သိုၵ်းလူင်ပွင်ၸိုင်ႈမၢၼ်ႈ တင်း ၸုမ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ် ၾၢႆႇဢွၵ်ႇဝဵင်းလႃႈသဵဝ်ႈ ထပ်းၵၼ်ၶိူဝ်းယႂ်း ၼႂ်းလုၵ်ႈလိူၼ်ၼႆႉၵူၺ်းပဵၼ်ပၢင်တိုၵ်းလၢႆလၢႆၵမ်း ၵူၼ်းမိူင်းၸိူဝ်းၺႃးၸၢၵ်ႇသိုၵ်း လႆႈပၢႆႈယၢၼ်ႁိူၼ်းယေးတီႈယူႇ။
ဝၼ်းတီႈ 4/9/2020 ယၢမ်းၵၢင်ၼႂ် 8 မူင်းထိုင် 10 မူင်း သိုၵ်းလူင်ပွင်ၸိုင်ႈမၢၼ်ႈ တႂ်ႈတပ်ႉၸုမ်းလူင်/တပ်ႉမ 66 တင်း တပ်ႉမ 99 တပ်ႉၵွင် ၶမယ 352 တင်း 364 ၸိူဝ်းၵႂႃႇတူင်ႉၼိုင် ၾၢႆႇဢွၵ်ႇဝဵင်းလႃႈသဵဝ်ႈ ၼၼ်ႉ ႁႅၼ်းသိုၵ်းလေႃႇတိုၵ်း၊ ႁႅၼ်းၶိူင်ႈ မိၼ်လေႃႇတိုၵ်း ၸုမ်းဢူၺ်းလီ သိုၵ်းပွတ်းႁွင်ႇ။ သွင်ၾၢႆႇပဵၼ်ပၢင်တိုၵ်း ၵၼ်တၢင်းဢိူင်ႇမိူင်းယေႃ ၊ ဢိူင်ႇမိူင်းၵႅတ်ႈ၊ ဢိူင်ႇဝၢၼ်ႈမၢၵ်ႇ၊ ဢိူင်ႇၽႃႇၽိုင်ႈ ၸိူဝ်းၼႆႉ။
ၵူၼ်းမိူင်းၵႅတ်ႈ လၢတ်ႈဝႃႈ – “ မိူဝ်ႈဝၼ်းတီႈ 1 တင်း 2 ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ်မႅင်းမီႈသေ ယိုဝ်းၸွႆႈ။ ယဝ်ႉၵေႃႈ ၸႂ်ႉၶိူင်ႈၵွင်ႈလူင်ၶဝ် ဢၼ်ပၵ်းဝႆႉတီႈမိူင်းၵႅတ်ႈႁဝ်းၼႆႉသေ ယိုဝ်းၸွႆႈထႅင်ႈလူးၵွၼ်ႇ။ ႁဝ်းၶႃႈ ၵူၼ်းမိူင်း ဢွၼ်ၵၼ်တူၵ်းၸႂ် ၵူဝ်ၵၼ်ၶႃႈဢေႃႈ။ သဵင်ႁႅင်းၼႃႇၶႃႈလူင်။ ၵူၺ်းၵႃႈ လွင်ႈမၢတ်ႇၸဵပ်းလူႉတၢႆ တင်းသွင်ၾၢႆႇတႄႉ ဢမ်ႇလႆႈႁူႉၸွမ်းၶႃႈ။ ၼႂ်း ဝူင်ႈဝၢင်ႈၼႆႉ ပၢင်တိုၵ်းသိုၵ်းသိူဝ်ၵေႃႈ လိူဝ်မႃးႁႅင်း ၵူၼ်းမိူင်းၸိူဝ်းယူႇၸွမ်း တေးသၼ်လွႆၸွမ်းသၢပ်ႇၶူင်းၵေႃႈ မီးတၢင်း မႆႈၸႂ် လွင်ႈပၢင်တိုၵ်း၊ ဢမ်ႇၸၢင်ႈၵႂႃႇႁဵတ်းၵၢၼ်ႁႆႈ ၵၢၼ်သူၼ် တၢင်းပဵၼ်ၶူဝ်ႊဝိတ်ႉၵေႃႈၵူဝ်ဢေႃႈ”- ဝႃႈၼႆ။
သိုၵ်းလူင်ပွင်ၸိုင်ႈမၢၼ်ႈ ၼႆႉ ပိုၼ်ၽၢဝ်ႇၵိုတ်းတိုၵ်းၾၢႆႇလဵဝ် တေႃႇဢႃယုထႅင်ႈလိူၼ်ၼိုင်ႈ တေႃႇထိုင် လိူၼ်သႅပ်ႊ ထႅမ်ႊပိူဝ် သဵင်ႈသေတႃႉ သူင်ႇႁႅင်းသိုၵ်းၶိုၼ်ႈမႃးမိူင်းတႆးထႅင်ႈတင်းၼမ်၊ ယင်းၸႂ်ႉႁိူဝ်းမိၼ်တိုၵ်း လေႃႇတိုၵ်း သိုၵ်းၸၢဝ်းၶိူဝ်းယူႇ။
ယၢမ်းလဵဝ်သမ်ႉ ၸမ်ၶၢဝ်းပၢင်လိူၵ်ႈတင်ႈၵေႃႈပိူင်ၼိုင်ႈ ၊ ၶႂ်ႈယႃႉတၢင်း ၼေႃႇၽူႈတႅၼ်းသၽႃး လူင်းႁႃသဵင်ၵေႃႈ ပိူင်ၼိုင်ႈ ၊ တိုၼ်းတင်ႈၸႂ်ႁႂ်ႈပၢင်လိူၵ်ႈတင်ႈ ဢမ်ႇလႆႈၸတ်းလီၵေႃႈ ပဵၼ်လႆႈ ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း SHRF လၢတ်ႈၼႄၼင်ႇၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈဝႃႈ – “ သိုၵ်းမၢၼ်ႈ ပိုၼ်ၽၢဝ်ႇ ၵိုတ်းတိုၵ်း ၾၢႆႇလဵဝ်ဝႆႉ သမ်ႉႁႅၼ်းသိုၵ်း လေႃႇတိုၵ်းၸိူင်ႉၼႆ ဢၼ်ပိုၼ်ၽၢဝ်ႇၵေႃႈပဵၼ်ၶဝ် ဢၼ်ယိုဝ်းၵေႃႈပဵၼ်ၶဝ် ။ ထႅင်ႈလွင်ႈၼိုင်ႈၵေႃႈ မၼ်းတေၵဵဝ်ႇ ၵပ်းတင်းပၢင်လိူၵ်ႈတင်ႈ ၼႂ်းထုင်ႉၼၼ်ႉ၊ ၶဝ်ၶႂ်ႈယႃႉ ပႃႇတီႇၸၢဝ်းၶိူဝ်းၵူၺ်း”– ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈလႃႈသဵဝ်ႈၵေႃႈလၢတ်ႈဝႃႈ ၸမ်ပၢင်လိူၵ်ႈတင်ႈ လႄႈ ၸမ်ၶၢဝ်းလူင်းသူၼ်းတုမ်ၵူၼ်းမိူင်း တပ်ႉသိုၵ်းမၢၼ်ႈသမ်ႉ ထႅမ်ႁႅင်းသိုၵ်း ၶိုၼ်ႈမႃးၼႂ်းမိူင်းတႆးထႅင်ႈတင်းၼမ်။ လွင်ႈၼႆႉတိုၼ်းဢမ်ႇႁပ်ႉတွၼ်ႈ၊ တိုၼ်းမႃးယႃႉပၢင်လိူၵ်ႈတင်ႈယဝ်ႉ ဝႃႈၼႆ။
ထုင်ႉပဵၼ်ပၢင်တိုၵ်းယူႇၼႆႉ မီးတပ်ႉပႃႇတီႇမႂ်ႇသုင်ၸိုင်ႈတႆး SSPP/SSA ၊ မီးပႃး သိုၵ်းၶၢင် KIO/KIA ၊ တပ်ႉပျီႇတူႉၸိတ်ႉ မၢၼ်ႈပၢင်ႇ ဢၼ်ပူဝ်ႇမူၼ်းဢွၼ်ႁူဝ်။ ဢၼ်ပဵၼ်ပၢင်တိုၵ်းၵၼ်တင်းသိုၵ်းမၢၼ်ႈတႄႉ ပဵၼ်သိုၵ်းဢူၺ်းလီ 3 ၸုမ်း တပ်ႉသိုၵ်းတဢၢင်း၊ ၵူဝ်းၵၢင်ႉလႄႈ ရၶႅင်ႇ ။ ၶဝ်ႈသၢမ်ၸုမ်းၼႆႉၵေႃႈ ပိုၼ်ၽၢဝ်ႇၵိုတ်းသိုၵ်းဝႆႉ ၶၢဝ်းတၢင်း 70 ဝၼ်း တႄႇဢဝ် ဝၼ်းတီႈ 1/9/2020 တေႃႇထိုင် ဝၼ်းတီႈ 9/11/2020 ၶၢဝ်းပၢင်လိူၵ်ႈတင်ႈ လႄႈ ၵႅတ်ႇၶႄႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ဝႃႈၼႆ။
