မိူဝ်ႈဝၼ်းတီႈ 16/2/2026 ၼၢင်းယိင်းသႅၼ်းဢႃႇယု 30 ပီ ၵေႃႉၵႂႃႇယူႇသဝ်းဝႆႉ တီႈဝဵင်းပၢင်သၢင်း ၵႂႃႇဢႅဝ်ႇႁၢၼ်ႉပျေႃႇမူၼ်ႈ KTV တီႈၼိုင်ႈသေ ဢိုၵ်ႉၼမ်ႉယႃႈမဝ်းၵမ် ဢၼ်ၵူၼ်းတင်းၼမ်ႁွင်ႉဝႃႈ K ဢမ်ႇၼၼ် Happy water ၼၼ်ႉ ၼမ်ထိုင် 5 ၵွၵ်းလႄႈ ထိုင်တီႈပဵၼ်သျွတ်ႉၵႂႃႇ ထိုင်သၢႆၸႂ်ပေႃး လူႉၵႂႃႇ ၼႆယဝ်ႉ။
ပိူင်ပဵၼ် ဢၼ်ၼၢင်းယိင်းၵေႃႉဢၼ်ဢိုၵ်ႉၼမ်ႉယႃႈမဝ်းၵမ်ၼမ် ၼႂ်းႁၢၼ်ႉပျေႃႇမူၼ်ႈၼၼ်ႉ ၽႄႈဢွၵ်ႇမႃးၼိူဝ်သိုဝ်ႇတူင်ႇဝူင်းၵူၼ်း Social Media ၸွတ်ႇတူဝ်ႈၵႂႃႇသဵင်ႈ။
ၵူၼ်းမိူင်းပိုၼ်ႉတီႈ ၵေႃႉႁူႉၸွမ်းလွင်ႈၼၢင်းယိင်းဢၼ်လူႉသဵင်ႈၵႂႃႇၼၼ်ႉ လၢတ်ႈၼႄတီႈသိုဝ်ႇ ၶၢဝ်ႇဝႃႈ “မၼ်းၼၢင်း ၵိၼ်ၼမ်ၵႂႃႇ ထိုင် 5 ၵွၵ်းၼၼ်ႉၼႃႇ။ မဵဝ်းၼႆ မၼ်းႁႅင်းၼႃႇ ၵိၼ်ၵွၵ်းလဵဝ် ၵူၺ်းၵေႃႈ ၸၢင်ႈပဵၼ်ဢေႃႈ။ မိူဝ်ႈတႄႇတႄႇပဵၼ်ၼၼ်ႉ ၵိုင်ႉၵၢင်ႉမၼ်းႁိူဝ်ႉႁႅင်းသေ ႁဵတ်းႁႂ်ႈမၼ်း ထူၺ်ႈၸႂ်ဢမ်ႇဢိမ်ႇ၊ ဢမ်ႇၶိုတ်းၵၼ်။ မၼ်းၼၢင်းလူတၢႆၵႂႃႇတီႈ ႁူင်းယႃၵမ်းသိုဝ်ႈ” ဝႃႈၼႆ။
လႆႈႁူႉဝႃႈ ၼၢင်းယိင်းၵေႃႉလူႉသဵင်ႈၵႂႃႇ ယွၼ်ႉယႃႈမဝ်းၵမ် ဢၼ်ၶၢႆဝႆႉၼႂ်းႁၢၼ်ႉပျေႃႇမူၼ်ႈ KTV ၼၼ်ႉ ပဵၼ်ၸၢဝ်းၶိူဝ်းဝႃႉ ၸႃႇတိဢိူင်ႇမင်းသႅင် ဝဵင်းတၢင်ႉယၢၼ်း မၼ်းၼၢင်းမီးလုၵ်ႈလၢင်းဝႆႉ သွင်ၵေႃႉသေ ပေႃႈၸဝ်ႈႁိူၼ်း (ၸဝ်ႈၽူဝ်) မၼ်းၼၢင်းၵေႃႈ လူႉသဵင်ႈၵႂႃႇႁိုင်ယဝ်ႉ ဝႃႈၼႆ။
ၸွမ်းၼင်ႇႁွင်ႈၵၢၼ်ပလိၵ်ႈမိူင်းဝႃႉ WSP ႁၢႆးငၢၼ်းဢွၵ်ႇဝႆႉတႄႉ ၵၢၼ်တီႈ ႁူင်းပျေႃႇမူၼ်ႈ KTV၊ Bar၊ Club ၸိူဝ်းၼႆႉ ၶၢႆဝႆႉပႃး Shiha ၼႆႉ ႁေႉႁၢမ်ႈဝႆႉ ပဵၼ်တၢင်းၵၢၼ်လႄႈ တေ သိုပ်ႇဢဝ်လိူင်ႈၵႂႃႇ ႁႂ်ႈပဵၼ်တၢင်းၵၢၼ် ၸွမ်းၼင်ႇပၵ်းပိူင် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ