ပၢင်လိူၵ်ႈတင်ႈဢၼ်သိုၵ်းမၢၼ်ႈၼမ်းၸတ်းႁဵတ်းၵႂႃႇႁႂ်ႈပဵၼ် ၼႂ်းၵႄႈငဝ်းလၢႆးဝၢၼ်ႈမိူင်းသုၵ်ႉယုင်ႈ ဢူၼ်မေႃး ၵူၼ်းမိူင်းႁူပ်ႉတၢင်းယၢပ်ႇၵိၼ်းယူႇၼႆႉ ၵူၼ်းမိူင်းၸိူဝ်းမီးသုၼ်ႇလႆႈပၼ်သဵင် မီးယူႇ 24.22 လၢၼ်ႉပၢႆသေတႃႉ ဢၼ်ၵႂႃႇပၼ်သဵင်ၼႆႉ မီးယူႇ 13.14 လၢၼ်ႉၵေႃႉၵူၺ်းလႄႈ ပေႃးၼပ်ႉပဵၼ် ဝၢၵ်ႈမၼ်းၸိုင် မီးယူႇမွၵ်ႈ 55% ၵူၺ်း ၼႆယဝ်ႉ။

မိူဝ်ႈဝၼ်းတီႈ 26/1/2026 ၸွမ်ႁၢၼ်ၸေႃႇမိၼ်းထုၼ်း ၽူႈၶၢၼ်ပၢၵ်ႇၸုမ်းသိုၵ်းမၢၼ်ႈ လၢတ်ႈၵႂႃႇဝႃႈ “ၵူၼ်းမိူင်းၸိူဝ်းမႃးပၼ်သဵင် တင်းသၢမ်ပွၵ်ႈၼႆႉ မီးယူႇ 13.14 လၢၼ်ႉပၢႆ လႄႈ ပေႃးၼပ်ႉပဵၼ်ဝၢၵ်ႈမၼ်းတႄႉ မီးယူႇ 54% ပၢႆ မွၵ်ႈ 55% ယူႇ” ဝႃႈၼႆ။

တႃႇဝၼ်းပၢင်လိူၵ်ႈတင်ႈပွၵ်ႈၵမ်း 1 ၼႆႉ ၵူၼ်းမိူင်းၸိူဝ်းမီးသုၼ်ႇလႆႈပၼ်သဵင် မီးယူႇ 11.69 လၢၼ်ႉပၢႆ ဝႃႈၼႆသေတႃႉ ၵူၼ်းမိူင်းဢၼ်ၵႂႃႇပၼ်သဵင်တေႉတေႉၼႆႉ မီးယူႇ 6.09 လၢၼ်ႉပၢႆၵူၺ်း ဢၼ်ၼႆႉ ၾၢႆႇသိုၵ်းမၢၼ်ႈၼပ်ႉသွၼ်ႇဝႃႈမီးၵူၼ်းၵႂႃႇပၼ်သဵင် 52.13%။

ထိုင်ပၢင်လိူၵ်ႈတင်ႈ ပွၵ်ႈၵမ်း 2 တႄႉ ၵူၼ်းမိူင်းၸိူဝ်းမီးသုၼ်ႇလႆႈပၼ်သဵင် မီးယူႇ 7.59 လၢၼ်ႉပၢႆ၊ ၵူၼ်းၵႂႃႇပၼ်သဵင်တေႉတေႉ မီးယူႇ 4.24 လၢၼ်ႉပၢႆ ၼႆႉၵေႃႈသိုၵ်းမၢၼ်ႈဝႃႈ ၵူၼ်းမိူင်းၵႂႃႇပၼ်သဵင်မီးယူႇ 55.95% ။

ပွၵ်ႈၵမ်း 3 တႄႉ ၵူၼ်းမိူင်းၸိူဝ်းမီးသုၼ်ႇလႆႈပၼ်သဵင် မီးယူႇ 4.94 လၢၼ်ႉပၢႆ၊ ၵူၼ်းၵႂႃႇပၼ်သဵင်တေႉတေႉမီးယူႇ 2.79 လၢၼ်ႉပၢႆၵူၺ်း သိုၵ်းမၢၼ်ႈဝႃႈ မီးၵူၼ်းၵႂႃႇပၼ်သဵင်ယူႇ 56.48 % ၼႆယဝ်ႉ။

ၼႂ်းၶၢဝ်းတၢင်းဢၼ်ၸတ်းႁဵတ်းပၢင်လိူၵ်ႈတင်ႈၵႂႃႇတင်းသဵင်ႈၼႆႉ မိူဝ်ႈပွၵ်ႈၵမ်း 1 ၼၼ်ႉ သိုၵ်းမၢၼ်ႈႁွင်ႉဢဝ် ၽူႈမီးပုၼ်ႈၽွၼ်း မိူင်းရတ်ႉသျႃး၊ ပႄႇလႃႊရုတ်ႉသ်၊ မိူင်းၶႄႇ၊ မိူင်းၵႃႊသႅတ်ႊသတၼ်ႊ၊ မိူင်းၵမ်ႇပူးၶျႃႊ၊ မိူင်းဢိၼ်ႊတီႊယိူဝ်ႊ၊ မိူင်းဝႅတ်ႉၼမ်း၊ မိူင်းၼီႊၵႃႊရႃႊၵႂႃႊ လႄႈ ၸုမ်းမိူင်းမၢၼ်ႈ-မိူင်းၵျႃႊပၢၼ်ႊၶဝ် ၵႂႃႇၶဝ်ႈႁူမ်ႈပဵၼ်ၽူႈပၵ်းတႃလဵပ်ႈႁဵၼ်း ပႂ်ႉတူၺ်းပၢင်လိူၵ်ႈတင်ႈ တႃႇ 8 ၸိုင်ႈမိူင်း လႄႈ မုၵ်ႉၸုမ်း 1 ၸုမ်း ႁူမ်ႈသဵၼ် မီးတူဝ်တႅၼ်း ၶဝ်ႈႁူမ်ႈ 32 ၵေႃႉ ၼႆယဝ်ႉ။

ပၢင်လိူၵ်ႈတင်ႈ ပွၵ်ႈၵမ်း 2 တႄႉ ဢမ်ႇမီးၵူၼ်းဢၼ်လုၵ်ႉတၢင်း မိူင်းၼွၵ်ႈ ၶဝ်ႈမိူဝ်းလဵပ်ႈႁဵၼ်း ပၵ်းတႃတူၺ်းၸွမ်း၊ ၾၢႆႇသိုၵ်းမၢၼ်ႈပၼ်သုၼ်ႇလႆႈ ၽူႈမီးပုၼ်ႈၽွၼ်း လုမ်းတၢင် မိူင်းၼွၵ်ႈ ဢၼ်မီးယူႇၼႂ်းမိူင်းမၢၼ်ႈၼၼ်ႉ ၵႂႃႇၶဝ်ႈႁူမ်ႈလဵပ်ႈႁဵၼ်းၵူၺ်း။

ပွၵ်ႈၵမ်း 3 တႄႉ ၾၢႆႇသိုၵ်းမၢၼ်ႈႁွင်ႉဢဝ် မိူင်းပႄႊရႃႊရုတ်ႉသ်၊ မိူင်းၵမ်ႇပူးၶျႃႊ၊ မိူင်းၼီႊပေႃႊ၊ မိူင်းဢိၼ်ႊတူဝ်ႊၼီႊသျႃႊ၊ မိူင်းဝႅတ်ႉၼမ်း၊ မိူင်းၼီႊၵႃႊရႃႊၵႂႃႊ၊ မိူင်းဢိၼ်ႊတီႊ ယိူဝ်ႊ လႄႈ ၸုမ်း International Conference of Asian Political Parties (ICAPP) တႃႇ ၸိုင်ႈမိူင်း 7 မိူင်း လႄႈ မုၵ်ႉၸုမ်း 1 ၸုမ်း မႃးၶဝ်ႈႁူမ်ႈပႂ်ႉတူၺ်း။

ၸွမ်ႁၢၼ်ၸေႃႇမိၼ်းထုၼ်း ၽူႈၶၢၼ်ပၢၵ်ႇသိုၵ်းမၢၼ်ႈ တွပ်ႇလၢတ်ႈတီႈသိုဝ်ႇၶၢဝ်ႇပဵၼ်တၢင်းၵၢၼ်ဝႆႉဝႃႈ “လုမ်းတၢင်မိူင်းၼွၵ်ႈ ဢၼ်ပၵ်းလုမ်းဝႆႉၼႂ်းတိူင်းတႃႈၵုင်ႈၼၼ်ႉ တႃႇ 14 မိူင်း သူင်ႇတူဝ်တႅၼ်းၵႂႃႇၶဝ်ႈႁူမ်ႈ လဵပ်ႈႁဵၼ်းၸွမ်း 133 ၵေႃႉ ၽွင်းၶၢဝ်းၸတ်းပၢင်လိူၵ်ႈတင်ႈ တင်းသၢမ်ပွၵ်ႈ” ဝႃႈၼႆ။

လိူဝ်ၼၼ်ႉ သိုၵ်းမၢၼ်ႈယင်းပိုၼ်ၽၢဝ်ႇဝႆႉထ်င်ႈဝႃႈ မိူဝ်ႈပၢင်လိူၵ်ႈတင်ႈပွၵ်ႈၵမ်း 1 ၼၼ်ႉ မီးၸုမ်းသိုဝ်ႇ ၼွၵ်ႈမိူင်းၶဝ်ႈၵႂႃႇဢဝ်ၶၢဝ်ႇ တႃႇ 61 ၸုမ်းလႄႈ ၼၵ်းၶၢဝ်ႇႁူမ်ႈသဵၼ်ႈမီးယူႇ 215 ၵေႃႉ၊ ပွၵ်ႈၵမ်း 2 တႄႉ ၸုမ်းသိုဝ်ႇၼွၵ်ႈမိူင်း မီး 35 ၸုမ်း ၽူႈသိုဝ်ႇၶၢဝ်ႇ မီး 101 ၵေႃႉ၊ ပွၵ်ႈၵမ်း 3 တႄႉ ၸုမ်းသိုဝ်ႇၶၢဝ်ႇၼႂ်းမိူင်း မီး 52 ၸုမ်း ၽူႈသိုဝ်ႇၶၢဝ်ႇ မီး 1177 ၵေႃႉ ဝႃႈၼႆ။

ၽွင်းၶၢဝ်းၸတ်းပၢင်လိူၵ်ႈတင်ႈယူႇၼၼ်ႉ ၸုမ်းၸိူဝ်းသၢၼ်ၶတ်းပၢင်လိူၵ်ႈတင်ႈ၊ ၸုမ်းၸိူဝ်းႁဵတ်းၵၢၼ်လုၵ်ႉ ၽိုၼ်ႉၶဝ် ပွႆႇမၢၵ်ႇၵူႈသႅၼ်းသႅၼ်း ၸွမ်းႁူင်းပၼ်သဵင်၊ သူင်ႇလိၵ်ႈလွၵ်ႇငိုတ်ႈတီႈၽူႈမီးပုၼ်ႈၽွၼ်း၊ ႁေႉႁၢမ်ႈ ၸွမ်းၵဝ်းသဵၼ်ႈတၢင်းရူတ်ႉၵႃးႁပ်ႉသူင်ႇၵူၼ်းၵႂႃႇပၼ်သဵင် လႄႈ ၸႂ်ႉတိုဝ်းၶိူင်ႈ Fixed wings သေယိုဝ်း ၸဵမ်ၸိူဝ်းၼႆႉ။

မိူဝ်ႈပၢင်လိူၵ်ႈတင်ႈပွၵ်ႈၵမ်း 1 ၼၼ်ႉ တႃႇ 13 ၸႄႈဝဵင်း၊ ပွၵ်ႈၵမ်း 2 ပဵၼ် 10 ၸႄႈဝဵင်း၊ ပွၵ်ႈၵမ်း 3 ပဵၼ် 11 ၸႄႈဝဵင်း ႁူမ်ႈသဵၼ်ႈ 25 ၸႄႈဝဵင်း ၺႃးၸုမ်းလုၵ်ႉၽိုၼ်ႉ လႄႈ ၸုမ်း ဢမ်ႇႁၼ်လီၼိူဝ် ပၢင်လိူၵ်ႈတင်ႈၼၼ်ႉ ပွႆႇမၢၵ်ႇၵူႈသႅၼ်းသႅၼ်းသေ ယႃႉၵဝ်းပၢင်လိူၵ်ႈတင်ႈၵႂႃႇၼႆ ၸွမ်ႁၢၼ်ၸေႃႇမိၼ်းထုၼ်း လၢတ်ႈဝႆႉ ၼင်ႇၼႆ။

ပၢင်လိူၵ်ႈတင်ႈဢၼ်သိုၵ်းမၢၼ်ႈၼမ်းၸတ်း ၼႂ်းႁၢင်ပီ 2025 လႄႈ ႁူဝ်ပီ 2026 ၼႆႉ ၶဵတ်ႇလိူၵ်ႈတင်ႈ တႃႇသၽႃးၵူၼ်းမိူင်း မီးယူႇ 263 ၸႄႈဝဵင်း၊ သၽႃးၸိူဝ်ႉၸၢတ်ႈ ဢွင်ႈတီႈၽူႈပေႉၵိၼ်ၶၢတ်ႇ FPTP ၼႆႉ မီးယူႇ 73 ၸႄႈဝဵင်း၊ ဢွင်ႈတီႈလိူၵ်ႈတင်ႈၸွမ်းပုၼ်ႈသုၼ်ႇ PR သမ်ႉ မီးယူႇ 26 ၸႄႈဝဵင်း။

ၶဵတ်ႇလိူၵ်ႈတင်ႈ တႃႇသၽႃးၸႄႈမိူင်း လႄႈ တိူင်း ဢွင်ႈတီႈၽူႈပေႉၵိၼ်ၶၢတ်ႇ FPTP ၼၼ်ႉ မီးယူႇ 255 ၸႄႈဝဵင်း၊ ဢွင်ႈတီႈလိူၵ်ႈတင်ႈၸွမ်းပုၼ်ႈသုၼ်ႇ PR တႄႉ မီးယူႇ 42 ၸႄႈဝဵင်း၊ တႃႇသၽႃးၸၢဝ်းၶိူဝ်း ဢၼ်ယူႇတႂ်ႈသၽႃးၸႄႈမိူင်း လႄႈ တိူင်း ၼၼ်ႉၵေႃႈ မီးယူႇ 29 ၸႄႈဝဵင်း ၼႆယဝ်ႉ။