တၢင်းပဵၼ် ၶူဝ်ႊဝိတ်ႉ 19 ၽႄႈလၢမ်းႁွပ်ႈသွင် ပတ်းပိုၼ်ႉမိူင်းႁူမ်ႈတုမ်လႄႈ ပိူဝ်ႈတႃႇၵႅတ်ႇၵင်ႈ ၵႆယၢၼ် ၼႆသေ  ၸၼ်ႉၸွမ် ပုတ်ႉထ မိူင်းတႆး SSBU ပိၵ်ႉဢိုတ်း Lockdown ႁၢမ်ႈၵူၼ်းၶဝ်ႈ/ဢွၵ်ႇၵႂႃႇမႃးႁႃၵၼ်ဝႆႉၸူဝ်ႈၶၢဝ်း တေႃႇထိုင်လိူၼ်သႅပ်ႊထိမ်ႊပိူဝ်ႊၼႆႉသဵင်ႈ။

သင်ၶၸဝ်ႈ၊ ၸဝ်ႈတူၼ်ၶူး ဢိၵ်ႇၽူႈမီးပုၼ်ႈၽွၼ်း ႁၵ်ႉသႃ ပူၵ်းပွင် ၸၼ်ႉၸွမ်ပုတ်ႉထ မိူင်းတႆး ၸတ်းႁဵတ်းပၢင်ၵုမ် ဢုပ်ႇဢူဝ်းတႅပ်းတတ်းဝႃႈ တႄႇဢဝ် ဝၼ်းတီႈ 11/9/2020 တေႃႇထိုင် ဝၼ်းတီႈ 30/9/2020 ၶၢဝ်းတၢင်း မွၵ်ႈ 20 ဝၼ်း ၼႆႉ ႁၢမ်ႈႁႅတ်ႉ ၵူၼ်းၶဝ်ႈ ၵူၼ်းဢွၵ်ႇ ယွၼ်ႉၵူဝ်တၢင်းပဵၼ် ၶူဝ်ႊဝိတ်ႉ 19 ၽႄႈလၢမ်းတေႃႇၵၼ် ၼႂ်းၸၼ်ႉၸွမ်ပုတ်ႉထ မိူင်းတႆး Shan State Buddha University ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။

ၸဝ်ႈၶူး Dr. ပိၺ်ႇၺႃႇၽေႃးၵ ႁူဝ်ၼႃႈၾၢႆႇလဵပ်ႈႁဵၼ်း ပိတၵၢတ်ႈ ၸၼ်ႉၸွမ်ပုတ်ႉထ မိူင်းတႆးဝႃႈ – “ ၽွင်းၶၢဝ်းၼႆႉ တေ ဢမ်ႇပၼ်ၵူၼ်းတၢင်းၼွၵ်ႈၶဝ်ႈၼႂ်းၸၼ်ႉၸွမ်။ တေႃႈလုၵ်ႈႁဵၼ်း ၵူၼ်းႁိူၼ်း 3 ၵေႃႉ ဢၼ်လုၵ်ႉတီႈဝဵင်းသေ မႃးၶိုၼ်ႈ ႁဵၼ်း ၼၼ်ႉၵေႃႈ ဢမ်ႇပၼ်ၶဝ်ႈမႃးၼႂ်းၸၼ်ႉၸွမ်ယဝ်ႉ လႆႈယူႇတီႈႁိူၼ်းသေ ႁဵၼ်းဢဝ်တၢင်းဢွၼ်ႊလၢႆႊ ပၼ်ၵၢၼ် ႁဵၼ်း ႁဵတ်းဝႆႉတီႈႁိူၼ်း။ ၵၢၼ်ႁဵၼ်းၼႂ်းၸၼ်ႉၸွမ်ပုတ်ႉထတႄႉ သွၼ်ၵႂႃႇမိူၼ်ၵဝ်ႇၵူၺ်း ဢမ်ႇဢိုတ်း။ လုၵ်ႈႁဵၼ်းဢၼ် ယူႇဝႆႉ ၼႂ်းၸၼ်ႉၸွမ်းၼႆႉၵေႃႈ ဢမ်ႇပၼ်ဢွၵ်ႇၵႂႃႇတၢင်းလႂ်ၶႃႈ” – ဝႃႈၼႆ။

ၵၢၼ်သွၼ်ႁဵၼ်းၼႂ်းၸၼ်ႉၸွမ်တႄႉ ဢမ်ႇၵိုတ်း သိုပ်ႇပူင်သွၼ်ပၼ်ၵႂႃႇယူႇ မိူၼ်ပၵ်းၵဝ်ႇ ပိူင်ၵဝ်ႇ ၶူးသွၼ်လႄႈ လုၵ်ႈ ႁဵၼ်း ၸိူဝ်းယူႇသဝ်းဝႆႉတၢင်းၼႂ်းၸၼ်ႉၸွမ်ၼၼ်ႉ။ ၵူၺ်းၵႃႈ ၸွမ်းၼင်ႇပိူင်ပၢႆးယူႇလီမီးဝႆႉတႄႉ ၶူးတင်းလုၵ်ႈႁဵၼ်းတေ လႆႈၼင်ႈယၢၼ်ၵႆၵၼ် ၼိုင်ႈၵေႃႉလႂ် 6 ထတ်း၊ တေလႆႈသႂ်ႇၽႃႈတူမ်းသူပ်းၵူႈၵေႃႉ။ ယဝ်ႉၵေႃႈ ၵွၼ်ႇတေၶဝ်ႈႁွင်ႈႁဵၼ်း ၼၼ်ႉ တေလႆႈလၢင်ႉမိုဝ်းၵၼ်ယဝ်ႉ ၸင်ႇတေၶဝ်ႈၼႂ်းႁွင်ႈႁဵၼ်း ဝႃႈၼႆ။

ၼႂ်းၶေႃႈပိုၼ်ၽၢဝ်ႇ ၸၼ်ႉၸွမ်ပုတ်ႉထမိူင်းတႆးၼၼ်ႉ ဢွၵ်ႇဝႆႉ ၵဵဝ်ႇလူၺ်ႈတၢင်းပဵၼ်ၶူဝ်ႊဝိတ်ႉ 19 ၼၼ်ႉ 1) တေဢမ်ႇ လႆႈဢွၵ်ႇၶွပ်ႇလႅၼ်ၸၼ်ႉၸွမ် တေႃႇထိုင် ဝၼ်းတီႈ 30/9/2020။ 2) ပေႃးမီးၵၢၼ်လမ်ႇလွင်ႈၸိုင် မႃးယွၼ်းတၢင်းၸွႆႈထႅမ် တီႈ လုမ်းၾၢႆႇ ၽွင်းငမ်းသေ ၸွႆႈၵၼ်ၵႂႃႇ။ 3) ပေႃးမီးလွင်ႈလမ်ႇလွင်ႈသေ ဢွၵ်ႇၶၢဝ်းတၢင်းၸိုင် တေလႆႈၵုမ်းၶင်တူဝ် ၸဝ်ႈၵဝ်ႇ ႁင်းၵူၺ်း 21 ဝၼ်း မိူၼ်ၵူႈပွၵ်ႈ။ 4) ၶေႃႈၸီႉသင်ႇၼႆႉ တႄႇမၵ်းမၼ်ႈၸႂ်ႉတိုဝ်းၵႂႃႇ တင်ႈတႄႇ ဝၼ်းတီႈ 11/9/2020  တေႃႇထိုင် ဝၼ်းတီႈ 30/9/2020  ၸင်ႇဝႃႈၵၼ်ထႅင်ႈၵမ်းၼိုင်ႈ ဝႃႈၼႆ။

ၸၢႆးမဵဝ်း ၵူၼ်းတူၼ်ႈတီး လၢတ်ႈဝႃႈ – “မိူဝ်ႈၼႆႉ ပဵၼ်ဝၼ်းလိူၼ်လပ်းၵၢင်ဝႃႇ တေၵႂႃႇၶိုၼ်ႈၵျွင်းတီႈၸၼ်ႉၸွမ်ပုတ်ႉထၼႆ သေ ၽိူဝ်ႇႁဝ်းၶႃႈ ၵႂႃႇတီႈပုၼ်ႉ ဢမ်ႇလႆႈၶဝ်ႈတၢင်းၼႂ်းဝၢင်းၸၼ်ႉၸွမ် လႆႈၵႂႃႇလူႇတၢၼ်းဝႆႉတီႈၵဵတ်ႉ ပၢႆးယူႇလီၶဝ်တၢင်း ၼွၵ်ႈၼၼ်ႉၵူၺ်း ၶူဝ်းလူႇၶူဝ်းတၢၼ်းၸိူဝ်းၼႆႉၵေႃႈလႆႈၵႂႃႇလူႇဝႆႉတီႈၼၼ်ႈမူတ်းမူတ်းၵူၺ်းၶႃႈ တေမီးမုၼ်ၸၢင်းၶဝ်မႃး ပႂ်ႉႁပ်ႉတၢင်းတၢၼ်းသေ ႁေႃးပၼ်တီႈၵဵတ်ႉၼၼ်ႉၵူၺ်း” – ဝႃႈၼႆ။

ယူႇတီႈၸၼ်ႉၸွမ် ပုတ်ႉထ မိူင်းတႆးသေ ပိုၼ်ၽၢဝ်ႇ Lockdown ႁၢမ်ႈၵူၼ်းၶဝ်ႈဢွၵ်ႇ တီႈၸၼ်ႉၸွမ်ၼႆႉ မႃးၵမ်းၼိုင်ႈ တႄႇဢဝ် မိူဝ်ႈလိူၼ်ဢေႊပရိူဝ်ႊမႃး တေႃႇထိုင် လိူၼ်မေႊသဵင်ႈ ။ ၵမ်းၼႆႉပဵၼ်ၵမ်းထူၼ်ႈသွင် ယွၼ်ႉတၢင်းပဵၼ် ၶူဝ်ႊဝိတ်ႉ 19 ၽႄႈလၢမ်းပတ်းပိုၼ်ႉ မိူင်းႁူမ်ႈတုမ် ၵူၼ်းတိတ်းၸပ်း ၼိုင်ႈဝၼ်း ၾၢႆႇၼိူဝ်ပၢၵ်ႇ လွၼ်ႉလွၼ်ႉ။

ယၢမ်းလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းတိတ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ 19 ၼႆႉ တင်းမူတ်းမီးၵႂႃႇ 3,636 ၵေႃႉ၊ ယူတ်းယႃ 2,765 ၵေႃႉ၊ ယႃၶႅၼ်း 832 ၵေႃႉလႄႈ လူႉတၢႆ 39 ၵေႃႉ ႁွင်ႈၵၢၼ်ပၢႆးယူႇလီမိူင်းႁူမ်ႈတုမ် ပိုၼ်ၽၢဝ်ႇဢွၵ်ႇဝႆႉၼင်ႇ ၼႆ။