ၶူင်ႇႁိူဝ်းမိၼ်ၵူႈမိူင်းမိူင်း မိူၼ်ၼင်ႇတႃႈႁိူဝ်းမိၼ်သူဝၼ်းၼႃးၽုမ်း မိူင်းၵွၵ်ႇ(ၵုင်းထဵပ်ႈ) လႄႈ တႃႈႁိူဝ်းမိၼ် ၵဵင်းမႂ်ႇ ၵူတ်ႇထတ်းၵူၼ်းၶဝ်ႈမိူင်းႁၢဝ်ႈႁႅင်း တႃႇႁႄႉၵင်ႈတၢင်းပဵၼ် ဝၢႆႊရၢတ်ႉသ် ၼီႊပႃႊ။

ဝၼ်းတီႈ 24/01/2026 တႃႈႁိူဝ်းမိၼ် ၵူႈမိူင်းမိူင်း ဢၼ်မီးတီႈဝဵင်းလူင်ၵုင်းထဵပ်ႈလႄႈ ဢၼ်မီးတီႈ ဝဵင်းၵဵင်းမႂ်ႇ 2 ဢၼ် ပႂ်ႉၵူတ်ႇထတ်းၵူၼ်းၼွၵ်ႈမိူင်းၸိူဝ်းၶဝ်ႈမႃးမိူင်းထႆး။ ပိူင်လူင်ၵူတ်ႇထတ်း ဢၼ်လုၵ်ႉမိူင်းၵြႃးဢိၼ်ႊတီႊယႃႊမႃး ဢမ်ႇၼၼ် ဢၼ်လုၵ်ႉတၢင်ႇမိူင်းၼႂ်းလုမ်ႈၾႃႉမႃး ၵူၺ်းၵႃႈလႆႈမႃးၵိုတ်းဝႄႉတီႈမိူင်းၵြႃးဢိၼ်ႊတီႊယႃႊသေ ၸင်ႇမႃးမိူင်းထႆး။ ပလိၵ်ႈလႄႈၾၢႆႇပၢႆးယူႇလီ ၸႂ်ႉၶိူင်ႈၸၢၵ်ႈသႅၼ်းလီ ပႂ်ႉၵူတ်ႇထတ်း ႁႅင်းလူမ်းမႆႈ လႄႈ လွတ်ႇလူမ်းထူၺ်ႈၸႂ် ။ ၵူဝ်ၸိူဝ်းၶဝ်တိတ်းၸပ်းတၢင်းပဵၼ်ဝၢႆႊရၢတ်ႉသ် ၼီႊပႃႊ မႃးပႃးဝႃႈၼႆ။

ဝၼ်းတီႈ 26/01/2026 မိူဝ်ႈဝႃး မေႃယႃလူင် ဝရၼ်ႊယူႊ ၵျမ်ႊၼူင်ႊပရသၢတ်ႇၽွၼ်း ၾၢႆႇပၢႆးယူႇလီၼႂ်းမိူင်းၵဵင်းမႂ်ႇ ပိုၼ်ၽၢဝ်ႇလၢတ်ႈဝႃႈ တေႃႇထိုင်ယၢမ်းလဵဝ်တႄႉ တီႈၼႂ်းမိူင်းထႆး ပႃးၸဵမ်ၼႂ်းမိူင်းၵဵင်းမႂ်ႇ ပႆႇမီးၵူၼ်းတိတ်းၸပ်းတၢင်းပဵၼ်ဝၢႆႊရၢတ်ႉသ် ၼီႊပႃႊ ၼႆႉ။ ၶိူင်ႈမိၼ်ဢၼ်လုၵ်ႉမိူင်းၵြႃးမႃးၵမ်းသိုဝ်ႈသေမႃးလူင်းတီႈတႃႈႁိူဝ်းမိၼ်ၵဵင်းမႂ်ႇၵေႃႈပႆႇမီး။ ၵူၺ်းၵႃႈ ၵူၼ်းမိူင်းၵဵင်းမႂ်ႇ ဢမ်ႇထုၵ်ႇလီဝႆႉမဝ်မၢင်။ ၾၢႆႇပၢႆးယူႇလီထုၵ်ႇလီၵူတ်ႇထတ်းပႂ်ႉတူၺ်းယူႇတႃႇသေႇ။ ၾၢႆႇၸွႆႈထႅမ်ၵေႃႈ ထုၵ်ႇလီႁၢင်ႈႁႅၼ်းဝႆႉတႃႇတီႈယူႇတီႈလိုဝ်ႈ တႃႇၵုမ်းၶင်တူဝ်ၵူၼ်း သင်ဝႃႈမီးၵူၼ်းတိတ်းၸပ်းတၢင်းပဵၼ်ဢၼ်ၼႆႉမႃး။ ယွၼ်ႉပိူဝ်ႈမၼ်းပဵၼ် တၢင်းပဵၼ်ဢၼ်တၢႆငၢႆႈလိူဝ်တၢင်းပဵၼ်ၶူဝ်ႊဝိတ်ႉ။ တေႃႇထိုင်ယၢမ်းလဵဝ် ပႆႇမီးယႃႈယႃမၼ်း – ဝႃႈၼႆ။

တီႈမိူင်းၵြႃးတႄႉ ၸိုင်ႈမိူင်းပိုၼ်ၽၢဝ်ႇပဵၼ်တၢင်းၵၢၼ်ဝႃႈ ယၢမ်းလဵဝ်ၵူၼ်းၸပ်းတၢင်းပဵၼ်ဢၼ်ၼႆႉဝႆႉမီးယူႇ 5 ၵေႃႉ။ ယူတ်းယႃတူဝ်ဝႆႉ ၸွမ်းၼင်ႇငဝ်းလၢႆးပဵၼ်မႃးယူႇ။ ၵူၼ်းၸိူဝ်းလႆႈယူႇၸမ်ၵၼ်တင်းၶဝ်ၼႂ်းၶၢဝ်းတၢင်း ၽၢၵ်ႇလိူၼ် 20 ဝၼ်းၼႆႉသမ်ႉမီးယူႇ 180 ပၢႆ ၼၼ်ႉၵေႃႈထုၵ်ႇၵုမ်းၶင် ၵႂႃႊရၼ်ႊထိၼ်ႊဝႆႉယဝ်ႉ – ၼႆ သိုဝ်ႇၶၢဝ်ႇၸိုင်ႈမိူင်းၵြႃးပိုၼ်ၽၢဝ်ႇဝႆႉၼင်ႇၼႆ။

တၢင်းပဵၼ်ၼီႊပႃႊ ၼႆႉ ၸိူဝ်ႉမႅင်းမၼ်းလုၵ်ႉတီႈတူဝ်ဝိင်ႇမႃး။ ၵူၼ်းဢမ်ႇၼၼ်သတ်း ၵႂႃႇၵိၼ်မႅၼ်ႈမၢၵ်ႇမႆႉမၢၵ်ႇတွၵ်ႇဢၼ်မီးႁွႆးမိင်ႇၵိၼ်ဝႆႉ၊ ၵႂႃႇၵိၼ်ၺႃးမႅၼ်ႈၽၵ်းယိူဝ်ႈၼၢင်းၶဵဝ် ဢၼ်ၺႃးမိင်ႇယဵဝ်ႈသႂ်ႇဝႆႉၸိူဝ်းၼၼ်ႉ- ၸိူဝ်ႉမႅင်းတၢင်းပဵၼ်ၸၢင်ႈတိတ်းၸပ်းၶဝ်ႈထိုင်ၼႂ်းတူဝ်ၵူၼ်းလႆႈၵမ်းသိုဝ်ႈ။

သင်ဝႃႈတိတ်းၸပ်းတၢင်းပဵၼ်ၼႆႉယဝ်ႉၼႆၸိုင် ၾၢင်ႁၢင်ႈတၢင်းပဵၼ် တေပဵၼ်မႃးမိူၼ်ၼင်ႇ ၼိူဝ်ႉမႆႈ ၵူၼ်ႉမူၺ်ႈ ႁူဝ်ပၼ်ႇႁူဝ်မဝ်း လူင်လူင်လိုမ်းလိုမ်း ထူၺ်ႈၸႂ်ယၢပ်ႇ ၸိူဝ်းၼႆႉသေ ၸၢင်ႈထိုင်တၢႆလႆႈဝႆးဝႆး။

ၵွပ်ႈၼႆ ၵူၼ်းၸိူဝ်းယူႇႁိမ်းၸမ်ထမ်ႈ ၊ တိၼ်လွႆလႃႇႁႃႉ ၼႂ်းပိုၼ်ႉတီႈဢၼ်မီးၼူၵ်ႉမိင်ႇၸိူဝ်းၼႆႉ ႁႂ်ႈၾၢင်ႉယူႇၾၢင်ႉၵိၼ်လႄႈ လုမ်းလႃးပၢႆးယူႇလီၸဝ်ႈၵဝ်ႇ၊ ၵႆႉလၢင်ႉမိုဝ်း လႄႈမေႃႈဝၢၼ်ႇ ၶိူင်ႈၸႂ်ႉၶူဝ်းသွႆ တီႈႁိူၼ်း၊ တၢင်းၵိၼ်တၢင်းယမ်ႉၵေႃႈႁႂ်ႈသုၵ်ႈလၢင်ႉၶႅမ်ႉၶႅမ်ႉယဝ်ႉၸင်ႇၵိၼ်။ မၢၵ်ႇမႆႉ လႄႈၽၵ်းၶဵဝ်ဢၼ်မီးႁွႆးၼူၵ်ႉၼူ ၵၢပ်ႈၶူပ်းယဝ်ႉၸိူဝ်းၼၼ်ႉဢမ်ႇထုၵ်ႇလီဢဝ်မႃးၵိၼ်လႃးလႃး – ၾၢႆႇပၢႆးယူႇလီပၼ်ၾၢင်ႉဝႆႉၼင်ႇၼႆ။