မိူဝ်ႈဝၼ်းတီႈ 16/02/2026 ၸၢႆးၾၢင်ဢိူင်ႇၾႃႉ ၵူၼ်းၼုမ်ႇတႆးၽူႈလူင်ႉလႅၼ်ႇၾၢႆႇလိၵ်ႈလၢႆး ပၢႆးမွၼ်းလႄႈ ဢၼ်ပဵၼ်ပႃး ၽူႈသိုဝ်ႇၶၢဝ်ႇၵူၼ်းမိူင်း (CJ) ၸုမ်းၶၢဝ်ႇၽူႈတွႆႇႁွၵ်ႈ ၵိုင်ႉ ၵၢင်ႉလူႉသဵင်ႈၵႂႃႇ ယွၼ်ႉတၢင်းပဵၼ်ထူၺ်ႈၸႂ်ၵပ်ႉ တီႈဢိူင်ႇဝၢၼ်ႈႁွင်ႇ ႁွင်ႈလိုၵ်ႉ ဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇ။

မၼ်းၸၢႆးၼႆႉပဵၼ်ၵူၼ်းၵတ်ႉၶႅၼ်ႇလူင်ႉလႅၼ်ႇ လွင်ႈဢၢႆႊထီႊ(IT) ၊ ယၢမ်းလဵဝ်ၵေႃႈယူႇၼႂ်းၸုမ်း ဢၢႆႊထီႊတႆးသေၶိုင်သၢင်ႈတႃႇယုၵ်ႉမုၼ်း လိၵ်ႈလၢႆးတႆးလႄႈၵၢၼ်ဢၢႆႊထီႊ။

မၼ်းၸၢႆးပဵၼ်ပႃးၽူႈတႅမ်ႈလိၵ်ႈ တႅမ်ႈပွင်ႈၵႂၢမ်းလီ ။ ၵဵဝ်ႇၵပ်းၵၢၼ်မိူင်း ၵၢၼ်ၾႅတ်ႊတရႄႊ ၻီႊမူဝ်ႊၶရေႊသီႊ၊ လွင်ႈ Peace and Harmony လွင်ႈငမ်းယဵၼ်လႄႈ ယူႇႁူမ်ႈၵၼ် ၵတ်းၵတ်းယဵၼ်ယဵၼ်ၼႆၸိူဝ်းၼႆႉ တႅမ်ႈသႂ်ႇၼႂ်းၽိုၼ်ၶၢဝ်ႇ Journal မၢၼ်ႈ -တႆးလၢႆလၢႆဢၼ်ၸဵမ်ပၢၼ် ပီ 1990 ပၢႆမႃး တေႃႇထိုင်မၼ်းၸၢႆးလူႉသဵင်ႈ မၼ်းၸၢႆးတိုၵ်ႉတႅမ်ႈပၼ် ပွင်ႈ ၵႂၢမ်းလွင်ႈငမ်းယဵၼ် တၢင်ႇတီႈၼႃႈလိၵ်ႈၶၢဝ်ႇၸုမ်းၶၢဝ်ႇၽူႈတွႆႇႁွၵ်ႈယူႇ။

ၾၢင်ဢိူင်ႇၾႃႉၼႆႉ ပဵၼ်ပႃးၽူႈတႅမ်ႈၽဵင်းၵႂၢမ်း မိူၼ်ၼင်ႇၽဵင်းၵႂၢမ်း – မဵၼ်ႉၼမ်ႉတႃၾူၼ်၊ သဵင်သႅၼ်ႇႁွင်ႉ၊ မႂ်ႇသုင်ႁႂ်ႈမႂ်ႇသုင်၊ မွင်းလိူၼ်မွင်းလၢဝ် (ၸိူဝ်းဢၼ်မေႃၵႂၢမ်းၸၢႆးႁၢၼ် လႅင်းႁွင်ႉဝႆႉ) ၸိူဝ်းၼၼ်ႉၵူၺ်းဢမ်ႇၵႃး ဢိၵ်ႇပႃးထႅင်ႈၽဵင်းၵႂၢမ်းတႆးထႅင်ႈတင်းၼမ်။ မိူၼ်ၼင်ႇလိုၼ်း သုတ်းၼႆႉလႆႈႁၼ်ၼမ်ႉမိုဝ်းမၼ်းၸၢႆးတႅမ်ႈၵႂၢမ်း မွင်းဝၼ်းႁၵ်ႉႁႃး – ဢၼ်မေႃႁွင်ႉၵႂၢမ်းၸၢႆးႁၵ်ႉၶိူဝ်းႁၢၼ်လႄႈၼၢင်းမူဝ်မူဝ်ၶမ်းဢေးႁွင်ႉဝႆႉ။

ၼွၵ်ႈလိူဝ်ၼၼ်ႉဢၼ်မၼ်းၸၢႆးႁွင်ႉဢွၵ်ႇႁင်းၵူၺ်းၵေႃႈမီးၽႃသႃတႆး လႄႈ ၽႃသႃမၢၼ်ႈထႅင်ႈတင်းၼမ်။

မၼ်းၸၢႆးၼႆႉမေႃတႅင်ႇတႅမ်ႈ/ႁွင်ႉၽဵင်းၵႂၢမ်းၵူၺ်းဢမ်ႇၵႃး ပဵၼ်ပႃးမေႃထၢႆႇငဝ်းႁၢင်ႈသဵင် MV ၽဵင်းၵႂၢမ်းပႃးထႅင်ႈ။ ဢၼ်မၼ်းၸၢႆးႁဵတ်းဝႆႉပိုၼ်း Documentary လွင်ႈၸဝ်ႈၼၢင်း တိပ်ႉထီးလႃး ယိင်းႁတ်းႁၢၼ်ဝဵင်းၵဵင်းတုင် ၵေႃႈမီး။ လႆႈႁူႉဝႃႈ ပႆႇလႆႈပိုၼ်ၽႄႈၼႆလူးၵွၼ်ႇ။

မၼ်းၸၢႆးၼႆႉ ပဵၼ်ၽူႈႁတ်းႁၢၼ် ၼႂ်းၵူၼ်းၼုမ်ႇတႆးၵေႃႉၼိုင် ၵူၺ်းဢမ်ႇၵႃး ပဵၼ်ၵူၼ်းလူင်ႉလႅၼ်ႇၾၢႆႇပၢႆးမွၼ်း၊ လွင်ႈသိုဝ်ႇတူင်ႇဝူင်းၵူၼ်း လႄႈ ၵပ်းသၢၼ်ၶဝ်ႈႁႃၵူၼ်းၼုမ်ႇပိုၼ်ႉတီႈသေ တူင်ႉၼိုင်ႁဵတ်းသၢင်ႈ ၵၢၼ်သၢၼ်ၶတ်းလွင်ႈဢမ်ႇတြႃး ဢမ်ႇၽဵင်ႇပဵင်း ။

ၵူၼ်းမိူင်းတႃႈၶီႈလဵၵ်း ၵေႃႉၵႂႃႇၸွႆႈထႅမ် ၵဵပ်းဢဝ်ၶၢပ်ႈတူဝ်တၢႆမၼ်းၸၢႆး လၢတ်ႈတီႈၽူႈတွႆႇႁွၵ်ႈဝႃႈ – “မၼ်းမီးတၢင်းပဵၼ်ႁူဝ်ၸႂ်ၵပ်ႉ၊ ၸႂ်သၼ်ႇ၊ ထူၺ်ႈၸႂ်ဢမ်ႇဢိမ်ႇၼႆဢေႃႈ။ ၵိုင်ႉ ၵၢင်ႉလူႉသဵင်ႈၵႂႃႇၸိူင်ႉ ၼႆ လီသေလၢႆၼႃႇ။ မၼ်းၼႆႉပဵၼ်ၵူၼ်းၵေႃႉဢၼ်ႁဝ်းတေလႆႈပိုင်ႈဢိင် ဢဝ်တၢင်းႁၼ်ထိုင်လႆႈလွင်ႈၵၢၼ်မိူင်း၊ ပၼ်တၢင်းႁူႉၵူၼ်းၼုမ်ႇ၊ လွင်ႈဢၢႆႊထီႊ ၸိူဝ်းၼႆႉတေႉတေႉ။ မိူဝ်ႈလဵဝ် ႁဝ်းတိုၵ်ႉတေၶၢႆႉတူဝ်တၢႆမၼ်းၸၢႆး ၵႂႃႇဝႆႉတီႈဝတ်ႉယူႇဢေႃႈ” ဝႃႈၼႆ။

ၾၢင်ဢိူင်ၾႃႉၼႆႉ ပဵၼ်ၵူၼ်းၸႃႇတိ ဝဵင်းၵဵင်းတုင် ။ ဢိင်ၼိူဝ်ငဝ်းလၢႆးၵူႈလွင်ႈလွင်ႈသေ မၼ်းၸၢႆးၶၢႆႉယူႇဝဵင်းတႃႈၶီႈလဵၵ်း ႁိုင်ၶၢဝ်းတၢင်း 5 ပီ တေႃႇပေႃးလူႉသဵင်ႈ။

ၽူႈထတ်းလိၵ်ႈၸုမ်းၶၢဝ်ႇၽူႈတွႆႇႁွၵ်ႈ တႄႉလၢတ်ႈဝႃႈ မၼ်းၸၢႆးၸွႆႈၵၢၼ်တီႈၽူႈတွႆႇႁွၵ်ႈ တေႃႇထိုင် ပီ 2025 သဵင်ႈ။ ၼႂ်းပီ 2026 ၼႆႉတႄႉၵေႃႈ ပႆႇမီးလွင်ႈၵွင်ႉၸူးၶဝ်ႈႁႃၵၼ်သင် ၶိုၼ်း- ဝႃႈၼႆ။