ၵၢပ်ႈပၢၼ်မႂ်ႇၼႆႉ ၵူၼ်းတေႃႇၵူၼ်းၵေႃႈ ၶၢႆၵိၼ်ၵၼ်ၶိုၼ်း ၊ လူလၢႆၵၼ်ၶိုၼ်း ၶႃႈႁႅမ်ၵၼ်ၶိုၼ်း။ ပိူင်ပဵၼ်ၸိူဝ်းၼႆႉ မီးမႃးၶိူဝ်းယႂ်း ။ ပေႃးဢမ်ႇၾၢင်ႉ ၸၢင်ႈတူၵ်းပဵၼ်တူဝ်ယိူဝ်ႇၵူၼ်းၸိူဝ်းဢမ်ႇမီးသတိ ဢမ်ႇမီးပၢႆးဝူၼ်ႉလီ ။ သင်လူႉႁၢႆတၢႆယွၼ်ႉၸိူဝ်းၼႆႉမႃး ဢမ်ႇၸၢင်ႈႁွင်ႉႁႃတီႈပိုင်ႈ ။ မိူၼ်ၼင်ႇ ၼုမ်ႇယိင်း ဢႃယု 21 ပီၵေႃႉၼိုင်ႈ တီႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ႁၢႆၵႂႃႇလၢႆဝၼ်းသေ ၵမ်းလိုၼ်းႁၼ်ၶိုၼ်းပဵၼ်တူဝ်တၢႆ ။ ပီႈၼွင်ႉယင်းပႆႇ လႆႈႁၼ်ၶၢပ်ႈတူဝ် ပလိၵ်ႈမၢၼ်ႈႁၼ်ယဝ်ႉ ၼႅတ်ႈၽဝ်ပႅတ်ႈလႄႈ ဢမ်ႇႁူႉငိူၼ်ႈမၼ်းဝႃႈ တၢႆယွၼ်ႉၶႃႈႁႅမ်ႁႃႉ တၢႆယွၼ်ႉသင် ။ ထိုင်မိူဝ်ႈလဵဝ် ပီႈၼွင်ႉလႄႈ ၵူၼ်းႁူမ်ႈႁိူၼ်း ၼုမ်ႇယိင်းၵေႃႉၼႆႉ တိုၵ်ႉငမ်းငဝ်းၵၼ်ယူႇဝႃႈ တၢႆလူၺ်ႈလွင်ႈတၢင်းသင်တႄႉတႄႉၼႆယူႇ ။

ပေႃးၸူးၸႂ် ၵူၼ်းမိူင်းတႄႉ ၶႂ်ႈႁႂ်ႈ ပလိၵ်ႈလႄႈသိုၵ်းၵူႈၸုမ်းၸုမ်း ဢၼ်ယူႇၼႂ်းမိူင်းႁူမ်ႈတုမ် မေႃဢဝ်ပုၼ်ႈၽွၼ်းလႄႈ မေႃၵႄႈလိတ်ႈပၼ်ႁႃ တႃႇၵူၼ်းမိူင်း ။ ၵူၺ်းၵႃႈ ဢၼ်ၵူၼ်းမိူင်း လႆႈထူပ်းလႆႈၺႃးယူႇသေႇသေႇသမ်ႉ ပလိၵ်ႈလႄႈ သိုၵ်း ဢၼ်ယူႇတႂ်ႈသိုၵ်းမၢၼ်ႈၸိူဝ်းၼႆႉ ၵမ်ႈၼမ် ဢမ်ႇသူႈႁဵတ်းႁႂ်ႈၵူၼ်းမိူင်းလႆႈၸႂ်ယႂ်ႇ။

တေႃႈၼင်ႇ ၼုမ်ႇယိင်းတႃႈၶီႈလဵၵ်း ဢၼ်ႁၢႆတူဝ်ၵႂႃႇ မိူဝ်ႈ ဝၼ်းတီႈ 13/02/2026 ၼၼ်ႉ ႁိုင်ထိုင် 3 – 4 ဝၼ်းယဝ်ႉၵေႃႈ ပႆႇႁၼ်ၶိုၼ်းလႄႈ ၵူၼ်းႁူမ်ႈႁိူၼ်း မႆႈၸႂ် ။ ၸင်ႇၵႂႃႇတိူင်ႇလၢတ်ႈတီႈႁူင်းပလိၵ်ႈဢိူင်ႇႁွင်ႈလိုၵ်ႉ ၸႄႈဝဵင်းတႃႈၶီႈလဵၵ်း မိူဝ်ႈဝၼ်းတီႈ 17/02/2026 ။

ဝၼ်းဢၼ်ၵူၼ်းႁူမ်ႈႁိူၼ်း ၵႂႃႇတၢင်ႇလၢတ်ႈလွင်ႈၵူၼ်းႁၢႆၼၼ်ႉ ပလိၵ်ႈမၢၼ်ႈ ၸင်ႇၶိုၼ်းတွပ်ႇလၢတ်ႈဝႃႈ – ” ဝၼ်းတီႈ 16 ၼႆႉ လႆႈထူပ်းႁၼ်ၶၢပ်ႈတူဝ်ၼၢင်းယိင်းၵေႃႉၼိုင်ႈ ၵူၺ်းၵႃႈ ၽဝ်တူဝ်မၼ်းပႅတ်ႈယဝ်ႉ ” – ဝႃႈၼႆ ။

ဢိင်ၼိူဝ်လွင်ႈၸိူဝ်းၼႆႉသေ ဢဝ်ပဵၼ်ၶၢဝ်ႇလိုဝ်းႁူင်ယူႇၼိူဝ်သူဝ်ႊသျႄႊမီႊတီႊယိူဝ်ႊ ဝႃႈ ပလိၵ်ႈမၢၼ်ႈၸိူဝ်းၼႆႉ ၵူဝ်ၵူၼ်းႁူမ်ႈႁိူၼ်းၼုမ်ႇယိင်းၼၼ်ႉ ႁူႉလွင်ႈပိူင်ပဵၼ်တႄႉ ၼုမ်ႇယိင်းၵေႃႉဢၼ်လူႉတၢႆၵႂႃႇၼၼ်ႉလႄႈ တင်ႈၸႂ် ယႃႉငဝ်ႈႁၢၵ်ႈသၢၵ်ႇသေႇမၼ်းႁိုဝ် ဝႃႈၼႆထႅင်ႈ။

ၼုမ်ႇယိင်းဢၼ်လူႉသဵင်ႈၵႂႃႇၼႆႉ ၸိုဝ်ႈ မၽိဝ်ႇၽိဝ်ႇဢေး ဢႃယု 21 ပီ ယူႇပွၵ်ႉပႃႇလႅင် ၸႄႈဝဵင်းတႃႈၶီႈလဵၵ်း။ ၵႂႃႇတီႈႁၢၼ်ႉၵိၼ်ၵျေႃႇ KTV သေ ႁၢႆတူဝ်ၵႂႃႇ ႁိုင် 3 ဝၼ်း ၸင်ႇႁူႉဝႃႈ လူႉသဵင်ႈ ။ မိူဝ်ႈထူပ်းႁၼ်ၶၢပ်ႈတူဝ်ၼၼ်ႉ ပလိၵ်ႈမၢၼ်ႈ ဢမ်ႇႁႂ်ႈၵူၼ်းၼွၵ်ႈႁူႉၸွမ်းသေဢမ်ႇၵႃး ပၢႆၼႅတ်ႈၽဝ်ပႅတ်ႈၽႂ်းၽႂ်းလႄႈ ႁဵတ်းႁႂ်ႈၵူၼ်းပိုၼ်ႉတီႈ ထၢင်ႇထိူမ်လၢႆလွင်ႈ။

ၶႅပ်းႁၢင်ႈၶၢပ်ႈတူဝ်ဢၼ် ပလိၵ်ႈမၢၼ်ႈထၢႆႇဝႆႉၼၼ်ႉၵေႃႈ လိူဝ်သေ ၵူၼ်းႁူမ်ႈႁိူၼ်းမၽိဝ်ႇၽိဝ်ႇဢေးယဝ်ႉ ဢမ်ႇႁႂ်ႈၼႄၽႂ်ၼႆယူႇ။ ၸွမ်းၼင်ႇ ၵူၼ်းၸိူဝ်းႁူႉၸွမ်းလွင်ႈၼႆႉ လၢတ်ႈၼႄတႄႉ ၶၢပ်ႈတူဝ်ၼုမ်ႇယိင်းၼၼ်ႉ မီးႁွႆးပေႃႉ ႁွႆးထုပ်ႉဝႆႉ တီႈၵၢၼ်ႈၶေႃးၵေႃႈ မီးႁွႆးမၢၼ်ႉၵမ်ႇဝႆႉ ၊ ၶႅၼ်မိုဝ်းၸိူဝ်းၼႆႉၵေႃႈ မိူၼ်ၺႃးႁၵ်းဝႆႉ ” – ဝႃႈၼႆ။

ဝၢႆးသေ ၵူၼ်းႁူမ်ႈႁိူၼ်း မၽိဝ်ႇၽိဝ်ႇဢေး ၵႂႃႇတၢင်ႇလၢတ်ႈတီႈပလိၵ်ႈမၢၼ်ႈယဝ်ႉ ၊ ဝၼ်းတီႈ 24/02/2026 ၼႆႉ ၸင်ႇတီႉၺွပ်းလႆႈ ၵေႃႉဢၼ်ထၢင်ႇထိူမ်ဝႃႈ ပဵၼ်ၽူႈပူၼ်ႉပႅၼ် ၸိုဝ်ႈၸၢႆးၹေႃႇပၢႆႇ ဢႃယု 25 ပီ ။

ၸွမ်းၼင်ႇ ပလိၵ်ႈမၢၼ်ႈထတ်းထွင်သေ လႆႈႁူႉမႃးတႄႉဝႃႈ ၸၢႆးၹေႃႇပၢႆႇၼႆႉ ပဵၼ်ၵူၼ်းႁူႉႁၼ်ၸွမ်း လွင်ႈၼုမ်ႇယိင်းဢွၼ်ႇတၢႆ ။ ၵေႃႉဢၼ်ပႃးၼႂ်းလွင်ႈတၢႆ တႄႉတႄႉပဵၼ် မွင်ႇၺၢၼ်ႇလိၼ်းထႅတ်ႉ (ၶ) ဢႃးသၢၼ်းၵေႃး ။ မၼ်းၸၢႆးပဵၼ်ၵေႃႉႁၵ်ႉၵၼ်တင်း မၽိဝ်ႇၽိဝ်ႇဢေးၵေႃႉဢၼ်လူႉတၢႆၵႂႃႇၼၼ်ႉ ဝႃႈၼႆ။
ဢႃးသၢၼ်းၵေႃး လႄႈ မၽိဝ်ႇၽိဝ်ႇဢေးၼႆႉ ပဵၼ်ၵူႈႁၵ်ႉၵၼ် ၊ ၽွင်းၶိၼ်းၵၼ်ၵႂႃႇၵိၼ်ၵျေႃႇၵၼ် တီႈ KTV ၼၼ်ႉ ၵိၼ်ယႃႈမဝ်းၵမ်လူၼ်ႉလိူဝ်လႄႈ ႁဵတ်းႁႂ်ႈၼုမ်ႇယိင်းၼၼ်ႉ သျွၵ်ႉသေ လိူဝ်ၸႂ်ႁႅင်း မိူဝ်ႈၶမ်ႈ ဝၼ်းတီႈ 14 ( ဝၼ်းၵေႃႉႁၵ်ႉ – ဝၼ်းဝႃႊလႅၼ်ႊထၢႆႊ) ၼၼ်ႉ။

မိူဝ်ႈၼုမ်ႇယိင်းၼၼ်ႉ သျွၵ်ႉယႃႈသေ ထူၺ်ႈၸႂ်ဢမ်ႇလႆႈလီလီယဝ်ႉၼၼ်ႉ ဢႃးသၢၼ်းၵေႃး ၸင်ႇထူဝ်းၾူၼ်းႁွင်ႉဢဝ် ဢူၺ်းၵေႃႉမၼ်း ၸၢႆးၹေႃႇပၢႆႇၼႆႉမႃးၸွႆႈ ႁပ်ႉ မိူဝ်းတီႈႁူင်းသဝ်း(တည်းခိုခန်း) ။ ဝၢႆးၼၼ်ႉ လႅပ်ႈဢမ်ႇလွတ်ႈ ယဝ်ႉလႄႈ ဢဝ်မိူဝ်းၸူးတီႈႁိူၼ်း ။ တီႈႁိူၼ်းသမ်ႉ မီးဝႆႉ မႄႈ ဢႃးသၢၼ်းၵေႃး ယူႇဝႆႉ ၸိုဝ်ႈႁွင်ႉဝႃႈ တေႃႇၼၢင်းသႅင်တၢၼ်း ။

ၽွင်းႁွတ်ႈဝႆႉ တီႁိူၼ်းဢႃးသၢၼ်းၵေႃးၼၼ်ႉ မၽိဝ်ႇၽိဝ်ႇဢေး ပဵၼ်ႁႅင်းဝႆႉလႄႈ ဢႃးသၢၼ်းၵေႃးလႄႈၵေႃႉပဵၼ်မႄႈ ႁႃလွၵ်းႁႃလၢႆးသေ ယူတ်းယႃႁင်းၵူၺ်း လူၺ်ႈဢမ်ႇဢဝ်ၵႂႃႇႁူင်းယႃ ။ ဝၢႆးၼၼ်ႉ ထိုင်တီႈ ဢဝ်ဢမ်ႇလွတ်ႈသေ လူႉတၢႆၵႂႃႇ ၼႂ်းၶမ်ႈဝၼ်းတီႈ 14 ၼၼ်ႉၵမ်းလဵဝ်။

ဝၢႆးသေ လူႉႁၢႆတၢႆယဝ်ႉ သမ်ႉၵူဝ်ပဵၼ်ဢမူႉၼႆသေ ၶဝ်သၢမ်ၵေႃႉ ၸင်ႇႁႃလၢႆးတၢင်း တႃႇဢဝ်ၶၢပ်ႈတူဝ်တၢႆ မၽိဝ်ႇၽိဝ်ႇဢေး ၼႆႉ မူၵ်းသိူင်ႇဝႆႉသေတီႈတီႈ ။ ၸင်ႇဢဝ် ၵိူဝ် သႂ်ႇသေ ဢဝ်ၵႂႃႇပႅတ်ႈဝႆႉ ၶႅပ်ႇဝဵင်း။ ဝၢႆးၼၼ်ႉ ဢႃးသၢၼ်းၵေႃး ၵေႃႉႁၵ်ႉၼုမ်ႇယိင်းၼၼ်ႉလႄႈ မႄႈမၼ်း ဢွၼ်ၵၼ်ငိူင်ႉဝႄႈပၢႆႈၶဝ်ႈမိူင်းထႆး ဝႆႉ ၼႆ ၸွမ်းၼင်ႇပလိၵ်ႈမၢၼ်ႈ ထတ်းၸၢႆးၹေႃႇပၢႆႇသေ လႆႈႁူႉဝႆႉၼင်ႇၼႆ။

ပိူင်ပဵၼ်ၸိူဝ်းၼႆႉ ၸႂ်ႈတႄႉဢမ်ႇၸႂ်ႈတႄႉ တႅတ်ႈႁႃႈဢမ်ႇတႅတ်ႈဢၼ်ဝႃႈၼၼ်ႉ ၽႂ်ဢမ်ႇၸၢင်ႈယိုၼ်ယၼ်လႄႈ ၸိူဝ်းပဵၼ်ပီႈၼွင်ႉလႄႈ ၵူၼ်းႁူမ်ႈႁိူၼ်းမၽိဝ်ႇၽိဝ်ႇဢေးတႄႉ ပႆႇမီးလွင်ႈႁၢၼ်ႉၸႂ်သေတႃႉ ဢမ်ႇၸၢင်ႈႁႃပိုင်ႈၽႂ် ။ ထိုင်မိူဝ်ႈလဵဝ် ဢၼ်လႂ်ပဵၼ်ဢၼ်တႄႉဢၼ်ပွမ် ပေႃးလၢမ်းယၢပ်ႇယဝ်ႉၼႆ – ၼၢင်းယိင်း ၵူၼ်းပိုၼ်ႉတီႈၵေႃႉၼိုင်ႈ လၢတ်ႈၼႄၼင်ႇၼႆ –

မိူဝ်ႈတႄႇ ဢွၵ်ႇၶၢဝ်ႇတႄႉၵေႃႈ ဝႃႈ ၼုမ်ႇယိင်းၵေႃႉၼႆႉ ၵႂႃႇၸွမ်းမေႃယႃၽူႈမီးၸၼ်ႉၼႂ်းတပ်ႉမၢၼ်ႈၵေႃႉၼိုင်ႈၼႆဝႃႈ ။ ၽိူဝ်ႇ 2 3 ဝၼ်းသမ်ႉ မႃးပဵၼ်ထႅင်ႈမဵဝ်းၼိုင်ႈ။ ဢၼ်ႁွင်ႉၵႂႃႇၼႆႉ သမ်ႉဝႃႈ ပဵၼ်မၢဝ်ႇမၼ်းၼႆဢေႃႈ။ ၸူဝ်းၵၼ်ၵႂႃႇဢႅဝ်ႇ KTV သေယဝ်ႉ ၵိၼ် ၶေႊ K ။ ၽိူဝ်ႇမဝ်း သမ်ႉ ဢဝ်ယႃႈႁႄႊလူဝ်ႊဢိၼ်ႊ သိတ်ႇသမ်းပၼ်ၼႂ်းသဵၼ်ႈလိူတ်ႈၼုမ်ႇယိင်းၼၼ်ႉ ။ ဝၢႆးၼၼ်ႉ ၸင်ႇသျွၵ်ႉပႅတ်ႈႁေ ႁွင်ႉၵႂႃႇႁူင်းသဝ်း ၊ ဢမ်ႇလႆႈယဝ်ႉလႄႈၸင်ႇဢဝ်ၵႂႃႇတီႈႁိူၼ်းမၢဝ်ႇမၼ်းၼၼ်ႉၼႆဢေႃႈ။ သမ်ႉဢမ်ႇမီးၸႂ်ယဝ်ႉၼႆလႄႈ ၼင်ႇႁိုဝ်တေဢမ်ႇဢွၵ်ႇဢၢႆသႅဝ်ၼၼ်ႉ ၸင်ႇဢဝ်ၵိူဝ်သႂ်ႇ ၊ ပူၵ်ႉသႂ်ႇၽႃႈႁူမ်ႇသေ ၵႂႃႇပႅတ်ႈ။ဝၢႆးၼၼ်ႉ ၸၢႆးၼၼ်ႉလႄႈမႄႈမၼ်းတႄႉ ပၢႆႈၵႂႃႇမိူင်းထႆးယဝ်ႉၼႆဢေႃႈ။

ၵၢပ်ႈယၢမ်းလဵဝ် ဢမ်ႇဝႃႈယိင်းဝႃႈၸၢႆး ပေႃးၵိၼ်မႅၼ်ႈတၢင်းၵိၼ်ဢၼ်မဝ်းမိင်းယဝ်ႉၸိုင် ၸၢင်ႈဢဝ်ပၢႆးဝူၼ်ႉပၢႆးၸႂ်ပိူင်ႈ ၊ ၸၢင်ႈႁဵတ်းၽိတ်း လႄႈ ၵိုင်ႇလီၾၢင်ႉ ၼႆ မႄႈလုၵ်ႈဢွၼ်ႇၵေႃႉၼိုင်ႈလၢတ်ႈၼင်ႇၼႆ –

ၵၢပ်ႈပၢၼ်မိူဝ်ႈလဵဝ် ၵူၼ်းမိူၵ်ႈၵူၼ်းလိူင်းၵေႃႈ လိူင်ႇၼမ် ၊ တၢင်းၵိၼ်ဢၼ်ဢမ်ႇယၢမ်ႈငိၼ်း ဢၼ်ဢမ်ႇယၢမ်ႈႁၼ်ၵေႃႈ ၼမ်။ ၼင်ႇႁိုဝ် တေဢမ်ႇလႆႈထူပ်းၽေးႁၢႆႉၸႃႉၸိူင်ႉၼႆ လုၵ်ႈဢွၼ်ႇသႅၼ်းႁုၼ်ႈမႂ်ႇဢၼ်ၶိုၼ်ႈမႃးယူႇၸိူဝ်းၼႆႉၵေႃႈ ၶႂ်ႈႁႂ်ႈၾၢင်ႉတူဝ်ၵၼ်ယႂ်ႇယႂ်ႇၼမ်ၼမ်။

ယႃႇပေၸွမ်းၸႂ်တူဝ်ၸဝ်ႈၵဝ်ႇတီႈဢၼ်ၶႂ်ႈႁဵတ်းၶႂ်ႈပဵၼ်ယူႇၸိူဝ်းၼၼ်ႉ
တႃႈၶီႈလဵၵ်းၼႆႉ ၸဵမ်ဢဝ် လွင်ႈလၵ်ႉလွင်ႈၸူၼ် လွင်ႈၶႃႈလွင်ႈႁႅမ် ၸိူဝ်းၼႆႉ ပေႃးပဵၼ်မႃး ဢမ်ႇမီးၽူႈလႂ်ၽႂ် ဢၼ်ပုၼ်ႈၽွၼ်းထိုင်တီႈထိုင်လႅၼ် ။ ၽႂ်ပဵၼ်ၵေႃႈ မၼ်းၶၢမ်ႇ ၵူၺ်းလႄႈ မိူဝ်ႈပႆႇပဵၼ်ပႆႇလူႉၼႆႉ လီၾၢင်ႉၵၼ်ၼၵ်းၼႃ ။ ပေႃးပဵၼ်မႃး မၼ်းယၢပ်ႇ။ ထိုင်တီႈၵႂႃႇတၢင်ႇလၢတ်ႈပၼ်ႁႃၸဝ်ႈၵဝ်ႇ တီႈႁူင်းပလိၵ်ႈယဝ်ႉၵေႃႈ ၸၢင်ႈလႆႈသုမ်းငိုၼ်းသုမ်းတွင်း သုမ်းၶၢဝ်းယၢမ်းပႃးထႅင်ႈလူးၵွၼ်ႇၼႆ ၵူၼ်းၸိူဝ်းႁူႉလွင်ႈတႃႈၶီႈလဵၵ်းၵေႃႉၼိုင်ႈလၢတ်ႈၼႄၼင်ႇၼႆ။