သိုၵ်းၵဝ်ႈၵၢင်ႉ MNDAA လႆႈၵုမ်းၵမ် ပၼ်ၵၢၼ်ၽွင်းငမ်းၶိုၼ်း ၸႄႈဝဵင်းၵူတ်ႉၶၢႆယဝ်ႉဢမ်ႇႁိုင် ယႃႉမွတ်ႇပႅတ်ႈ လိၵ်ႈတဢၢင်း ၸွမ်းပၢႆႉတၢင်းၶဝ်ႈဝၢၼ်ႈ ၼႂ်းၸႄႈဝဵင်းၵူတ်ႉၶၢႆသေ ယၢမ်းလဵဝ် သႂ်ႇၶိုၼ်း လိၵ်ႈမၢၼ်ႈ တင်း လိၵ်ႈၶႄႇ ၼႆယဝ်ႉ။

ဢွင်ႈတီႈသိုၵ်းၵဝ်ႈၵၢင်ႉ ယႃႉမွတ်ႇပႅတ်ႈ လိၵ်ႈတဢၢင်းၼၼ်ႉ ပဵၼ်ၸွမ်းဢိူင်ႇၵႃလႅင် လႄႈ ဢိူင်ႇႁူဝ်ၼွင် ၸွမ်းဝၢၼ်ႈမီးၸၢဝ်းၶိူဝ်းတဢၢင်းယူႇသဝ်းၼၼ်ႉၼႆ ၵူၼ်းမိူင်းပိုၼ်ႉတီႈ ၸႄႈဝဵင်းၵူတ်ႉၶၢႆ လၢတ်ႈၼင်ႇၼႆ။

“ဝၢႆးလင်ၶဝ်ၵုမ်းလႆႈၶိုၼ်းယဝ်ႉၵမ်ႉၼိုင်ႈၵူၺ်း ၶဝ်မွတ်ႇပႅတ်ႈလိၵ်ႈတဢၢင်း ၸွမ်းပၢႆႉတၢင်းၶဝ်ႈဝၢၼ်ႈပၢၼ်းသေး ၼႂ်းဢိူင်ႇၵႃလႅင် ဝၢၼ်ႈႁူဝ်သွင် ဝၢၼ်ႈပၢင်ႇလေႃႉ ဢိူင်ႇႁူဝ်ၼွင် ၸိူဝ်းၼႆႉဝႆႉ။ မိူဝ်ႈလဵဝ်ၼႆႉ ၶဝ်တႅမ်ႈသႂ်ႇၶိုၼ်း လိၵ်ႈမၢၼ်ႈ တင်း လိၵ်ႈၶႄႇဝႆႉတင်းသဵင်ႈယဝ်ႉ” ဝႃႈၼႆ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး သိုၵ်းတဢၢင်း သိုၵ်းၵဝ်ႈၵၢင်ႉ ႁူမ်ႈၵၼ် ၵုမ်းၵမ် ပၼ်ႇၵၢၼ်ၽွင်းငမ်း ၼႂ်းၸႄႈဝဵင်းၵူတ်ႉၶၢႆသေ ၼႂ်းႁၢင်လိူၼ်ၾႅပ်ႊပိဝ်ႊရီႊ လႄႈ လိူၼ်မၢတ်ႉမႃး သိုၵ်းၵဝ်ႈၵၢင်ႉ တင်း သိုၵ်းတဢၢင်း ယိုဝ်းၵၼ်ၶိုၼ်း ၼႂ်းၸႄႈဝဵင်းၵူတ်ႉၶၢႆလႄႈ သိုၵ်းတဢၢင်း လႆႈထွႆဢွၵ်ႇပၼ်ၶိုၼ်း ၼႂ်းၸႄႈဝဵင်းၵူတ်ႉၶၢႆ တင်းသဵင်ႈ ။

ၼႂ်းမိူင်းတႆးပွတ်းႁွင်ႇ ၸိူဝ်းပိုၼ်ႉတီႈ သိုၵ်းၵဝ်ႈၵၢင်ႉၵုမ်းၵမ်ဝႆႉ ဝၢႆးလင်ၽႅၼ်ၵၢၼ်ယၼ်ႇသိုၵ်း 1027 မႃး ၸွမ်းပၢႆႉတၢင်းၶဝ်ႈဝၢၼ်ႈ လႄႈ ပၢႆႉႁၢၼ်ႉတၢင်းၵိၼ်တၢင်းယႅမ်ႉ ဢိၵ်ႇပႃး ႁၢၼ်ႉတၢင်းၶၢႆၸိူဝ်းၼႆႉ ၵူၼ်းမိူင်း ပိုၼ်ႉတီႈ လႆႈၸႂ်ႉတိုဝ်းဝႆႉပဵၼ်လိၵ်ႈၶႄႇ တင်း လိၵ်ႈမၢၼ်ႈ ပဵၼ်ပိူင်ယႂ်ႇဝႆႉ ၼႆယဝ်ႉ။