ဝၼ်းတီႈ 20/05/2025 ၼႆႉ ၸုမ်းပၢႆးယူႇလီလုမ်ႈၾႃႉ WHO ၸတ်းပၢင်ၵုမ်လူင် ၺီႇလႃႇၶၢမ်ႇ တီႈဝဵင်းၵျႃႇၼီႇပႃႇၼၼ်ႉ ၵႅမ်ၸွမ်ၽွင်းလူင် မိူင်းၶႄႇ လီႊၵျူဝ်ႊၸူင်ႊ မွၵ်ႇလၢတ်ႈၵႂႃႇဝႃႈ တေၵမ်ႉၸွႆႈပၼ်ငိုၼ်း ၼႂ်းၶၵ်ႉၵၢၼ်ပၢႆးယူႇလီ 500 လၢၼ်ႉတေႃႊလႃႊ တႃႇၶၢဝ်းတၢင်း 5 ပီ ဝႃႈၼႆ။
ၸွမ်းၼင်ႇ ၶေႃႈတႅပ်းတတ်း ၸွမ်ၸိုင်ႈမိူင်းဢမေႊရိၵၼ်ႊ ၻူဝ်ႊၼေႃႊ ထရမ်ႉသေ ၵၢၼ်ငိုၼ်းတွင်း ၸုမ်းပၢႆးယူႇလီလုမ်ႈၾႃႉ လႆႈၵပ်ႉၵိၼ်းၵႂႃႇႁၢဝ်ႈႁႅင်း။ ၺႃးတတ်းပႅတ်ႈ ၵႃႈၸႂ်ႉၸၢႆႇငိုၼ်းတွင်း တႃႇၼႂ်းပီ 2026 – 2027 ၵိုင်ႇငိုၼ်း 4.2 ပီႊလီႊယႅၼ်ႊတေႃႊလႃႊ တႃႇ 21 ဝၢၵ်ႈ (%)။
တႄႇႁူဝ်ပီ 2025 မႃး လူင်ပွင်ၸိုင်ႈမိူင်းဢမေႊရိၵၼ်ႊ ၵိုတ်းယင်ႉပႅတ်ႈ လွင်ႈပၼ်တၢင်းၸွႆႈထႅမ် ၼွၵ်ႈမိူင်းဝႆႉလႄႈ ႁဵတ်းႁႂ်ႈၸုမ်းတူင်ႉၼိုင်တူင်ႇဝူင်းၵူၼ်း လၢႆလၢႆၸိုင်ႈမိူင်း လႆႈၵိုတ်းယင်ႉၵၢၼ်ငၢၼ်းသေ တုမ်ႉတိူဝ်ႉၵူၼ်းၸိူဝ်းလူဝ်ႇတၢင်းၵမ်ႉၸွႆႈၵႂႃႇ တင်းလုမ်ႈၾႃႉ။
တွၼ်ႈတႃႇ ငိုၼ်းၵႃႈၸႂ်ႉၸၢႆႇ ၸုမ်းပၢႆးယူႇလီလုမ်ႈၾႃႉ WHO ပီတေမႃးၼႆႉ လႆႈတႅပ်းတတ်းၵႂႃႇ ၼႂ်းပၢင်ၵုမ်လူင် ၺီႇလႃႇၶၢမ်ႇ မိူဝ်ႈဝၼ်းတီႈ 20 လိူၼ်မေႊၼႆႉဝႃႈ – တေၽိူမ်ႉငိုၼ်းၵွင်ၵၢင် ဢၼ်ၵူႈၸိုင်ႈမိူင်း တိုၼ်းတေလႆႈၵမ်ႉၸွႆႈၼၼ်ႉ တႃႇ 20 % ။ ၼႂ်းၸိုင်ႈမိူင်းၸိူဝ်းတေပၼ်ငိုၼ်းၵမ်ႉၸွႆႈၼၼ်ႉ မိူင်းၶႄႇ တေပဵၼ်မိူင်းဢၼ်သႂ်ႇငိုၼ်းၵွင်ၵၢင် ၼမ်လိူဝ်ပိူၼ်ႈတီႈသုတ်း ၼႂ်းလုမ်ႈၾႃႉ ဝႃႈၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ