တႄႇၵၢင်လိူၼ် ၾႅပ်ႉပိဝ်ႊရီႊၼႆႉမႃး ၵၢင်ႉၵႄႇႁူမ်ႈ သိုၵ်းမၢၼ်ႈ ၵူတ်ႇထတ်းသဵၼ်ႈမၢႆၶႅၵ်ႇယဝ်ႉ တီႉၺွပ်းၵူၼ်းၼုမ်ႇ ယၢမ်းၵၢင်ၶမ်ႈၵၢင်ၶိုၼ်း ႁၢဝ်ႈႁႅင်း တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။
ၵၢင်ႉၵႄႇႁူမ်ႈသိုၵ်းမၢၼ်ႈ ၶဝ်ႈၵူတ်ႇထတ်းသဵၼ်ႈမၢႆၶႅၵ်ႇ တီႈပွၵ်ႉၼႂ်းယွမ်သေ ၊ ၵၢင်ၶမ်ႈ 8 မူင်းထိုင် 11မူင်း ပႂ်ႉၵူတ်ႇထတ်းတီႉၺွပ်းၵူၼ်းၼုမ်ႇၸွမ်းတႃႈၸွမ်းတၢင်း ။ ပိူင်ယႂ်ႇ တေပႂ်ႉၵူတ်ႇထတ်းၵူၼ်းၼုမ်ႇ ၸိူဝ်းၵႂႃႇၼင်ႈၵိၼ်ၵျေႃႇ တီႈႁၢၼ်ႉၶၢႆလဝ်ႈ ပီႊယႃႊသေ ပွၵ်ႈမိူဝ်းႁိူၼ်းၶိုၼ်း ၵူၼ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ။
ၵူၼ်းၸၢႆးဢႃယု 28 လၢတ်ႈၽူႈတွႆႇႁွၵ်ႈဝႃႈ – “ ပေႃးၵၢင်ၶမ်ႈမႃးၼႆႉ ၵၢင်ႉၵႄႇႁူမ်ႈသိုၵ်းမၢၼ်ႈ တေၶဝ်ႈ ၵူတ်ႇထတ်းသဵၼ်ႈမၢႆၶႅၵ်ႇ ၊ ပေႃးပဵၼ်ႁူင်းသဝ်း (ဢသွင်ႇ) ၵူၼ်းၸၢႆးၼႆႉထၢမ်တႂ်ႈထၢမ်ၼိူဝ် ၊ ပေႃးဢမ်ႇ သၢင်ႇတေႃႇတီႉၺွပ်းၵႂႃႇပႃး ၊ ၸွမ်းတႃႈၸွမ်းတၢင်းၵေႃႈ သိုၵ်းမၢၼ်ႈၶဝ် ၵႆႉတီႉၺွပ်း ၵူၼ်းၵႂႃႇမႃး ၽွင်းၵၢင်ၶမ်ႈၵၢင်ၶိုၼ်းၼႃႇ ၊ ၵူၼ်းပႃးၵႂႃႇမီးၼမ်ၼႃႇ” -ဝႃႈၼႆ ။
မိူၼ်ၼင်ႇၼႆ ပူၼ်ႉမႃး ဝၼ်းတီႈ 15/2/2026 ၼၼ်ႉၵေႃႈ သိုၵ်းမၢၼ်ႈၵူတ်ႇထတ်းတီႉၺွပ်း ၼုမ်ႇၸၢႆး 5 ၵေႃႉ ၼႂ်းပွၵ်ႉ ၵျွင်းၵျီးၸု လႄႈ ၶျၢမ်းသႃႇ ဝဵင်းတူၼ်ႈတီး။ ၼႂ်းဝၼ်းတီႈ 17 ၼႆႉသမ်ႉ ပလိၵ်ႈမၢၼ်ႈ ၵူတ်ႇထတ်းတီႉၺွပ်းၵူၼ်းၼုမ်ႇၵႂႃႇထႅင်ႈ ၼႂ်းပွၵ်ႉ ၵၼ်ႇတႃႇ ဝႃႈၼႆသေတႃႉ ႁူဝ်ၼပ်ႉတႅတ်ႈတေႃးတႄႉ ပႆႇမီးၽႂ်ယိုၼ်ယၼ်။
ၵူၼ်းၸၢႆးပိုၼ်ႉတီႈၼႂ်းဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ ပေႃးၶဝ်(သိုၵ်းမၢၼ်ႈ) ၵဵပ်းၵူၼ်းႁၢပ်ႇၵၢၼ်သိုၵ်းၼႆႉလီၾၢင်ႉၼႃႇ ၊ ၵၢင်ၶမ်ႈၸိူဝ်းၼႆႉ ၶဝ်တေလမ်းတီႉၺွပ်းၵူၼ်းႁၢပ်ႇၵၢၼ်သိုၵ်း ၊ ၼႂ်းလိူၼ်ၼႆႉၵူၺ်း တီႈဝဵင်းတူၼ်ႈတီႈ ၊ ယွင်ႁူၺ်ႈ ၸိူဝ်းၼႆႉပႃးၵႂႃႇၼမ်ၼႃႇ ”- ဝႃႈၼႆ ။
ၵူၼ်းဢၼ်ထုၵ်ႇတီႉၺွပ်းၵႂႃႇၼၼ်ႉ ထုၵ်ႇသူင်ႇၾိုၵ်းၵၢၼ်သိုၵ်း တီႈဝဵင်းလွၵ်ႉၸွၵ်ႇ ပႃႉထူး သေ ၊ မၢင်ၸိူဝ်းလႆႈပၼ်ငိုၼ်း 50 သႅၼ်သေထုၵ်ႇတူဝ်လႆႈမႃးၶိုၼ်း – ၵူၼ်းပိုၼ်ႉတီႈလၢတ်ႈ ။
ၸွမ်းၼင်ႇသဵၼ်ႈမၢႆ TGI Support Revolution ၵဵပ်းဝႆႉၼၼ်ႉတႄႉ ၼႂ်းလိူၼ်ၾႅပ်ႉပိဝ်ႊရီႊၼႆႉၵူၺ်း ၵူၼ်းၼုမ်ႇၸိူဝ်းထုၵ်ႇတီႈၺွပ်း တီႈသဵၼ်ႈတၢင်းဝႃးပျႃး 5 ၵေႃႉ ၊ တၢင်းၵၢတ်ႇၼႂ်းပွၵ်ႉ ၸဝ်ႈၸၢမ်ႇထုၼ်း 2 ၵေႃႉ ၊ ၼႂ်းပွၵ်ႉၶျၢၼ်းမျႃႉ 3 ၵေႃႉ ၊ တၢင်းၾၢႆႇတူၵ်း ပွၵ်ႉသူၺ်ႇတွင်ႇ 10 ၵေႃႉ ၊ ၼႂ်းပွၵ်ႉ ၵၢၼ်ႇတႃႇ 5 ၵေႃႉ ၊ ၼႂ်းပွၵ်ႉရတၼႃႇသီႇရိ 1 ၵေႃႉ ၊ တၢင်းပွၵ်ႉ ဝၢင်းႁူင်းၾႆးမိၼ်ႇ 3 ၵေႃႉ ၊ ႁိမ်းတပ်ႉ( 212 ) 2 ၵေႃႉ ၼႆယဝ်ႉ ။
ယွၼ်ႉပလိၵ်ႈသိုၵ်းမၢၼ်ႈ လိုပ်ႈလမ်းတီႉၺွပ်း ႁၢဝ်ႈႁႅင်းဝႆႉလႄႈ ႁဵတ်းႁႂ်ႈၵူၼ်း ဢၼ်ႁဵတ်းၵၢၼ် ႁႃၵိၼ် လဵင်ႉတွင်ႉ ၶၢႆႁၢၼ်ႉတၢင်းၵိၼ် ၵၢင်ၶမ်ႈ ၸိူဝ်းၼၼ်ႉၵေႃႈ လႆႈဢိုတ်းႁၢၼ်ႉၸဝ်ႉ ပဵၼ်ဢၼ်ယၢပ်ႇၸႂ် တႃႇႁႃၵိၼ်လဵင်ႉတွင်ႉဝႆႉ – ဝႃႈၼႆ။
မိူဝ်ႈလိူၼ်ထူၼ်ႈသွင် ပီ 2024 ၼၼ်ႉ သိုၵ်းမၢၼ်ႈပိုၼ်ၽၢဝ်ႇ ပၵ်းပိူင် ၵူၼ်းမိူင်းတေလႆႈႁဵတ်းသိုၵ်း။ ဝၢႆးၼၼ်ႉၼိုင်ႈလိူၼ် သိုၵ်းမၢၼ်ႈတႄႇၵဵပ်းၵူၼ်းၼုမ်ႇ သူင်ႇၾိုၵ်းၵၢၼ်သိုၵ်း။
ယၢမ်းလဵဝ် ပၢင်သွၼ်ၵၢၼ်သိုၵ်း ဢၼ်သိုၵ်းမၢၼ်ႈၸတ်းႁဵတ်းယူႇၼႆႉ ထိုင်မႃးပွၵ်ႈၵမ်း 22 ၊ ဝၼ်းတီႈ 18/2/2026 ၼႆႉ သိုၵ်းမၢၼ်ႈၸတ်းပၢင်ပိုတ်ႇ ပၢင်သွၼ်ၵၢၼ်သိုၵ်းထႅင်ႈ တီႈၼႂ်းတပ်ႉသိုၵ်း ဢၼ်မၵ်းမၼ်ႈဝႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ