တႄႇဝူင်ႈထီႉသၢမ် လိူၼ်ၼႆႉမႃး တီႈဝဵင်းလိူဝ်ႇ မီးၵူၼ်းတိတ်းၸပ်းတၢင်းပဵၼ် တွင်ႉၵႂႃႇတွင်ႉႁေႈ ၼမ်လိူင်ႇသေ ထိုင်တီႈလူႉတၢႆ ယူႇတီႈ ႁွင်ႈၵၢၼ် ၾၢႆႇပၢႆးယူႇလီလႄႈ ၸုမ်းၸွႆႈထႅမ်တူင်ႇဝူင်းၵူၼ်း ပရႁိတၶဝ် လႆႈလူင်းပိုၼ်ႉတီႈ သိတ်းယႃႈၶႃႈမူင်ႈမႅင်းပၼ် လၢႆလၢႆတီႈ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 26/10/2024 ၼႆႉ လုၵ်ႈဢွၼ်ႇ ၵေႃႉၼိုင်ႈ ယူႇတၢင်း ၸႄႈဝဵင်းမႁႃႇဢွင်ႇမျေႇ ဝဵင်းလိူဝ်ႇ ပဵၼ်တွင်ႉၵႂႃႇတွင်ႉႁေႈသေ လူႉတၢႆၵႂႃႇ ယွၼ်ႉတၢင်းပဵၼ်ၼႆႉသေ ၸွမ်းၼင်ႇ လႆႈႁူႉၸွမ်းတႄႉ မီးၵူၼ်းလူႉတၢႆ ဢမ်ႇယွမ်း 5 ၵေႃႉယဝ်ႉၼႆ ၽူႈၶဝ်ႈၸုမ်း ပရႁိတ ၼႂ်းပိုၼ်ႉတီႈ ၵေႃႉၼိုင်ႈလၢတ်ႈ။

ၵူၼ်းတိတ်းၸပ်း တၢင်းပဵၼ် တွင်ႉၵႂႃႇတွင်ႉႁေႈသေ လူႉတၢႆၼၼ်ႉ ပဵၼ်လုၵ်ႈဢွၼ်ႇ 3 ၵေႃႉ၊ ထဝ်ႈယိင်း ၵေႃႉၼိုင်ႈလႄႈ ၵူၼ်းၸၢႆးၵေႃႉၼိုင်ႈ ဝႃႈၼႆ။

ယၢမ်းလဵဝ် တီႈဝဵင်းလိူဝ်ႇၼႆႉ ၵႆႉႁဵတ်းပွႆးလၢမ်းၼမ်၊ ၵူၺ်းၵႃႈ တၢင်းၵိၼ်ဢၼ်ဝၢင်းၶၢႆ ၸွမ်းပွႆးလၢမ်းၸိူဝ်းၼၼ်ႉ ဢမ်ႇပေႃးမီးလွင်ႈၸိုၼ်ႈသႂ်၊ မႅင်းမူၼ်းတွမ်ၼမ်သေ ႁဵတ်းႁႂ်ႈတွင်ႉၸဵပ်းတွင်ႉၵႅၼ်း၊ မၢင်ၸိူဝ်း ၸပ်းတၢင်းပဵၼ်တွင်ႉၵႂႃႇတွင်ႉႁေႈသေ ထိုင်တီႈမီးၵူၼ်းလူႉတၢႆမႃး။ ယွၼ်ႉၼၼ် ႁႂ်ႈၾၢင်ႉၵၼ်ယူႇသဝ်း ငိူင်ႉဝႄႈတၢင်းၵိၼ် ဢၼ်မူင်ႈမႅင်းတွမ် ၸိူဝ်းၼၼ်ႉၼႆ ပၼ်ၾၢင်ႉၵၼ်ဝႆႉၼင်ႇၼႆ။

ဢၢင်ႈဢိင် – The Irrawaddy