မိူဝ်ႈဝႃး ဝၼ်းတီႈ 24 လိူၼ်ၾႅပ်ႉပိဝ်ႊရီႇ သိုၵ်းဝႃႉ (UWSA) ပွတ်းၸၢၼ်း ၼႃႈလိၼ်သိုၵ်း 171 ၸတ်းပၢင် မွပ်ႈယႃႈမဝ်းၵမ် လႄႈ ၵူၼ်းၸိူဝ်းၵဵဝ်ႇၶွင်ႈ ႁဵတ်းၵၢၼ်ၵႃႉၶၢႆယႃႈၼၼ်ႉပၼ်သိုၵ်းမၢၼ်ႈ တီႈဝၢၼ်ႈႁူၺ်ႈဢေႃႈ ၸႄႈဝဵင်းမိူင်းတူၼ် ပဵၼ်ပွၵ်ႈၵမ်း 25 ဝႃႈၼႆ။
ယႃႈမဝ်းၵမ်ဢၼ်သိုၵ်းဝႃႉ ပွတ်းၸၢၼ်း ဢဝ်မွပ်ႈပၼ်တီႈသိုၵ်းမၢၼ်ႈၼၼ်ႉ ပဵၼ်ဢၼ်တီႉၺွပ်းလႆႈ မိူဝ်ႈဝၼ်းတီႈ 15 လိူၼ်ၾႅပ်ႉပိဝ်ႊရီႇ ယၢမ်းၵၢင်ဝၼ်း မွၵ်ႈ 12 မူင်း ၼႂ်းၼႃႈလိၼ်သိုၵ်း 171 တပ်ႉၸုမ်း 775၊ တပ်ႉၵွင် 712 တီႈၼႂ်းဝၢၼ်ႈလီႇသူး ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၼၼ်ႉ ဝႃႈၼႆ။
ဢူးၺီႇရၼ်း ၽူႈၶၢၼ်ပၢၵ်ႇတပ်ႉသိုၵ်းဝႃႉ ပိုၼ်ၽၢဝ်ႇဢွၵ်ႇဝႆႉၼိူဝ်သိုဝ်ႇတူင်ႇဝူင်းၵူၼ်းမၼ်းဝႃႈ “ၾၢႆႇတပ်ႉသိုၵ်းမၢၼ်ႈၶဝ် ပွင်ႇၶၢဝ်ႇယွၼ်းတၢင်းၸွႆႈထႅမ်လၢတ်ႈ မိူဝ်ႈဝၼ်းတီႈ 4/2/2026 လႄႈ ၸုမ်းတပ်ႉသိုၵ်းဝႃႉ ၸိူဝ်းတူင်ႉၼိုင်ယူႇၸွမ်းလႅၼ်လိၼ်ထႆး-မၢၼ်ႈ ၸင်ႇႁဵတ်းၵၢၼ်ၵူတ်ႇထတ်း ၸွမ်းတီႉၺွပ်းဢဝ် ၵူၼ်းၸုမ်းဢၼ်လုၵ်ႉတၢင်းၼႃႈတီႈသိုၵ်းမၢၼ်ႈပၢႆႈမႃးတၢင်းၼႃႈလိၼ်သိုၵ်းႁဝ်းၼၼ်ႉ သေ တီႉဢဝ်လႆႈမိူဝ်ႈဝၼ်းတီႈ 15/2/2026” ဝႃႈၼႆ။
ယႃႈမဝ်းၵမ်ၸိူဝ်းဢၼ်သိုၵ်းဝႃႉပွတ်းၸၢၼ်း ၼႃႈလိၼ်သိုၵ်း 171 တီႉဢဝ်လႆႈၼၼ်ႉ ပႃးယႃႈၾိၼ်ႇၽိူၵ်ႇ ၼမ်ႉၼၵ်းမီး 120.75 ၵီႊလူဝ်ႊၵရမ်ႊ ၊ မႅတ်ႊတမ်ႊၽႅတ်ႊတမိၼ်း (Methamphetamine) 494 ၵီႊလူဝ်ႊၵရမ်ႊ ၊ ၵူၼ်းၸၢႆးသွင်ၵေႃႉ၊ ရူတ်ႉၶိူင်ႈ 4 လမ်း၊ ၾူၼ်း 2 လုၵ်ႈ၊ ၵွင်ႈသတ်ႉယၢမ်း 1 လဝ်း၊ ၵႃး 1 လမ်း လႄႈ မၢႆၾၢင်မိူင်းမၢၼ်ႈ 4 ၶႅပ်း။
မိူဝ်ႈပူၼ်ႉမႃး ဝၼ်းတီႈ 14/2/2026 ယၢမ်းၵၢင်ၼႂ်ၸဝ်ႉၼၼ်ႉ သိုၵ်းဝႃႉ ႁေႉၵႃးပျီႇတူႉၸိတ်ႉလႃးႁူႇ ၵူတ်ႇထတ်းလႄႈ ၵူၼ်းသိုၵ်းၸုမ်းပျီႇတူႉၸိတ်ႉ ဢဝ်ၵွင်ႈပွတ်းယိုဝ်းသႂ်ႇသိုၵ်းဝႃႉ တၢႆသွင်ၵေႃႉ တင်းသွင်ၸုမ်းၸင်ႇလႆႈၶဵင်ႈၶႅင်ၵၢၼ်သိုၵ်းတေႃႇၵၼ်။
ဝၢႆးလင်ၼၼ်ႉ သိုၵ်းဝႃႉဢဝ်ႁႅင်းသိုၵ်းၼပ်ႉႁူဝ်ပၢၵ်ႇၵေႃႉ ထႅမ်ႁႅင်းသိုၵ်းဝႆႉထႅင်ႈသေ တင်ႈလၢၼ်ႇပႂ်ႉၵူတ်ႇထတ်း ၸွမ်းတၢင်းၶဝ်ႈတၢင်းဢွၵ်ႇ ၼမ်ႉႁူးၶုၼ်ႇ၊ ၶွၵ်ႈဝူဝ်း၊ ဝၢၼ်ႈမႂ်ႇလီးသေႃး တၢင်းၽႄတႃႈၵႂၢင်ႈ သဵၼ်ႈတၢင်းၶိုၼ်ႈၵႂႃႇလွႆပႃၶီး တၢင်းၶဝ်ႈဢွၵ်ႇဝဵင်းပုင်ႇပႃႇၶႅမ် ၸဵမ်ၸိူဝ်းၼႆႉႁၢဝ်ႈႁႅင်း ။
လႆႈႁူႉဝႃႈ ၵူၼ်းသိုၵ်းၸုမ်းပျီႇတူႉၸိတ်ႉလႃးႁူႇၵေႃႉဢၼ်ယိုဝ်းသိုၵ်းဝႃႉ ပွတ်းၸၢၼ်း တၢႆသွင်ၵေႃႉၼၼ်ႉ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇတီႉၺွပ်းလႆႈ ဝႃႈၼႆ။
လိူဝ်ၼၼ်ႉ သိုၵ်းဝႃႉ UWSA ၼႆႉ ယၢမ်ႈဢဝ်ယႃႈမဝ်းၵမ် ၸိူဝ်းတီႉၺွပ်းလႆႈၼႂ်းပိုၼ်ႉတီႈၶဝ် မွပ်ႈသူင်ႇပၼ် တီႈလူင်ပွင်ၸိုင်ႈမိူင်းၶႄႇ မိူဝ်ႈဝၼ်းတီႈ 2/2/2026 တီႈၵဵတ်ႉလၢၼ်ႇလႅၼ်လိၼ် Yonghe ၼၼ်ႉ ႁႂ်ႈပဵၼ် တၢင်းၵၢၼ်မႃး။ ၽွင်းၼၼ်ႉ ပႃးယႃႈ (Methamphetamine) ၼမ်ႉၼၵ်း 1622.9 ၵီႊလူဝ်ႊၵရမ်ႊ ၵိုင်ႇ 1 တၼ်ႊၶိုင်ႈ ႁိမ်းႁွမ်း 2 တၼ်ႊ ႁူမ်ႈသဵၼ်ႈ မီး 56 ထူင် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ