ၵူၼ်းၼုမ်ႇထုင်ႉဢီႇၼၢႆး ဝဵင်းလႃႈသဵဝ်ႈ ၺႃးသိုၵ်းၵဝ်ႈၵၢင်ႉ MNDAA ၼႄးဝႃႈၵဵဝ်ႇၵွင်ႉယႃႈမဝ်းၵမ်ၼႆသေ တီႉၺွပ်းၵႂႃႇလႆႈၽၢၵ်ႇလိူၼ်သၢဝ်းဝၼ်းယဝ်ႉယင်းပႆႇပွႆႇမႃးၶိုၼ်း- ပေႃးပီႈၼွင်ႉဢမ်ႇၵႂႃႇထုတ်ႇၸိုင် တေဢဝ်ၵႂႃႇႁဵတ်းလွၼ်ႉသိုၵ်း ၵဝ်ႈၵၢင်ႉ ၼႆလႄႈ ၸိူဝ်းဢမ်ႇမီးငိုၼ်း ဢမ်ႇမီးပီႈၼွင်ႉပဵၼ်ဢၼ်မႆႈၸႂ်။
ၵူၼ်းၼုမ်ႇထုင်ႉဢီႇၼၢႆးၼႆႉ ၺႃးတီႉၺွပ်းၵႂႃႇၸဵမ်မိူဝ်ႈဝၼ်းတီႈ 21/04/2026။ ပဵၼ်ၵူၼ်းပွတ်းဝၼ်ႈ 12 လၵ်း၊ 13 လၵ်း၊ မၢၼ်ႈတွင်း(ပလွင်ႈ)၊ ဝၢၼ်ႈဢီႇၼၢႆးၸိူဝ်းၼႆႉ တင်းမူတ်း 70 ပၢႆ ။
ၸၢႆးၼုမ်ႇတႆးၵေႃႉၼိုင်ႈ ယူႇဝဵင်းလႃႈသဵဝ်ႈလၢတ်ႈၽူႈတွႆႇႁွၵ်ႈဝႃႈ -“ ၶဝ်ၺွပ်းၵူၼ်းၼုမ်ႇ 70 ပၢႆသေ သူင်ႇၵႂႃႇသႅၼ်ဝီၵမ်းလဵဝ်။ ၵႂႃႇထတ်းယဵဝ်ႈထတ်းယႃႈ။ မၢင်ၸိူဝ်း ပေႃႈမႄႈ ပီႈၼွင်ႉ ၵႂႃႇထူပ်းသေ ၵႂႃႇထုတ်ႇတူဝ်မႃးၶိုၼ်း။ ပေႃးဢမ်ႇမီးၵူၼ်းမႃးထုတ်ႇတူဝ် တေဢဝ်ၵႂႃႇႁဵတ်းသိုၵ်းလွၼ်ႉ-ဝႃႇ”- ဝႃႈၼႆ ။
ယွၼ်ႉပိူဝ်ႈသိုၵ်းၵဝ်ႈၵၢင်ႉၵႆႉပႂ်ႉၺွပ်းၸွမ်းတႃႈၸွမ်းတၢင်းလႄႈ ယၢမ်းလဵဝ်ၵူၼ်းဝၢၼ်ႈဢမ်ႇႁတ်းၵႂႃႇမႃး ဢမ်ႇမီးလွင်ႈႁူမ်ႇလူမ်ႈ ဝႃႈၼႆ။
“တလဵဝ်ဢမ်ႇပေႃးမီးၽႂ်ႁတ်း ၶီႇရူတ်ႉၶိူင်ႈ ၶီႇရူတ်ႉၵႃးၵႂႃႇမႃးယဝ်ႉ။ ပေႃးတေၵႂႃႇလႃႈသဵဝ်ႈၵေႃႈ လႆႈၸႂ်ယႂ်ႇရူတ်ႉသၢႆ (လႅင်းၵႃး) ၵူၺ်းယဝ်ႉ။ ပေႃးၶဝ်ၶႆႈၺွပ်းၵူၼ်းၼႆ ၶဝ်လုၵ်ႉမႃးႁႄႉၵူတ်ႇထတ်းတီႈၺွပ်း ဢမ်ႇမီးၶိင်ႇမီးၶၢဝ်း။” – ၵူၼ်းပိုၼ်ႉတီႈလၢတ်ႈၼင်ႇၼႆ။
ဢၼ်သိုၵ်းၵဝ်ႈၵၢင်ႉတီႉၺွပ်းၵူၼ်းမိူင်းယူႇၸိူင်ႉၼႆယၢမ်းလဵဝ်ၼႆႉ ၵူၼ်းပိုၼ်ႉတီႈႁၼ်ထိုင်ဝႃႈ – ဢဝ်ၶေႃႈဢၢင်ႈယႃႈမဝ်းၵမ်သေ ၵဵပ်းၵူၼ်းသိုၵ်းမႂ်ႇၵူၺ်းဝႃႈၼႆ။
ၼုမ်ႇၸၢႆးတႆးထႅင်ႈၵေႃႉၼိုင်ႈၵေႃႈထတ်းသၢင်ဝႃႈ- “ယူႇတီႈတၢင်းႁၼ်ထိုင်ၶႃႈတႄႉၵေႃႈ မၼ်းမိူၼ်ၸိူင်ႉဝႃႈ ဢဝ်ငဝ်းလၢႆးဢူၼ်ႈဢွၼ်ႇသေလႄႈ ၸူႉတုမ် ၵူၼ်းသိုၵ်းၵွႆးၼႆ ၶႃႈတႄႉႁၼ်ထိုင်ၸိူင်ႉၼႆဢေႃႈ၊ သင်ၸိူဝ်ႉဝႃႈ ၶဝ်ၶႂ်ႈ ၵႄႈလိတ်ႈပၼ်ႁႃယႃႈမဝ်းၵမ် ပၼ်ၵူၼ်းဝၢၼ်ႈတေႉတေႉၼႆ ၶဝ်ထုၵ်ႇလီမီး ပၵ်းပိူင်ဢၼ်တႅတ်ႈတေႃးသေ ဢွၵ်ႇလိၵ်ႈပၼ်ၾၢင်ႉၵူၼ်းဝၢၼ်ႈယဝ်ႉ ၸင်ႇလူင်းမိုဝ်းႁဵတ်းတႄႉတႄႉဢေႃႈ။ ၶဝ်ၶႂ်ႈတီႉတီႈလႂ်ၵေႃႈလုၵ်ႉတီႉလူင်ၵႂႃႇၸိူင်ႉၼႆ မၼ်းဢမ်ႇၶဝ်ႈၶႂၢင်ႇတြႃးတေႉတေႉ မၼ်းပဵၼ်လွင်ႈၶီႇၼဵၵ်းတဵၵ်းတဵင် တွၼ်ႈလႂ်တွၼ်ႈၼၼ်ႉၵူၺ်း” – ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇၸူး ၽူႈမီးပုၼ်ႈၽွၼ်းၾၢႆႇပွင်ႇၶၢဝ်ႇ MNDAA ၵေႃႈၵပ်းသိုပ်ႇဢမ်ႇလႆႈလႄႈဢမ်ႇၸၢင်ႈထၢမ်လွင်ႈပိူင်ပဵၼ်ႁူဝ်ယွႆႈ။
ယၢမ်းလဵဝ် ၸုမ်းသိုၵ်းၵဝ်ႈၵၢင်ႉၼႆႉ လုၵ်ႉတီႈၼႂ်းထုင်ႉဢီႇၼၢႆးသေ ၽိုတ်ႉၶဝ်ႈၵႂႃႇတၢင်း ဝဵင်းၼမ်ႉတူႈ ။ ၵမ်ႈၽွင်ႈ ထိုင်ပွတ်းဝၢၼ်ႈၼႃႈသၢႆး ဢၼ်မီး ၸုမ်းသိုၵ်း TNLA လႄႈ SSPP ယူႇသဝ်းဝႆႉ ။ ယွၼ်ႉၼၼ် ယၢမ်းလဵဝ် ၵူၼ်းၼုမ်ႇပိုၼ်ႉတီမႆႈၸႂ်ၵူဝ်ၺႃးတီႉၺွပ်းလႄႈ လႆႈငိူင်ႉဝႄႈ ၵၢၼ်ၶီႇလူတ်ႉၶိူင်ႈ ၵႂႃႇမႃးၶၢဝ်းတၢင်းၵႆ။ ပဵၼ်ဢၼ်ယၢပ်ႇၽိုတ်ႇၼႂ်းၵၢၼ်ႁႃၵိၼ်လဵင်ႉတွင်ႉတႄႉတႄႉဝႃႈၼႆ။
တႅမ်ႈ-ၶုၼ်ၶိင်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ