တႆးၼႆႉ ပဵၼ်တႆးၶိူဝ်းလူင် မီးၸွတ်ႇလူင်ၵႂႃႇၵူႈဝၢၼ်ႈၵူႈဝဵင်း ၸဵမ်ၼႂ်းမိူင်းၼွၵ်ႈမိူင်းၼႆ တႆးပၢၼ်သိုပ်ႇပၢၼ် ယၢမ်ႈလၢတ်ႈ ဢဝ်ၵုင်ႇမုၼ်မႃးတႃႇသေႇ။ ၵူၺ်းၵႃႈ ဢိင်ၼိူဝ် ငဝ်းလၢႆး ၵၢၼ်ဝၢၼ်ႈၵၢၼ်မိူင်းလႅၵ်ႈလၢႆႈသေ ဢမ်ႇမီးတိုဝ်ႉတၢင်း ၶွၼ်ႈတုမ်ၵၼ်လီလီ ။ ၽၢတ်ႇၽႄၵၼ်ၵႂႃႇၵူႈႁူးၵူႈတၢင်း။ ၵွပ်ႈၼႆလႄႈ ၾိင်ႈၵေႃႈ ပိူင်ႈၵၼ်ၵႂႃႇၸွမ်းဢွင်ႈတီႈၽႂ်မၼ်း ။

မိူၼ်ၼင်ႇ ပီႈၼွင်ႉၸၢဝ်းတႆးလႅင်ၵေႃႈ ပႂ်ႉပႃးၾိင်ႈထုင်းႁိတ်ႈႁွႆး လႄႈလွင်ႈယုမ်ႇယမ် ႁင်းၵူၺ်းမႃး ။ ဝႃႈၼၼ် သေတႃႉ ၸႂ်ႁၵ်ႉၶိူဝ်းတႆးတိုၵ်ႉတဵမ်ပၢၵ်ႇ ။ တိုၵ်ႉမၵ်းမၼ်ႈ ပဵၼ်ၶိူဝ်းလဵဝ်ၵၼ်တင်းတႆးၵူႈတီႈတီႈယူႇ ။ ဝၼ်းၸိူဝ်ႉၸၢတ်ႈတႆးလႅင် (ဢၼ်ၼႂ်းပိုၼ်းတႅမ်ႈဝႆႉဝႃႈ တႆးလႅင်း/ တႆးၼႆး) ပီၼႆႉၶွပ်ႈတဵမ်မႃး 499 ပီယဝ်ႉ၊ ဢၼ်ၼႆႉမၼ်းပႅၵ်ႇၵၼ်တင်းတႆးလူင်သေတႃႉ ဢမ်ႇၸႂ်ႈတႃႇၸႅၵ်ႇၼိူဝ်ႉလိူတ်ႈၵၼ် ၼႆ ၽူႈလဵပ်ႈႁဵၼ်း ပိုၼ်းတႆးလႅင်ၵေႃႉၼိုင်ႈလၢတ်ႈၼင်ႇၼႆ ။

ဝၼ်းတီႈ 13/03/2026 ၼႆႉ မႅၼ်ႈဝၼ်းၸိူဝ်ႉၸၢတ်ႈတႆလႅင် ၶွပ်ႈတဵမ် 499 ပီလႄႈ ၸၢဝ်းတႆးလႅင်ၵူႈတီႈၵူႈလႅၼ် ဢွၼ်ၵၼ်ဢဝ်ၵုင်ႇမုၼ်သေ ၼမ်းၸတ်းပၢင်မၢႆတွင်းတီႈၽႂ်တီႈမၼ်း ။

ဢိင်ၼိူဝ်ငဝ်းလၢႆးၵၢၼ်မိူင်းသေ ၸၢဝ်းတႆးလႅင် ဢမ်ႇၸၢင်ႈၸတ်းဝၼ်းၸိူဝ်ႉၸၢတ်ႈ ႁႂ်ႈၶွၼ်ႈတုမ်ၵၼ်လႆႈၶိုၵ်ႉယႂ်ႇ ။ ၸင်ႇၼၼ် ၸိူဝ်းယူႇၼွၵ်ႈမိူင်းၵေႃႈ ၸတ်းၼွၵ်ႈမိူင်း ၊ ၸိူဝ်းယူႇၼႂ်းမိူင်းၵေႃႈ ၸတ်းၼႂ်းမိူင်း ။ မိူၼ်ၼင်ႇ တီႈဝဵင်း ၼမ်ႉတေႃး၊ ဝၢၼ်ႈမူၵ်း(ပမွၵ်ႉ)၊ ဝဵင်းမႂ်ႇ(ဝၢႆးမေႃႇ)၊ မိူင်းၵွင်(မူဝ်းၵွင်း) ဢၼ်မီးၼႂ်းၸႄႈတွၼ်ႈႁုင်းမၢၵ်ႇလၢင်း တိူင်းၸႄႈၵႅင်းလႄႈသင် ၼႂ်းတိူင်းတႃႈလိူဝ်ႇ ၸိူဝ်းၼႆႉလႄႈသင် ပႃးၸဵမ် ၼႂ်းၸႄႈမိူင်းၶၢင်ၸိူဝ်းၼႆႉ ၸၢဝ်းတႆးလႅင် ဢမ်ႇပၼ်လုတ်ႈႁၢမ်း။

မိူၼ်ၼင်ႇ တီႈၵဵင်းမႂ်ႇၸိုင်ႈထႆးၵေႃႈ ႁူဝ်ၼပ်ႉၸၢဝ်းတႆးလႅင် ဢမ်ႇၼမ်ႁႅင်းသေတႃႉ ၶုၵ်းထူပ်းဢဝ်ၵုင်ႇမုၼ် ၶိူဝ်းၸဝ်ႈၵဝ်ႇသေ ၽွမ်ႉၵၼ် ႁဵတ်းၵၢၼ်လီၵုသူလ်ႇ ၵၢပ်ႈသွမ်း တႃႇမၢႆတွင်း ဝၼ်းၸိူဝ်ႉၸၢတ်ႈတႆးလႅင် တီႈဝတ်ႉသၢႆးမုၼ်း ၸႄႈဝဵင်းၵဵင်းမႂ်ႇ ။
ၼႂ်းတွၼ်ႈၼႆႉ ၸၢင်ႈမီးၶေႃႈထၢမ်ဝႃႈ ၵွပ်ႈသင်တႆးလႅင် မီးမႃးဝၼ်းၸိူဝ်ႉၸၢတ်ႈတႆးလႅင်ႁင်းၶေႃ ၊ ၶႂ်ႈၸႅၵ်ႇဢွၵ်ႇၶိူဝ်းတႆးၼင်ႇၵၼ်ႁႃႉ ၼႆၸိူဝ်းၼႆႉ ။ ပိူင်ပဵၼ်တႄႉ ၵွၼ်ႇပႆႇထိုင် 1948 ၼၼ်ႉ တႆးယၢမ်ႈပဵၼ်ဢၼ်လဵဝ်ၵၼ်မႃးယူႇဝႃႈၼႆသေတႃႉ ။ ဝၢႆးလႆႈလွတ်ႈလႅဝ်းသဝ်းၶေႃၸွမ်းမၢၼ်ႈယဝ်ႉ ၸုမ်းၽသပလၶဝ်ႁဵတ်းႁႂ်ႈတႆးယၢႆႈၵၼ်။

တႆးလႆႈၶၢတ်ႇၵၼ်ၵႂႃႇပဵၼ်သၢမ်တွၼ်ႈ 1) တႆးၼႂ်းမိူင်းတႆး 2)တႆးၼႂ်းမိူင်းၶၢင် လႄႈ 3) တႆးဢၼ်ယူႇၼႂ်းတိူင်းၸႄႈၵႅင်းတွၼ်ႈၼိူဝ်။ ၵမ်းလိုၼ်း ၺႃး သိုၵ်းမၢၼ်ႈၸႅၵ်ႇထႅၵ်ႇ လၢႆပွၵ်ႈလၢႆၵမ်းသေ ငိူၼ်ႈတႆးလႅင်ၵေႃႈ ၸမ်ႁၢႆ ။ ၽႃသႃၵႂၢမ်းလၢတ်ႈ ၊ ၾိင်ႈထုင်းၸိူဝ်းၼႆႉ ၸမ်ဝၢႆးႁၢႆမွတ်ႇ ။ ၸင်ႇၼၼ် တႄႇမိူဝ်ႈ 2017 ၼၼ်ႉသေ ၸုမ်းၵူၼ်းၼုမ်ႇတႆးလႅင်ပတ်းပိုၼ်ႉၸိုင်ႈမိူင်း ၸင်ႇၽိုၼ်ႉၽူးပိုၼ်းသေ မၵ်းမၼ်ႈဝၼ်းၸိူဝ်ႉၸၢတ်ႈမႃး ၼႆၸၢႆးသိူဝ်ၶမ်းၾႃႉ ၽူႈတႅမ်ႈလိၵ်ႈ၊ ၽူႈႁၵ်ႉသႃလဵပ်ႈႁဵၼ်းပိုၼ်းတႆးလႅင် လၢတ်ႈၼႄဝႃႈ –

ႁဝ်းၶႃႈ ႁဵတ်းဝၼ်းၸိူဝ်ႉၸၢတ်ႈတႆးလႅင်ဢၼ်ဝႃႈၼႆႉ တႆးလႅင်ဢၼ်ယူႇၼွၵ်ႈမိူင်းၸိူဝ်းၼၼ်ႉၵေႃႈ ႁႂ်ႈမီးၼမ်ႉၸႂ် ပဵၼ်တႆးမႃးၶိုၼ်းၼႆသေလႄႈ ၸင်ႇၸတ်းႁဵတ်းမႃး။ ဢမ်ႇၸႂ်ႈတႃႇၸႅၵ်ႇၽႄ ။ တႄႇမိူဝ်ႈ 1948 ၼၼ်ႉသေ ပၢၼ် ၼေႇဝိၼ်း ၼၼ်ႉ တႆးလႅင်ၺႃး သိုၵ်းမၢၼ်ႈၵုမ်းႁႅင်းၼႃႇလႄႈ မၢႆၾၢင်တႆးၵေႃႈ ဢမ်ႇမီးယဝ်ႉ။ၵမ်ႈၽွင်ႈၵေႃႈ ဢမ်ႇလႆႈ လၢတ်ႈၵႂၢမ်းတႆး။ၸိူဝ်ႉၶိူဝ်းၵေႃႈ ၶႂ်ႈႁၢႆမႃးယဝ်ႉ။ ၽႃႇသႃႇၵႂၢမ်းလၢတ်ႈၵေႃႈ ၶႂ်ႈဢေႇမႃး။ ဢၼ်ၼႆႉၵေႃႈႁဝ်းၶႃႈ မုင်ႈမွင်း ၸိူဝ်းဢမ်ႇမေႃၵႂၢမ်းတႆးၵေႃႈ တေမေႃမႃး။ပိုၼ်းဢမ်ႇႁူႉၵေႃႈ တေႁူႉမႃး။ တႆးလႅင်ယူႇၵိၼ်ၸိူင်ႉႁိုဝ် ယဝ်ႉၵေႃႈ တႆးလူင်ၸိူဝ်းယူႇၼႂ်းမႄႈမိူင်းတႆးၵေႃႈ ပဵၼ်ပီႈၼွင်ႉၵၼ်ဢိူဝ်ႈၼႆၼၼ်ႉၵေႃႈ တေႁူႉပွင်ႇမႃးၵမ်ႈၼမ်

ဝၼ်းၸိူဝ်ႉၸၢတ်ႈတႆးလႅင်ၼႆ ယူႇတီႈၸုမ်းၵူၼ်းၼုမ်ႇတႆးလႅင်ပတ်းပိုၼ်ႉမိူင်းႁူမ်ႈတုမ် (SNYO) မၵ်ႈမၼ်ႈမႃး မိူဝ်ႈ လိူၼ်မၢတ်ႉၶျ် ဝၼ်းတီႈ 13 ပီ 2017 ။ တႃႇႁႂ်ႈ ၶိူဝ်းတႆးလႅင်ပတ်းပိုၼ်ႉ တေမီးၸႂ်ႁၵ်ႉၶိူဝ်း ၊ ၼင်ႇႁိုဝ် တေမီးၸႂ် လုၵ်ႉႁိုၼ်ႇတေႃႈသူႈတႃႇၸိူဝ်ႉၶိူဝ်း လႄႈ တႃႇႁႂ်ႈမေႃၽွမ်ႉသဵင်ပဵင်းပၢၵ်ႇၸိူဝ်းၼႆႉၼႆသေ မၵ်းမၼ်ႈဝၼ်းၸိူဝ်ႉၸၢတ်ႈမႃး ဝႃႈၼႆ။
တႃႇပဵၼ်မႃးဝၼ်းၸိူဝ်ႉၸၢတ်ႈၼႆႉ ၸၢဝ်းတႆးလႅင် လႆႈတူၵ်းလူင်းမၵ်းမၼ်ႈဝႆႉ ၶေႃႈယၼ်ႇၸႂ် 5 ပိူင် လႄႈ ၶေႃႈ ယိူင်းဢၢၼ်း 4 ။

ၶေႃႈယၼ်ႇၸႂ် 5 ပိူင် ၼၼ်ႉ

1) တႃႇၶွတ်ႇလိူတ်ႈၸၢဝ်းတႆးလႅင်း ႁႂ်ႈၵႅၼ်ႇၶႅင်ႇၼႅၼ်ႈၼႃမၼ်ႈၵိုမ်း။
2)တႃႇႁႂ်ႈၸၢဝ်းတႆးလႅင် ႁူႉၶိုၼ်းပိုၼ်းသေ မေႃၶုၵ်ႉထူပ်းၵုင်ႇၶုၼ်းမုၼ်ငဝ်း ၵူၼ်းၸိူဝ်းႁဵတ်းၵၢၼ်ၸိူဝ်ႉၸၢတ်ႈမႃး ပၢၼ်သိုပ်ႇပၢၼ်။
3)တႃႇႁႂ်ႈ တူင်ႇၵူၼ်းၸၢဝ်းတႆးလႅင် မီးၸႂ်ႁၵ်ႉၸိူဝ်ႉၶိူဝ်း ၼမ်လိူဝ်တိူဝ်းမႃး။
4) တႃႇၸၢဝ်းတႆးလႅင် တေမီးၸႂ် ၶႂ်ႈႁဵတ်းသၢင်ႈ ႁႂ်ႈၸိူဝ်ႉၸၢတ်ႈ ဝၢၼ်ႈမိူင်းၶိုၼ်ႈယႂ်ႇမႂ်ႇသုင် ။
5)တႃႇႁႂ်ႈ သုၼ်ႇလႆႈပီႈၼွင်ႉၸၢဝ်းၶိူဝ်းတၢင်ႇၸိူဝ်း ပေႃးတေၽဵင်ႇပဵင်းပဵၼ်ထမ်းၼၼ်ႉ တေႁူမ်ႈသၢင်ႈၵႂႃႇလူၺ်ႈလၢႆးတၢင်းၵတ်းယဵၼ် ။

ၶေႃႈယိူင်းဢၢၼ်း ဝၼ်းၸိူဝ်ႉၸၢတ်ႈတႆးလႅင် 4 ပိူင်သမ်ႉ

1)ၼင်ႇႁိုဝ် တေမေႃဝႆႉၵႃႈၶၼ် ၼမ်ႉလိၼ်ႁိၼ်ၽႃ သၽႃဝသိင်ႇဝႅတ်ႉလွမ်ႉ ဢၼ် ပူႇမွၼ်ႇ ၼၢႆးယႃႈတႆးလႅင် ယၢမ်ႈယူႇသၢင်ႈၵိၼ်သဝ်းၵိုၵ်းပိုၼ်းမႃးပၢၼ်သိုပ်ႇပၢၼ် ။
2)ၼင်ႇႁိုဝ် ၸၢဝ်းတႆးလႅင် တေမီးၸႂ် ၶႂ်ႈႁၵ်ႉသႃပႅင်းမႅတ်ႇ ပူၵ်းပွင် ၾိင်ႈငႄႈၾိင်ႈထုင်း လိၵ်ႈလၢႆးပၢႆပေႇ ပႃးၸဵမ် ပၢႆးမွၼ်းၵူႈပိူင်ပိူင် ၼင်ႇႁိုဝ် တေဢမ်ႇမွတ်ႇဝၢႆးၸူမ်ႁၢႆ။
3)ၼင်ႇႁိုဝ် တႆးလႅင် ဢၼ်ယူႇသဝ်းၸွမ်းသၢပ်ႇၼမ်ႉလႅၼ်လိၼ် ဝၢၼ်ႈသိုပ်ႇဝၢၼ်ႈ ဝဵင်းသိုပ်ႇဝဵင်း ဢၼ်တိတ်းၸပ်းၵၼ်ၸိူဝ်းၼၼ်ႉ ႁႂ်ႈမေႃၶွၼ်ႈတုမ်ၵႅၼ်ႇၼႅၼ်ႈမၼ်ႈၵိုမ်းသေ ႁၵ်ႉႁွမ်ၵၼ်လူၺ်ႈလွင်ႈၽဵင်ႇပဵင်း။
4)ၼင်ႇႁိုဝ် လွင်ႈၶွၼ်ႈတုမ်ၸၢဝ်းတႆးလႅင်ၼႆႉ တေပဵၼ်မႃးဢဵၼ်ႁႅင်းယႂ်ႇလူင်ဢၼ်ၼိုင်ႈ ဢၼ်တေႁဵတ်းႁႂ်ႈ ပွတ်းတွၼ်ႈၼိုင်ႈ ၼႂ်းၸႄႈဝဵင်းလႄႈသင် ၊ ၼင်ႇႁိုဝ် တေပဵၼ်ဢဵၼ်ႁႅင်းဢၼ်ၼိုင်ႈ တႃႇၸိုင်ႈမိူင်းလႄႈသင်ၸိူဝ်းၼႆႉ ။

ပိုၼ်းၵႅပ်ႈဝၼ်းၸိူဝ်ႉၸၢတ်ႈတႆးလႅင်

ၸၢဝ်းတႆးလႅင်ၼႆႉ ယၢမ်ႈမီးၸိၵ်းၸွမ်ပဵၼ်ၸဝ်ႈပဵၼ်ၶုၼ်မႃး ပီယၢဝ်းၶၢဝ်းႁိုင် ။ ယၢမ်ႈမီးလိၵ်ႈလၢႆးပၢႆပေႇလႄႈ ၾိင်ႈငႄႈႁိတ်ႈႁွႆးၸဝ်ႈၵဝ်ႇၵိုၵ်းပိုၼ်းမႃး။
ဝၼ်းဢၼ် တႆးလႅင် ယၢမ်ႈဢွင်ႇမၢၼ်မႃး ဢၼ်ယၢမ်ႈဢဝ်ၵုင်ႇမုၼ်မႃးတႄႉ ပႃးဝၼ်းၸိူဝ်ႉၸၢတ်ႈတႆးလႅင်ၼႆႉဝၼ်းၼိုင်ႈ ဢၼ်မႅၼ်ႈဝၼ်းတီႈ 13 လိူၼ်မၢတ်ႉၶျ်ၼႆႉ။ တႄႇၼပ်ႉ ပီသႃသၼႃ 2070 ပီ ၊ ပီတႆး 1621 ပီ ၊ ပီၵေႃးၸႃႇ 888 ၶု ၊ ပီၶရိတ်ႉ 1527 ၼၼ်ႉသေ ဢဝ်ပဵၼ်ဝၼ်းဢွင်ႇမၢၼ်တႆးလႅင်ဝၼ်းၼိုင်ႈၼႆယူႇ။

မိူဝ်ႈၽွင်းၼၼ်ႉ ပဵၼ်ၶၢဝ်းယၢမ်းဢၼ် ၸၢဝ်းတႆးလႅင် ၶွတ်ႇလိူတ်ႈ သၢင်ႈလွင်ႈၽွမ်ႉႁူမ်ႈ ဢဵၼ်ႁႅင်းယႂ်ႇမႃး ။ သင်ၵွၵ်းၶိုၼ်းပိုၼ်းၼႂ်းမိူင်းႁူမ်ႈတုမ်မၢၼ်ႈၼႆႉၵေႃႈ တႆးလႅင်ၼႆႉ ယၢမ်ႈထိုင်ၸၼ်ႉၶုၼ်ႁေႃၶမ်း ၊ ယၢမ်ႈထိုင်ၸၼ်ႉၸဝ်ႈၾႃႉ ၊ ယၢမ်ႈထိုင်ၸၼ်ႉၸဝ်ႈၾႃႉဢၼ်ၽွင်းငမ်းပူၵ်းပွင်ပိုၼ်ႉတီႈၽႂ်မၼ်းမႃး ။

ၸင်ႇၼၼ်လႄႈ ထိုင်ယၢမ်းလဵဝ် ဢွင်ႈတီႈၵိုၵ်းပိုၼ်းတႆးလႅင် လႄႈ ၾိင်ႈထုင်းႁိတ်ႈႁွႆးၸိူဝ်းၼႆႉ တိုၵ်ႉမီးၼမ် တိုၵ်ႉမၵ်းမၼ်ႈဝႆႉထိုင်မိူဝ်ႈလဵဝ် ။ တႃႇၵိုၵ်းပိုၼ်းၵႂႃႇမိူဝ်းၼႃႈၼၼ်ႉၵေႃႈ ၸၢဝ်းတႆးလႅင် တိုၵ်ႉၸိုၼ်ႈ တိုၵ်ႉၶတ်းၸႂ်သၢင်ႈ ။
ၸင်ႇၼၼ် ဝၼ်းၸိူဝ်ႉၸၢတ်ႈတႆးလႅင်ၼႆႉ ၸၢဝ်းတႆးလႅင် ၸင်ႇၼပ်ႉဢဝ် မိူဝ်ႈပီတႆး 1621 ၼၼ်ႉမႃး ။ ၵွပ်ႈဝႃႈ ၽွင်းၼၼ်ႉ ၸဝ်ႈလူင်မိူင်းယၢင်းလႄႈ ၵေႃႉပဵၼ် လုၵ်ႈ ၸၢႆးမၼ်းၸဝ်ႈ ၸဝ်ႈသိူဝ်ႁၢၼ်ၾႃႉ ဢွၼ်ႁူဝ်လုၵ်ႈၼွင်ႉပွင်ႈပၢႆ ၽွမ်ႉႁူမ်ႈၵၼ်တီႈမိူင်းယၢင်းသေ ဢွင်ႇပေႉမိူင်းဢႃႇဝ (ဢိၼ်းဝႃႉ) ။

ၽွင်းၼၼ်ႉ ၸၢဝ်းတႆးလႅင် မီးပိူင်ၽွင်းငမ်းဢၼ်ၵႂၢင်ႈၶႂၢင် ၊ မီးၽူႈဢွၼ်ႁူဝ်ၵႅၼ်ႇၶႅင်လႅတ်းၾၢႆ လႄႈ ႁူမ်ႈႁႅင်းၶွတ်ႇလိူတ်ႇၵၼ်ၶိုၵ်ႉတွၼ်း ၼႆ ၽူႈတႅမ်ႈပိုၼ်းတႆးလႅင် တႅမ်ႈမၢႆဝႆႉၼင်ႇၼႆ။
သင်တူၺ်းၼႂ်းပိုၼ်းပၢၼ်သိုပ်ႇပၢၼ်ၸိုင် ၸၢဝ်းတႆးလႅင်ၼႆႉ ယူႇသၢင်ႈၵိၼ်သဝ်းမႃး ၸွမ်းပိုၼ်ႉတီႈ မိူင်းႁူမ်ႈတုမ်တွၼ်ႈၼိူဝ် လွတ်ႈလႅဝ်းထၢင်ႇႁၢင်ႈမႃး ပီယၢဝ်းၶၢဝ်းႁိုင်။ ဢွင်ႈတီႈ ဢၼ်ၸၢဝ်းတႆး လႅင် ယူႇသဝ်းမႃး ပၢၼ်သိုပ်ႇပၢၼ်တႄႉ မိူၼ်ၼင်ႇ – မိူင်းၵွင် ၊ မိူင်းယၢင်း ၊ မၢၼ်ႈမေႃႇ ၊ ဝၢၼ်ႈမူၵ်း၊ၵၢတ်ႇလိုဝ်း ၊ သွင်သူပ်း ၊ ဝဵင်းသိူဝ် ၸဵမ်ၸိူဝ်းၼႆႉ။

ၵူၼ်းမိူင်းၸိူဝ်းပဵၼ်ၸၢဝ်းတႆးလႅင်ၼႆႉ တိုၵ်ႉဢွၼ်ၵၼ် ႁၵ်ႉသႃ ပႂ်ႉပႃးၾိင်ႈထုင်းႁိတ်ႈႁွႆးၽႂ်မၼ်းဝႆႉ ၸွမ်းပွတ်း တွၼ်ႈၼိူဝ် မိူင်းႁူမ်ႈတုမ် မိူၼ်ၼင်ႇ ၸႄႈဝဵင်းၽႃၵၢၼ်ႉ ၊ ၸႄႈတွၼ်ႈၵၢတ်ႇသႃ ၊ ႁုင်းမၢၵ်ႇ လၢင်း ၊ ၶမ်းတီႈ ၊ ၵၢတ်ႇလိုဝ်း ဢၼ်မီးၼႂ်းတိူင်းၸႄႈၵႅင်းလႄႈ ၸႄႈတွၼ်ႈၸေႈၼႃး ၊ မၢၼ်ႈမေႃႇ ၼႂ်းၸႄႈမိူင်းၶၢင် ၸိူဝ်းၼႆႉ။