ဝၼ်းတီႈ 6/7/2021 မိူဝ်ႈၼႆႉဝၼ်းလဵဝ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 တီႈဝဵင်းလႃႈသဵဝ်ႈ လူႉတၢႆထႅင်ႈ 5 ၵေႃႉ ၊ ၼႂ်းၶၢဝ်းတၢင်းၼိုင်ႈလိူၼ်ၵူၺ်းၵူၼ်းတၢႆယွၼ်ႉတၢင်းပဵၼ် တီႈလႃႈသဵဝ်ႈမီး 31 ၵေႃႉယဝ်ႉဝႃႈၼႆ။
ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉသေ ယူတ်းယႃတူဝ်ဝႆႉတီႈႁူင်းယႃဝဵင်းလႃႈသဵဝ်ႈ လူႉတၢႆမိူဝ်ႈၼႆႉ ၽူႈယိင်း 2 ၵေႃႉ၊ ထိုင်ယၢမ်းၵၢင်ဝၼ်းမႃး ၵူၼ်းယူႇပွၵ်ႉ 12 လႃႈသဵဝ်ႈ ဢၼ်ၵၵ်းတူဝ်ဝႆႉတီႈႁိူၼ်းၼၼ်ႉ လူႉတၢႆထႅင်ႈၵေႃႉၼိုင်ႈ ပဵၼ်ၽူႈယိင်းၼင်ႇၵဝ်ႇ၊ ယၢမ်းႁူဝ်ၶမ်ႈသမ်ႉ ၵူၼ်းၸၢႆး ဢၼ်ထၢင်ႇထိူမ်ဝႃႈပဵၼ်ၶူဝ်ႊဝိတ်ႉ 19 ၼႆသေ ပႂ်ႉတူၺ်းငဝ်းလၢႆးဝႆႉယူႇၼၼ်ႉ တၢႆတီႈႁိူၼ်းၽႂ်မၼ်းထႅင်ႈ 2 ၵေႃႉ ။ တင်းမူတ်းမိူဝ်ႈၼႆႉလူႉတၢႆ 5 ၵေႃႉ ၸုမ်းၸွႆႈထႅမ်ၵူၼ်းတိတ်းၸပ်းၶူဝ်ႊဝိတ်ႉ ဝဵင်းလႃႈသဵဝ်ႈ COVID-19 Operation Team Lashio လၢတ်ႈ။
ၵွပ်ႈၼႆလႄႈ ၵူၼ်းမိူင်းဝဵင်းလႃႈသဵဝ်ႈၵေႃႈ ဢွၼ်ၵၼ်ၵၵ်းတူဝ်ယူႇသဝ်းၼႂ်းႁိူၼ်းၽႂ်မၼ်းသေ ၊ ယူႇတီႈၵၢင်ႉၵႄႇပွၵ်ႉယွမ်ႇပၼ်ၾၢင်ႉၵၼ်ဝႃႈႁႂ်ႈဢွၼ်ၵၼ်ယူႇသဝ်းၼႂ်းႁိူၼ်းယေးၽႂ်မၼ်း။ ပေႃးလူဝ်ႇဢွၵ်ႇသိုဝ်ႉၽၵ်း၊ ၶဝ်ႈၼမ်ႉတၢင်းၵိၼ်ၵေႃႈ ၼိုင်ႈႁိူၼ်းၼိုင်ႈၵေႃႉၵေႃႈလႆႈယဝ်ႉဝႃႈၼႆဝႆႉ။
တေႃႇထိုင်မိူဝ်ႈၼႆႉ ၶၢဝ်းတၢင်းၼိုင်ႈလိူၼ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉတီႈလႃႈသဵဝ်ႈၼႆႉမီး 600 ပၢႆ၊လူႉတၢႆမီး 31 ၵေႃႉယဝ်ႉလႆႈႁူႉၼင်ႇၼႆ။