သိုၵ်းမၢၼ်ႈဢွၵ်ႇလိၵ်ႈပွၵ်ႈၵမ်းသၢမ် လိုပ်ႈၸဝ်ႈႁၢၼ်ႉၶၢႆၶူဝ်း 200 ပၢႆ ဢၼ်မီး ႁိမ်းႁွမ်း သူၼ်မွၵ်ႇ ဢွင်ႇသၢၼ်း( ဗိုလ်ချုပ်အောင်ဆန်း ) တီႈပၢင်ႇလဵၼ်ႈ ဢဵၼ်ႁႅင်းၵၢင်ဝဵင်းတူၼ်ႈတီး ၸိုင်ႈတႆးပွတ်းၸၢၼ်း  ။

တႃႇၶိုၼ်းမႄးၵေႃႇသၢင်ႈ ႁူင်းလဵၼ်ႈဢဵၼ်ႁႅင်းႁႂ်ႈၶႅမ်ႉလိူဝ်ၵဝ်ႇ၊ တႃႇၵေႃႇသၢင်ႈ ဢၢင်ႇလဵၼ်ႈၼမ်ႉၼၼ်ႉ  ႁႂ်ႈႁၢၼ်ႉၶၢႆၶူဝ်းၶၢႆတၢင်းၵိၼ် ၸွမ်းႁိမ်းႁွမ်း ပၢင်ႇလဵၼ်ႈႁႅင်းၼၼ်ႉ  ၶၢႆႉပၢႆႈ ပၼ် ၊    ဝၼ်းတီႈ 28 လိူၼ် ၾႅပ်ႉပိဝ်ႊရီႊ ၼႆႉ တေလႆႈၶၢႆႉႁႂ်ႈယဝ်ႉတူဝ်ႈ ဝႃႈၼႆ ။

ၼၢင်းယိင်းၸဝ်ႈႁၢၼ်ႉတၢင်းၶၢႆ တီႈႁိမ်းသူၼ်မွၵ်ႇ ၼၼ်ႉလၢတ်ႈၽူႈတွႆႇႁွၵ်ႈဝႃႈ -“တီႈၼႆႈၼႆႉ ၶၢႆၶူဝ်းၶၢတ်ႇလီလႄႈ ႁဝ်းၶႃႈဢမ်ႇၵႂႃႇသိုဝ်ႉတီႈလိၼ်/ သိုဝ်ႉႁွင်ႈ တၢင်ႇတီႈယဝ်ႉ။ ႁဝ်းၶႃႈ သိုဝ်ႉႁွင်ႈသေၶၢႆၶူဝ်း ယူႇဝႆႉတီႈၼႆႈ ႁိုင် 25  ပီယဝ်ႉ ၊ ယူႇတီႈၼႆႈ ၵိၼ်တီႈၼႆႈ ပဵၼ်ႁိူၼ်းႁဝ်းၶႃႈဢေႃႈ ။ ၵမ်းၼႆႉ ၵိုင်ႉၵၢင်ႉၸႂ်ႉမႃးၶၢႆႉ ၸိူင်ႉၼႆ တေလႆႈၵႂႃႇယူႇတီႈလႂ်  ၊  တႃႇၵူၼ်းၶၢႆႉဢွၵ်ႇၼႆႉ ၶဝ်ဢမ်ႇၸွႆႈတူၺ်းၸွႆႈလူ ၸွႆႈၶိုင်ပၼ်သင်လူင်။ ၶဝ်ၶႂ်ႈႁႂ်ႈႁဝ်းၶၢႆႉလႄႈၶဝ်ဝႃႈ – တီႈၼႆႈၼႆႉ ပဵၼ်ပိုၼ်ႉတီႈ ၶွင်သိုၵ်းမၢၼ်ႈၼႆၵူၺ်းၼႃႇ   ”- ဝႃႈၼႆ ။

ႁွင်ႈၵၢၼ်ၾၢႆႇလိူမ်ႈလႆႇၸႄႈဝဵင်း သူင်ႇလိၵ်ႈလူင်းမႃးပၼ်ၾၢင်ႉ ႁႂ်ႈႁၢၼ်ႉတၢင်းၶၢႆ ၶၢႆႉၼႆႉ မီး 3 ပွၵ်ႈပႃးၼႆႉယဝ်ႉ ။   မိူဝ်ႈလိူၼ် တီႊသႅမ်ႊပိူဝ်ႊ ဝၼ်းတီႈ 3 ၼိုင်ႈပွၵ်ႈ ၊ ၼႂ်းလိူၼ်ၵျႅၼ်ႊၼိဝ်ႊရီႊ ဝၼ်းတီႈ 5 ၼိုင်ႈပွၵ်ႈ ၊ ၼႂ်းလိူၼ် ၾႅပ်ႉပိဝ်ႊရီႊ ဝၼ်းတီႈ 2 ၼိုင်ႈပွၵ်ႈ ဝႃႈၼႆ ။  

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ ၸဝ်ႈႁၢၼ်ႉၶၢႆၵုၼ်ႇ ႁိမ်းသူၼ်မွၵ်ႇၸိူဝ်းၼၼ်ႉ တိုၵ်ႉပိုတ်ႇၶၢႆဝႆႉယူႇၸိူင်ႉၼၼ်ၵူၺ်း ၊ ထုၵ်ႇသူင်ႇလိၵ်ႈပၼ်ၾၢင်ႉမႃးသၢမ်ပွၵ်ႈယဝ်ႉ ၊ တေႁဵတ်းႁိုဝ်ၶၢႆႉပၼ်လႃႇၼေႃႈ ပိူၼ်ႈၵေႃႈယူႇမႃးတီႈၼၼ်ႈမီးၸူဝ်ႈပိူၼ်ႈယဝ်ႉ ၊ ၵူၼ်းသိုဝ်ႉယူႇတီႈႁၢၼ်ႉၸိူဝ်းၼၼ်ႉတႄႉ သုမ်းႁိူၼ်း သုမ်းႁၢၼ်ႉပႃးယဝ်ႉၵမ်းၼႆႉ”- ဝႃႈၼႆ ။   

ႁၢၼ်ႉတၢင်းၶၢႆ ဢၼ်မီးႁိမ်းသူၼ်မွၵ်ႇ ဢွင်ႇသၢၼ်းၼၼ်ႉ  မီးႁၢၼ်ႉ ပိုတ်ႇၶိူင်ႈၸၢၵ်ႈရူတ်ႉၶိူင်ႈလႄႈ ႁၢၼ်ႉၶဝ်ႈမုၼ်း ၊ ႁၢၼ်ႉၶိူင်ႈၶွမ်ႊ ။ ၵူၼ်းႁဵတ်းၵၢၼ် ႁႃၸဝ်ႉၵိၼ်ၶမ်ႈၵေႃႈ  ၶၢတ်ႈယူႇသဝ်းဝႆႉၵေႃႈမီးတင်းၼမ်   ။

ၵွပ်ႈပိူဝ်ႈ တဵၵ်းၸႂ်ႉၶၢႆႉၸိူင်ႉၼၼ်လႄႈ တွၼ်ႈတႃႇ ၵူၼ်းႁဵတ်း ၵၢၼ် ႁႃၸဝ်ႉၵိၼ်ၶမ်ႈ ဢိၵ်ႇၸိူဝ်းၸဝ်ႈၶွင်ႁၢၼ်ႉၶဝ်ယၢပ်ႇၽိုတ်ႇၵိၼ်းၸႂ်ဝႆႉ။

မိူၼ်ၼင်ႇၼႆ ႁၢၼ်ႉၶၢႆၶူဝ်း ဢၼ်မီးတီႈႁိမ်းၸမ် ဢထၵ 8 တၢင်းလဵပ်ႈဝဵင်းတူၼ်ႈတီးၼၼ်ႉၵေႃႈ သိုၵ်းမၢၼ်ႈသင်ႇႁႂ်ႈပိၵ်ႉၶၢႆႉ ႁဵတ်းႁႂ်ႈ ၸဝ်းႁၢၼ်ႉ ယၢပ်ႇၽိုတ်ႇၵိၼ်းၸႂ်ဝႆႉ ၼႆယဝ်ႉ ။