တႄႇႁၢင်လိူၼ် ၾႅပ်ႉပိဝ်ႊရီႊၼႆႉမႃး သိုၵ်းမၢၼ်ႈႁူမ်ႈတင်းပူႇၵၢင်ႉပူႇၵႄႇၼႂ်းပိုၼ်ႉတီႈသေ ပႂ်ႉၵူတ်ႇထတ်းတီႉၺွပ်းၵူၼ်းၼုမ်ႇ လႄႈ ၼၢင်းယိင်းၵႂႃႇ ဢမ်ႇယွမ်း 5 ၵေႃႉ ၽွင်းၵၢင်ၶမ်ႈ ၵၢင်ၶိုၼ်း တီႈသဵၼ်ႈတၢင်းသူၺ်ႇၽူင်းပုၼ်ႉ (‌ရွှေဘုန်းပွင့်) ဝဵင်းတူၼ်ႈတီး မိူင်းတႆးပွတ်းၸၢၼ်းၼႆယဝ်ႉ ။

ပိူင်ယႂ်ႇ သိုၵ်းမၢၼ်ႈ တေပႂ်ႉၵူတ်ႇထတ်းၵၢင်ၶမ်ႈ 8 မူင်းထိုင် 11မူင်း တီႉၺွပ်းဢဝ်ၵူၼ်းၼုမ်ႇၸွမ်းတႃႈၸွမ်းတၢင်းလႄႈ ႁဵတ်းႁႂ်ႈၵူၼ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ ။

ၼၢင်းယိင်းပိုၼ်ႉတီႈဝဵင်းတူၼ်ႈတီႈလၢတ်ႈၽူႈတွႆႇႁွၵ်ႈဝႃႈ -“ၽွင်းၶႃႈၵႂႃႇတင်းသဵၼ်ႈတၢင်း သူၺ်ႇၽူင်းပုၼ်ႉၼၼ်ႉ ႁၼ်ၵႃးသိုၵ်းမၢၼ်ႈၼမ်ၼႃႇ ၊ ၶဝ်ပႂ်ႉၵူတ်ႇထတ်းၵူၼ်းၼုမ်ႇ ၊ လႆႈငိၼ်းဝႃႈ ၼၢင်းယိင်းၸိူဝ်းၺႃးသိုၵ်းမၢၼ်ႈၺွပ်းၵႂႃႇဢမ်ႇယွမ်း 5 ၵေႃႉယဝ်ႉၼႆ ၊ ဢွၼ်တၢင်းပေႃးပဵၼ်ၼၢင်းယိင်းၼႆၶဝ်ဢမ်ႇတီႉ၊ ၵမ်းၼႆႉပေႃးပဵၼ်ၵူၼ်းၼုမ်ႇၼႆႉတီႉၵူႈၵေႃႉ ယဝ်ႉ ၽႂ်ၵေႃႈဢမ်ႇႁတ်းဢွၵ်ႇတၢင်းၼွၵ်ႈယဝ်ႉမိူဝ်ႈလဵဝ် ”- ဝႃႈၼႆ ။

တႄႇႁူဝ်လိူၼ်ၾႅပ်ႉပိဝ်ႊရီႊမႃးသိုၵ်းမၢၼ်ႈႁွင်ႉဢဝ်ၵူၼ်းၼုမ်ႇ တႃႇၵႂႃႇၾိုၵ်းၵၢၼ်သိုၵ်းၸုပ်ႈ 22 ၊ ဝၢႆးလင်ၼၼ်ႉ သိုၵ်းမၢၼ်ႈၵႆႉၵူတ်ႇထတ်း ၵူၼ်းၼုမ်ႇၽွင်းၵၢင်ၶမ်ႈၵၢင်ၶိုၼ်းသေ တီႉၺွပ်းဢဝ်ယဝ်ႉသူင်ႇၵႂႃႇၾိုၵ်းၵၢၼ်သိုၵ်း တီႈၸႄႈဝဵင်းလွၵ်ႉၸွၵ်ႇ တၢင်းဝဵင်းပႃႉထူးသေ၊ မၢင်ၸိူဝ်းလႆႈ ပၼ်ငိုၼ်း 50 သႅၼ်ယဝ်ႉၸင်ႇထုတ်ႇတူဝ်လႆႈမႃးၶိုၼ်းလႆႈၼႆ – ၵူၼ်း ပိုၼ်ႉတီႈလၢတ်ႈ ။

ၼၢင်းယိင်းၵေႃႉယူႇဝႆႉၼႂ်းပိုၼ်ႉတီႈလၢတ်ႈဝႃႈ -“ တလဵဝ်တီႈတူၼ်ႈတီးၼႆႉ ပေႃးၵၢင်ၶမ်ႈ 8 မူင်းၼႆႉ ဢမ်ႇမီးၵူၼ်းဢွၵ်ႇတၢင်းၼွၵ်ႈယဝ်ႉ၊ ၵႆႉၺႃးတီႉၺွပ်းၼႃႇ ၊ ပေႃးထုၵ်ႇတီႉၺွပ်း ၵႂႃႇယဝ်ႉ ထုၵ်ႇသူင်ႇၵႂႃႇၾိုၵ်းၵၢၼ်သိုၵ်းၵမ်းလဵဝ် ၊ ၵူၼ်းႁူႉၸၵ်းၶႃႈၵေႃႉၼိုင်ႈၺႃးတီႉၵႂႃႇ ၽွင်းမၼ်းလုၵ်ႉ တီႈၵၢၼ်ပွၵ်ႈမႃးၶိုၼ်းၼၼ်ႉ ၊ ထုၵ်ႇသူင်ႇၵႂႃႇၾိုၵ်းၵၢၼ်သိုၵ်း ထိုင်ဝၼ်း မိူဝ်ႈၼႆႉၵေႃႈ ဢမ်ႇလႆႈတင်းၵပ်းသိုပ်ႇသင်”- ဝႃႈၼႆ ။

ယွၼ်ႉပလိၵ်ႈ တင်း သိုၵ်းမၢၼ်ႈ ႁူမ်ႈၵၼ်ဝၢင်းၽႅၼ်ႁၢင်ႈႁႅၼ်းဝႆႉ တႃႇလိုပ်ႈလမ်းတီႉၺွပ်းဢဝ်ၵူၼ်းၼုမ်ႇယဝ်ႉလႄႈ ႁဵတ်းႁႂ်ႈၵူၼ်းၸိူဝ်းႁဵတ်းၵၢၼ် ႁႃၵိၼ်လဵင်ႉတွင်ႉၽိူၵ်ႇၸိုၼ်ႈ ၶၢဝ်သႂ် မိူၼ်ၼင်ႇပိုတ်ႇႁၢၼ်ႉၶၢႆတၢင်းၵိၼ်ၸွမ်းၵၢတ်ႇၵၢင်ၶမ်ႈၸိူဝ်းၼၼ်ႉၵေႃႈ လႆႈဢိုတ်းႁၢၼ်ႉၸဝ်ႉ ပဵၼ်ဢၼ်ယၢပ်ႇၸႂ် တႃႇႁႃၵိၼ်လဵင်ႉတွင်ႉဝႆႉ ၼႆယဝ်ႉ။

ၸွမ်းၼင်ႇသဵၼ်ႈမၢႆ TGI Support Revolution ၵဵပ်းဝႆႉၼၼ်ႉတႄႉ ၼႂ်းလိူၼ်ၾႅပ်ႉပိဝ်ႊရီႊၼႆႉၵူၺ်း ၵူၼ်းၼုမ်ႇၸိူဝ်းထုၵ်ႇတီႈၺွပ်း တီႈသဵၼ်ႈတၢင်းဝႃးပျႃး 5 ၵေႃႉ ၊ တၢင်းၵၢတ်ႇ ၼႂ်းပွၵ်ႉ ၸဝ်ႈၸၢမ်ႇထုၼ်း 2 ၵေႃႉ ၊ ၼႂ်းပွၵ်ႉၶျၢၼ်းမျႃႉ 3 ၵေႃႉ ၊ တၢင်းၾၢႆႇတူၵ်း ပွၵ်ႉသူၺ်ႇတွင်ႇ 10 ၵေႃႉ ၊ ၼႂ်းပွၵ်ႉ ၵၼ်ႇတႃႇ 5 ၵေႃႉ ၊ ၼႂ်းပွၵ်ႉရတၼႃႇသီႇရိ 1 ၵေႃႉ ၊ တၢင်းပွၵ်ႉ ဝၢင်းႁူင်းၾႆးမိၼ်ႇ 3 ၵေႃႉ ၊ ႁိမ်းတပ်ႉသိုၵ်းမၢၼ်ႈ ( 212 ) ၼၼ်ႉ 2 ၵေႃႉ ၼႆယဝ်ႉ ။

မိူဝ်ႈလိူၼ်ၾႅပ်ႉပိဝ်ႊရီႊပီ 2024 ၼၼ်ႉ သိုၵ်းမၢၼ်ႈပိုၼ်ၽၢဝ်ႇ ပၵ်းပိူင်ဝႃႈၵူၼ်းမိူင်းၵူႈၵေႃႉၸိူဝ်းပဵၼ်ၵူၼ်းၼုမ်ႇ သႅၼ်းဢႃႇယု 18 ပီတေႃႇထိုင် 45 ပီတေလႆႈၶဝ်ႈႁၢပ်ႇၵၢၼ်သိုၵ်း။ ဝၢႆးၼၼ်ႉၼိုင်ႈလိူၼ် သိုၵ်းမၢၼ်ႈတႄႇၵဵပ်းၵူၼ်းၼုမ်ႇသေ သူင်ႇၵႂႃႇၾိုၵ်းၵၢၼ်သိုၵ်း။ ယၢမ်းလဵဝ် ပၢင်သွၼ် ၾိုၵ်းၵၢၼ်သိုၵ်း ဢၼ်သိုၵ်းမၢၼ်ႈၸတ်းႁဵတ်းယူႇၼႆႉ ထိုင်မႃးပွၵ်ႈၵမ်း 22 ယဝ်ႉ။