မိူဝ်ႈဝႃးဝၼ်းတီႈ 19 လိူၼ်ၾႅပ်ႉပိဝ်ႊရီႇ ယၢမ်းၵၢင်ဝၼ်း သိုၵ်းၵဝ်ႈၵၢင်ႉ (MNDAA) ပွႆႇပၼ်ၶိုၼ်း ၵူၼ်းမိူင်း ဝၢၼ်ႈၸေႈ 5 ၵေႃႉ ဢၼ်တိုၵ်ႉ ၵိုတ်းဝႆႉၼႂ်းၶွၵ်ႈၶင်ႁူင်းပလိၵ်ႈ (ရဲစခန်း) တီႈဝဵင်းသႅၼ်ဝီၼၼ်ႉသေ ႁွတ်ႈထိုင်ၶိုၼ်းႁိူၼ်းယေးႁင်းၽႂ်မၼ်း ၶၢဝ်းတၢမ်းၶမ်ႈ 5 မူင်းပၢႆ ၼၼ်ႉဝႃႈၼႆ။
ၵူၼ်းဝၢၼ်ႈၸေႈ ထုင်ႉၼမ်ႉပွင်ႈ လၢတ်ႈတီႈၽူႈတွႆႇႁွၵ်ႈဝႃႈ “ၶဝ်ၺႃးၶင်ဝႆႉတီႈ ႁူင်းပလိၵ်ႈ သိုၵ်းၵဝ်ႈၵၢင်ႉ ဢၼ်မီးယူႇ ၼႂ်းဝဵင်းသႅၼ်ဝီၼၼ်ႉဢေႃႈ။ ၵေႃႇမတီႇဝၢၼ်ႈ၊ ၽူႈၵွၼ်း ဢိူင်ႇႁဝ်းၶဝ် လႆႈၵႂႃႇ လူင်းလၢႆးမိုဝ်းသေ ဢဝ်ဢွၵ်ႇမႃးၶႃႈဢေႃႈ။ ၾၢႆႇသိုၵ်းၵဝ်ႈၵၢင်ႉ ၶဝ်ဝႃႈ ပေႃးသိုပ်ႇမီးသိုပ်ႇပဵၼ်ပၼ်ႁႃၸိူင်ႉၼႆ ထႅင်ႈၸိုင် ၵူၼ်းၸိူဝ်းၵႂႃႇလူင်းလၢႆးမိုဝ်းပၼ်ၸိူဝ်း ၼႆႉ တေၶိုၼ်းၺႃးဢဝ်လိူင်ႈ ” ဝႃႈၼႆ။
ယွၼ်ႉပၼ်ႁႃၵၢၼ်သိုဝ်ႉၶၢႆတီႈလိၼ်၊ ၵၢၼ်ၶုတ်းၶမ်း ၸွမ်းထုင်ႉၼမ်ႉပွင်ႈၼၼ်ႉသေ သိုၵ်းၵဝ်ႈၵၢင်ႉ တီႉၺွပ်းဢဝ် ၵူၼ်းမိူင်းၸိူဝ်း လုၵ်ႉႁိုၼ်ႇ သၢၼ်ၶတ်း တီႈဢိူင်ႇဝၢၼ်ႈၸေႈၵႂႃႇ မိူဝ်ႈဝၼ်းတီႈ 2/2/2026 ၼၼ်ႉ တႃႇ 36 ၵေႃႉ။ ဝၼ်းတီႈ 3/2/2026 ယွၼ်ႉၵွၼ်းဢိူင်ႇ လႄႈ ၵေႃႇမတီႇဢိူင်ႇၶဝ် ၵႂႃႇၸွႆႈလၢတ်ႈ ငူပ်ႉငီႉသေ ၾၢႆႇသိုၵ်းၵဝ်ႈၵၢင်ႉ ပွႆႇမႃးပၼ်ၶိုၼ်း တႃႇ 27 ၵေႃႉ။
မိူဝ်ႈဝၼ်းတီႈ 9/2/2026 ယၢမ်းၵၢင်ဝၼ်း 12 မူင်း ဝၢႆးလင် ၸုမ်းၵူၼ်းၼုမ်ႇတႆး လႄႈ ပႃႇတီႇမႂ်ႇသုင်ၸိုင်ႈတႆး ဢွၵ်ႇလိၵ်ႈပိုၼ်ၽၢဝ်ႇ တႅမ်ႈလိၵ်ႈယိုၼ်ႈထိုင်ၸူး ၽူႈၼမ်းတပ်ႉသိုၵ်း ၵဝ်ႈၵၢင်ႉ ႁႂ်ႈပွႆႇမႃးပၼ်ၶိုၼ်းၵူၼ်းမိူင်းၸိူဝ်းၵိုတ်းဝႆႉယူႇၼၼ်ႉ ၶၼ်ၶၼ်ဝႆးဝႆး။ သင်ၾၢႆႇ သိုၵ်းၵဝ်ႈၵၢင်ႉ ဢမ်ႇပွႆႇပၼ် ၶိုၼ်းၸိုင် တေလႆႈၵႂႃႇဢုပ်ႇဢူဝ်းၵၼ်တီႈၽူႈယႂ်ႇၵူၼ်းလူင်တီႈလၢဝ်ႇၵၢႆး ပႃးဝႆႉၼင်ႇၼႆလႄႈ – သိုၵ်းၵဝ်ႈၵၢင်ႉ ပွႆႇမႃးပၼ်ၶိုၼ်း ၵူၼ်းမိူင်းထႅင်ႈ 4 ၵေႃႉ။
ၽွင်းသိုၵ်းၵဝ်ႈၵၢင်ႉတီႉၺွပ်းဢဝ်ၵူၼ်းမိူင်းၵႂႃႇယဵတ်ႈသႂ်ႇဝႆႉၼႂ်းၶွၵ်ႈၶင်ၼၼ်ႉ ၵူၼ်းမိူင်းဝၢၼ်ႈၸေႈ 9 ၵေႃႉ ၺႃးပေႃႉထုပ်ႉႁႅမ်ႁၢဝ်ႈႁႅင်းၵူႈၵေႃႉၼႆ ၵူၼ်းမိူင်းပိုၼ်ႉတီႈလၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“ၺႃးပေႃႉထုပ်ႉ၊ ၺႃးႁႅမ်တင်း 9 ၵေႃႉယဝ်ႉၶႃႈ။ တႃႇသွင်ၵေႃႉၼႆႉတႄႉ ၶဝ်ၽႅၼ်ဝႆႉမိူဝ်ႈႁူဝ်ၶမ်ႈ 5 မူင်း တေႃႇထိုင်ၵၢင်ၼႂ် 6 မူင်းၼႆႉၵွၼ်ႇ။ ၵူၺ်းၵႃႈမိူဝ်ႈၶဝ်ပွၵ်ႈမႃးလိုၼ်းသုတ်း 5 ၵေႃႉၼႆႉတႄႉဢမ်ႇၵိုတ်းႁွႆး သင်ယဝ်ႉ။ ၶဝ်ၺႃးၶင်ဝႆႉ ႁိုင်လိူဝ်ပိူၼ်ႈသုတ်းၼႃႇ။ ၶဝ်သီႇၵေႃႉဢၼ်ဢွၵ်ႇမႃးၵမ်းဢွၼ်တၢင်းၼၼ်ႉတႄႉ မီးႁွႆးၸဵပ်းႁွႆးမၢၼ်ႉၵိုတ်းမႃးၸွမ်းၶႃလူင်၊ မၢၵ်ႇၵၢဝ်ႈၶဝ်ၸိူဝ်းၼႆႉ ပေႃးၵမ်ႇပေႃးမၢၼ်ႉ။ ၶဝ်ၺႃးဢဝ်ၸိူၵ်ႈၾႆးၽတ်ႉဝႆႉ။”
လွင်ႈတၢင်းဢၼ်လႆႈပဵၼ်ပၼ်ႁႃၵၼ်ၼႆႉ မိူဝ်ႈဝၼ်းတီႈ (30/1/2026) သိုၵ်းၵဝ်ႈၵၢင်ႉ ၵႂႃႇတူၺ်း ၸွမ်း ႁွင်ႈၼမ်ႉပွင်ႈ ၶႂ်ႈဢဝ်ႁိူဝ်းသေ ၶုတ်းဢဝ်ၶမ်းၼႂ်းၼမ်ႉပွင်ႈ ဢၼ်မီးၾၢႆႇဢွၵ်ႇဝၢၼ်ႈၸေႈ။ ၵူၼ်းမိူင်း သမ်ႉတေၵေႃႇသၢင်ႈၶူဝ်ၶၢမ်ႈၼမ်ႉပွင်ႈ ဢၼ်လုၵ်ႉတီႈဝၢၼ်ႈၸေႈ ၶၢမ်ႈၸူး ဝၢၼ်ႈၵွင်းဝဵင်း- ပဵင်းလူင် သိုၵ်းၵဝ်ႈၵၢင်ႉ ဢမ်ႇၶႂ်ႈပၼ်ႁဵတ်း ယွၼ်ႉလူဝ်ႇဢဝ်ႁိူဝ်း ၶိုၼ်ႈၸွမ်းၼမ်ႉ ။ ထိုင်တီႈလႆႈထဵင်မေႃး ၽိတ်းၵၼ်သေ ထိုင်မႃးဝၼ်းတီႈ 2/2/2026 မႃးတီႉဢဝ်ၵူၼ်းဝၢၼ်ႈၵႂႃႇ။
ဝၢႆးလင်သိုၵ်းမၢၼ်ႈယိုတ်းဢဝ်ဢႃႇၼႃႇၸိုင်ႈမိူင်းသေ ပဵၼ်မႃးၽႅၼ်ၵၢၼ်ယၼ်ႇသိုၵ်း 1027 ၽွင်း သိုၵ်းၵဝ်ႈၵၢင်ႉ ၵုမ်းၵမ်ပၼ်ၵၢၼ်ႇၽွင်းငမ်း ဝႆႉတီႈထုင်ႉၼမ်ႉပွင်ႈပဵၼ်တၢင်းၵၢၼ်မႃး ၶၢဝ်းတၢင်း 2 ပီပၢႆၼၼ်ႉ လၢဝ်းပၢၼ်းၶႄႇ ႁူမ်ႈတင်း သိုၵ်းၵဝ်ႈၵၢင်ႉသေ ႁႃတဵၵ်းသိုဝ်ႉ တီႈလိၼ် သူၼ်ႁႆႈၼႃး ၵူၼ်းမိူင်းၸိူဝ်းယူႇၼႂ်းပိုၼ်ႉတီႈၼၼ်ႉ ဢမ်ႇထၢတ်ႇၼႆ ၵူၼ်းမိူင်း ၵေႃႉယူႇၼႂ်းထုင်ႉၼမ်ႉပွင်ႈ လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ