ဝၼ်းတီႈ 18/10/2024 ပူၼ်ႉမႃးၼႆႉ ယူႇတီႈ ၸုမ်းပၢႆးယူႇလီ လုမ်ႈၾႃႉ WHO ပိုၼ်ၽၢဝ်ႇဢွၵ်ႇမႃးဝႃႈ ယႃႈယႃၵိၼ် တႃႇတေယူတ်းယႃ တၢင်းပဵၼ်တွင်ႈၵႂႃႇတွင်ႈႁေႈ ၶၢတ်ႇတူဝ်ႈလုမ်ႈၾႃႉလႄႈ ႁဵတ်းႁႂ်ႈတုမ်ႉတိူဝ်ႉၵၢၼ်ငၢၼ်း တႃႇၵႅတ်ႇၶႄႁႄႉၵင်ႈ တၢင်းပဵၼ်တွင်ႉၼႆ – သိုဝ်ႇၶၢဝ်ႇ AFP ႁၢႆးငၢၼ်းဝႆႉၼင်ႇၼႆ။
လွင်ႈယႃႈယႃၶၢတ်ႇၵႂႃႇၼႆႉ ဢမ်ႇၸႂ်ႈဝႃႈ ယွၼ်ႉၵိုတ်းလိုဝ်ႈ လွင်ႈႁဵတ်းဢွၵ်ႇယႃႈယႃ။ ပဵၼ်ယွၼ်ႉလွင်ႈၵူၼ်းပဵၼ် ဢၼ်လူဝ်ႇယႃႈယႃ တိူဝ်းၼမ်မႃးၵူၺ်း – ဝႃႈၼႆ။
တႄႇဢဝ် ဝၼ်းတီႈ 01/09/2024 တေႃႇထိုင် 14/10/2024 ၼႆႉ ၵူၼ်းမိူင်းမၢၼ်ႈ၊ မိူင်းပင်းၵလႃးတိတ်ႉသ် (Bangladesh)၊ မိူင်းသုၺ်ႊတိၼ်ႊ(Sudan)၊ ဢီႊတီႊယူဝ်ႊပီႊယိူဝ်ႊ (Ethiopia)၊ ၼၢႆႊၵျႃႊ(Niger) ၸိူဝ်းၼႆႉ ဢွၼ် ၵၼ် ပဵၼ်တၢင်းပဵၼ်တွင်ႉၵႂႃႇတွင်ႉႁေႈၼမ်ႁႅင်းလႄႈ ယႃႈယႃလႆႈၶၢတ်ႇၵႂႃႇ။ ၵွပ်ႈၼႆလႄႈ ထိုင်မႃး ၼႂ်းဝၼ်းတီႈ 14 ၼႆႉ ယႃႈယႃ ၶၢတ်ႇၵႂႃႇ ပႅတ်ႈမူတ်းယဝ်ႉ ဝႃႈၼႆ။
ယၢမ်းလဵဝ် ယႃႈယႃ ဢၼ်သင်ႇဝႆႉမီး 8 လၢၼ်ႉပၢႆ။ တိုၵ်ႉလႆႈသူင်ႇပၼ် 7 လၢၼ်ႉပၢႆၵူၺ်း။
ၸွမ်းၼင်ႇသဵၼ်ႈမၢႆ ၸုမ်းပၢႆးယူႇလီလုမ်ႈၾႃႉ (WHO) ပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 29/09/2024 ၼၼ်ႉ ၵူၼ်းၸပ်းတၢင်းပဵၼ်တွင်ႉၵႂႃႇတွင်ႉႁေႈမီး 439,724 ၵေႃႉ ၊ ၵူၼ်းလူႉတၢႆမီး 3,432 ၵေႃႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
