ပူဝ်ႇၼၵႃး (ထိၼ်ႇလိၼ်း) ဢၼ်ပဵၼ်ႁူဝ်ၼႃႈ တပ်ႉသိုၵ်းၸိူဝ်ႉၸၢတ်ႈမၢၼ်ႈ BNRA ၼၼ်ႉ ပႃးၶိူင်ႈၵွင်ႈၵၢင်ႇဢိတ်းဢီႈ ဢဝ်တင်းလုၵ်ႈလၢင်းမေးၼၢင်းလႄႈၵူၼ်းႁိူၼ်းသေ ၵႂႃႇဝၢင်းၶိူင်ႈပၼ်သိုၵ်းမၢၼ်ႈ။

ႁွင်ႈၵၢၼ်ၾၢႆႇပိုၼ်ၽၢဝ်ႇ ထီႊဝီႊမၢၼ်ႈပိုၼ်ၽၢဝ်ႇဢွၵ်ႇၶမ်ႈၼႆႉ 18/02/2026 ၼႆႉဝႃႈ ပူဝ်ႇၼၵႃး ၽူႈၼမ်းၸုမ်းယိပ်းၵွင်ႈၵၢင်ႇမၢၼ်ႈ ဢၼ်ပၵ်းတပ်ႉငဝ်ႈငုၼ်းဝႆႉတီႈ ၸႄႈဝဵင်းယိၼ်းမႃႇပိၼ်ႇ တိူင်းၸႄႈၵႅင်းၼၼ်ႉ ဢဝ်တၢင်းၵွင်ႈပွတ်းၵွင်ႈယၢဝ်းၵမ်ႈၽွင်ႈသေ ဝၢင်းၶိူင်ႈပၼ်သိုၵ်းမၢၼ်ႈယဝ်ႉဝႃႈၼႆ။

ပူဝ်ႇၼၵႃးၼႆႉ ပဵၼ်ၸုမ်းလုၵ်ႉၽိုၼ်ႉတေႃႇသိုၵ်းမၢၼ်ႈၸုမ်းၼိုင်ႈ မီးဢဵၼ်ႁႅင်းသိုၵ်း 100 ပၢႆ ယူႇၼႂ်းတိူင်းၸႄႈၵႅင်း ။ ၵူၺ်းၵႃႈ ၸုမ်း NUG လႄႈသိုၵ်း PDF ၶဝ်ၼႄးဝႃႈ ၸုမ်းသိုၵ်းပူဝ်ႇၼၵႃး(ဢၼ်ဢမ်ႇယွမ်းၶဝ်ႈႁူမ်ႈၸွမ်း PDF- NUG ၼႆႉ ) ႁဵတ်းႁၢႆႉပူၼ်ႉပႅၼ်တေႃႇၵူၼ်းမိူင်းၵူၼ်းသိုၵ်း၊ တဵၵ်းတဵင်လူလၢႆၵၼ်ႉၸၼ်ၼၢင်းယိင်း ၊ တိုၵ်းလိုပ်ႈ တပ်ႉသိုၵ်းၵႅတ်ႇၶႄၵူၼ်းမိူင်း PDF ၊ သူင်ႇၶၢဝ်ႇပၼ်သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ PDF ၊ ၵဵပ်းၵိၼ်ၶွၼ်ႇတီႈၵူၼ်းမိူင်း – ၼႆၸိူဝ်းၼႆႉသေ PDF ဝဵင်းယိၼ်းမႃႇပိၼ်ႇ ၸင်ႇဢဝ်ႁႅင်းသိုၵ်းၶဝ်ႈပိုတ်းယိုဝ်းၸုမ်း ပူဝ်ႇၼၵႃးၶဝ် ။ ၸုမ်းသိုၵ်းပူဝ်ႇၼၵႃးၵေႃႈ ဢွၵ်ႇလၢတ်ႈတၢင်းသိုဝ်ႇၼႅင်ႈသၢၼ် – ၼႄးသိုၵ်း PDF လႄႈ NUG ။ ၼႂ်းပီ 2025 တင်းပီ ၶဵင်ႇၼႄးၵၼ်ၵႂႃႇၼႄးၵၼ်မႃး – ထိုင်မႃး မိူဝ်ႈဝႃးဝၼ်းတီႈ 17/02/2026 ထိုင်တီႈသိုၵ်း PDF တႂ်ႈ NUG ၶဝ်ႈပိုတ်းယိုဝ်း တပ်ႉငဝ်ႈငုၼ်း ပူဝ်ႇၼၵႃးၶဝ် ။

ထိုင်မႃးမိူဝ်ႈၼႆႉၵေႃႈ သိုၵ်းမၢၼ်ႈၸင်ႇပိုၼ်ၽၢဝ်ႇဢွၵ်ႇမႃးဝႃႈမၼ်း ပူဝ်ႇၼၵႃး ဢဝ်တင်းလုၵ်ႈလၢင်းၼၢင်းမေးမၼ်းသေ ဝၢင်းၶိူင်ႈၸူးသိုၵ်းမၢၼ်ႈ SAC ယဝ်ႉ ဝႃႈၼႆ။

ဢၼ်ပဵၼ်လုၵ်ႈၸုမ်း ၵူၼ်းသိုၵ်းမၼ်းၸၢႆး 100 ပၢႆတႄႉ သိုၵ်းမၢၼ်ႈဢမ်ႇလၢတ်ႈသင်ပႃး။ ၾၢႆႇတၢင်းသိုၵ်း PDF ၶဝ်တႄႉလၢတ်ႈဝႃႈ ၵူၼ်းသိုၵ်းမၼ်းၸၢႆး ၽူင်ႉပၢႆႈၵေႃႉႁူးၵေႃႉတၢင်း ၵမ်ႈၽွင်ႈဝၢင်းၶိူင်ႈၸူး PDF ဝႃႈၼႆဝႆႉ။