ၸုမ်းၸၢဝ်းၶိူဝ်း EAO-s ဢၼ်လူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း NCA-s လႆႈၸႂ် ၽွမ်ႉပိၼ်ႇလၢႆႈၶေႃႈၵႂၢမ်း ဢၼ်ဝႃႈ “ဢမ်ႇၽၢတ်ႇဢွၵ်ႇ” ပဵၼ် “ၼင်ႇႁိုဝ်ၸိုင်ႈမိူင်းႁူမ်ႈတုမ်တေမၼ်ႈၵိုမ်း” ၼၼ်ႉဝႃႈၼႆ။

လူင်ပွင်ၸိုင်ႈ ပႃႇတီႇ NLD တေၸတ်းႁဵတ်း ပၢင်ၵုမ်လူင်လွင်ႈငမ်းယဵၼ် မိူင်းႁူမ်ႈတုမ် (UPC) ပွၵ်ႈၵမ်းထူၼ်ႈ 5 ၊ ဢမ်ႇၼၼ် ပၢင်ၵုမ်လူင်ပၢင်လူင် ပီႁူဝ်ပၢၵ်ႇ 21 ပွၵ်ႈၵမ်းထူၼ်ႈ 4 တင်ႈတႄႇဝၼ်းတီႈ 19-21/08/2020 ဝူင်ႈၼႆႉ။ တႃႇတေ လူင်းလၢႆးမိုဝ်း ၵိၼ်ၵႅၼ်ႇ တီႈပၢင်ၵုမ်လူင်ၵမ်းၼႆႉ လူင်ပွင်ၸိုင်ႈမၢၼ်ႈ၊ သိုၵ်းမၢၼ်ႈ၊ ၸုမ်းယိပ်းၵွင်ႈၵၢင်ႇ 10 ၸုမ်း (ၸုမ်းလူင်းလၢႆးမိုဝ်း NCA ) ၊ ပႃႇတီႇ ၵၢၼ်မိူင်း ၸိူဝ်းၼႆႉ လႆႈၸႂ် ၵၼ်ဝႆႉ လၢႆၶေႃႈ၊ ပႃးႁူဝ်ၶေႃႈ ၽၢတ်ႇ/ဢမ်ႇၽၢတ်ႇဢွၵ်ႇ – ၼႆယဝ်ႉ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵိူဝ်းၵုမ် RCSS/SSA ဢၼ်ဢွၵ်ႇၶၢဝ်းတၢင်း ၸွမ်းၸွမ်သိုၵ်းလူင် ယွတ်ႈသိုၵ်း သေ မီးဝႆႉယူႇတီႈၼေႇပျီႇတေႃႇၼၼ်ႉ လၢတ်ႈဝႃႈ – “မၼ်းဢမ်ႇလႆႈၸႂ်ႉတိုဝ်းၶေႃႈၵႂၢမ်း လွင်ႈတေၽၢတ်ႇ ဢွၵ်ႇ ဢမ်ႇလႆႈၽၢတ်ႇဢွၵ်ႇ ၼႆႉလႃးလႃး ။ ဢမ်ႇလႆႈၸႂ်ႉတိုဝ်းၶေႃႈၵႂၢမ်းၼႆႉသေ လႅၵ်ႈလၢႆႈၵႂႃႇၸႂ်ႉတိုဝ်း ၶေႃႈၵႂၢမ်းဢၼ်ဝႃႈ – “ၼင်ႇႁိုဝ်ၸိုင်ႈမိူင်းႁူမ်ႈတုမ်တေမၼ်ႈၵိုမ်း” ။ ၵူၺ်းၵႃႈ ႁူဝ်ယွႆႈမၼ်းတႄႉ မိူဝ်ႈလဵဝ် ပႆႇၸၢင်ႈလၢတ်ႈ” ဝႃႈၼႆ။

တေႃႇဢွင်ႇသၢၼ်းသူႉၵျီႇၵေႃႈ လၢတ်ႈတီႈပၢင်ၵုမ်လူင် UPDJC ဝၼ်းမိူဝ်ႈၼႆႉဝႃႈ ပၢႆးမိူင်းဝၼ်းမိူဝ်ႈၼႆႉ လၢႆၾၢႆႇလၢႆပႃႈၵေႃႈ ယွမ်းႁပ်ႉမႃး ပိူင်ၻီႊမူဝ်ႊၶရေႊသီႊၾႅတ်ႊတရႄႊ ယဝ်ႉလႄႈ ၼႆႉပဵၼ် တႃႈမုင်ႈ လူင်ႁဝ်းၶႃႈမႃးၶႃႈယဝ်ႉ၊ ဢၼ်တွပ်ႇထဵင်ၵၼ် လူၺ်ႈၶေႃႈၵႂၢမ်း ၼမ်ႉၵႂၢမ်းၼႂ်းလိၵ်ႈၵိၼ်ၵႅၼ်ႇ ၸိူဝ်းၼႆႉ ပဵၼ်လွင်ႈဢမ်ႇမီးလွင်ႈယုမ်ႇယမ်ၼိူဝ်ၵၼ်ၵူၺ်း – ဝႃႈၼႆ။

ၸၢႆးၶိူဝ်းလိူၼ် ၽူႈတႅမ်ႈပပ်ႉလိၵ်ႈ ပၢင်လူင် “ၽႂ်ၽိတ်းၽႂ်ထုၵ်ႇ တဵမ် 10 ပီ” ထတ်းသၢင်ဝႃႈ – “မိူဝ်းၼႃႈ တေၽၢတ်ႇဢွၵ်ႇ ဢမ်ႇၽၢတ်ႇဢွၵ်ႇ မိူင်းႁူမ်ႈတုမ်ဢၼ်ဝႃႈၼႆႉ ၸွမ်းၼင်ႇၵၢၼ်ႁဵတ်း ၵၢၼ်ၶဝ် ၶဝ်ၸဝ်ႈတေလၢတ်ႈယၢပ်ႇ၊ ၽၢတ်ႇဢွၵ်ႇဢမ်ႇၽၢတ်ႇဢွၵ်ႇၼႆႉ မၼ်းပဵၼ်ၵၢင်ၸႂ်ၵူၺ်း။ မိူဝ်ႈလဵဝ်ၼႆႉ ငဝ်းလၢႆးႁဝ်း မိူင်းႁူမ်ႈတုမ်ဢၼ်ၸိုၼ်ႈၸၢင်ႇ ဢၼ်ဝႃႈၼၼ်ႉ ႁဝ်းယင်းပႆႇလႆႈၸိမ်းလႆႈလႅမ်ႉ မႃးတူၺ်းသေပွၵ်ႈ။ ပေႃးႁဝ်းၵုမ်ႇမႃးဢဝ်လွင်ႈၽၢတ်ႇဢွၵ်ႇၼႆႉ ပဵၼ်ယႂ်ႇယူႇၼႆတႄႉ လွင်ႈၸၢဝ်းၶိူဝ်းႁဝ်း ႁဝ်းတေႃႇႁဝ်းၸိူဝ်းၼႆႉၵေႃႈ တေတႅၵ်ႇၵၼ်မႃးထႅင်ႈ မီးတင်းၼမ်။ ၼင်ႇႁိုဝ်ႁဝ်းတေႁူမ်ႈၵၼ်ၵႂႃႇ လႆႈၼၼ်ႉ တေလႆႈဢဝ်ၸွမ်းငဝ်းလၢႆးမၼ်းသေႁဵတ်းၵႂႃႇ” ၸၢႆးၶိူဝ်းလိူၼ် လၢတ်ႈၼႄၼင်ႇၼႆ။

တင်ႈတႄႇ မိူင်းၽွမ်ႉႁူမ်ႈၸိုင်ႈတႆး ႁူမ်ႈမိူင်းမၢၼ်ႈတူင်ႈပဵင်းဢဝ်ၵွၼ်းၶေႃမႃး – မိူဝ်ႈတႄႇၵၢၼ်လုၵ်ႉၽိုၼ်ႉ 1.ယိပ်းၵွင်ႈလုၵ်ႉၽိုၼ်ႉတိုၵ်းဢဝ်မိူင်းတႆးၵွၼ်းၶေႃ၊ 2. ႁဵတ်းၵၢၼ်ဢဝ်လွတ်ႈလႅဝ်းၵွၼ်းၶေႃ ဢမ်ႇလႆႈ ယဝ်ႉ ၵေႃႈ ဢဝ်လွင်ႈၾႅတ်ႊၻရႄႊ၊ ဢဝ်လွင်ႈမိူင်းႁူမ်ႈတုမ်ၸိုၼ်ႈၸၢင်ႇၼႆႉ ၶိုၼ်ႈၼႃႈမႃး။

မိူင်းသၼ်လွႆ ၶၢင်၊ ၶျၢင်း  တင်း တႆး တူၵ်းလူင်း ႁူမ်ႈမိူင်းမၢၼ်ႈ တူင်ႈပဵင်း ဢဝ်ၵွၼ်းၶေႃၼႆႉ လႆႈၸႂ် ၶေႃႈၵိၼ်ၵႅၼ်ႇ လိၵ်ႈႁူမ်ႈမၢႆ ပၢင်လူင် 1947 – မီး 9 ၶေႃႈ။ တွၼ်ႈ ၽၢတ်ႇဢွၵ်ႇ လႄႈ ဢမ်ႇၽၢတ်ႇဢွၵ်ႇ တင်ႈမိူင်းႁင်းၶေႃ ၼၼ်ႉ ဢမ်ႇသႂ်ႇပႃးဝႆႉၼႂ်းလိၵ်ႈႁူမ်ႈမၢႆပၢင်လူင်၊ ၵူၺ်းၵႃႈ ၶဵၼ်ႇတႅမ်ႈဝႆႉပႃး ၼႂ်းပပ်ႉ ပိူင်ငဝ်ႈပိုင်းမိူင်း (လၵ်းမိူင်း) 1947 ဝႆႉတႅတ်ႈတႅတ်ႈတေႃးတေႃး ဝႃႈ ပေႃးယူႇႁူမ်ႈၵၼ်တဵမ် 10 ပီယဝ်ႉ ဢမ်ႇလႆႈၸႂ်ယူႇၸွမ်းၵၼ်ထႅင်ႈၵေႃႈ ၽၢတ်ႇဢွၵ်ႇ တင်ႈမိူင်းႁင်းၶေႃႈလႆႈ။