ၵူၼ်းမိူင်း 9 ၵေႃႉ ၼႂ်းဢိူင်ႇဝၢၼ်ႈၸေႈ ၸိူဝ်းသိုၵ်းၵဝ်ႈၵၢင်ႉ တီႉၺွပ်းၵႂႃႇၶင်ၶွၵ်ႈဝႆႉသေ ၺႃးပေႃႉထုပ်ႉၼၼ်ႉ ထိုင်ဝၼ်းမိူဝ်ႈၼႆႉ 6/2/2026 ႁိုင်ၶၢဝ်းတၢင်း 5 ဝၼ်းယဝ်ႉၵေႃႈ သိုၵ်း ၵဝ်ႈၵၢင်ႉပႆႇပွႆႇပွၵ်ႈႁိူၼ်းၶိုၼ်းလႄႈ ၸုမ်းၵူၼ်းၼုမ်ႇ ၸိူဝ်းတူင်ႉၼိုင် တႃႇတူင်ႇဝူင်းတႆး 11 ၸုမ်းႁူမ်ႈၵၼ် ႁဵတ်းၽိုၼ်လိၵ်ႈဢွၵ်ႇ သၢၼ်ၶတ်း လွင်ႈႁဵတ်း သၢင်ႈၸုမ်းသိုၵ်းၵဝ်ႈၵၢင်ႉ MNDAA ။

ၼႂ်းလိၵ်ႈပိုၼ်ၽၢဝ်ႇ ၸုမ်းၵူၼ်းၼုမ်ႇၼၼ်ႉ ပိူင်ႈၸႅင်ႈၼႄဝႆႉဝႃႈ- ၵူၼ်းသိုၵ်းၵဝ်ႈၵၢင်ႉၼႆႉ ပိုင်ႈဢိင်ၼိူဝ် ၶိူင်ႈၵွင်ႈၵၢင်ႇသေ တဵၵ်းယိုတ်းဢဝ်တီႈလိၼ်ၵူၼ်းမိူင်းပိုၼ်ႉတီႈ ၼႂ်းဝၢၼ်ႈမၢၼ်ႈၸေႈသေ ႁဵတ်းၵၢၼ် ၶုတ်းၶမ်း လူၺ်ႈၵူၼ်းမိူင်းဢမ်ႇၽွမ်ႉပဵင်းပေႃး ၸႂ်ၸွမ်း။ ၽွင်းၵူၼ်းမိူင်းပိုၼ်ႉတီႈ ႁူမ်ႈႁႅင်းၵၼ်သေ ဢွၵ်ႇၼႄၵၢင်ၸႂ်လူၺ်ႈလၢႆးၵတ်းယဵၼ် ဢမ်ႇမီး ၵွင်ႈၵၢင်ႇသင်ၼႂ်းမိုဝ်းၼၼ်ႉ ၵူၼ်းသိုၵ်းၵဝ်ႈၵၢင်ႉ ၸႂ်ႉႁႅင်း သိုၵ်းဢၼ်မီးၵွင်ႈသေ ဝႅတ်ႉလွမ်ႉၵူၼ်းဝၢၼ်ႈဝႆႉယဝ်ႉ လၼ်ႇၵွင်ႈလွၵ်ႇငိုတ်ႈတေႃႇၵူၼ်းမိူင်းသေ တဵၵ်းႁွင်ႉ တီႉၺွပ်းဢဝ် ၵူၼ်းမိူင်းၵႂႃႇ – ဝႃႈၼႆ။

ၽူႈယႂ်ႇၵူၼ်းလူင်ၸိူဝ်းပဵၼ်ၵေႃႇမတီႇၼႂ်းဢိူင်ႇ မွၵ်ႈ 7 ၵေႃႉ ႁူမ်ႈၵၼ်ၵႂႃႇလၢတ်ႈတီႈသိုၵ်းၵဝ်ႈၵၢင်ႉ ႁႂ်ႈပွႆႇပၼ်ၶိုၼ်း ၵူၼ်းမိူင်းတင်း 36 ၵေႃႉၼႆသေတႃႉ သိုၵ်းၵဝ်ႈၵၢင်ႉ ပွႆႇမႃးပၼ် ၶိုၼ်းတႃႇ 27 ၵေႃႉလႄႈ ယၢမ်းလဵဝ် ၵူၼ်းမိူင်းၸိူဝ်းၵိုတ်းဝႆႉ 9 ၵေႃႉၼၼ်ႉ ႁိုင်ၶၢဝ်းတၢင်း 5 ဝၼ်းယဝ်ႉၵေႃႈ ဢမ်ႇပႆႇလႆႈဢွၵ်ႇၶွၵ်ႈၶင်မႃးၼႆ ၵူၼ်းမိူင်းပိုၼ်ႉတီႈ ဢိူင်ႇဝၢၼ်ႈၸေႈ ထုင်ႉၼမ်ႉပွင်ႈ လၢတ်ႈၼင်ႇၼႆ။

မေးၼၢင်းၵူၼ်းၸၢႆး ဝၢၼ်ႈၸေႈ ၵေႃႉထုၵ်ႇတီႉၺွပ်းၵႂႃႇသႂ်ႇဝႆႉၼႂ်းၶွၵ်ႈၶင် သိုၵ်းၵဝ်ႈၵၢင်ႉၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်လႆႈထူဝ်းၾူၼ်းလၢတ်ႈတေႃႇမႃး ၵူၼ်းတီႈႁိူၼ်းယူႇ။ မိူဝ်ႈလဵဝ် ၶဝ်မီးဝႆႉ ၼႂ်းၶွၵ်ႈၶင်သိုၵ်းၵူဝ်းၵၢင်ႉ တီႈသဵၼ်ႈဝီ ၼႆဢေႃႈ။ မဵဝ်းၺႃးၵုမ်းၶင်ၼႆၼႃႇ မိူဝ်ႈလဵဝ်ၶဝ်ဢမ်ႇပေႃႉထုပ်ႉ ဢမ်ႇႁႅမ်ဢမ်ႇႁဵတ်းသင်တီႈယဝ်ႉၼႆၵေႃႈ ယူႇယၢပ်ႇယူႇၶႃႈ ဢေႃႈ။ မိူဝ်ႈလဵဝ် ၶဝ် 6 ၵေႃႉၼႆႉလႆႈယူႇ ၸွမ်းၵၼ်ဝႆႉ။ တႃႇ 3 ၵေႃႉၼႆႉ လႆႈၸႅၵ်ႇၽႄႁႄယူႇဝႆႉၵေႃႉၶွင်ႉၶွင်ႉဝႆႉ။ ၵူၼ်းဢၼ်လၢတ်ႈလႆႈ ၶႆႈၸၢင်ႈတႃႇ 3 ၵေႃႉၼၼ်ႉ ၶဝ်မၵ်းမၼ်ႈဝႃႈ ပဵၼ်ၵူၼ်းဢၼ်ဢဝ်လွင်ႈပၼ်ႁႃၼႆႉ တၢင်ႇၼိူဝ်ဢွၼ်ႊလၢႆႊ ဢွၼ်တၢင်း ၼႆလႄႈ ၸင်ႇယႅၵ်ႈၶဝ်ဢွၵ်ႇဝႆႉ ၼႆဢေႃႈ” ဝႃႈၼႆ။

ၼင်ႇႁိုဝ် ၵူၼ်းမိူင်းဝၢၼ်ႈၸေႈ 9 ၵေႃႉ ပေႃးတေလႆႈလွတ်ႈဢွၵ်ႇမႃးၶိုၼ်းၼၼ်ႉ ၾၢႆႇၼိုင်ႈၵေႃႈ ပႃႇတီႇမႂ်ႇသုင် ၸိုင်ႈတႆး၊ တပ်ႉသိုၵ်းၸိုင်ႈတႆး SSPP/SSA ၶဝ်ၵေႃႈ လႆႈသူင်ႇလိၵ်ႈယိုၼ်ႈထိုင်ၸူးတီႈ ၵႅမ်ၸွမ်ႁၢၼ် ၽူင်းဝုၼ်းၼၢႆႇ MNDAA ဝႆႉမိူဝ်ႈဝၼ်းတီႈ 4/2/2026 ဝႆႉ ႁႂ်ႈပွႆႇပၼ်ၵူၼ်းမိူင်းဝႆးဝႆးသေ ၵႄႈလိတ်ႈပၼ်ႁႃၵႂႃႇ ႁႂ်ႈၵူၼ်းမိူင်းပဵင်းပေႃးၸႂ် ၼႆယဝ်ႉ။

ၽူႈႁူႉႁၼ်ၸမ်ၸႂ်ၵၼ်တင်းသိုၵ်း SSPP/SSA ၸဝ်ႈၼိုင်ႈၵေႃႈ လၢတ်ႈၼႄတီႈၽူႈတွႆႇႁွၵ်ႈ မိူဝ်ႈၼႆႉ 6/2/2026 ဝႃႈ – မိူဝ်ႈလဵဝ် တိုၵ်ႉပႂ်ႉတူၺ်းၶေႃႈၵႄႈၶဝ်ယူႇ။ သင်ပႆႇပွႆႇပၼ်ၵူၼ်း မိူင်းၼႆ ငဝ်ႈငုၼ်းတေၸတ်း ပွႆႇၵူၼ်းလူင်ၵႂႃႇဢုပ်ႇဢူဝ်းတီႈလၢဝ်ႇၵၢႆး။ ၾၢႆႇၼိုင်ႈၵေႃႈ မိူဝ်ႈၼႆႉ ၵေႃႇမတီႇသွင်ၾၢႆႇ (MNDAA+SSPP) ႁူမ်ႈၵၼ်လူင်းထတ်းပိုၼ်ႉတီႈ ပၼ်ႁႃဢၼ်ပဵၼ်ၵႂႃႇတီႈဝၢၼ်ႈပၢင်မႅင်းၼၼ်ႉယူႇ- ဝႃႈၼႆ။

ၼႂ်းၶေႃႈတုၵ်းယွၼ်း လိၵ်ႈပိုၼ်ၽၢဝ်ႇၸုမ်းၵူၼ်းၼုမ်ႇ 11 ၸုမ်းၼၼ်ႉ ပႃးဝႆႉဝႃႈ – ႁႂ်ႈသိုၵ်းၵဝ်ႈၵၢင်ႉ ပွႆႇပၼ်ၶိုၼ်း ၵူၼ်းမိူင်းဝၢၼ်ႈၸေႈ 9 ၵေႃႉၶၼ်ၶၼ်ဝႆးဝႆး၊ ၵိုတ်းယိုတ်းၵၢၼ်ယႃႉလူႉသၽႃႇဝသေ တဵၵ်းတဵင် သိမ်းဢဝ်တီႈလိၼ်ၵူၼ်းမိူင်း လႄႈ ၵိုတ်းလွင်ႈႁဵတ်းသၢင်ႈဢၼ်ဢမ်ႇမႅၼ်ႈၸွမ်းပၵ်းပိူင် ၼႂ်းပိုၼ်ႉတီႈၼၼ်ႉ တင်းသဵင်ႈ၊ တေလႆႈႁပ်ႉဢဝ်ပုၼ်ႈၽွၼ်း ဢၼ်ႁဵတ်းလွၵ်ႇငိုတ်ႈလႄႈ ပေႃႉထုပ်ႉႁႅမ် ၵူၼ်းမိူင်းဝႆႉၼၼ်ႉ တင်းသဵင်ႈ လႄႈ တုၵ်းယွၼ်းပႃး ႁႂ်ႈပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး ၸွႆႈယူႇၵၢင် ၶဝ်ႈၵႄႈပၼ်ႁႃ ၼႆယဝ်ႉ။

မိူဝ်ႈပူၼ်ႉမႃး ဝၼ်းတီႈ 29 လိူၼ်ၵျႅၼ်ႊၼိဝ်ႊရီႊၼႆႉၵေႃႈ ယွၼ်ႉသိုၵ်းၵဝ်ႈၵၢင်ႉပေႃႉထုပ်ႉႁႅမ်ၵူၼ်းမိူင်း ဝၢၼ်ႈပၢင်မႅင်း ၸႄႈဝဵင်းသီႇပေႃႉသေ မၢတ်ႇၸဵပ်းၵႂႃႇႁႅင်းလႄႈ ထိုင်တီႈလႆႈလူႉတၢႆၵႂႃႇၵေႃႉၼိုင်ႈ။