ၼၢင်းယိင်းၵေႃႉၼိုင်ႈ ဢႃယု 60 ပီ လုၵ်ႉမိူင်းထႆး ပွၵ်ႈၶိုၼ်းႁိူၼ်း မိူင်းၼၢႆး ၼၼ်ႉ ၵိုင်ႉၵၢင်ႉလူႉတၢႆၽွင်းၵၵ်းတူဝ်ဝႆႉတီႈ ဝတ်ႉၵျွင်း ဝိပသၼႃမူဝ်းၵူၵ်ႉ ဢၼ်မီးတီႈ ပွၵ်ႉၼႃႈႁွင်ႇ။
မၼ်းၼၢင်းပဵၼ်ၵူၼ်းဝၢၼ်ႈသူၼ်မၢၵ်ႇယၢၼ်း ဢိူင်ႇၵုၼ်ၼႃး ၸေႈဝဵင်းမိူင်းၼၢႆး။ မၼ်းၼၢင်းလုၵ်ႉမိူင်းထႆးပွၵ်ႈမိူဝ်းထိုင် မိူင်းၼၢႆးမိူဝ်ႈဝၼ်းတီႈ 3/7/2020။ မိူဝ်းၵၵ်းတူဝ်ဝႆႉလႆႈ 11 ဝၼ်းသေ လႆႈလူႉတၢႆၵႂႃႇၼႂ်းပၢင်သဝ်းၵၵ်းတူဝ် မိူဝ်ႈဝၼ်းတီႈ 14/7/2020။
ၸၢႆးၸွမ်ၼုမ်ႇ ၽူႈတူင်ႉၼိုင်ၸွႆႈထႅမ်တူင်ႇဝူင်းၵူၼ်း မိူင်းၼၢႆးလၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ၾင်ၸွမ်းၵမ်းလဵဝ်ၶႃႈ။ မႄႈပႃႈၼၼ်ႉလႆႈႁူႉဝႃႈ တီႈမိူင်းထႆးၵေႃႈ လႆႈယႃတၢင်းပဵၼ်ႁူဝ်ၸႂ်မႃးၼႆၶႃႈဢေႃႈ။”- ဝႃႈၼႆ။
မေႃယႃၵူတ်ႇထတ်းတူၺ်းလႆႈႁူႉဝႃႈမၼ်းၼၢင်း ၼွၼ်းလပ်းသေ လႆႈသဵင်ႈၸႂ်ၵႂႃႇမွၵ်ႈၶၢဝ်းယၢမ်း 1 မူင်း ၵၢင်ၶိုၼ်းပုၼ်ႉ ယဝ်ႉဝႃႈၼႆ။
ဝၢႆးမၼ်းၼၢင်းတၢႆ မေႃယႃလႆႈဢဝ်ၼမ်ႉမုၵ်ႈၼမ်ႉလၢႆး ၵူတ်ႇထတ်းတူၺ်းတႄႉ ဢမ်ႇမီးၸိူဝ်ႉမႅင်းၶူဝ်ႊဝိတ်ႉ ၼင်ႇၵဝ်ႇ ဝႃႈၼႆ။
ယၢမ်းလဵဝ် တီႈမိူင်းၼၢႆးၼႆႉ ၵူၼ်းၵၵ်းတူဝ်ဝႆႉမီး 8 ၵေႃႉ ။ လႆႈသူင်ႇၸိူဝ်းၶဝ် ၵႂႃႇယူႇဝႆႉတီႈ ႁူင်းယႃမိူင်းၼၢႆးမူတ်းယဝ်ႉ လႆႈႁူႉၼင်ႇၼႆ။
