ဝၢႆးၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ တၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈမိူင်းတႆး ၽႄႈလၢမ်းႁၢဝ်ႈႁႅင်း မီးၵူၼ်းတိတ်းၸပ်းလူႉတၢႆၼမ် ၼႂ်းၼၼ်ႉ တီႈၸႄႈဝဵင်းၵဵင်တုင်ၵေႃႈ မီးၵူၼ်းတိတ်းၸပ်းၸိူဝ်ႉမႅင်းၼႆႉ 8 ၵေႃႉယဝ်ႉ။

တႄႇဢဝ် လိူၼ်ၵျုၼ်ႊ 2021 တေႃႇထိုင်မႃး ဝၼ်းတီႈ 4/7/2021 ၼႆႉ ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၵူတ်ႇ ထတ်းႁၼ် ၵူၼ်းတိတ်းၸပ်းၸိူဝ်ႉ မႅင်း တၢင်းပဵၼ်ၶူဝ်ႊဝိတ်ႉ 19 တင်းမူတ်း မီးၵႂႃႇယဝ်ႉ 8 ၵေႃႉယဝ်ႉ  လူႉတၢႆ တႄႉ ပႆႇမီး။

ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၵေႃႉၼိုင်ႈ တီႈၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈၵဵင်းတုင်ၼႆႉ ၵူတ်ႇ ထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 ၼႆႉ တင်းမူတ်းမီးၵႂႃႇ 8 ၵေႃႉယဝ်ႉ။ လူႉတၢႆတႄႉ ပႆႇမီး။ ၵူၼ်းတိတ်း ၸပ်း ၸိူဝ်းၼၼ်ႉတႄႉ လႆႈငိၼ်းဝႃႈ ဢဝ်သူင်ႇၵႂႃႇယူတ်းယႃတူဝ်ဝႆႉတီႈ ႁူင်းယႃလူင်ၵဵင်းတုင်ယဝ်ႉ”- ဝႃႈၼႆ။

ၵူၼ်းမိူင်း 8 ၵေႃႉ ဢၼ်တိတ်းၸပ်းၸိူဝ်းမႅင်း တၢင်းပဵၼ် ၶူဝ်ႊဝိတ်ႉ 19 တီႈၵဵင်းတုင်ၼႆႉ ၽူႈၸၢႆး 3 ၵေႃႉ ၼၢင်းယိင်း 5 ၵေႃႉ ၼႆယဝ်ႉ။

ယၢမ်းလဵဝ် တၢင်းၶဝ်ႈဢွၵ်ႇၼႂ်းဝဵင်းၵဵင်းတုင် မိူၼ်ၼင်ႇ ၵဵင်းတုင် – တႃႈၶီႈလဵၵ်း တီႈၵဵတ်ႉ/ လၢၼ်ႇၼွင်ၼူၼ်း၊ ၵဵင်းတုင် – တူၼ်ႈတီး တီႈႁူဝ်ၶူဝ်ၵဵင်းၽွင်းလႄႈ ၵဵင်းတုင် – မိူင်းၶၢၵ်ႇ တီႈၶူဝ်ၼမ်ႉၶိုၼ် ၸိူဝ်းၼၼ်ႉ ယူႇတီႈၽူႈမီးပုၼ်ႈၽွၼ်းၶဝ် ပႂ်ႉ ၵူတ်ႇထတ်းၵူၼ်းၶဝ်ႈဢွၵ်ႇၵႂႃႇမႃး ႁၢဝ်ႈႁႅင်း ၵဵဝ်ႇလူၺ်ႈတၢင်းပဵၼ် ၶူဝ်ႊဝိတ်ႉ 19 ၼႆႉ။  

တီႈဝဵင်းတႃႈၶီႈလဵၵ်း ဢၼ်တိတ်းၸပ်းလႅၼ်လိၼ်ထႆးၵေႃႈတေႃႈၼင်ႇၼၼ် ။ တိတ်းၸပ်းတၢင်းပဵၼ်ၶူဝ်ႊဝိတ်ႉ ဝၼ်းလဵဝ်ပုင်ႈၶိုၼ်ႈ 60 ၵေႃႉလႄႈ ယၢမ်းလဵဝ် ၵူၼ်းပဵၼ်ၶူဝ်ႊဝိတ်ႉ တီႈတႃႈၶီႈလဵၵ်း တင်းမူတ်းမီး 140 ပၢႆယဝ်ႉ။ ၵူၺ်းၵႃႈ ပႆႇသင်ႇပိၵ်ႉ လွၵ်ႉတၢဝ်ႊဝဵင်းလႄႈ ၵူၼ်းတိတ်းၸပ်းတေပုင်ႈၶိုၼ်ႈမႃးထႅင်ႈႁိုဝ်ၼႆၵူၼ်းဝဵင်းတႃႈၶီႈလဵၵ်းဢွၼ်ၵၼ်မႆႈၸႂ်ဝႆႉယူႇဝႃႈၼႆ။

  ၼႂ်းၸႄႈမိူင်းတႆး ပွတ်းႁွင်ႇၵေႃႈမိူဝ်ႈဝၼ်းတီႈ 3/7/2021 ပူၼ်ႉမႃးၼႆႉ ဝၼ်းလဵဝ်ၵူၺ်း မီးၵူၼ်းလူႉတၢႆ ယွၼ်းတၢင်းပဵၼ်ၶူဝ်ႊဝိတ်ႉ 19   ဢမ်ႇယွမ်း 5 ၵေႃႉ ။ ယၢမ်းလဵဝ် ၼႂ်းၸႄႈမိူင်းတႆး ပတ်းပိုၼ်ႉ မီးၵူၼ်းတိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 ၼႆႉ တင်းမူတ်း မီးၵႂႃႇ 1,000 ပၢႆယဝ်ႉ။