ၼႂ်းႁူဝ်လိူၼ် ၾႅပ်ႉပိဝ်ႊရီႇၼႆ ၵၢင်ႉၵႄႇပွၵ်ႉရတၼႃႇသီႇရိ ႁွင်ႉၵူၼ်းမိူင်းၸိူဝ်းယူႇၼႂ်းပွၵ်ႉ ႁဵတ်းပၢင်ၵုမ်သေ လွၵ်ႇငိုတ်ႈတီႈမုင်ႉႁေႃႁိူၼ်း ၸိူဝ်းမီးၼုမ်ႇၸၢႆး ဢႃႇယု 18 ပီ ထိုင် 35 ပီ ဢၼ်ပႃးၼႂ်းသဵၼ်ႈမၢႆ တႃႇႁၢပ်ႇၵၢၼ်သိုၵ်း ၼႂ်းဝဵင်းတူၼ်ႈတီးယဝ်ႉ ယွၼ်းငိုၼ်း ၼိုင်ႈၵေႃႉလႂ် 40 သႅၼ်ပျႃး ၼႆယဝ်ႉ။

သင်ဢမ်ႇပၼ်ငိုၼ်းလႆႈၼႂ်းၶၢဝ်းတၢင်း 3 ဝၼ်းၸိုင် တေသူင်ႇၾိုၵ်းၵၢၼ်သိုၵ်းၵမ်းသိုဝ်ႈၼႆ ၵၢင်ႉၵႄႇလွၵ်ႇငိုတ်ႈဝႆႉၼင်ႇၼႆလႄႈ ႁဵတ်းႁႂ်ႈၵူၼ်းပိုၼ်ႉတီႈယၢပ်ႇၽိုတ်ႇၵိၼ်းၸႂ် ဝႃႈၼႆ။

ၵူၼ်းၸမ်ၸႂ်ၵၢင်ႉၵႄႇ ဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ႁိူၼ်းဢၼ်မီးလုၵ်ႈၸၢႆးၼၼ်ႉ ၵၢင်ႉၵႄႇႁွင်ႉပၢင်ၵုမ်သေ ယွၼ်းငိုၼ်း ၊ ပေႃးပႃးသဵၼ်ႈၸိုဝ်ႈႁၢပ်ႇၵၢၼ်သိုၵ်းၼႆႉ လႆႈပၼ်ၼိုင်ႈၵေႃႉ 40 သႅၼ်ပျႃးၼႆဢေႃႈ ၊ ပေႃးဢမ်ႇပၼ်တေသူင်ႇၾိုၵ်းၵၢၼ်သိုၵ်းၼႆလွၵ်ႇဝႆႉပႃးၼင်ၼႆၶႃႈ”– ဝႃႈၼႆ ။

ၵူၼ်းၼႂ်းပွၵ်ႉရတၼႃႇသီႇရိ ၸိူဝ်းဢမ်ႇပႃးၼႂ်းသဵၼ်ႈမၢႆႁၢပ်ႇၵၢၼ်သိုၵ်းၼႆႉ ၼိုင်ႈလိူၼ်လႆႈပၼ်ငိုၼ်းတီႈၵၢင်ႉၵႄႇပွၵ်ႉၼၼ်ႉ 1 သႅၼ်ပျႃး၊ ၵူၼ်းၸိူဝ်းပႃးၼႂ်းသဵၼ်ႈၸိုဝ်ႈႁၢပ်ႇၵၢၼ်သိုၵ်း သမ်ႉလႆႈပၼ်ထိုင် 40 သႅၼ်ပျႃး။ ယွၼ်ႉလႆႈပၼ်ငိုၼ်းၵမ်ႉထႅမ်တႃႇႁၢပ်ႇၵၢၼ်သိုၵ်းၼမ်လိူဝ်ၵူႈပွၵ်ႈလႄႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈဢၼွ်ၵၼ်ၶၢင်းပွင်ႉဢွၵ်ႇလွင်ႈယၢပ်ႇ ၵိၼ်းႁင်းၽႂ်မၼ်း။

ၼၢင်းယိင်းၵေႃႉယူႇဝႆႉၼႂ်းပိုၼ်ႉတီႈသေ တၢမ်တူဝ်မၼ်းၼၢင်းလႆႈသႂ်ႇငိုၼ်းတႃႇႁၢပ်ႇၵၢၼ်သိုၵ်းၵူႈလိူၼ် ပၼ်တီႈၵၢင်ႉၵႄႇၼၼ်ႉလၢတ်ႈၽူႈတွႆႇႁွၵ်ႈဝႃႈ -“တွၼ်ႈတႃႇၵူၼ်းႁႃၸဝ်ႉ ၵိၼ်ၶမ်ႈ မိူၼ်ႁဝ်းၶႃႈၼႆႉ ပေႃးလႆႈငိုၼ်းမႃး လႆႈၽႄဝႆႉတွၼ်ႈတႃႇသႂ်ႇငိုၼ်းတႃႇႁၢပ်ႇၵၢၼ်သိုၵ်းဢွၼ်တၢင်း ၊ ယွၼ်ႉမႆႈၸႂ် ၵူဝ်ႇလႆႈၵႂႃႇႁၢပ်ႇၵၢၼ်သိုၵ်းလႄႈ ယွၼ်းၵႃႈႁိုဝ်ၵေႃႈ လႆႈပၼ်ဢေႃႈ ။ ပၼ်ငိုၼ်းယူႇၵူႈလိူၼ်ၼႆႉ ယင်းတိုၵ်ႉလႆႈမႆႈၸႂ်ဝႃႈ လိူၼ်လႂ်ၶဝ်တေၵဵပ်းၵူၼ်းၼႆယူႇ”-ဝႃႈၼႆ ။

ပွၵ်ႉဢၼ်လႆႈသႂ်ႇငိုၼ်းၼမ်သုတ်းတီႈဝဵင်းတူၼ်ႈတီးၼႆႉ ပဵၼ်ပွၵ်ႉလၢၼ်းမတေႃႇ (လမ်းမတော်) ၊ သူၺ်ႇတွင်ႇ (ရွှေတောင်) ၊ မဵဝ်ႉမ( မြို့မ ) ၊ ၵၢၼ်ႇဢွၵ်ႉ ( ကန်အောက် ) ၊ ပျီႇတေႃႇသႃႇ ( ပြည်တော်သာ) ၊ ပွၵ်ႉပႃႇမႆႉ ( သစ်တော ) ၊ ပွၵ်ႉၼမ်ႉၵတ်း ( ရေအေးကွင်း ) ၸဵမ်ၸိူဝ်းၼႆႉ။

ငိုၼ်းၵမ်ႉထႅမ်တႃႇႁၢပ်ႇၵၢၼ်သိုၵ်း ဢၼ်ၵၢင်ႉၵႄႇၶဝ်ယွၼ်းတီႈၵူၼ်းမိူင်းၼႆႉ ၼိုင်ႈလိူၼ်လႆႈ ပၼ် 1 မိုၼ်ႇထိုင် 5 မိုၼ်ပျႃး ႁိုင်မႃးၶၢဝ်းတၢင်းမွၵ်ႈ 2 ပီယဝ်ႉ ဝႃႈၼႆ။

ၸဵမ်မိူဝ်ႈသိုၵ်းမၢၼ်ႈ တႄႇၵဵပ်းသိုၵ်းမႂ်ႇ ဝၢႆးလင်ယိုတ်းဢႃႇၼႃႇၸိုင်ႈမိူင်းယဝ်ႉၼၼ်ႉ ယၢမ်ႈပိုၼ်ၽၢဝ်ႇလၢတ်ႈဝႃႈ – ၵၢၼ်ၵဵပ်းသိုၵ်းမႂ်ႇၼႆႉ ပဵၼ်တႃႇလူလွမ် ပႂ်ႉဢဝ်လွင်ႈႁူမ်ႇလူမ်ႈ ၼႂ်းဢွင်ႈတီႈၽႂ် မၼ်းၵူၺ်းဝႃႈၼႆသေတႃႉ ၵူၼ်းၸိူဝ်းပႃးၼႂ်းသဵၼ်ႈမၢႆတႃႇႁၢပ်ႇၵၢၼ်သိုၵ်းၼၼ်ႉ ထုၵ်ႇသူင်ႇၸူးၼႃႈသိုၵ်းသေ လူႉတၢႆမႃးၵေႃႈမီးတင်းၼမ်။ ယၢမ်းလဵဝ် ၵၢၼ်ၵဵပ်း ၵူၼ်းၶဝ်ႈႁၢပ်ႇၵၢၼ်သိုၵ်းၼႆႉ ပဵၼ်ၸုပ်ႈထီႉ 21 ယဝ်ႉ ။