ၸိူဝ်ႉမႅင်းၶူဝ်ႊရူဝ်ႊၼႃႊ ဝၢႆးရတ်ႉသ် ဢၼ်တႄႇၽႄႈၼႂ်းမိူင်းဝူႊႁၢၼ်ႊ ၼၼ်ႉ ၸုမ်းပၢႆးယူႇလီလုမ်ႈၾႃႉ WHO မၵ်းမၼ်ႈၸိုဝ်ႈသဵင်မၼ်းပဵၼ်တၢင်းၵၢၼ်ဝႃႈ Covid- 19 ဝႃႈၼႆ။
Tedros Adhanom Ghebreyesus ၽူႈၵွၼ်းၾၢႆႇၸီႉသင်ႇ ပၢႆးယူႇလီလုမ်ႈၾႃႉ WHO ပိုၼ်ၽၢဝ်ႇတီႈလုမ်း ၵျီႇၼီႇဝႃႇ မိူင်းသဝိတ်ႉသိူဝ်ႊလႅၼ်ႊမိူဝ်ႈဝၼ်းတီႈ 11/2/2020 ဝႃႈ Co ၼႆႉမၢႆထိုင် ၶူဝ်ႊရူဝ်ႊၼႃႊ၊ vi ၼႆႉပဵၼ် ၸိူဝ်ႉမႅင်းဝၢႆးရတ်ႉသ် d ၼႆႉမၢႆထိုင် တၢင်းပဵၼ်၊ 19 ၼႆႉသမ်ႉမၢႆထိုင်ပီ ဢၼ်လႆႈထူပ်းႁၼ်မႅင်းတၢင်းပဵၼ် ပီ 2019 ၊ ယွၼ်ႉပိူဝ်ႈဝႃႈ ၸိုဝ်ႈသဵင် ရေႃးၵႃႇတၢင်းပဵၼ်ၼႆႉ လမ်ႇလွင်ႈတွၼ်ႈတႃႇၵၢၼ်ၽဵဝ်ႈမူၺ်ႉႁႄႉၵင်ႈတၢင်းပဵၼ်လႄႈၸင်ႇလႆႈသႂ်ႇၸိုဝ်ႈတၢင်းပဵၼ်ၼႆႉ ဝႆႉၵူႈဢၼ်- ဝႃႈၼႆ။
ၽူႈၵိူဝ်းၵုမ်ၸၼ်ႉသုင် ၾၢႆႇပၢႆးယူႇလီမိူင်းၶႄႇ လၢတ်ႈဝႃႈ ၸိူဝ်ႉမႅင်းတၢင်းပဵၼ်ဢၼ်ၽႄႈယူႇၼႆႉ တေၸၢင်ႈယဵၼ်ႁၢႆၵႂႃႇလီလီ မွၵ်ႈလိူၼ် April ၼႆႉ – ဝႃႈၼႆ။
ၽူႈၸီႉသင်ႇ WHO တႄႉလၢတ်ႈဝႃႈ ပၼ်ႁႃ ၸိူဝ်ႉမႅင်းတၢင်းပဵၼ် ဝၢႆးရတ်ႉသ်ၼႆႉ ႁၢႆႉၸႃႉလိူဝ်ပၼ်ႁႃၵေႃႇၵၢၼ်ႁၢႆႉ ထႅင်ႈလႄႈ လီဝႆႉပဵၼ် ၽူႈၶဵၼ်ႈထီႉ1 တႃႇၵူၼ်းမိူင်းၼႆသေ ၵႄႈလိတ်ႈပၼ်ႁႃၼႆႉၵႂႃႇဝႆးဝႆးယူႇ – ဝႃႈၼႆ။
တေႃႇထိုင်ဝၼ်းၽတ်း 13/2/2020 မိူဝ်ႈၼႆႉၵၢင်ၼႂ်တႄႉ တၢင်းပဵၼ်ၼႆႉၽႄႈထိုင် 29 ၸိုင်ႈမိူင်းၼႂ်းလုမ်ႈၾႃႉယဝ်ႉသေ ၵူၼ်းၸပ်းတၢင်းပဵၼ်ၼႆႉမီး 6 မိုၼ်ႇပၢႆ တၢႆ 1363 ၵေႃႉယဝ်ႉ။
ၸွမ်ၸိုင်ႈ သီၵျိၼ်ႉၽိင် မိူင်းၶႄႇ ပိုၼ်ၽၢဝ်ႇဝႃႈ ၼႂ်း ဝၼ်း 2 ဝၼ်းၼႆႉ ၵူၼ်းတိတ်းၸပ်းတၢင်းပဵၼ်ၼႆႉ လူတ်းယွမ်းလူင်းၵႂႃႇယဝ်ႉသေတႃႉ ၾၢႆႇတၢင်း WHO ပိုၼ်ၽၢဝ်ႇဝႃႈ ဢမ်ႇပႆႇလီဝႆႉမဝ်မၢင်။ ယႃႈယႃႁႄႉၵင်ႈ (ဝၵ်ႉသိၼ်း) တႃႇတၢင်းပဵၼ်ၼႆႉ ထႅင်ႈ 18 လိူၼ်ၸင်ႇတေၸၢင်ႈဢဝ်မႃးၸႂ်ႉပဵၼ်တၢင်းၵၢၼ် – ဝႃႈၼႆ။
Ref; WHO, VOA
