ၽူႈၸိသင်ႇ ၽွင်းငဝ်းလၢႆးၶိုၵ်ႉၶၵ်ႉ ၸုမ်းပၢႆးယူႇလီလုမ်ႈၾႃႉ WHO လၢတ်ႈဝႃႈ ၸိူဝ်ႉမႅင်း ဝႆးရတ်ႉသ် Covid 19 ၼႆႉ တေဢမ်ႇၸၢင်ႈႁဵတ်းႁႂ်ႈမၼ်းႁၢႆလႆႈလႄႈ ထုၵ်ႇလီၾၢင်ႉတူဝ်ၽႂ်မၼ်းသေယူႇသဝ်းၵႂႃႇဝႃႈၼႆ။
ဝၼ်းတီႈ 13/5/2020 ၼၼ်ႉ ၸုမ်း WHO ႁဵတ်းပၢင်ၵုမ် ဢွၼ်ႊလၢႆႊ၊ ယူႇတီႈၽူႈၶဝ်ႈပၢင်ၵုမ်လၢမ်းၶၢတ်ႈ ၶၢဝ်းယၢမ်း ၸိူဝ်ႉမႅင်းဝႆးရတ်ႉသ်ၶူဝ်ႊဝိတ်ႉ 19 တေႁၢႆၼၼ်ႉ တွၵ်ႊတိူဝ်ႊ မၢႆႊၶိူဝ်ႊလ် ရၢႆယၼ်ႊ ၽူႈၸိသင်ႇငဝ်းလၢႆးၶိုၵ်ႉၶၵ်ႉ ၸုမ်းပၢႆးယူႇလီလုမ်ႈၾႃႉ WHO လၢတ်ႈဝႃႈ – “ႁဝ်းတၵ်းလႆႈဢုပ်ႇၵုမ်ၵၼ်တႃႇႁၢင်ႈႁႅၼ်း တႃႇတေႁႄႉၵင်ႈၼင်ႇႁိုဝ်ၵူၼ်းမိူင်းၶူင်းၵၢင်တေဢမ်ႇတၢႆပဵၼ်ၵေႃႇပဵၼ်ၵွင်။ မႅင်းဝႆးရတ်ႉသ်ၼႆႉ မၼ်းတေဢမ်ႇႁၢႆၵႂႃႇ။ မိူၼ်ၼင်ႇ HIV ၵေႃႈ ဢမ်ႇႁၢႆၶႃႈလူး။ မၼ်းၵေႃႈသိုပ်ႇမီးၸွမ်းၵူၼ်းႁဝ်းမႃးယူႇတေႃႇထိုင်ဝၼ်းမိူဝ်ႈၼႆႉၼၼ်ႉၼႃႇ ”- ဝႃႈၼႆ။
မၼ်းၸၢႆးယင်းလၢတ်ႈထႅင်ႈဝႃႈ ယၢမ်းလဵဝ် ၵူႈမိူင်းမိူင်းဢွၼ်ၵၼ်ႁဵတ်းဢွၵ်ႇယႃႈယႃႁႄႉၵင်ႈ ဝၵ်ႉသိၼ်ႊ 100 ပၢႆယဝ်ႉ တႃႇႁႄႉၵင်ႈယူတ်းယႃတၢင်းပဵၼ်ၼႆႉ။ သင်ဝႃႈ ယႃႈယႃၸိူဝ်းၼၼ်ႉ မၵ်းမၼ်ႈပၼ်ၸႂ်ႉတိုဝ်းမူတ်းယဝ်ႉၼႆၵေႃႈ ၵူၼ်းတင်းလုမ်ႈၾႃႉတၵ်းလႆႈ ၾၢင်ႉယူႇၾၢင်ႉၵိၼ်ႁင်းၽႂ်မၼ်းသေ တႃႇတေႁၢမ်ႈမႅင်းဝႆးရတ်ႉသ်ၼႆႉလႆႈ တိုၵ်ႉတေလႆႈဢဝ်ၶၢဝ်းယၢမ်းတင်းႁိုင်ယူႇ ဝႃႈၼႆ။
မိူဝ်ႈၼႆႉ 15/5/2020 ၼႆႉ မီးၵူၼ်းတိတ်းၸပ်းတၢင်းပဵၼ် တူဝ်ႈလုမ်ႈၾႃႉ သီႇလၢၼ်ႉပၢႆ လူႉတၢႆယဝ်ႉ သၢမ်သႅၼ်ပၢႆ။
ဢၢင်ႈဢိင်ၶၢဝ်ႇ – Daily Mail
