မိူဝ်ႈၼႆႉ ဝၼ်းတီႈ 16 လိူၼ်မၢတ်ႉၶျ် တႄႇယၢမ်းၵၢင်ၼႂ် သဵင်ၵွင်ႈယဵၼ် သိုၵ်းတဢၢင်း တင်း သိုၵ်းၵဝ်ႈၵၢင်ႉ ဢမ်ႇယိုဝ်းၵၼ်ႁၢဝ်ႈႁႅင်း ၸွမ်းပိုၼ်ႉတီႈ သဵၼ်ႈတၢင်းလူင်ႁၢႆႊဝေႊ ၵႄႈၵၢင် ဝဵင်းသႅၼ်ဝီ-ၵူတ်ႉၶၢႆ-ၼမ်ႉၽၵ်းၵႃ- 105 လၵ်း – မူႇၸေႊယဝ်ႉလႄႈ ရူတ်ႉၵႃးဢွၼ်ႇ ၸိူဝ်းဢမ်ႇ တၢင်ႇၶူဝ်းၵုၼ်ႇတႄႉ လတ်းၵႂႃႇမႃးလႆႈၶိုၼ်းမိူၼ်ၵဝ်ႇယဝ်ႉ ဝႃႈၼႆ။

မိူဝ်ႈဝၼ်းတီႈ 14-15/3/2026 ၼႂ်းၶၢဝ်းတၢင်းသွင်ဝၼ်းတဵမ်တဵမ် သိုၵ်းၵဝ်ႈၵၢင်ႉ တင်း သိုၵ်း တဢၢင်း ယိုဝ်းၵၼ်ႁၢဝ်ႈႁႅင်း ၵႄႈၵၢင်ဝဵင်းသႅၼ်ဝီ တင်း ဝဵင်းၵူတ်ႉၶၢႆ သိုပ်ႇလၢမ်းၽႄႈ ၵႂႃႇထိုင် ၾၢႆႇၼွၵ်ႈၸႄႈဝဵင်း မူႇၸေႊ တင်း ၼမ်ႉၶမ်း ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈႁူပ်ႉတၢင်းယၢပ်ႇ ၵိၼ်းၸႂ် ၵူၺ်းဢမ်ႇၵႃး ရူတ်ႉၵႃးဢွၼ်ႇၸိူဝ်း လတ်းၵႂႃႇမႃးၼိူဝ်သဵၼ်ႈတၢင်းလူင်ႁၢႆႊဝေႊၵေႃႈ လႆႈၵိုတ်းၶၢင်ႉၶမ်ဝႆႉ ၸွမ်းတၢင်း ၼႆယဝ်ႉ။

ၵူၼ်းမိူင်းပိုၼ်ႉတီႈ ၵေႃႉႁေႃႈၵႃးတၢင်ႇၵူၼ်းႁပ်ႉသူင်ႇၶႅၵ်ႇ ၵႂႃႇမႃးၼိူဝ်သဵၼ်ႈတၢင်းလူင်ႁၢႆႊဝေႊ လႃႈသဵဝ်ႈ- မူႇၸေႊသေ လႆႈၵိုတ်းၶမ်ဝႆႉ ၽွင်းပၢင်တိုၵ်းၼၼ်ႉ လၢတ်ႈတီႈၽူႈတွႆႇ ႁွၵ်ႈဝႃႈ “မိူဝ်ႈၼႆႉ သဵင်ၵွင်ႈတႄႉ တိုၵ်းလႆႈငိၼ်းၸွမ်းၼိူဝ်လွႆ ႁိမ်းၽင်ႇတၢင်း ၸွမ်းၾၢႆႇၼွၵ်ႈ ဝဵင်းၵူတ်ႉၶၢႆၼၼ်ႉ ဢိတ်းဢိတ်းယူႇ။ ဢမ်ႇႁၢဝ်ႈႁႅင်းတၢၼ်ႇမိူဝ်ႈဝႃး-မိူဝ်ႈသိုၼ်းၼၼ်ႉယဝ်ႉ။ မိူဝ်ႈလဵဝ် ရူတ်ႉၵႃးဢွၼ်ႇ၊ ၵႃးလူင်ၸိူဝ်းၼႆႉ သိုၵ်းၵဝ်ႈၵၢင်ႉၶဝ် ပိုတ်ႇပၼ်ၵႂႃႇမႃးမိူၼ်ၵဝ်ႇၶိုၼ်းယဝ်ႉ” ဝႃႈၼႆ။

သိုၵ်းၶႄႇၵဝ်ႈၵၢင်ႉ (MNDAA) ၼႆႉ ၸႂ်ႉတိုဝ်းၶိူင်ႈတရူၼ်ႊ၊ ၵွင်ႈၵၢင်ႇၵူႈသႅၼ်းသႅၼ်းသေၶဝ်ႈလူမ်ႇ ယိုဝ်းၸွမ်းတပ်ႉပၢင်သဝ်းသိုၵ်းတဢၢင်း (TNLA) ၸွမ်းသၢပ်ႇဝဵင်း လႄႈ ၼႂ်းဝဵင်း ၵူတ်ႉၶၢႆၵူၺ်း ဢမ်ႇၵႃး ၸွမ်းပိုၼ်ႉတီႈ ထုင်ႉမိူင်းၸီး၊ မိူင်းႁွမ်း လႄႈ ၵဵတ်ႉလၢၼ်ႇ ၵျိၼ်ႊသၢၼ်ႊၵျေႃႉ (105) လၵ်း တင်း ၵဵတ်ႉလၢၼ်ႇ 12 လၵ်း ဢၼ်မီးၼႂ်းၵႄႈၵၢင် ၼမ်ႉၽၵ်းၵႃလႄႈ ဝဵင်းၼမ်ႉၶမ်းၼၼ်ႉ ၼႂ်းၶၢဝ်းယၢမ်းလဵဝ်ၽွမ်ႉၽွမ်ႉၵၼ် ဝႃႈၼႆ။

လႆႈႁူႉဝႃႈ ယၢမ်းလဵဝ် ၼႂ်းဝဵင်းၵူတ်ႉၶၢႆၼႆႉ ပဵၼ်သိုၵ်းၵဝ်ႈၵၢင်ႉ ၵုမ်းၵမ်ၶိုၼ်းဝႆႉတင်းသဵင်ႈသေတႃႉ ယွၼ်ႉမီးပႃးဝႆႉၸုမ်းသိုၵ်းၶၢင် KIA ယူႇသဝ်းတူင်ႉၼိုင်ၸွမ်းဝႆႉလႄႈ လွင်ႈၵၢၼ် ၽွင်းငမ်း ၵႂႃႇၶၢဝ်း ႁိုင်ၼၼ်ႉ တင်းသွင်ၸုမ်းတေတူၵ်းလူင်းငူပ်ႉငီႉၵၼ်ၸိူင်ႉႁိုဝ်ၶိုၼ်းၼႆ ပႆႇမီးၸုမ်းသိုၵ်းလႂ် ပိုၼ်ၽၢဝ်ႇယိုၼ်ယၼ်ဢွၵ်ႇမႃး သပ်းၸႅင်ႈၼႄ။

တင်ႈတႄႇသိုၵ်းတဢၢင်း တင်း သိုၵ်းၵဝ်ႈၵၢင်ႉ ၽိတ်းမေႃး ပေႃႉထုပ်ႉ လိုပ်ႈလမ်းၵၼ်မႃး သိုၵ်းၵဝ်ႈၵၢင်ႉ ၸိူဝ်းတူင်ႉၼိုင်ယူႇသဝ်းပၼ်ႇၵၢၼ် ၽွင်းငမ်း ယူႇၼႂ်းၸႄႈဝဵင်းသႅၼ်ဝီ တင်ႈၵဵတ်ႉလၢၼ်ႇ ၽိူမ်ႉၼမ်မႃးႁႅင်း လိူဝ်ၵဝ်ႇသေ ပႂ်ႉၵူတ်ႇထတ်း ၵူၼ်းၶဝ်ႈၵူၼ်းဢွၵ်ႇ လႄႈ မၢႆၾၢင် လၢႆႊသိၼ်ႊ ရူတ်ႉၵႃး ၼိူဝ်သဵၼ်ႈတၢင်းလူင်ႁၢႆႊဝေႊ သႅၼ်ဝီ-ၵူတ်ႉၶၢႆ ၼႆ ယဝ်ႉ။

ဝၢႆးလင်မႃး ပၼ်ႁႃသိုၵ်းတင်းသွင်ၸုမ်း ဢမ်ႇလူတ်းယွမ်းလူင်းၵႂႃႇသေ ယိုင်ႈဝၼ်းႁိုင် ၵူၼ်းသိုၵ်းတင်းသွင် ၸုမ်း ၸိူဝ်းယူႇၼႂ်းပိုၼ်ႉတီႈ ၶဵင်ႈၶႅင်ၵၢၼ်သိုၵ်းတေႃႇၵၼ်ဢမ်ႇထၢတ်ႇလႄႈ ၾၢႆႇသိုၵ်းၵဝ်ႈၵၢင်ႉ သိုပ်ႇဢိုတ်း ႁေႉႁၢမ်ႈ ၵၢၼ်တေႃႉၶူဝ်းၵုၼ်ႇ လုၵ်ႉတၢင်းဝဵင်းသႅၼ်ဝီ ၶိုၼ်ႈၵႂႃႇတၢင်း ဝဵင်းၵူတ်ႉၶၢႆ သဵၼ်ႈၼိုင်ႈ၊ လုၵ်ႉတၢင်း ဝဵင်းလႃႈသဵဝ်ႈ ၵႂႃႇတၢင်း ဝဵင်းၼမ်ႉတူႈသဵၼ်ႈၼိုင်ႈ ။