ၼႂ်းၶၢဝ်းတၢင်းမိူင်းတႆး သိုၵ်းသိူဝ်ၼမ် ဝၢၼ်ႈမိူင်းယုင်ႈၸွမ်းပၼ်ႁႃသိုၵ်းမၢၼ်ႈယိုတ်းမိူင်းၼႆႉ ၵူၼ်းမိူင်းလၢႆသႅၼ်းထၢၼ်ႈၵိၼ်းၸႂ်လွင်ႈယူႇလွင်ႈၵိၼ် ။ ဢၼ်ၵိၼ်းၸႂ်ႁႅင်း ပဵၼ် ၵူၼ်းၸိူဝ်းပၢႆးယူႇလီဢမ်ႇၶႅမ်ႉ ။

မိူၼ်ၼင်ႇ ယိင်းဢွၼ်ႇသီႇပေႃႉ ဢႃယု 12 ပီ ဢၼ်ၸပ်းတၢင်းပဵၼ်ပုမ်ယႂ်ႇ ဢၼ်ၵူၼ်းပိုၼ်ႉတီႈဝႃႈ ပၢင်ႈၵီႈၼႆၼၼ်ႉ ယၢမ်ႈၵႂႃႇယူတ်းယႃတူဝ်တီႈလႃႈသဵဝ်ႈသေတႃႉ ဝၢႆးသေမိူင်းသုၵ်ႉၸွမ်း ပၢင်ယၼ်ႇသိုၵ်း 1027 ယဝ်ႉ ၶၢတ်ႇၵၢၼ်ယူတ်းယႃၵႂႃႇ။ ယၢမ်းလဵဝ် တႃႇၽႃႇတတ်းယူတ်းယႃတူဝ်ၼၼ်ႉ ၼႃႈႁိူၼ်းဢမ်ႇပွင်ပဵၼ်လႆႈလႄႈ ၶႂ်ႈယွၼ်းတၢင်းၵမ်ႉၸွႆႈ ဝႃႈၼႆ။

ယိင်းဢွၼ်ႇၵူၼ်းသီႇပေႃႉ ဢၼ်ၸပ်းတၢင်းပဵၼ်ပုမ်ၵႂ်ႈပုမ်ယႂ်ႇၼႆႉ ၸိုဝ်ႈ ၼွင်ႉၽူၺ်းလိုၼ်း ဢႃယု 12 ပီ ပဵၼ်လုၵ်ႈယိင်း လုင်းပႃႉ ပႃႈၶိၼ်ႇဢေး ယူႇဝၢၼ်ႈၵွၵ်ႇတႅင် ဢိူင်ႇၼွင်ၵေႃႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ။

မၼ်းၼၢင်း ၸပ်းတၢင်းပဵၼ်ၼႆႉမႃး ၸဵမ်မိူဝ်ႈ ဢႃယု တိုၵ်ႉမီး 6 ၶူပ်ႇ ၊ ဢိင်ၼိူဝ်မုင်ႉႁေႃႁိူၼ်း ဢမ်ႇပွင်ပဵၼ်လႆႈသေ တေႃႉတႄႉ ၵိၼယႃႈယႃပၼ်ၸူဝ်ႈၵႅပ်ႉၸူဝ်ႈၵမ်းၵူၺ်း ၼႆ ၵူၼ်းဝၢၼ်ႈဢၼ်ႁူႉၸွမ်းလွင်ႈၼႆႉ လၢတ်ႈၼင်ႇၼႆ။

တၢင်းပဵၼ် ပုမ်ၵႂ်ႈပုမ်ယႂ်ႇၸိူင်ႉၼႆ ၵူၼ်းပိုၼ်ႉတီႈတႄႉ ဢွၼ်ၵၼ်ႁွင်ႉဝႃႈ တၢင်းပဵၼ်ပၢင်ႈၵီႈ ။

ၸၢႆးၵျေႃႇလူႇ ႁႅင်းၵၢၼ်ယၢၼ်မိူင်း ၵေႃႉပဵၼ် ပီႈဢၢႆႈၼွင်ႉၽူၺ်းလိုၼ်း လၢတ်ႈဝႃႈ – “ တႃႇယူတ်းယႃတူဝ်ၼွင်ႉယိင်းၼၼ်ႉ သူင်ႇငိုၼ်းမိူဝ်းပၼ်ယူႇသေတႃႉ ၵွပ်ႈဢမ်ႇပဵင်းပေႃးလႄႈ ယႃပၼ်လႆႈၸူဝ်ႈၵႅပ်ႉၵမ်းၵူၺ်း ။ ဢမ်ႇပေႉလႆႈၵႃႈၽႃႇတတ်း ။ မေႃယႃၶဝ်လၢတ်ႈတႄႉ တေသဵင်ႈမွၵ်ႈ 70 သႅၼ်ငိုၼ်းမၢၼ်ႈ ” – ဝႃႈၼႆ။

တႃႇၽႃႇတတ်းၼၼ်ႉ တေလူဝ်ႇၵူၼ်းလူႇလိူတ်ႈဢမ်ႇယွမ်း 5 ၵေႃႉ ၊ လိူတ်ႈၼွင်ႉၽူၺ်းလိုၼ်း ပဵၼ် Group B ။ ၸင်ႇၼၼ်လႄႈ ၽႂ်ယိုၼ်းမိုဝ်းထိုင်လႆႈၵေႃႈ ႁႂ်ႈၸွႆႈပၼ်ယႂ်ႇၼမ်သေၵမ်း ၼႆ – ပႃႈၶိၼ်ႇဢေး မႄႈ ၼွင်ႉၽူၺ်းလိုၼ်း ၵေႃႈ တုၵ်းယွၼ်းတၢင်းၸွႆႈထႅမ်ဝႆႉၼင်ႇၼႆ။

ၼွင်ႉၽူၺ်းလိုၼ်း ၵေႃႉဢၼ်ၸပ်းတၢင်းပဵၼ်ၵေႃႈ လၢတ်ႈဝႃႈ –

“ မေႃယႃၶဝ်လၢတ်ႈဝႃႈတႄႉ ႁႂ်ႈၼွင်ႉၵႂႃႇၽႃႇၼႆဝႃႇ ၊ မိူဝ်ႈၼွင်ႉၵႂႃႇၼႄမေႃယႃၵမ်းပူၼ်ႉတႄႉဝႃႈ တေလႆႈၽႃႇၼႆဢေႃႈ ။ ၵူၺ်းၵႃႈ ၼွင်ႉသမ်ႉတိုၵ်ႉၵေႃႉလဵၵ်ႉလႄႈပႆႇၽႃႇၼႆဢေႃႈ ။ ပေႃးၼွင်ႉ လႆႈထႅင်ႈလိူတ်ႈ ပီႈၼၢင်းတေဢွၼ်ၵႂႃႇယႃတူၺ်းထႅင်ႈ ။ ၸွႆႈထႅမ်ၼွင်ႉၽွင်ႈၶႃႈ ”

ၼွင်ႉၽူၺ်းလိုၼ်းၼႆႉ တင်ႈတႄႇမိူဝ်ႈ ၸပ်းတၢင်းပဵၼ်ပုမ်ၵႂ်ႈပုမ်ယႂ်ႇၼႆႉမႃးသေ ႁႅင်းလိူတ်ႇဢေႇ ၼႃႈလိူင် ၊ လႆႈထႅင်ႈလိူတ်ႈၵူႈလိူၼ် ယႃၵေႃႈ လႆႈၵိၼ်ပၼ်ၵူႈဝၼ်း ။ သင်ၽႂ်လႆႈႁူႉလႆႈငိၼ်းၸွမ်းယဝ်ႉ ႁႂ်ႈၵပ်းသိုပ်ႇတိတ်းတေႃႇၸွႆႈထႅမ်ပၼ်သေၵမ်း ၼႆ ပီၼွင်ႉၸမ်ၸႂ်ထႅင်ႈၵေႃႉၼိုင်ႈလၢတ်ႈၼင်ႇၼႆ။

ၵွၼ်ႇၼႃႈ ပၢင်ယၼ်ႇသိုၵ်း 1027 ၼၼ်ႉတႄႉ မုင်ႉႁေႃႁိူၼ်းမၼ်းၼၢင်း ယၢမ်ႈဢဝ်ၵႂႃႇယူတ်းယႃတီႈ ႁူင်းယႃလူင်လႃႈသဵဝ်ႈ။ ဝၢႆးသေ ၸႄႈဝဵင်းလႃႈဝဵင်းလႃႈသဵဝ်ႈ မီးပၢင်တိုၵ်းသိုၵ်းသိူဝ်ႁၢဝ်ႈႁႅင်းယဝ်ႉ ႁူင်းယႃၸိူဝ်းၼၼ်ႉၵေႃႈ ဢမ်ႇပၼ်ႇၵၢၼ်လႆႈ ၊ သဵၼ်ႈတႃႈသၢႆတၢင်းၵေႃႈ ဢမ်ႇထၢင်ႇႁၢင်ႈၵႂႃႇမႃး မိူၼ်ၵူႈပွၵ်ႈလႄႈ ၸင်ႇၶၢတ်ႇၶၵ်ႉတွၼ်ႈမၼ်းၵႂႃႇ ၼႆယူႇ။

မိူဝ်ႈလဵဝ် ၼွင်ႉၽူၺ်းတေလပ်းတေၼွၼ်းယၢပ်ႇၽိုတ်ႇ ၊ တွင်ႉၸဵပ်းၸဵပ်းၵႅၼ်းၵႅၼ်းႁႅင်းၼႃႇ ၊ ၸူးၸႂ်ၶႂ်ႈၵႂႃႇယူတ်းယႃၽႃႇတတ်း ၶႂ်ႈၸဵဝ်းယူႇလီ – မၼ်းၼၢင်းလၢတ်ႈၼင်ႇၼႆ ။
မႄႈၼွင်ႉၽူၺ်းလိုၼ်းလၢတ်ႈဝႃႈ – ” ၵူၼ်းၵေႃႉဢၼ်ပဵၼ်ၵေႃႈ ႁိုဝ်တေၶႂ်ႈပဵၼ် ၊ ၵူၼ်းၵေႃႉဢၼ်ၸွႆႈၵႃႈယူတ်းယႃၵူႈလိူၼ်ၵေႃႈ လိူဝ်ၸႂ်ယူႇႁင်းၽႂ်မၼ်း။ ဢမ်ႇႁၼ်သဵၼ်ႈတၢင်းတႃႇယူတ်းယႃလုၵ်ႈယိင်းၸဝ်ႈၵဝ်ႇႁႂ်ႈၶႅၼ်းလီ ၊ မီးငိုၼ်းမႃးဢိတ်းဢွတ်းၵေႃႈ သိုဝ်ႉယႃပၼ်မွၵ်ႈၼၼ်ႉၵူၺ်း ၊ လုၵ်ႈယိင်းၸပ်းတၢင်းပဵၼ်ဢၼ်ၸုပ်ႇၼိူဝ်ႉၸုပ်ႇလိူတ်ႈ ” – ဝႃႈၼႆ။

ပွတ်းတၢင်းၼွင်ႉၽူၺ်းလိုၼ်းယူႇ ဢိူင်ႇပၢင်မိူတ်ႇၼႆႉ ၼမ်ႉၵေႃႈႁႅၵ်း ၊ လႆႈၸႂ်ႉလႆႈၵိၼ် ၼမ်ႉဢၼ်ဢမ်ႇၸိုၼ်ႈသႂ်လႄႈ ၸပ်းတၢင်းပဵၼ်ၵေႃႈ ၸၢင်ႈပဵၼ်လႆႈ ၊ ၼႂ်းထုင်ႉၼႆႉ လင်ၶႃးႁိူၼ်း မီး 200 ထိုင် 300 ။ ႁူဝ်ၼပ်ႉၵူၼ်းသမ်ႉၼမ် ၼမ်ႉသမ်ႉၵိၼ်းလႄႈ တၢင်းပဵၼ်ၵေႃႈ ပဵၼ်ၵၼ်ငၢႆႈ ၼႆ – ၼၢင်းယိင်းၵူၼ်းသီႇပေႃႉၵေႃႉၼိုင်ႈလၢတ်ႈၼႄၼင်ႇၼႆ

ဝၢၼ်ႈၶဝ်ၼႆႉ ၼမ်ႉၵိၼ်းႁႅင်းၵူၺ်းဢမ်ႇၵႃး မၼ်းပဵၼ် ဝၢၼ်ႈလိၼ်လႅင် တီႈဝၢၼ်ႈၼႆႉ ၵူၼ်းတႃမွတ်ႇၵေႃႈၼမ် ႁူၼူၵ်ႇၵေႃႈၼမ်လူးၵွၼ်ႇ ။ ပေႃးၶၢဝ်းၾူၼ်တႄႉၶဝ်ၵေႃႈၸူမ်း တေလႆႈၸႂ်ႉၼမ်ႉၾူၼ် ၊ ၶၢဝ်းႁႅင်ႈတႄႉ ၶဝ်တေလႆႈၵႂႃႇပႂ်ႉတဵၵ်းၼမ်ႉၸွမ်းပိုၼ်ႉတီႈဢွၵ်ႇၼမ်ႉႁဵတ်းၼၼ်ဢေႃႈ

တၢင်းပဵၼ်သႅၼ်းၼႆႉ ယၢမ်ႈမီးမႃးလၢႆတီႈလၢႆၵေႃႉ ၼႂ်းတူင်ႇၵူၼ်းတႆးလၢႆတီႈလၢႆတၢင်း ၵႆႉၸီႉၸမ်ႈၵၼ်ဝႃႈ ပဵၼ်တၢင်းပဵၼ်ဢၼ်ပိူၼ်ႈႁဵတ်းသႂ်ႇၼႆၸိူဝ်းၼႆႉ ။ မိူဝ်ႈပူၼ်ႉမႃးလၢႆသိပ်းပီၵေႃႈ ပေႃးမီးလုၵ်ႈဢွၼ်ႇယိင်းပုမ်ၵႂ်ႈပုမ်ယႂ်ႇၸိူင်ႉၼႆ ၵူၼ်းၼႂ်းမိူင်းတႆးမၢင်ပွတ်းမၢင်တွၼ်ႈ ၸီႉၸမ်လၢတ်ႈဝႃႈ လုၵ်ႈဢွၼ်ႇပႃးတွင်ႉၸေႃႇၵီႇ ၼႆသေ ဢဝ်ၶႅပ်းႁၢင်ႈပုမ်ယႂ်ႇၼၼ်ႉ လႄႇႁႃၵဵပ်းငိုၼ်းလူႇၶၢမ်ႇတီႈၼိုင်ႈယဝ်ႉတီႈၼိုင်ႈ ၵေႃႈ ယၢမ်ႈမီးမႃး – ၼႆ ၵူၼ်းၶိုတ်းၼႃႈႁၼ်လင်ၶဝ်ယၢမ်ႈလၢတ်ႈၼႄၼင်ႇၼႆ။

ယၢမ်းလဵဝ် ၵွပ်ႈၵၢၼ်လွၵ်ႇလႅၼ်ငိုၼ်းတွင်းၵၼ်ၵေႃႈၼမ်လိူင်ႇလႄႈ တႃႇတေလူႇတေတၢၼ်းၼၼ်ႉ ႁႂ်ႈႁူႉႁူဝ်ယွႆႈသပ်းသေးၸင်ႇတေလီ ၼႆ ၸုမ်းတူင်ႇၵူၼ်း ပၼ်ၾၢင်ႉၵၼ်ၼင်ၼႆ ။

ၼၢင်းသူၺ်ႇထေး ၽူႈတူင်ႉၼိုင် ၼႂ်းၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းလၢင်းၶိူဝ်း လၢတ်ႈၼႄဝႃႈ “ ယၢမ်ႈႁၼ်ဢေႃႈမဵဝ်းၼႆႉ ယၢမ်ႈဢဝ်လုၵ်ႈဢွၼ်ႇမိူင်းပၼ်ႇ ၵႂႃႇယႃတူၼ်ႈတီး ၊ ယိင်းဢွၼ်ႇၵေႃႉၼႆႉၵေႃႈ တႃႇတေယူတ်းယႃလႆႈၼၼ်ႉၵေႃႈ တေၶိုၼ်းလၢတ်ႈၵႂႃႇတူၺ်းတီႈ ၵေႃၽႄ ၸုမ်းၼမ်ႉၶူင်းၵျွၵ်ႉမႄး ” – ယူႇဝႃႈၼႆ။

တႃႇတေၸွႆႈထႅမ်လႆႈ ၼွင်ႉၽူၺ်းလိုၼ်းၼႆႉ ၵပ်းသိုပ်ႇတွင်ႈထၢမ်ႁူဝ်ယွႆႈမၼ်းလႆႈတီႈ ၼၢင်းမူၺ် ၵေႃႉပဵၼ်ၼႃႉၼွင်ႉၽူၺ်းလိုၼ်း မၢႆၾူၼ်း 096 713 543 64 လႄႈ ၸၢႆးၵျေႃႇလူႇ ၵေႃႉပဵၼ်ပီႈဢၢႆႈ မၢႆၾူၼ်းထႆး 080 763 4744 လႆႈၵမ်းသိုဝ်ႈ။
ယွၼ်းသူးႁႂ်ႈၼွင်ႉၽူၺ်းလိုၼ်း ၸဵဝ်းယူႇလီသေၵမ်း။