မိူဝ်ႈၼႆႉ ဝၼ်းတီႈ 6 လိူၼ်ၾႅပ်ႉပိဝ်ႊရီႇ ယၢမ်းၵၢင်ၼႂ် ၶွင်ႇသီႇဢဝ်ၶိုၼ်းၸိုင်ႈတႆး၊ တပ်ႉသိုၵ်းၸိုင်ႈတႆး ႁဵတ်းလိၵ်ႈပိုၼ်ၽၢဝ်ႇဢွၵ်ႇပဵၼ်တၢင်းၵၢၼ် လွင်ႈၸတ်းႁဵတ်းပၢင်ၵုမ်လူင် ၸိူဝ်ႉၸၢတ်ႈၸိုင်ႈတႆး ပွၵ်ႈၵမ်း 1 ၼႆယဝ်ႉ။
ယိူင်းဢၢၼ်းဢၼ်လႆႈၸတ်းပၢင်ၵုမ်လူင်ၵႂႃႇၼၼ်ႉ ပဵၼ်တႃႇႁႂ်ႈၸၢဝ်းၶိူဝ်းၼႂ်းၸိုင်ႈတႆးယူႇသဝ်းႁူမ်ႈၵၼ်လႆႈ ၵတ်းၵတ်းယဵၼ်ယဵၼ်၊ တႃႇၵေႃႇသၢင်ႈလႆႈ လွင်ႈငမ်းယဵၼ် မၼ်ႈၵိုမ်းယိုၼ်းယၢဝ်း၊ တႃႇသုၼ်ႇလႆႈၽဵင်ႇပဵင်း လႄႈ သုၼ်ႇလႆႈတႅပ်းတတ်းႁင်းၶေႃ၊ တႃႇၶဵၼ်ႇတႅမ်ႈပိူင်ပိုင်းၸိုင်ႈတႆး၊ တႃႇၶွတ်ႇၽွတ်ႈလႆႈ ၸုမ်းၵၢၼ်မိူင်း ဢၼ်တၢင်တူဝ်လႆႈၸိုင်ႈတႆး ၸဵမ်ၸိူဝ်းၼႆႉ ဝႃႈၼႆ။
လိူၼ်ၾႅပ်ႉပိဝ်ႊရီႇ ဝၼ်းတီႈ 2 ထိုင် 4 ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉ၊ ပႃႇတီႇၵၢၼ်မိူင်း၊ ၸုမ်းတူင်ႇဝူင်းၵူၼ်း လႄႈ ၸုမ်းၵူၼ်းၼုမ်ႇ ဢိၵ်ႇပႃး ၽူႈယႂ်ႇၵူၼ်းလူင် ၸိူဝ်းတၢင်တူဝ် ၸႄႈဝဵင်းၽႂ်မၼ်း ၼႂ်းၸိုင်ႈတႆး လႆႈၵႂႃႇၶဝ်ႈႁူမ်ႈ ပၢင်ၵုမ်လူင်ၸိူဝ်ႉၸၢတ်ႈၸိုင်ႈတႆး ပွၵ်ႈၵမ်း 1 တီႈငဝ်ႈၸိုင်ႈလွႆတႆးလႅင်း ၼႂ်းၼႃႈတီႈ RCSS/SSA ၼႆယဝ်ႉ။
ပၢင်ၵုမ်လူင်ၸိူဝ်ႉၸၢတ်ႈၸိုင်ႈတႆးၼႆႉ ၶွင်ႇသီႇဢဝ်ၶိုၼ်းၸိုင်ႈတႆး RCSS လႆႈၼမ်းၸတ်းႁဵတ်းၵႂႃႇ မီးၽူႈၶဝ်ႈႁူမ်ႈတင်းသဵင်ႈ 105 ၵေႃႉသေ ဢုပ်ႇဢူဝ်းမၵ်းမၼ်ႈၵၼ်ၵႂႃႇ လၵ်းပိူင် ၾႅတ်ႇတရႄႇ 33 ၶေႃႈ၊ ပိုၼ်ႉထၢၼ်သုၼ်ႇလႆႈသုၼ်ႇပဵၼ် 38 ၶေႃႈ လႄႈ ၶွတ်ႇၽွတ်ႈၸုမ်းဢွၼ်ႁူဝ်ၵၢၼ်ၾႅတ်ႇတရႄႇၸိုင်ႈတႆး တႃႇပွင်သၢင်ႈၶၵ်ႉၵၢၼ်ၶၢဝ်းတၢင်းၼႃႈၵႂႃႇ ၼႆ ယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ