ပေႃးဢဝ် ပိူင်ၸိုင်ႈမိူင်းဢၼ်ငဝ်းလၢႆးဝၢၼ်ႈမိူင်းၼိမ်သဝ်းဝႃႈတႄႉ ပၢင်လိူၵ်ႈတင်ႈၸိုင်ႈထႆးၼႆႉ တေဢၢၼ်းၸတ်းၼႂ်းပီ 2027 မွၵ်ႈလိူၼ်မေႊၼၼ်ႉ ဝႃႈၼႆသေတႃႉ ဢိင်ၼိူဝ် ၵၢၼ်မိူင်းၵိုင်ႉၵၢင်ႉမီးလွင်ႈလႅၵ်ႈလၢႆႈသေ ၶွမ်ႊမသျိၼ်ႊပၢင်လိူၵ်ႈတင်ႈၸိုင်ႈထႆး ၸင်ႇပိုၼ်ၽၢဝ်ႇတေၸတ်းပၢင်လိူၵ်ႈတင်ႈၼႂ်းပီ 2026 ၼႆႉ ။ ၵၢၼ်မိူင်းၼႂ်းၸိုင်ႈထႆးၼႆႉ မၼ်းၸၢင်ႈတုမ်ႉယွၼ်ႈထိုင်မိူင်းႁိမ်းႁွမ်း ပႃးၸဵမ်မိူင်းႁူမ်ႈတုမ်မၢၼ်ႈ ။ ယွၼ်ႉဝႃႈ ၼႂ်းထႆး မီးႁႅင်းၵၢၼ်ယၢၼ်မိူင်းၼမ် ။

ပႃႇတီႇ ဢၼ် တူင်ႉတိုၼ်ႇလႄႈ ဢၼ်ၵူၼ်းၼမ် ပၵ်းတႃပႂ်ႉတူၺ်းယူႇယၢမ်းမိူဝ်ႈလဵဝ်တႄႉ ပဵၼ် ပႃႇတီႇၽုမ်ႊၸႆႊထႆး ဢၼ်ၵမ်ႈၼမ်ႁၼ်ဝႃႈ ပဵၼ်ပႃႇတီႇဢၼ်တိုၵ်ႉတိုတ်ႉၸၼ်ဝႆႉပိူင်ၾိင်ႈမိူင်းၵဝ်ႇၵဝ်ႇ ၊ မီးထႅင်ႈပႃႇတီႇ ပရႃႊၶျႃႊၶျူၼ်ႊ ဢၼ်ပဵၼ်ၸိူဝ်ႉသၢႆပႃႇတီႇၵၢဝ်ႉၵလႆႊ ဢၼ်ၺႃးပၢၵ်ႈပႅတ်ႈဝႆႉ လႄႈ ပႃႇတီႇၽိူဝ်ႉထႆး ဢၼ်ၵမ်ႈၼမ်ႁၼ်ဝႃႈ ဝႆႉၵၢၼ် ပၢႆးမၢၵ်ႈမီးပဵၼ်ယႂ်ႇ ၼႆၸိူဝ်းၼႆႉ ။

ၽႂ်တေဢွင်ႇပေႉ ၽႂ်တေလႆႈတီႈယူႇၼမ်ၼႆၼၼ်ႉတႄႉ ယူႇတီႈၵၢၼ်တူင်ႉၼိုင်ႁႃသဵင် သူၼ်းတုမ် ၶဝ်ၼႆႉ ၽူႈလဵပ်ႈ ႁဵၼ်းၵၢၼ်မိူင်းၶဝ်လၢတ်ႈၼႆ။ဢၼ်တေႁဵတ်းႁႂ်ႈပၢင်လိူၵ်ႈတင်ႈ လႆႈၶႅပ်းသဵင် ပႅၵ်ႇပိူင်ႈၵၼ်တႄႉ တေယူႇတီႈ ႁူဝ်ၶေႃႈဢၼ်ၶဝ်တေသူၼ်းတုမ်။

မိူင်းထႆးၼႆႉ လၵ်းလၵ်းၵေႃႈ သဵင်ၵၢင်ၸႂ်ၵူၼ်းမိူင်း ဢၼ်ၶႂ်ႈလႆႈၶႂ်ႈပဵၼ်မီးဝႆႉ တီႈဢေႇသုတ်းမၼ်း 3 လၢႆးၼႆႉ 1)တႃႇမူၼ်ႉမႄးပိူင်ငဝ်ႈပိုင်းမိူင်း 2)ပိူင်တပ်ႉသိုၵ်းလႄႈပိူင်လုမ်းတတ်းသိလ်(လုမ်းတႅပ်းတတ်းတြႃး)ၵွပ်ႈဝႃႈ ၵႆႉမီးလွင်ႈပၢၵ်ႈပႅတ်ႈတၼ်းႁဵင်း ပၢၵ်ႈပႅတ်ႈၸၼ်ႉထၢၼ်ႈၵၼ် လူၺ်ႈဢမ်ႇထွမ်ႇၵၢင်ၸႂ်ၵူၼ်းမိူင်း ၊ 3)ငဝ်းလၢႆးပၢႆးမၢၵ်ႈမီး မိူၼ်ၼင်ႇ ၶူင်းၵၢၼ်ၸၢႆႇငိုၼ်းၵေႃႉၶိုင်ႈၶိုင်ႈ မိူင်းထႆး ၸိူဝ်းၼႆႉ တေၵႂႃႇလႆႈထႅင်ႈႁႃႉ ဢမ်ႇၵႂႃႇလႆႈထႅင်ႈၼႆႉၼႆၼၼ်ႉ ၵေႃႈ ပဵၼ်ဢၼ်ၵူၼ်းမိူင်းသူၼ်ၸႂ်ဝႆႉၼမ်။

ဢိင်ၼိူဝ်ႁူဝ်ၶေႃႈၸိူဝ်းၼႆႉသေ မိူဝ်ႈလဵဝ်ပႃႇတီႇၵၢၼ်မိူင်း ၼႂ်းမိူင်းထႆး ဢွၼ်ၵၼ်တႄႇလူင်းသူၼ်းတုမ် လူၺ်ႈလၢႆး တၢင်းတဵတ်ႇယဵၼ် ။ ၼႂ်းလိူၼ်ထူၼ်ႈ 2 ပီ 2026 ၼႆႉတႄႉ လႅပ်ႈတေမီးမႃး ပႃႇတီႇၼင်ႇၵၼ် တေၶွတ်ႇၽွတ်ႈ ၸုမ်းဢူၺ်းလီၵၼ် ၽွတ်ႈၼႅင်ႈသၢၼ်ၵၼ်ၸိူဝ်းၼႆႉၼႆ ၽူႈလဵပ်ႈႁဵၼ်းၵၢၼ်မိူင်းၶဝ်လၢတ်ႈၼင်ႇၼႆ။

ပႃႇတီႇဢၼ် တၢင်ႇမၢႆၾၢင် လူင်းၸိုဝ်ႈတႃႇၶဝ်ႈၶႄႉၶႅင်ႇပၢင်လိူၵ်ႈတင်ႈ ၼႂ်းဝၼ်းတီႈ 08/02/2569 (2026) ၼႆႉ တင်းမူတ်း မီး 57 ပႃႇတီႇ ၼႆ ၶွမ်ႊမသျိၼ်ႊပၢင်လိူၵ်ႈတင်ႈထႆး กกต ပိုၼ်ၽၢဝ်ႇဝႆႉ မိူဝ်ႈႁူဝ်လိူၼ်ၵျၼ်ႊၼိဝ်ႊရီႊ 2026 ၼႆႉ ၼင်ႇၼႆ။

ၸွမ်းၼင်ႇ ပိူင်ၶွမ်ႊမသျိၼ်ႊပၢင်လိူၵ်ႈတင်ႈ တမ်းဝၢင်းဝႆႉတႄႉ ပႃႇတီႇၸိူဝ်းၶဝ်ႈၶႄႉၶႅင်ႇ ၼိုင်ႈပႃႇတီႇလႂ် တေလႆႈသူင်ႇ သဵၼ်ႈၸိုဝ်ႈ ၵူၼ်းဢၼ်တေႁပ်ႉပုၼ်ႈၽွၼ်းပဵၼ်လႆႈၸွမ်ၽွင်းလူင် 1 ထိုင် 3 ၵေႃႉ။ ပႃႇတီႇဢၼ်သူင်ႇသဵၼ်ႈၸိုဝ်ႈဝႆႉ မီး 43 ပႃႇတီႇ လႆႈႁူႉၼင်ႇၼႆ ။

ၼႂ်းၼၼ်ႉ ပႃႇတီႇဢၼ်ၵူၼ်းသႅၼ်းႁုၼ်ႈမႂ်ႇလႆႈၸႂ်ၼမ် ပႃႇတီႇပရႃႊၶျႃႊၶျူၼ်ႊ ပၼ်သဵၼ်ႈၸိုဝ်ႈ ၼေႃႇၸွမ်ၽွင်းလူင် ဝႆႉဝႆႉ 3 ၵေႃႉ ပဵၼ် ၼၢႆႊၼတ်းထၽူင်ႊ ရိူင်ႊပၼ်ႊယႃႊဝုတ်း ၊ ၼၢင်းသၢဝ်သီရိၵၼ်ႊယႃႊ တူၼ်ႉသၵုၼ်ႊ လႄႈ ၼၢႆးဝီႊရယုတ်း ၵၢၼ်ၶျူႊၶျတ်ႇ ။

ပႃႇတီႇၽုမ်ႊၸႆႈထႆးသမ်ႉ သူင်ႇသဵၼ်ႈၸိုဝ်ႈၼေႃႇၸွမ်ၽွင်းလူင်ဝႆႉ 2 ၵေႃႉ ပဵၼ် ၼၢႆးဢၼုထိၼ်း ၶျၢၼ်ႊဝီႊရၵုၼ်ႊ ( ၵေႃႉဢၼ်ပဵၼ် ၸွမ်ၽွင်းလူင်ထူၼ်ႈ 32 တၼ်းလႆႈသၢမ်လိူၼ် ၵိုတ်းသၽႃးပႅတ်ႈ ထိုင်ယၢမ်းလဵဝ်) ၊ လႄႈ ထႅင်ႈၵေႃႉၼိုင်ႈ သိႁသၵ်ႇ ၽူင်ႊၵဵတ်ႇၵႅဝ်ႉ ။

ပႃႇတီႇၽိူဝ်ႉထႆးသမ်ႉ ပၼ်ဝႆႉသဵၼ်ႈၸိုဝ်ႈ သၢတ်ႇတရႃႊၸၢရ်ယူတ်ႊၶျၼၼ်ႊ ဝူင်ႊသဝတ်ႊ ၊ ၼၢႆးၸူႇလၽၼ်ႊ ဢမွၼ်ႊဝိဝတ်ႊ လႄႈ ၼၢႆးသူႇရိယ ၸိုင်ႊရုင်ႉရိူင်ႊၵိတ်ႇ ၼႆၸိူဝ်းၼႆႉ။ပႃႇတီႇလႂ်ပႃႇတီႇၼၼ်ႉ ပၼ်သဵၼ်ႈၸိုဝ်ႈ ၵူၼ်းဢၼ်တေၶႂ်ႈႁပ်ႉတၼ်းႁဵင်းၸွမ်ၽွင်းလူင်မိူင်းထႆးလႆႈ 1 ထိုင် 3 ၵေႃႉၼႆလႄႈ ႁူမ်ႈသဵင်ႈ သဵၼ်ႈၸိုဝ်ႈၵူၼ်းဢၼ် တၢင်ႇယိုၼ်ႈဝႆႉ မီးထိုင် 73 ၵေႃႉ လူးၵွၼ်ႇ ဝႃႈၼႆ။

လိူဝ်ၼၼ်ႉ ပႃႇတီႇလႂ်ပႃႇတီႇၼၼ်ႉ သူင်ႇသဵၼ်ႈၸိုဝ်ႈ ၼေႃႇၽူႈတႅၼ်း ဢၼ်ဢဝ်ၸိုဝ်ႈပႃႇတီႇသေလိူၵ်ႈတင်ႈၶေႃၶေႃ လူၺ်ႈဢမ်ႇလူင်းလိူၵ်ႈၼႂ်းၶဵတ်ႇလိူၵ်ႈတင်ႈ ဢၼ်ၾၢႆႇထႆးႁွင်ႉဝႃႈ สส.แบบบัญชีรายชื่อ (Party list) ၼၼ်ႉၵေႃႈ တင်း 57 ပႃႇတီႇသူင်ႇသဵၼ်ႈၸိုဝ်ႈယဝ်ႉတူဝ်ႈ ။

မၢင်ပႃႇတီႇ ပၼ်သဵၼ်ႈၸိုဝ်ႈ 3 ၵေႃႉ မၢင်ပႃႇတီႇ သူင်ႇထိုင် 100 ၵေႃႉ ၵေႃႈမီး။ ၼႂ်းၼၼ်ႉ ပႃႇတီႇပရႃႊၶျူၼ်ႊ သူင်ႇသဵၼ်ႈၸိုဝ်ႈဝႆႉ 99 ၵေႃႉ ၊ ပႃႇတီႇၽိူဝ်ႉထႆး 100 ၵေႃႉ ၊ ပႃႇတီႇၽုမ်ႊၸႆႊထႆး 97 ။ သဵၼ်ႈၸိုဝ်ႈ ၼေႃႇၽူႈတႅၼ်းၸိူဝ်းၼႆႉ တေဢမ်ႇလႆႈၵႂႃႇသွၼ်ႉၵၼ်တင်း ၼေႃႇၽူႈတႅၼ်းဢၼ်လိူၵ်ႈတင်ႈၸွမ်းၼႂ်းၶဵတ်ႇလိူၵ်ႈတင်ႈဝဵင်းလႂ်ဝဵင်းၼၼ်ႉ ။

ၵဵဝ်ႇလူၺ်ႈလွင်ႈၼႆႉ ဢႃးၸၢရ်ၶိုၼ်းသႂ် ၸႂ်ယဵၼ် ၽူႈၵေႃႇတင်ႈၸုမ်းၶၢဝ်ႇၽူႈတွႆႇႁွၵ်ႈ လၢတ်ႈၼႄဝႃႈ – “ สส.แบบบัญชีรายชื่อ (Party list) ဢၼ်ဝႃႈၼႆႉ သင်ဝႃႈ ဝၢႆးလိူၵ်ႈတင်ႈယဝ်ႉ ပႃႇတီႇလႂ်ပေႉလႆႈလၢႆပိူဝ်ႊသဵၼ်ႊ ။တူဝ်ယၢင်ႇမၼ်း ပေႃးဝႃႈ ပေႉထိုင် 100 % ၼႆ တီႈၼင်ႈၼႂ်းသၽႃးလႆႈ 50 တီႈၼင်ႈၼႆၸိုင် ၵႃႈဢမ်ႇတဵမ် 50 တီႈၼင်ႈၼၼ်ႉ ၸၼ်ဢဝ်ၵူၼ်းၸိူဝ်းၼႆႉ သႂ်ႇလႆႈၸွမ်း” – ဝႃႈၼႆ။

สส.แบบบัญชีรายชื่อ (Party list) ဢၼ်ဝႃႈၼႆႉ ငၢႆးမိူၼ် ပိူင် PR ပိူင်လိူၵ်ႈတင်ႈၸွမ်းပုၼ်ႈသုၼ်ႇဝႆႉ ။ ပေႉလႆႈၶၼႅၼ်းမၼ်းၼမ်ၵႃႁိုဝ်ၵေႃႈ မီးသုၼ်ႇလႆႈဢဝ်တီႈၼင်ႈၼႂ်းသၽႃး ၼမ်ၵႃႈၼၼ်ႉ။

ဝၢႆးပၢင်လိူၵ်ႈတင်ႈၼႆႉယဝ်ႉ မိူင်းထႆး တေၶွတ်ႇၽွတ်ႈ လူင်ပွင်ၸိုင်ႈမႂ်ႇ ၊ ယဝ်ႉၵေႃႈ တေၶတ်းလိူၵ်ႈၸွမ်ၽွင်းလူင်ၵေႃႉမႂ်ႇမႃး ၵမ်းၼႆႉ တေမီးမႃးၸွမ်ၽွင်းလူင် ၵေႃႉထူၼ်ႈ 33 ။
ၸွမ်ၽွင်းလူင် ၵေႃႉထူၼ်ႈ 32 ဢၼုထိၼ်ႊ ၶျၢၼ်ႊဝီႊရၵုၼ်ႊတႄႉ တိုၵ်ႉႁပ်ႉတၼ်းႁဵင်း မီးၶၢဝ်းတၢင်း 3 လိူၼ်ၵူၺ်း သမ်ႉပေႃးၵိုတ်းပႅတ်ႈသၽႃး ။ ၸင်ႇၼၼ်လႄႈ တေၶိုၼ်းၸတ်းပၢင်လိူၵ်ႈတင်ႈ ၼႆ ၾၢႆႇၶွမ်ႊမသျိၼ်ႊပၢင်လိူၵ်ႈတင်ႈၸိုင်ႈထႆး ပိုၼ်ၽၢဝ်ႇၵႂႃႇ မိူဝ်ႈဝၼ်းတီႈ 15/12/2025 ၼႆႉ ။

ၸွမ်းၼင်ႇ ပိူင်ငဝ်ပိုင်းမိူင်း ၸိုင်ႈထႆး 2016 ၼၼ်ႉတႄႉ ပိူင်းၼႄဝႆႉဝႃႈ ဝၢႆးၵိုတ်းသၽႃးယဝ်ႉ ၶၢဝ်းတၢင်း 60 ဝၼ်း တၵ်းတေလႆႈၸတ်းပၢင်လိူၵ်ႈတင်ႈမႂ်ႇၶိုၼ်း ။
ၼႂ်းၶၢဝ်းတၢင်း 2 ပီမႃးၼႆႉၵူၺ်း ၸွမ်ၽွင်းလူင်ၸိုင်ႈထႆး လႅၵ်ႈလၢႆႈ 3 ၵေႃႉ ပႃးၵေႃႉၼႆႉ ဝၢႆး ၸွမ်ၽွင်းလူင် (ၵေႃႉၵဝ်ႇ) မိူင်းထႆး ၽႄႊထွင်ႊထၢၼ်ႊသျိၼ်ႊၼဝပ်ႊ ထွၼ်တူဝ်ဢွၵ်ႇ။
ပေႃးထိုင်မႃး ဝၼ်းတီႈ 01/02/2026 ပဵၼ်ဝၼ်းဢၼ် တေလႆႈတွတ်ႈၶႅပ်းၵၢင်ၸႂ်လူင်ႈၼႃႈ လႄႈ ၸဵမ်ဢဝ်ၵူၼ်းယူႇတီႈၵႆ ဢမ်ႇၸၢင်ႈထိုင်လႆႈၶဵတ်ႇလိူၵ်ႈတင်ႈလႄႈသင် ၵူၼ်းၸိူဝ်းဢၼ်ဢမ်ႇပိုင်ႈတူဝ်ၵဝ်ႇလႆႈ( ပဵၼ်ၵူၼ်းဢမ်ႇၶႅင်ႁႅင်း) ၸိူဝ်းၼႆႉလႄႈသင် ႁႂ်ႈတွတ်ႈၶႅပ်းသဵင်လူင်ႈၼႃႈ။

ဢိင်ၼိူဝ် ၵၢၼ်မိူင်းၵႆႉမီးလွင်ႈလႅၵ်ႈလၢႆႈလႄႈ ၵူၼ်းၼုမ်ႇထႆးၶဝ်တႄႉ မုင်ႈမွင်း ႁႂ်ႈမီးမႃး လူင်ပွင်ႇၸိုင်ႈ ဢၼ်ၶႂ်ႈတူၺ်းထိုင်ဝၢၼ်ႈမိူင်းတႄႉတႄႉ ၼၼ်ႉ ၼႆယူႇ။

ၵူၼ်းၼုမ်ႇထႆး လုၵ်ႈႁဵၼ်းၸၼ်ႉၸွမ်မႁႃႇၸူးလႃးလူင်းၵွၼ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “
ဢၼ်မုင်ႈမွင်းၼႂ်းၵၢၼ်လိူၵ်ႈတင်ႈ ပွၵ်ႈၵမ်းၼႆႉ ၶႂ်ႈႁႂ်ႈမီးလွင်ႈလႅၵ်ႈလၢႆႈၵၢၼ်မိူင်းပၢၼ်ၵဝ်ႇ သူႇၸူးၵၢၼ်မိူင်းဢၼ်မႂ်ႇ ၊ ႁႂ်ႈပဵၼ်မႃးတီႊမူဝ်ႊၵရေႊၸီႊဢၼ်မီးၼမ်ႉတွၼ်းၼိူဝ်ၵူၼ်းမိူင်း ။ ပိူင်လူင်မၼ်းတႄႉ ႁႂ်ႈပဵၼ်မႃးလူင်ပွင်ၸိုင်ႈ ဢၼ်တေပူၵ်းပွင် ယုၵ်ႉမုၼ်းပၼ် ႁႂ်ႈမီးမႃး ပေႃႊလၸီႊ ဢၼ်တေၵႄႈၶႆပၼ်ႁႃပၢႆးမၢၵ်ႈမီးၸိုင်ႈမိူင်းလႆႈ ၊ ႁႂ်ႈဝႆႉ ပၢၵ်ႇတွင်ႉၵူၼ်းမိူင်း ပဵၼ်ယႂ်ႇ။ ၸင်ႇၼၼ် ၶႂ်ႈလႆႈ ၵၢၼ်လိူၵ်ႈတင်ႈ ဢၼ်သိုဝ်ႈယူဝ်းၼိူဝ်ၵူၼ်းမိူင်းတႄႉတႄႉ ၼၼ်ႉၵူၺ်း ” – ဝႃႈၼႆ။

ပႃႇတီႇ မၢင်ၸိူဝ်းႁၼ်ဝႃႈ ၵၢၼ်မိူင်း မိူင်းထႆး ၼႆႉ လူဝ်ႇမူၼ်ႉမႄးလႅၵ်ႈလၢႆႈ ပပ်ႉပၵ်းပိူင်လၵ်းမိူင်း ဝႃႈၼႆသေတႃႉ ၵူၼ်းမိူင်းမၢင်ၸိူဝ်း ဢၼ်ဢမ်ႇၶႂ်ႈမူၼ်ႉမႄးလႅၵ်ႈလၢႆႈၵေႃႈမီးယူႇ။
ၼႂ်းဝၼ်းတီႈ 27/01/2026 ၵၢင်ၼႂ်ၼႆႉ ယူႇတီႈၶွမ်ႊမသျိၼ်ႊပၢင်လိူၵ်ႈတင်ႈမိူင်းထႆးၼမ်းၸတ်း ပၢင်ပိုတ်ႇၼႄပၢႆးဝူၼ်ႉပႃႇတီႇ တႃႇမူၼ်ႉမႄးပိူင်လၵ်းမိူင်း ။ ၼႂ်းၼၼ်ႉ ပႃႇတီႇဢၼ်ဢမ်ႇႁၼ်လီၸွမ်း တႃႇမူၼ်ႉမႄး သူင်ႇတူဝ်တႅၼ်းမႃး 4 ပႃႇတီႇ ၊ ပႃႇတီႇဢၼ်ႁၼ်လီတႃႇမႄးပိူင်လၵ်းမိူင်းသမ်ႉ မီး 5 ပႃႇတီႇ ။ လိူၵ်ႈမႃး ၼိုင်ႈပႃႇတီႇလႂ်ၼိုင်ႈၵေႃႉ ။

လွင်ႈၼႆႉ ၵူၼ်းထႆး ဢႃယု 50 ပၢႆ ဢၼ်ယၢမ်ႈပဵၼ်ဢႃးၸၢရ်ၼႂ်းၸၼ်ႉၸွမ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ႁဝ်းတႄႉ ဢမ်ႇၶႂ်ႈလႆႈ ပႃႇတီႇဢၼ်တေမႃးမႄးပိူင်ငဝ်ႈပိုင်းမိူင်း ၊ ယွၼ်ႉၶဝ်တေမႃးႁဵတ်းႁႂ်ႈ ပိူင်ၸဝ်ႈႁေႃၶမ်းႁၢႆ ။ ၵူၼ်းထႆးၵမ်ႈၼမ် ဢမ်ႇၵျိူၵ်ႈႁႂ်ႈၶဝ်မႃးယႃႉပိူင်ႁေႃၶမ်း။ ၵမ်ႈၼမ် တေထုၵ်ႇၸႂ် ပႃႇတီႇၽုမ်ႊၸႆႊထႆး ၼမ်ဢေႃႈ မိူဝ်ႈလဵဝ် ” – ဝႃႈၼႆ။

ဢိင်ၼိူဝ်ပၢင်လိူၵ်ႈတင်ႈဢၼ်တေၸတ်းၼႆႉသေ ႁူဝ်ပဝ်ႈပႃႇတီႇၽုမ်ႊၸႆႊထႆး ၼၢႆးဢၼုထိၼ်း ၶျၢၼ်ႊဝီႊရၵုၼ်ႊ တႄႉ လၢတ်ႈတီႈသိုဝ်ႇတူင်ႇၵူၼ်းဝႃႈ – “ ပေႃးဝႃႈ လႆႈမီးတိုဝ်ႉတၢင်းပဵၼ်ၸွမ်ၽွင်းလူင်ထႅင်ႈၸိုင် မွၵ်ႈ 4 ပီၼႆႉၵူၺ်း ၵူၼ်းမိူင်းတေမီးငိုၼ်းၶမ်းၼမ်လိူင်ႇ ထိုင်တီႈဝႃႈ ဢမ်ႇမီးတီႈဝႆႉငိုၼ်းယဝ်ႉ ၼႆၼၼ်ႉလူးၵွၼ်ႇ ” – ဝႃႈၼႆ။