မိူဝ်ႈၼႆႉ ဝၼ်းတီႈ 17 လိူၼ်မၢတ်ႉၶျ် ၽူႈၼမ်းသိုၵ်းတဢၢင်း (TNLA) ၵႂႃႇႁူပ်ႉထူပ်းၸွမ်း ၽူႈၼမ်းသိုၵ်းၶႄႇၵဝ်ႈၵၢင်ႉ (MNDAA) တီႈဝဵင်းၵၢတ်ႇၵဝ်ႇ (လၢဝ်ႇၵၢႆး) ပိူဝ်ႈတႃႇဢုပ်ႇဢူဝ်း ၵႄႈလိတ်ႈ ပၼ်ႁႃသိုၵ်းတင်းသွင်ၸုမ်းယူႇ ဝႃႈၼႆ။

ဝၼ်းတီႈ 14 -15/3/2026 သိုၵ်းၶႄႇၵဝ်ႈၵၢင်ႉ တင်း သိုၵ်းတဢၢင်း ယိုဝ်းတိုၵ်းၵၼ် ၸွမ်းၸႄႈဝဵင်းၵူတ်ႉၶၢႆ လႄႈ ၼိူဝ်သဵၼ်ႈတၢင်းလူင်ႁၢႆးဝေး သႅၼ်ဝီ – ၵူတ်ႉၶၢႆ – ၼမ်ႉၽၵ်းၵႃ- 105 လၵ်း ၵူၺ်းဢမ်ႇၵႃး လၢမ်းႁွတ်ႈထိုင်ပႃး ၾၢႆႇၼွၵ်ႈဝဵင်းၼမ်ႉၶမ်းဝႆႉသေ ႁဵတ်းႁႂ်ႈၵူၼ်းမိူင်းပိုၼ်ႉတီႈ လႆႈမႆႈၸႂ်ၵူဝ်ပၢင်တိုၵ်းလၢမ်းၶဝ်ႈထိုင် ၼႂ်းဝဵင်းၼမ်ႉၶမ်းယူႇ ၼႆယဝ်ႉ။

ၽူႈၶၢၼ်ပၢၵ်ႇတပ်ႉသိုၵ်းတဢၢင်း (TNLA) လူၺ်းယေႇဢူး ဢွၵ်ႇမႃးပိုၼ်ၽၢဝ်ႇလၢတ်ႈပဵၼ်တၢင်းၵၢၼ်တီႈ သိုဝ်ႇၶၢဝ်ႇပလွင်ႈ (လွႆ) ဝႆႉဝႃႈ “မိူဝ်ႈၼႆႉ (17/3/2026) ယၢမ်းၵၢင်ၼႂ်ၸဝ်ႉ ၽူႈယႂ်ႇၵူၼ်းလူင်ႁဝ်း တီႈငဝ်ႈငုၼ်းႁွတ်ႈဝႆႉတီႈဝဵင်းလၢဝ်ႇၵၢႆး ပိူဝ်ႈတႃႇႁူပ်ႉၸွမ်း ၽူႈၼမ်းသိုၵ်းၵဝ်ႈၵၢင်ႉ MNDAA ၶဝ်ယူႇ။ ယၢမ်းလဵဝ်တႄႉ ပၢင်တိုၵ်းၼႆႉယဵၼ်ဝႆႉယဝ်ႉ။ မုင်ႈမွင်းလႄႈယုမ်ႇယမ်ဝႃႈ ပၢင်ဢုပ်ႇဢူဝ်းပွၵ်ႈၼႆႉ တေလႆႈၶၢဝ်ႇလီမႃးယူႇ” ဝႃႈၼႆ။

ၽွင်းၸုမ်းသိုၵ်းတင်းသွင်ၾၢႆႇယိုဝ်းတိုၵ်းၵၼ် ၼႂ်းၸႄႈဝဵင်းၵူတ်ႉၶၢႆၼၼ်ႉ သိုၵ်းၶႄႇၵဝ်ႈၵၢင်ႉ တီႉၺွပ်းဢဝ် ၵူၼ်းသိုၵ်းတဢၢင်းၵႂႃႇ မွၵ်ႈ 100 ၵေႃႉပၢႆ။ တႃႇတေဢဝ်လႆႈၶိုၼ်း ပိုၼ်ႉတီႈဢၼ်သိုၵ်းတဢၢင်း လႆႈပွႆႇလုတ်ႈ ထွႆဢွၵ်ႇပၼ်ၵႂႃႇ ၽွင်းပၢင်တိုၵ်းၼၼ်ႉတႄႉ ယူႇတီႈၶေႃႈတွပ်ႇ ဢၼ်တေလႆႈမႃးတီႈ ပၢင်ၵုမ်ၽူႈၼမ်းၸုမ်း သိုၵ်း တင်းသွင်ၾၢႆႇ ပွၵ်ႈၼႆႉယူႇၼႆ – လူၺ်းယေႇဢူး သိုပ်ႇလၢတ်ႈဝႆႉၼင်ႇၼႆ။

ပၢင်တိုၵ်းသိုၵ်းတဢၢင်း တင်း သိုၵ်းၶႄႇၵဝ်ႈၵၢင်ႉ ၼႂ်းၸႄႈဝဵင်းၵူတ်ႉၶၢႆ လႄႈ သဵၼ်ႈတၢင်းလူင်ႁၢႆးဝေး သႅၼ် ဝီ-ၵူတ်ႉၶၢႆ- မူႇၸေႊၼႆႉ တႄႇမႃးတီႈၵူၼ်းသိုၵ်းလွႆ (တဢၢင်း) ပေႃႉ ထုပ်ႉ ႁေႃႈလိုပ်ႈ ၵူၼ်းသိုၵ်းၵဝ်ႈၵၢင်ႉ ၸိူဝ်းပၼ်ႇၵၢၼ်ၽွင်းငမ်းဝႆႉ ၼႂ်းဝဵင်းၵူတ်ႉၶၢႆ။

သိုၵ်းၶႄႇၵဝ်ႈၵၢင်ႉ ၸိူဝ်းပၼ်ႇၵၢၼ်ၽွင်းငမ်းဝႆႉယူႇ ၼႂ်းၸႄႈဝဵင်းၵူတ်ႉၶၢႆ လႄႈ ၸႄႈဝဵင်းသႅၼ်ဝီ ၶိုၼ်းၸွမ်း ပေႃႉထုပ်ႉ လိုပ်ႈလမ်းၵူၼ်းသိုၵ်းတဢၢင်း ဢွၵ်ႇၶၢႆႉပၢႆႈၵႂႃႇၼႂ်းပိုၼ်ႉတီႈသေ တင်းသွင်ၾၢႆႇၶဵင်ႈၶႅင်ၵၢၼ်သိုၵ်း တေႃႇၵၼ်မႃး ႁိုင်ၶၢဝ်းတၢင်း မွၵ်ႈၼိုင်ႈလိူၼ်။

ၼႂ်းၶၢဝ်းတၢင်းပဵၼ်ပၼ်ႁႃၵၼ်ယူႇၼၼ်ႉ သိုၵ်းၵဝ်ႈၵၢင်ႉ ဢိုတ်းႁၢမ်ႈ ႁတ်ႉႁႅတ်ႉပႅတ်ႈ ရူတ်ႉၵႃးတၢင်ႇၵုၼ်ႇ ၸိူဝ်းလတ်းၵႂႃႇမႃးၼႂ်းၼႃႈတီႈၶဝ်သေ တေသိုပ်ႇၶၢမ်ႈယၢင်ႈၵႂႃႇၸူး ၼႂ်း ၼႃႈတီႈသိုၵ်းတဢၢင်းၵုမ်းၵမ်ၼၼ်ႉ ၵူၺ်းဢမ်ႇၵႃး တင်ႈၵဵတ်ႉလၢၼ်ႇ ၼႂ်းၸႄႈဝဵင်းၼမ်ႉတူႈ၊ ၸႄႈဝဵင်းသႅၼ်ဝီ ၸိူဝ်းၼႆႉသေ ၵူတ်ႇထတ်းရူတ်ႉၵႃး ၵူၼ်းၶဝ်ႈၵူၼ်းဢွၵ်ႇ လႄႈ ဝႂ်လၢႆႇၸိၼ်ႇရူတ်ႉၵႃး ၼိူဝ်သဵၼ်ႈတၢင်းလူင်ႁၢႆးဝေး သႅၼ်ဝီ-ၵူတ်ႉၶၢႆ ႁၢဝ်ႈႁႅင်း။

ယွၼ်ႉသိုၵ်းၵဝ်ႈၵၢင်ႉ တင်း သိုၵ်းတဢၢင်း ပဵၼ်ပၼ်ႁႃၵၼ်သေ ၵူၼ်းမိူင်း ၸဝ်ႈၵႃႉၶူဝ်းၵုၼ်ႇမိူင်းတႆး ပွတ်းႁွင်ႇ ဢမ်ႇမီးသုၼ်ႇလႆႈ တေႃႉၶူဝ်းၵုၼ်ႇ ၵႃႉၶၢႆ လွတ်ႈလွတ်ႈလႅဝ်းလႅဝ်းလႄႈ ႁဵတ်းႁႂ်ႈၵႃႈၶၼ်ၼမ်ႉမၼ်း၊ ၵႃႈၶၼ်ၵုၼ်ႇၵိၼ်ယႅမ်ႉ ၵိုင်ႉၵၢင်ႉပုင်ႈၶိုၼ်ႈၵႂႃႇလိူဝ်ၵဝ်ႇ ၼႆယဝ်ႉ။

တႄႇဝၼ်းတီႈ 16 /3/2026 မႃး သိုၵ်းၶႄႇၵဝ်ႈၵၢင်ႉ MNDAA ယိုတ်းၵုမ်းဢဝ်လႆႈၸႄႈဝဵင်းၵူတ်ႉၶၢႆဝႆႉတင်းသဵင်ႈသေ ၾၢႆႇသိုၵ်းတဢၢင်း TNLA လႆႈထွႆဢွၵ်ႇၵႂႃႇတၢင်း ၸႄႈဝဵင်းၼမ်ႉၶမ်းသေ ယၢမ်းတၢမ်းၶမ်ႈ မိူဝ်ႈဝႃး ဝၼ်းတီႈ 16 လႆႈၵိုတ်းသၢႆသိုၵ်းၵဝ်ႈၵၢင်ႉၵေႃႈ လမ်းသိုၵ်းတဢၢင်းၵႂႃႇ ႁွတ်ႈထိုင်ဝႆႉ တီႈ 12 လၵ်း ၵႄႈၵၢင် ၼမ်ႉၽၵ်းၵႃ လႄႈ ဝဵင်းၼမ်ႉၶမ်းဝႆႉ ဝႃႈၼႆ။

လူၺ်းယေႇဢူး ယိုၼ်ယၼ်လၢတ်ႈဝႃႈ – ယၢမ်းလဵဝ် သိုၵ်းတင်းသွင်ၸုမ်း ၵိုတ်းဝႆႉသၢႆသိုၵ်း ၵၢၼ်သိုၵ်း ႁင်းၽႂ်မၼ်း တီႈဢွင်ႈႁွတ်ႈၽႅဝ်ဝႆႉၼၼ်ႉယူႇ ဝႃႈၼႆ။

ဝၢႆးလင်ပၢင်တိုၵ်းသိုၵ်းတဢၢင်း တင်း သိုၵ်းၵဝ်ႈၵၢင်ႉ ယဵၼ်ၵႂႃႇ မိူဝ်ႈဝႃးဝၼ်းတီႈ 16/3/2026 ၼၼ်ႉၵေႃႈ သိုၵ်းၶႄႇၵဝ်ႈၵၢင်ႉ ၶီႇရူတ်ႉၵႃး မၢႆ SR -1 မွၵ်ႈ 10 လမ်းသေ ၶဝ်ႈၵႂႃႇထိုင် ၼႂ်းၵၢင်ဝဵင်းလႃႈသဵဝ်ႈ ႁူပ်ႉဢုပ်ႇၵၼ် တင်း သိုၵ်းမၢၼ်ႈယိုတ်းမိူင်း တီႈႁူင်းႁႅမ်းၸၢင်ႉသွင်တူဝ် (ဆင်နှစ်ကောင်) ၼႆယဝ်ႉ။

ၵူၼ်းၸၢႆး ဢႃႇယု 40 ပၢႆ ၵေႃႉယူႇဝႆႉၼႂ်းဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝႃးၼႆႉ ပလိၵ်ႈမၢၼ်ႈ၊ ပလိၵ်ႈၶႄႇၵဝ်ႈၵၢင်ႉ သိုၵ်းမၢၼ်ႈ သိုၵ်းၶႄႇၵဝ်ႈၵၢင်ႉ ပေႃးသုၵ်ႉသၵ်ႉသူၼ်သိၼ်းသၢၼ်ၵၼ်ဝႆႉ ၸွမ်းႁေႃႇတႄႇ သိၼ်ႇၼၵွင်ႇ (ဆင်နှစ်ကောင်) ၼၼ်ႉ။ သိုၵ်းၶႄႇၵဝ်ႈၵၢင်ႉၼႆႉ ၶဝ်ဢဝ်ၵႃးၶဝ်မႃး မီးပဵၼ် 10 လမ်းပၢႆ။ ၶဝ်မႃးဢုပ်ႇၵၼ်တင်းသိုၵ်းမၢၼ်ႈၵႂႃႈ” ဝႃႈၼႆ။