႉ ယွၼ်ႉသိုၵ်းမိူင်းဢီႊရၼ်ႊ ယိူင်းပဝ်ႉမၢႆၸူး ႁူင်းၵေႃႇၵၢႆႇ ဢွင်ႈတီႈၵဵပ်းသိမ်းၼမ်ႉမၼ်းမဵၼ် လႄႈ ႁဵတ်းဢွၵ်ႇႁႅင်းၾႆးၾႃႉ ၸွမ်းၼႂ်းပိုၼ်ႉတီႈ ၸိူဝ်းၵဵဝ်ႇၵွင်ႉၼၼ်ႉယူႇ ၼႆယဝ်ႉ။

ၵၢၼ်တီႈၵႃႈၶၼ်ၼမ်ႉမၼ်းမဵၼ် ၶိုၼ်ႈႁႅင်းမႃးလိူဝ်ၵဝ်ႇ လၢႆပုၼ်ႈၼၼ်ႉ ၸၢင်ႈႁဵတ်းႁႂ်ႈတုမ်ႉယွၼ်ႈထိုင်ပႃး ၵႃႈၶၼ်ၶူဝ်းၵုၼ်ႇ လႄႈ ၵၢၼ်တေႃႉသူင်ႇၵူႈၸိုင်ႈမိူင်း ၼႂ်းလုမ်ႈၾႃႉ ႁူပ်ႉတၢင်းယၢပ်ႇၵိၼ်းယူႇ ၼႆယဝ်ႉ။