ၼႂ်းပီ 2026 လိူၼ်ၵျႅၼ်ႊၼိဝ်ႊၼႆႉ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်ၾၢႆႇလိူမ်ႈလႆႇ (စည်ပင်) တႂ်ႈ ဢႃႇၼႃႇသိုၵ်းမၢၼ်ႈတီႈဝဵင်းလႃႈသဵဝ်ႈ တဵၵ်းယွၼ်းငိုၼ်း ၵဵပ်းၶွၼ်ႇၵႃႈၵိုတ်းရူတ်ႉ ၶိူင်ႈရူတ်ႉၵႃး ၸွမ်းသဵၼ်ႈတၢင်း လႄႈ ၸွမ်းၵၢတ်ႇ၊ ၸွမ်းၼႃႈႁၢၼ်ႉၶၢႆၵုၼ်ႇယွႆႈၵူႈသႅၼ်းသႅၼ်း ႁၢဝ်ႈႁႅင်းမႃးၵူႈမိုဝ်ႉၵူႈဝၼ်း ၼႆယဝ်ႉ။

ၵႃႈၵိုတ်းရူတ်ႉၶိူင်ႈ၊ ၵႃႈၵိုတ်းၵႃးၵူႈသႅၼ်းသႅၼ်းၼႆႉ ႁွင်ႈၵၢၼ်ၾၢႆႇလိူမ်ႈလႆႇ ၵဵပ်း ၼိုင်ႈလမ်းလႂ် ၼိုင်ႈပွၵ်ႈ 1000 ထိုင် 2000 ပျႃး၊ ၵိုတ်းရူတ်ႉၵႃးၸူဝ်ႈၵႅပ်ႉၵမ်းၵူၺ်းၵေႃႈ ၶဝ်ၵဵပ်း ဢမ်ႇပၼ်ဢမ်ႇလႆႈ ၵူၼ်းမိူင်း လႃႈသဵဝ်ႈ လၢတ်ႈၼင်ႇၼႆ။

ၵူၼ်းၸၢႆးၸဝ်ႈႁၢၼ်ႉၶၢႆၵုၼ်ႇယွႆႈၵူႈသႅၼ်းသႅၼ်း ၼိူဝ်သဵၼ်ႈတၢင်းလူင် ၼႂ်းဝဵင်းလႃႈသဵဝ်ႈ လၢတ်ႈ ၽူႈတွႆႇႁွၵ်ႈဝႃႈ “ၶဝ်မႃးၸွမ်းယွၼ်းငိုၼ်းတီႈ ၵူၼ်းဢၼ်ၵိုတ်းၵႃးဝႆႉၾၢႆႇၼႃႈ ႁၢၼ်ႉႁဝ်းႁႄ မႃးသိုဝ်ႉတၢင်းၶၢႆ ႁဝ်းၼၼ်ႉ။ ႁဝ်းၵေႃႈဢွၵ်ႇၵႂႃႇလၢတ်ႈဝႃႈ ၶဝ်မႃးသိုဝ်ႉၵုၼ်ႇႁဝ်းၵူၺ်း ယႃႇပေၵဵပ်းၼႆၵေႃႈဢမ်ႇလႆႈ။ ပေႃးဝႃႈ ထဵင်ၶဝ်ၶိုၼ်းၼႆ ၶဝ်ၵႂႃႇႁွင်ႉၵူၼ်းၼႂ်း ၸုမ်းၶဝ်မႃး ပဵၼ်ၽုင်ပဵၼ်ၵေႁႄ မႃးၸွႆႈၵၼ်ၵဵပ်းငိုၼ်းၼၼ်ႉၼႃႇ။ ႁဝ်းပေႃးလႆႈၸၢႆႇပၼ်ငိုၼ်းၶဝ်ၵႂႃႇပိူင်ႇပိူင်ႇ ၵႃႈဢမ်ႇလႆႈၵေႃႈဢမ်ႇၸူး။ ၶႃႈတႄႉ လႆႈပၼ်ၶဝ်ၵႂႃႇ တႃႇၼိုင်ႈ လိူၼ်ယဝ်ႉဝႃႈ 35000 ပျႃး။ ၶဝ်မီးသိုၵ်းယူႇၾၢႆႇလင်ၶဝ် လူးၼေႃႈ ႁဝ်းသမ်ႉဢမ်ႇမီးၵွင်ႈၵၢင်ႇ တင်း ၶွၵ်ႈၶင်ယူႇၾၢႆႇလင်လႄႇ ၶဝ်ယွၼ်းၵႃႈႁိုဝ်ၵေႃႈ ၵႃႈလႆႈပၼ်ၵႂႃႇယဝ်ႉ” ဝႃႈၼႆ။

ၵၢၼ်ၵဵပ်းငိုၼ်းၵႃႈဝႆႉရူတ်ႉၵႃး ၸွမ်းသဵၼ်ႈတၢင်း လႄႈ ႁိမ်းႁွမ်းၵၢတ်ႇၼႂ်းဝဵင်းလႃႈသဵဝ်ႈၼႆႉ ၵွၼ်ႇပႆႇပဵၼ် ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၸဝ်ႈၵၢၼ်ပၢႆးမၢၵ်ႈမီးၶဝ် ၵႂႃႇၸၼ် ၵၢၼ်တႃႉၶၢႆ (လေလံ) တီႈလုမ်းလိူမ်ႈလႆႇ (စည်ပင်) သေပၼ်ႇၵၢၼ်မႃး။

ၵၢၼ်ၵဵပ်းငိုၼ်းၵႃႈဝႆႉရူတ်ႉၵႃးၼႂ်းဝဵင်းလႃႈသဵဝ်ႈၼႆႉ ၵမ်ႈၼမ် မီးၸွမ်းပိုၼ်ႉတီႈႁိမ်းႁွမ်းၵၢတ်ႇလူင်ၵူၺ်းၼႆ ၵူၼ်းမိူင်းပိုၼ်ႉတီႈ ဝဵင်းလႃႈသဵဝ်ႈလၢတ်ႈၼင်ႇၼႆ။

ၼၢင်းယိင်းဢႃႇယု 45 ပီ ၵေႃႉၶၢႆၶူဝ်းၵုၼ်ႇၵူႈသႅၼ်းသႅၼ်း ၼႂ်းၵၢတ်ႇလူင်ဝဵင်းလႃႈသဵဝ်ႈ လၢတ်ႈတီႈၽူႈတွႆႇ ႁွၵ်ႈဝႃႈ “တေႃႈလဵဝ်ၼႆႉ ၵႃးတိုၼ်းဢမ်ႇၵိုတ်းလႆႈသေဢိတ်း။ ၵိုတ်းၼိုင်ႈ ၵမ်းၵူၺ်းၵေႃႈ လႆႈပၼ်ငိုၼ်းတီႈ ၸီႇပိၼ်ႇယဝ်ႉ။ ၵူၼ်းၵဵပ်းမၼ်းၸိူဝ်းၼၼ်ႉ ၼုင်ႈသိူဝ်ႈၶဵဝ်ႁႄ ပႂ်ႉဝႆႉၸွမ်းၶၢင်ႈတၢင်းၼၼ်ႉၼႃႇ။ ၸိူင်ႉၼႆ ၼႆႉ ၶဝ်တိုၵ်ႉတႄႇၶိုၼ်းႁဵတ်းမိူဝ်ႈၶဝ် ၶိုၼ်းၶဝ်ႈမႃးၼၼ်ႉၵူၺ်း။ မိူၼ်ၵၼ်တင်း လၢႆးၵဝ်ႈၵၢင်ႉၶဝ်ႁဵတ်း ၽွင်းၶဝ်ဢုပ်ႉၼၼ်ႉလီလီယဝ်ႉ။ တေႃႈလဵဝ် ၼႂ်းၵၢတ်ႇႁဝ်းၼႆႉ ၵဵပ်းၼမ်ဝႃႈၼမ်။ ၵႃႈယုၵ်းယၢၵ်း ၼိုင်ႈလိူၼ် 15000၊ ႁူမ်ႇလူမ်ႈ 5000 မိူဝ်ႈပူၼ်ႉမႃးၼႆႉ ၵႃႈႁူမ်ႇလူမ်ႈၼႆႉ ၶဝ်ၵဵပ်း 10000 ၵွၼ်ႇဢိူဝ်ႈ၊ လၸိၼ်ႇၸေး 5000၊ ပႆႇပႃးၵႃႈၾႆး၊ ၵႃႈမီႇတႃႇ။ ၵႃႈၾႆးၵေႃႈ ၾႆးမႃးႁိုဝ်ဢမ်ႇမႃးႁိုဝ်ၵေႃႈ ယဝ်ႉ ၶဝ်ၵဵပ်းတိၵ်းတိၵ်း။ မၢၼ်ႈၼႆႉ တၢင်းယၢမ်ႈၶဝ် ပေႃးပိူၼ်ႈထဵင်ၶဝ်ၼႆ မေႃႁႃၺွပ်းပိူၼ်ႈၵႂႃႇၼႃႇ။ ၵွပ်ႈၼၼ် ပိူၼ်ႈၵေႃႈ ဢမ်ႇၶႂ်ႈထဵင် ၶၢၼ်ႉသုၵ်ႉသၵ်ႉၼႆႁႄ ပၼ်ငိုၼ်းၵႂႃႇ ၸွမ်းၼင်ႇၶဝ်ယွၼ်းၼၼ်ႉၼႃႇ” ဝႃႈၼႆ။

ဝဵင်းလႃႈသဵဝ်ႈၼႆႉသိုၵ်းၵဝ်ႈၵၢင်ႉ (MNDAA) ပိုတ်းယိုဝ်းသိုၵ်းမၢၼ်ႈသေဢွင်ႇပေႉယိုတ်းၵုမ်းလႆႈ ၸဵမ်မိူဝ်ႈၽႅၼ်ယၼ်ႇသိုၵ်း 1027 ႁိုင်ၼၢၼ်းၶၢဝ်းတၢင်း 9 လိူၼ်။ ဢိင်ၼိူဝ်မိူင်းၶႄႇ ၵုမ်းၵမ်ပၼ်ႁႅင်းဢီးသေ သိုၵ်းၵဝ်ႈၵၢင်ႉ ၶိုၼ်းလႆႈထွႆပၼ်သိုၵ်းမၢၼ်ႈၶိုၼ်း မိူဝ်ႈလိူၼ်ဢေႊပရိူဝ်ႊလ် ပီ 2024 ။