ၼႂ်းဝူင်ႈတီႈသွင် လိူၼ်မၢတ်ႉၶျ်ၼႆႉ သိုၵ်းၵဝ်ႈၵၢင်ႉ ဢိုတ်းႁပ်ႉပႅတ်ႈ ၵၢၼ်တေႃႉၶူဝ်းၵုၼ်ႇၵူႈသႅၼ်းသႅၼ်း လႄႈ ၼမ်ႉမၼ်းၸၢၵ်ႈ ၸိူဝ်းတေလုၵ်ႉတၢင်းဝဵင်းသႅၼ်ဝီ လတ်း ၶိုၼ်ႈၵႂႃႇတၢင်းဝဵင်းၵူတ်ႉၶၢႆ မိူင်းတႆးပွတ်းႁွင်ႇ ၼႃႈတီႈသိုၵ်းတဢၢင်း၊ သိုၵ်းၶၢင်၊ သိုၵ်းၵဝ်ႈၵၢင်ႉ ႁူမ်ႈၵၼ်ၵုမ်းၵမ်ပၼ်ႇၵၢၼ်ၽွင်းငမ်းဝႆႉၼၼ်ႉ ၼႆယဝ်ႉ။

သိုၵ်းၵဝ်ႈၵၢင်ႉ (MNDAA) တႄႇႁေႉႁၢမ်ႈ ဢမ်ႇပၼ်ၵူၼ်းမိူင်း တေႃႉတၢင်ႇၶူဝ်းၵုၼ်ႇၵူႈသႅၼ်းသႅၼ်း လတ်းၶၢမ်ႈၵဵတ်ႉလၢၼ်ႇၸွမ်းၼိူဝ်သဵၼ်ႈတၢင်းလူင် ဝဵင်းသႅၼ်ဝီ – ဝဵင်းၵူတ်ႉၶၢႆ လႄႈ ႁဵတ်းႁႂ်ႈၵူၼ်းမိူင်း ၸိူဝ်းႁဵတ်းၵၢၼ်ၵႃႉၶၢႆၽၵ်းယိူဝ်ႈၼၢင်းၶဵဝ် လႄႈ ၵႃႉၶၢႆၵုၼ်ႇၵူႈသႅၼ်းသႅၼ်း ႁူပ်ႉတၢင်းယၢပ်ႇ ႁၢဝ်ႈႁႅင်း။ မၢင်ၸိူဝ်းလႆႈႁႃသဵၼ်ႈတၢင်းတၢင်ႇသဵၼ်ႈလတ်းၶၢမ်ႈဝဵင်းသႅၼ်ဝီၵႂႃႇထိုင်ဝဵင်းၵူတ်ႉၶၢႆသေတႃႉ လႆႈၸႂ်ႉၶၢဝ်းယၢမ်း လႄႈ ၵႃႈၸႂ်ႉၸၢႆႇသုင်လိူဝ်ၵဝ်ႇ ၼႆယဝ်ႉ။

ၵူၼ်းမိူင်းၵေႃႉယူႇဝႆႉၼႂ်းဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈဝႃႈ “ၶဝ်တႄႇဢိုတ်းၵျၢမ်းၸိူင်ႉၼႆ မီးသၢမ်သီႇဝၼ်းယဝ်ႉ။ မိူဝ်ႈလဵဝ်ၼႆႉ ၵေႃႇၾီႇထုၵ်ႈၼိုင်ႈၵူၺ်းၵေႃႈဢမ်ႇပၼ် ၶၢမ်ႈ။ ၶဝ်ပႂ်ႉၸႅတ်ႈ ပႂ်ႉထတ်းတီႈ ၾၢႆႇတႂ်ႈ မၢၼ်ႈပဵင်း၊ ၾၢႆႇၼိူဝ်ဢေးသျႃးဝေႃးၼၼ်ႉ။ ၵႃးတၢင်ႇၽၵ်းၶဵဝ် ၸိူဝ်းဢၼ်တေၶိုၼ်ႈၵႂႃႇၶၢႆတၢင်း ဝဵင်းၵူတ်ႉၶၢႆၼၼ်ႉ ပေႃးဢမ်ႇလီယဝ်ႉ။ လုင်းႁဝ်းၶဝ်ၼႆႉ လႆႈၵႂႃႇတၢင်း ပၢင်ႇလေႃႉ၊ သဵၼ်ႈတၢင်းလွႆၶၢင် ၵွင်းၶႃး ၵႂႃႇဢွၵ်ႇတီႈ ဝဵင်းမႂ်ႇ (မြို့သစ်) ဝဵင်းၵူတ်ႉၶၢႆၼၼ်ႉ။ လႆႈဢဝ် လိၵ်ႈ (ထောက်ခံစာ) ႁႄၵႂႃႇ။ ပေႃးဢမ်ႇပႃးလိၵ်ႈၵမ်ႉယၼ်တီႈသိုၵ်းၵဝ်ႈၵၢင်ႉ ၶဝ်ဢမ်ႇပၼ် လၢႆႈၶူဝ်းၵုၼ်ႇၵၼ်တီႈၼႂ်းၵွင်းၶႃး။ မိူဝ်ႈလဵဝ် ပီႈၼွင်ႉဝၢၼ်ႈႁဝ်း ဢၼ်ႁဵတ်းၽၵ်းၶဵဝ်ၼၼ်ႉ ႁဵတ်းလႆႈယူႇဢမ်ႇၶၢႆလႆႈ။ သုမ်းထူၼ်ႈယဝ်ႉ ” ဝႃႈၼႆ။

ယၢမ်းလဵဝ် သိုၵ်းၵဝ်ႈၵၢင်ႉ တင်း သိုၵ်းတဢၢင်း တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ယူႇလႄႈ ၵူၼ်းမိူင်းၸိူဝ်းယူႇ ၼႂ်းပိုၼ်ႉတီႈၸႄႈဝဵင်းသႅၼ်ဝီ၊ ၸႄႈဝဵင်းၵူတ်ႉၶၢႆ ယင်းတိုၵ်ႉလႆႈမႆႈၸႂ် ၵူဝ်သဵင်ၵွင်ႈတႅၵ်ႇၶိုၼ်းလႄႈ လႆႈၾၢင်ႉၵၼ်ယူႇသဝ်းဝႆႉယူႇ ၼႆယဝ်ႉ။

ၼၢင်းယိင်းဢႃႇယု 30 ပီပၢႆ ၵေႃႉယူႇဝႆႉၼႂ်းၸႄႈဝဵင်းသႅၼ်ဝီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “တႄႇမိူဝ်ႈၼႆႉ (9/3/2026) သိုၵ်းၵဝ်ႈၵၢင်ႉၶဝ်ပိၵ်ႉလုမ်းသၢမ်ဝၼ်းၼႆဢေႃႈ။ မိူဝ်ႈ ၼႆႉ ယႄး (ပလိၵ်ႈ) သိုၵ်းၶႄႇၵဝ်ႈၵၢင်ႉၸိူဝ်းမီးယူႇတီႈဝဵင်းသႅၼ်ဝီ ပႃးၵွင်ႈၵၢင်ႇတဵမ်ႁႄ ၶိုၼ်ႈၵႂႃႇတၢင်းဝဵင်းၵူတ်ႉၶၢႆၼၼ်ႉ ၼမ်ထူၼ်ႈယဝ်ႉ။ တေပဵၼ်ႁင်မႃးၼႆႁဝ်းဢမ်ႇႁူႉလႆႈလႄႈ မိူဝ်ႈလဵဝ်ႁဝ်းဢမ်ႇႁတ်းၵႂႃႇလႂ် လႆႈၾၢင်ႉသေယူႇဝႆႉၵူၺ်း” ဝႃႈၼႆ။

သိုၵ်းၵဝ်ႈၵၢင်ႉ တင်း သိုၵ်းတဢၢင်းၼႆႉ ပဵၼ်ပၼ်ႁႃၽိတ်းမေႃးၵၼ် ၸွမ်းၼႂ်းဝဵင်းၵူတ်ႉၶၢႆ၊ ဝဵင်းသႅၼ်ဝီ၊ ထုင်ႉမိူင်းယေႃ ၸိူဝ်းၼႆႉသေ မီးၶၢဝ်ႇဢွၵ်ႇမႃးဝႃႈ ၽူႈယႂ်ႇၵူၼ်းလူင်တင်း သွင်ၾၢႆႇ ႁၢင်ႈႁႅၼ်းတႃႇႁူပ်ႉၵၼ် ဝႃႈၼႆသေတႃႉ ၾၢႆႇသိုၵ်းၵဝ်ႈၵၢင်ႉ ဢမ်ႇယွမ်းႁပ်ႉႁူပ်ႉထူပ်းၸွမ်းၼႆလႄႈ ပၢင်ဢုပ်ႇဢူဝ်းၵႄႈလိတ်ႈပၼ်ႁႃ ၵေႃႈ ဢမ်ႇဢွင်ႇမၢၼ်မႃး ၼႆယဝ်ႉ။

ဝၢႆးလင်ၵူၼ်းသိုၵ်းတဢၢင်းတႄႇၶဝ်ႈယိုတ်းပေႃႉထုပ်ႉလိုပ်ႈႁေႃႈ ၵူၼ်းသိုၵ်းၵဝ်ႈၵၢင်ႉ ၼႂ်းဝဵင်းၵူတ်ႉၶၢႆ ၽွင်းၵၢင်ၶမ်ႈၵၢင်ၶိုၼ်း မိူဝ်ႈၵၢင်လိူၼ်ၾႅပ်ႉပိဝ်ႊရီႇမႃးယဝ်ႉ တင်းသိုၵ်းၵဝ်ႈ ၵၢင်ႉသေ တႄႇပဵၼ်ပၼ်ႁႃၵၼ်မႃး ထိုင်တီႈၾၢႆႇသိုၵ်းၵဝ်ႈၵၢင်ႉ ႁၢမ်ႈဢမ်ႇပၼ်ၵူၼ်းၸၢဝ်းၶိူဝ်းတဢၢင်း (လွႆ) လတ်းၽၢၼ်ႇၵဵတ်ႉလၢၼ်ႇ၊ ႁေႉႁၢမ်ႈ ၵၢၼ်တေႃႉၶဝ်ႈသၢၼ်၊ ၼမ်ႉမၼ်းၸၢၵ်ႈ၊ ၼမ်ႉမၼ်းၵိၼ် လႄႈ ၽၵ်းယိူဝ်ႈၼၢင်းၶဵဝ်ၸိူဝ်းၼႆႉ သူင်ႇၸူး ၼႂ်းၼႃႈတီႈသိုၵ်းတဢၢင်းၵုမ်းၵမ် ဝႃႈၼႆ။