တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼႆႉ သိုၵ်းမၢၼ်ႈဢမ်ႇပၼ်ၶၢႆၼမ်ႉမၼ်းၸၢၵ်ႈပၼ် ရူတ်ႉၵႃးၸိူဝ်းဢမ်ႇမီးဝႂ် လၢႆႊသိၼ်ႊ ဝႃႈၼႆ။
သိုၵ်းမၢၼ်ႈပိုၼ်ႇၽၢဝ်ႇလၢတ်ႈဝႆႉဝႃႈ ယွၼ်ႉတေဢမ်ႇၶၢႆၼမ်ႉမၼ်းၸိူဝ်ႉၾႆးပၼ် ရူတ်ႉၵႃးဢမ်ႇမီး ဝတ်းဝႂ်လႄႈ သင်ၸိူဝ်ႉၵူတ်ႇထတ်းႁၼ်မႅၼ်ႈ ရူတ်ႉၵႃးဢမ်ႇမီးဝႂ်လၢႆႊသိၼ်ႊ ၶဝ်ႈထႅဝ်ပႂ်ႉသိုဝ်ႉ ၼမ်ႉမၼ်း တီႈပၢမ်ႉၼမ်ႉမၼ်းၸိုင် တေဢဝ်လိူင်ႈဝႃႈၼႆ။
ဝၢႆးသိုၵ်းမၢၼ်ႈပိုၼ်ႇၽၢဝ်ႇယဝ်ႉ ဝၼ်းတီႈ 12/3/2026 ယၢမ်းၵၢင်ၼႂ် ပၢမ်ႉၼမ်ႉမၼ်း တီႈဝဵင်း တူၼ်ႈတီး ၵူတ်ႇထတ်းရူတ်ႉၵႃးၸိူဝ်းမီးဝႂ်လၢႆႊသိၼ်ႊသေ ၸင်ႇၶၢႆပၼ်ၼမ်ႉမၼ်းလႄႈ ႁဵတ်းႁႂ်ႈ ၵူၼ်းႁႃၸဝ်ႉၵိၼ်ၶမ်ႈ ယၢပ်ႇၽိုတ်ႇၵိၼ်းၸႂ်။
ၵူၼ်းၶၢႆၵၢတ်ႇတီႈဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ ဝတ်းဝႂ်လၢႆႊသိၼ်ႊၵေႃႈ ဢမ်ႇမီး ၊ ပေႃးၵႂႃႇႁဵတ်း သဵင်ႈငိုၼ်းၼမ်ၼႃႇၶႃႈ ၊ ဢမ်ႇၸၢင်ႈႁဵတ်းႁိုဝ်ၶႃႈ ပေႃးဢမ်ႇၶၢႆပၼ်ၵေႃႈလူဝ်ႇလႆႈဢဝ်တဝ်ႈၼမ်ႉမၼ်းၵႂႃႇသိုဝ်ႉဢဝ်ၵူၺ်းဢေႃႈ ၊ ပေႃးဢမ်ႇၸၢင်ႈၶီႇရူတ်ႉၵေႃႈဢမ်ႇၸၢင်ႈႁဵတ်းႁိုဝ်ႁႃၵိၼ်လဵင်ႉတွင်ႉယဝ်ႉၶႃႈ လႆႈဢဝ်ရူတ်ႉၼႆႉသေ ႁဵတ်းၵိၼ်ၵူၺ်း”- ဝႃႈၼႆ ။
မိူဝ်ႈ ဝၼ်းတီႈ 11/ 3/2026 ၼၼ်ႉၵေႃႈ ယူႇတီႈႁွင်ႈၵၢၼ်ၵဵဝ်ႇၶွင်ႈ တႂ်ႈသိုၵ်းမၢၼ်ႈ ပၼ်ပၢင်သွၼ် ၸဝ်ႈပၢမ်ႉၼမ်ႉမၼ်း လွၵ်းလၢႆးၵုမ်းၼႂ်းၵၢၼ်သိုဝ်ႉၶၢႆၼမ်ႉမၼ်းၸၢၵ်ႈ (Fuel Control System ) တီႈႁၢၼ်ႉၼမ်ႉမၼ်း BOC ဝဵင်းတူၼ်ႈတီး ။ မီးၵူၼ်းၶဝ်ႈႁူမ်ႈပၢင်သွၼ် 70 ၵေႃႉ- လႆႈႁူႉၼင်ႇၼႆ ။
ၸဝ်ႈႁၢၼ်ႉၶၢႆၼမ်ႉမၼ်း တီႈဝဵင်းၼမ်ႉၸၢင်လၢတ်ႈၽူႈတွႆႇႁွၵ်ႈဝႃႈ -“ ပေႃးၸႂ်ႉတိုဝ်းလၢႆးၼႆႉ ဢၼ်တေယၢပ်ႇမၼ်းၵေႃႈ ၵူၼ်းၸိူဝ်းၶီႇရူတ်ႉၵႃးဢမ်ႇမီးဝတ်းဝႂ်လၢႆႊသိၼ်ႊ ၸိူဝ်းၼၼ်ႉ ၶဝ်တေဢမ်ႇၸၢင်ႈသႂ်ႇၼမ်ႉမၼ်း ၊ ၵိုင်ႉၵၢင်ႉမႃးဢွၵ်ႇပိူင် မိူဝ်ႈဝႃးမိူဝ်ႈသိုၼ်း သေ တေႁႂ်ႈၸႂ်ႉတိုဝ်း ၵမ်းသိုဝ်ႈတႄႉ တေပႆႇပဵၼ်လႆႈ ယူႇတီႈႁၢၼ်ႉၵေႃႈတေၸၢင်ႈမီး လွင်ႈၶွင်ႈၶမ်လၢႆလွင်ႈ”- ဝႃႈၼႆ ။
တွၼ်ႈတႃႇၼမ်ႉမၼ်းၸိူဝ်ႉၾၢႆး (ၼမ်ႉမၼ်းၸၢၵ်ႈ ) တေဢမ်ႇၶၢတ်ႇလႄႈ တွၼ်ႈတႃႇ ႁၢၼ်ႉၶၢႆပမ်ႉၼမ်ႉမၼ်း တေၵုမ်းၵၢၼ်သိုဝ်ႉၶၢႆလႆႈ လွင်ႈၶၢႆၼမ်ႉမၼ်းၼၼ်ႉၼႆသေ ၼႂ်းဝၼ်းတီႈ 11/3/2026 ၼႆႉသိုၵ်းမၢၼ်ႈပိုၼ်ၽၢဝ်ႇဢွၵ်ႇမႃးဝႃႈ ရူတ်ႉၶိူင်ႈ လႄႈ ၵႃးၼႆႉ ၼိုင်ႈဝၼ်းလႂ် တေမီးသုၼ်ႇ သႂ်ႇၼမ်ႉမၼ်းၸၢၵ်ႈ ၼိုင်ႈပွၵ်ႈၵူၺ်း ။
ယွၼ်ႉပိူဝ်ႈႁွင်ႈၵၢၼ်လူင်ၾၢႆႇႁႅင်းထၢတ်ႈ မိူင်းမၢၼ်ႈ တေတႄႇၸႂ်ႉတိုဝ်ႉ ၻီႊၵျိတ်ႊထႄလ်ႊ သႅၼ်းၼိုင်ႈ ။ ယူႇတီႈႁၢၼ်ႉၶၢႆပမ်ႉၼမ်ႉမၼ်းတၢင်းသဵၼ်ႈ တေလႆႈ လူတ်ႇဢႅပ်ႉ Application ဢၼ်ၸၢင်ႈၵူတ်ႇထတ်း သဵၼ်ႈမၢႆၶေႃႈမုလ်း ရူတ်ႉၵႃးလႆႈႁင်းၵူၺ်း ။
ၼင်ႇႁိုဝ်ၵူၼ်းမိူင်း တေဢမ်ႇဢဝ်ရူတ်ႉၶိူင်ႈ လႄႈ ၵႃး ၵႂႃႇသိုဝ်ႉၼမ်ႉမၼ်းၸၢၵ်ႈသႂ်ႇ ၼိုင်ႈလမ်းလႂ် သွင်သၢမ် ပွၵ်ႈၼႆႉ ၾၢႆႇသိုၵ်းမၢၼ်ႈ ၸတ်းပိူင်သိုဝ်ႉၼမ်ႉမၼ်းၸၢၵ်ႈ ႁဵတ်း QR code ဢၼ်ပႃးၶေႃႈမုၼ်းသုၼ်ႇတူဝ် ၸဝ်ႈၶွင်ရူတ်ႉၵႃး ၸိူဝ်းတၢင်ႇမၢႆၾၢင်ဝႆႉ (Wheel Tax) ၼၼ်ႉ သႂ်ႇဝႆႉၼႂ်း Application သေ တေၵူတ်ႇထတ်း ၸတ်းပိူင်ၵၢၼ်သိုဝ်ႉၶၢႆ ၼမ်ႉမၼ်းၸၢၵ်ႈၵႂႃႇ ၼႆယဝ်ႉ။
ရူတ်ႉၶိူင်ႈ လႄႈ ၵႃး ၸိူဝ်းတၢင်ႇမၢႆၾၢင်ဝႆႉပဵၼ်တၢင်းၵၢၼ်ၼၼ်ႉၵူၺ်း မီးသုၼ်ႇၵႂႃႇသိုဝ်ႉ ၼမ်ႉမၼ်းၸၢၵ်ႈသႂ်ႇလႆႈ ၸွမ်းႁၢၼ်ႉၶၢႆၼမ်ႉမၼ်းၸၢၵ်ႈ ဢၼ်ယႂ်ႇဢၼ်လူင်လႄႈ မိူဝ်ႈၵႂႃႇသိုဝ်ႉ ၼမ်ႉမၼ်းၸၢၵ်ႈသႂ်ႇၼၼ်ႉ ၵူၼ်းသိုဝ်ႉတေလႆႈၵႂႃႇ သၵႅၼ်း Scan QR code ယဝ်ႉၸင်ႇသႂ်ႇလႆႈ ဝႃႈၼႆ။
ၼၢင်းယိင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“တီႈတူၼ်ႈတီးၼႆႉ ၵူၼ်းဢၼ်မီးဝတ်းဝႂ် လၢႆႊသိၼ်ႊ ၼႆႉမီးၵမ်ႈဢႄႇၵူၺ်း ၊ ပေႃးဢမ်ႇမီးဝတ်းဝႂ် ဢမ်ႇၸၢင်ႈ သႂ်ႇမၼ်းၵေႃႈ ၵူၼ်းၶဝ်ႈထႅဝ် သိုဝ်ႉၼမ်ႉမၼ်း တေယွမ်းလူင်းၵႂႃႇ ၊ ၵူၼ်းႁဵတ်းႁႃၵိၼ်ဝၼ်းလႂ်ဝၼ်းၼၼ်ႉၵူၺ်းဢေႃႈ တေယၢပ်ႇၵိၼ်းမႃးထႅင်ႈ ၊ ၶဝ်ဝူၼ်ႉၸိူင်ႉႁိုဝ်သေႁဵတ်းမႃးပိူင်ၸိူင်ႉၼႆၵေႃႈဢမ်ႇႁူႉ ၊ ဢဝ်ၵူၼ်းမိူင်း ယၢပ်ႇထႅင်ႈ”- ဝႃႈၼႆ ။
သိုၵ်းမၢၼ်ႈပိုၼ်ႇၽၢဝ်ႇလၢတ်ႈဝႆႉဝႃႈ – ၶိူင်ႈၸၢၵ်ႈ လႄႈ ပိူင်ၵၢၼ်လူတ်းယွမ်းၸႂ်ႉတိုဝ်း ၼမ်ႉမၼ်းၸၢၵ်ႈ ဢၼ်သိုၵ်းမၢၼ်ႈယိုတ်းမိူင်း ၶူင်ဢွၵ်ႇမႃးမႂ်ႇ ၼႆႉ တေတႄႇၸႂ်ႉတိုဝ်းၵႂႃႇ တီႈဝဵင်းလူင်ၼေႇပျီႇတေႃႇ၊ ဝဵင်းတႃႈၵုင်ႈ (ယၼ်ႇၵုင်ႇ) ၊ ဝဵင်းလိူဝ်ႇ (မၢၼ်းတလေး) လႄႈ ဝဵင်းတူၼ်ႈတီး ဢွၼ်တၢင်းသုတ်းပိူၼ်ႈ ဝႃႈၼႆ။
တွၼ်ႈတႃႇၼမ်ႉမၼ်းၸိူဝ်ႉၾႆးဢမ်ႇၶၢတ်ႇၼၼ်ႉ ၼႂ်းဝၼ်းတီႈ 3 လိူၼ်ထူၼ်ႈသၢမ် သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဢွၵ်ႇမႃးတွၼ်ႈတႃႇ ႁႂ်ႈၵူၼ်းမိူင်း ယွမ်ႉၸႂ်ႉၼမ်ႉမၼ်းၸိူဝ်ႉၾႆး ၸိူဝ်းမီးဝႆႉရူတ်ႉၵႃး (သုၼ်ႇတူဝ်)ၼၼ်ႉ တေဢမ်ႇလႆႈၸႂ်ႉတိုဝ်းဢွၵ်ႇတၢင်းၼွၵ်ႈၵူႈဝၼ်း ။ ရူတ်ႉၵႃးၸိူဝ်းပဵၼ် မၢႆၵူႈလႄႈ မၢႆၵိၵ်ႈ တေလႆႈၵႂႃႇပၼ်ပုတ်ႈၵၼ်ၵႂႃႇမႃး ။ သင်ၽူႈမီးပုၼ်ႈၽွၼ်းၶဝ် ၵူတ်ႇထတ်းႁၼ် တေထုၵ်ႇတီႉၺွပ်းဢဝ်လိူင်ႈၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ