မိူဝ်ႈဝႃး ဝၼ်းတီႈ 13/2/2026 ယၢမ်းၵၢင်ၶမ်ႈ မွၵ်ႈ 9 မူင်းပၢႆ သိုၵ်းတဢၢင်း (TNLA) လႄႈ သိုၵ်းၵဝ်ႈၵၢင်ႉ (MNDAA) ပဵၼ်ပၼ်ႁႃ လွင်ႈၵၢၼ်ဢုပ်ႉပိူင်ႇၼႃႈတီႈၽွင်းငမ်းၵၼ်သေ ၽိတ်းၵၼ်ထုပ်ႉၵၼ် ထိုင်တီႈပူၼ်ႉၶၵ်ႉမိုဝ်းပဝ်ႇ လၼ်ႇၵွင်ႈတေႃႇၵၼ်သေ ၵူၼ်းသိုၵ်းတင်းသွင်ၾၢႆႇ လႆႈဢွၵ်ႇလိူတ်ႈပဵၼ်ယၢင် တီႈဝဵင်းၵူတ်ႉၶၢႆ မိူင်းတႆးပွတ်းႁွင်ႇ ၼႆယဝ်ႉ။
ၼၢင်းယိင်းဢႃႇယု 40 ပီပၢႆ ၵေႃႉယူႇဝႆႉၼႂ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ၵွၼ်ႇၼႃႈၼႆႉ သိုၵ်းၵဝ်ႈၵၢင်ႉ ႁႃတၢပ်ႈၵွင်ႈထၢႆႇCCTV ၼႂ်းဝဵင်းပေႃးၸွတ်ႇလူင်ၵႂႃႇ။ မိူဝ်ႈ ၶဝ်သႂ်ႇၼၼ်ႉ ၶဝ်ငူပ်ႉငီႉ ဢုပ်ႇၵၼ်တင်းသိုၵ်းတဢၢင်း (လွႆ) ယူႇႁႃႉဢမ်ႇဢုပ်ႇၼၼ်ႉတႄႉဢမ်ႇႁူႉယဝ်ႉ။ ၽိူဝ်ႇထိုင် မိူဝ်ႈဝႃးတၢမ်းၶမ်ႈ သိုၵ်းတဢၢင်းၶဝ် ပႃးၶိူင်ႈၵွင်ႈၵၢင်ႇၸေးမိုဝ်း ႁႄ ႁႃၸွမ်းပူတ်းပႅတ်ႈ CCTV ဢၼ်သိုၵ်းၵဝ်ႈၵၢင်ႉၶဝ်သႂ်ႇဝႆႉၼၼ်ႉ။ ယဝ်ႉၵေႃႈ ထိုင်ၵၢင်ၶမ်ႈ သိုၵ်းလွႆၸွမ်းလိုပ်ႈၵူၼ်းသိုၵ်းၵဝ်ႈၵၢင်ႉဢွၵ်ႇ ၸွမ်းလုမ်းဢုပ်ႉပိူင်ႇၶဝ် မိူၼ်ဢၼ်ၶဝ်ယၢမ်ႈႁဵတ်းၼၼ်ႉ။ ၵၢင်ၶမ်ႈၼႆၼႃႇ ၸွမ်းလုမ်းၵဝ်ႈၵၢင်ႉၶဝ်ၵေႃႈ မီးၵူၼ်းသိုၵ်းပႂ်ႉယၢမ်းၵူၺ်းဢိူဝ်ႈ။ ၶဝ်ႁွင်ႉဢဝ်သိုၵ်းၵဝ်ႈၵၢင်ႉၸိူဝ်းပႂ်ႉယၢမ်းၵၢင်ၶမ်ႈၼၼ်ႉၵႂႃႇႁႄ ၸူးပဵၼ်ပၼ်ႁႃ ထဵင်မေႃးၵၼ် ထိုင်တီႈလၼ်ႇၵွင်ႈတေႃႇၵၼ်ၼၼ်ႉၼႃႇ” ဝႃႈၼႆ။
ၵၢင်လိူၼ်ၾႅပ်ႉပိဝ်ႊရီႇၼႆႉ သိုၵ်းၵဝ်ႈၵၢင်ႉ (MNDAA) ၸိူဝ်းၵုမ်းၵမ်ပၼ်ႇၵၢၼ်ၽွင်းငမ်းယူႇ ၼႂ်းဝဵင်းၵူတ်ႉၶၢႆ တႄႇသႂ်ႇၵွင်ႈထႆႇ CCTV ၸွမ်းသဵၼ်ႈတၢင်း ၵူႈၸွၵ်ႉၵူႈၸဵင်ႇၼႂ်းဝဵင်း ၵူတ်ႉၶၢႆ။
ၽွင်းသိုၵ်းၵဝ်ႈၵၢင်ႉ တင်း သိုၵ်းတဢၢင်း ပဵၼ်ပၼ်ႁႃၽိတ်းမေႃးပေႃႉထုပ်ႉၵၼ်ၼၼ်ႉ ၾၢႆႇၵူၼ်းသိုၵ်းတဢၢင်း ဢဝ်တုင်း (ဢလၢမ်ႇ) ႁွင်ႈၵၢၼ်ပလိၵ်ႈၵဝ်ႈၵၢင်ႉ လႄႈ ၵူၼ်းသိုၵ်း ၸိူဝ်းပႂ်ႉယၢမ်းၵၢင်ၶမ်ႈ ၸွမ်းလုမ်းၾၢႆႇႁွင်ႈၵၢၼ်ၽွင်းငမ်း သိုၵ်းၵဝ်ႈၵၢင်ႉ ၵႂႃႇပႃးလႄႈ တင်းသွင်ၾၢႆႇထဵင်မေႃးၵၼ်သေ သဵင်ၵွင်ႈတႄႇတႅၵ်ႇဢွၵ်ႇယၢမ်းၼၼ်ႉ ဝႃႈၼႆ။
“သိုၵ်းလွႆၶဝ်ၵႂႃႇၶဝ်ႈလိုပ်ႈၵူၼ်းသိုၵ်းၵဝ်ႈၵၢင်ႉ တီႈလုမ်းၵေႃႇသၢင်ႈ (ဆောက်လုပ်ရေးရုံး) ႁိမ်းၵၢတ်ႇလူင်ၼၼ်ႉၵမ်ႉၼိုင်ႈၵူၺ်း သဵင်ၵွင်ႈၶဝ်တႅၵ်ႇယဝ်ႉၼႃႇ။ ၶဝ်ယိုဝ်းၵၼ်ၶိုၼ်းႁႃႉ ဢမ်ႇၼၼ်ၵေႃႈ ၶဝ်လၼ်ႇၵွင်ႈၶိုၼ်ႈၾႃႉႁႃႉတႄႉၵေႃႈဢမ်ႇႁူႉယဝ်ႉ။ ၽိူဝ်ႇဝႃႈသဵင်ၵွင်ႈတႅၵ်ႇယဝ်ႉၼႆၵေႃႈ ႁဝ်းၵူၼ်းမိူင်းတႄႉ မႆႈၸႂ်ၵူဝ်ၶဝ်ယိုဝ်းၵၼ် ပဵၼ်ပၢင်တိုၵ်းၵၼ်ၶိုၼ်းဢေႃႈ။ ၵွပ်ႈၼၼ် ၼႅတ်ႈၶၢႆႉၵူၼ်းထဝ်ႈလႄႈ လုၵ်ႈဢွၼ်ႇ ၶဝ်ႈၼႂ်းလုၵ်းပႅပ်ႉၵမ်းသိုဝ်ႈ” ၼႆ ၵူၼ်းမိူင်းပိုၼ်ႉတီႈ ဝဵင်းၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။
လႆႈႁူႉဝႃႈ ၽွင်းသိုၵ်းတင်းသွင်ၾၢႆႇ ပဵၼ်ပၼ်ႁႃၵၼ်ယူႇ ယၢမ်းၵၢင်ၶမ်ႈၼၼ်ႉ ၾၢႆႇသိုၵ်းတဢၢင်း ပႃးၶိူင်ႈၵွင်ႈလူင် လႄႈ ၵူၼ်းသိုၵ်းပႃးၶိူင်ႈၵွင်ႈၵၢင်ႇၸေးမိုဝ်း တဵမ်ၵႃးသေ ပၼ်ႇ ၸွမ်းသဵၼ်ႈတၢင်းၼႂ်းဝဵင်း ၵူတ်ႉၶၢႆ သမ်ႉပေႃးတဵမ်လူင်ၵႂႃႇမူတ်းလႄႈ ၵူၼ်းမိူင်းဢွၼ်ၵၼ်မႆႈၸႂ်ၵူဝ်တင်းသွင်ၾၢႆႇ ပဵၼ်ပၢင်တိုၵ်းၵၼ်ၶိုၼ်း ။
မိူဝ်ႈၼႆႉ 14/2/2026 ယၢမ်းၵၢင်ၼႂ်တႄႉ ယဵၼ်ၵႂႃႇၶိုၼ်းသေ ပႆႇႁၼ်မီးလွင်ႈလၢၵ်ႇလၢႆးသင်။ ၾၢႆႇၼိုင်ႈၵေႃႈ ပဵၼ်ၽွင်းၶၢဝ်းပီမႂ်ႇၶႄႇလႄႈ လွင်ႈပၼ်ႁႃၼႆႉ သိုၵ်းတင်းသွင်ၸုမ်း တေၵႄႈလိတ်ႈၵၼ်ၵႂႃႇၸိူင်ႉႁိုဝ်ၼႆ တေလႆႈပႂ်ႉတူၺ်းထႅင်ႈယူႇၼႆ ၵူၼ်းမိူင်းၵူတ်ႉၶၢႆ လၢတ်ႈၼင်ႇၼႆ။
ယွၼ်ႉသိုၵ်းတဢၢင်း လႄႈ သိုၵ်းၵဝ်ႈၵၢင်ႉမီးပၼ်ႁႃၵၼ် ၽိတ်းမေႃးၵၼ် လွင်ႈၵၢၼ်ၽွင်းငမ်းပိုၼ်ႉတီႈသေ ၵူၼ်းမိူင်းၸိူဝ်းႁဵတ်းၵၢၼ်ၵႃႉၶၢႆၽၵ်းယိူဝ်ႈၼၢင်းၶဵဝ် လႄႈ ရူတ်ႉၵႃး တၢင်ႇၵုၼ်ႇၸိူဝ်းလုၵ်ႉတၢင်း သႅၼ်ဝီ ၶိုၼ်ႈၵႂႃႇတၢင်းဝဵင်းၵူတ်ႉၶၢႆၼၼ်ႉၵေႃႈ လႆႈၵိုတ်းယင်ႉဝႆႉၸွမ်းတၢင်း သိုၵ်းတင်းသွင်ၸုမ်း ဢမ်ႇပႆႇပၼ်လတ်း ၶၢမ်ႈၵဵတ်ႉလၢၼ်ႇ ၶဝ်ႈဝဵင်း လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ