သိုၵ်းၵဝ်ႈၵၢင်ႉ MNDAA ၸိူဝ်းတူင်ႉၼိုင်ယူႇသဝ်း ၵုမ်းၵမ်ပၼ်ႇၵၢၼ်ၽွင်းငမ်းဝႆႉ ၼႂ်းထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈ ပႃးၵွင်ႈၵၢင်ႇၸေးမိုဝ်းသေ တဵၵ်းႁွင်ႉဢဝ်ၵူၼ်းမိူင်း ၸိူဝ်းယူႇၼႂ်းဝၢၼ်ႈၸေႈ 36 ၵေႃႉ ယွၼ်ႉပိူဝ်ႈဢွၵ်ႇမႃး ၼႄၵၢင်ၸႂ် သၢၼ်ၶတ်းလွင်ႈသိုၵ်းၵဝ်ႈၵၢင်ႉၶုတ်းၶမ်း။ ႁွင်ႉၵႂႃႇလႆႈ4-5 ဝၼ်းယဝ်ႉတေႃႇထိုင်ဝၼ်းမိူဝ်ႈၼႆႉ ပႆႇပွႆႇၵူၼ်းဝၢၼ်ႈမႃး ၶိုၼ်း တင်းမူတ်း တိုၵ်ႉၵိုတ်းယူႇ 9 ၵေႃႉ ။
တႄႇၵၢင်လိူၼ်ၵျႅၼ်ႊၼိဝ်ႊရီႇ ပီ 2026 သိုၵ်းၵဝ်ႈၵၢင်ႉ ႁွင်ႉဢဝ်လၢဝ်းပၢၼ်းၶႄႇမႃးၶုတ်းဢဝ်ၶမ်း ၸွမ်းၾင်ႇၼမ်ႉပွင်ႈ ၼႂ်းဢိူင်ႇမၢၼ်ႈၸေႈၼၼ်ႉတင်းၼမ်။ ၶႂၢၵ်ႈၶုတ်းလူင်ၵႂႃႇတီႈၼိုင်ႈယဝ်ႉတီႈၼိုင်ႈသေ ယိုတ်းဢဝ် တိူၵ်ႇႁႆႈ လွၵ်းၼႃး ၵူၼ်းမိူင်း ဝၢၼ်ႈၸေႈပႃးလႄႈ ထိုင်တီႈၵူၼ်းမိူင်းဢွၵ်ႇမႃးၼႄၵၢင်ၸႂ်သၢၼ်ၶတ်း။
ဝၼ်းတီႈ 2/2/2026 သိုၵ်းၵဝ်ႈၵၢင်ႉတီႉၵူၼ်းဝၢၼ်ႈၸေႈၵႂႃႇ 36 ၵေႃႉ (ပဵၼ်ၵူၼ်းၸၢႆး သႅၼ်းပၢၼ်ဢႃႇယု 20 ပၢႆ တေႃႇ 40 ပၢႆ လွၼ်ႉလွၼ်ႉ) ။ ႁွင်ႉတၢင်ႇရူတ်ႉၵႃးၵႂႃႇတၢင်း ဝၢၼ်ႈတၢၼ်ႇလုၼ်ႇ သေသိုပ်ႇၶိုၼ်ႈၵႂႃႇတၢင်းၸႄႈဝဵင်းသႅၼ်ဝီ ပိူဝ်ႈတႃႇၵႄႈလိတ်ႈပၼ်ႁႃၵၼ် ၊ သင်ဢုပ်ႇဢူဝ်း ငူပ်ႉငီႉ ၵႄႈလိတ်ႈပၼ်ႁႃၵၼ်ယဝ်ႉ တေပွႆႇ ပွၵ်ႈႁိူၼ်းၶိုၼ်းတင်းမူတ်း သိုၵ်းၵဝ်ႈၵၢင်ႉလၢတ်ႈၼင်ႇၼႆ သေတႃႉ တေႃႇထိုင်မိူဝ်ႈၼႆႉ ပႆႇပွႆႇမႃးၶိုၼ်းမူတ်း ။
ၵူၼ်းမိူင်း ထုင်ႉၼမ်ႉပွင်ႈလၢတ်ႈၽူႈတွႆႇႁွၵ်ႈဝႃႈ “ တေႃႇထိုင်ဝၼ်းမိူဝ်ႈၼႆႉ (4/2/2026) ၵေႃႈ ၵူၼ်းဝၢၼ်ႈ ပႆႇလႆႈ ပွၵ်ႈမႃးၶိုၼ်းမူတ်း။ မိူဝ်ႈသိုၼ်းဝၼ်းၶဝ်တီႉၵႂႃႇၼၼ်ႉ ၵေႃႇမတီႇ ဢိူင်ႇ 7 ၵေႃႉ ၶိုၼ်းၵႂႃႇၸွမ်းၸွႆႈလၢတ်ႈပၼ်လႄႈ ပွႆႇမႃးပၼ်ၶိုၼ်း 27 ၵေႃႉ။ ၵိုတ်းယူႇ 9 ၵေႃႉ။ ၶဝ်ၶင်ဝႆႉၼႂ်းၶွၵ်ႈ ၺႃးၺၢပ်ႈထၢင်ႇဝႆႉႁႄ သမ်ႉပၢႆၺႃးထုပ်ႉၸႅတ်ႈထၢမ် လွင်ႈဢၼ် ၵူၼ်းမိူင်းလုၵ်ႉႁိုၼ်ႇ သၢၼ်ၶတ်းတင်းၼမ် ၼၼ်ႉထႅင်ႈ လႄႈ မိူဝ်ႈလဵဝ်ၼႆႉ လႆႈမႆႈၸႂ်ဝႆႉတႃႇၶဝ် 9 ၵေႃႉၼၼ်ႉယူႇဢေႃႈ ” ဝႃႈၼႆ။
မိူဝ်ႈဝၼ်းတီႈ 4/2/2026 ယၢမ်းၵၢင်ဝၼ်း 1 မူင်းထိုင် 2 မူင်း သိုၵ်းၵဝ်ႈၵၢင်ႉ ဢဝ်ၵႃး 6 လေႃႉ သွင်လမ်း တၢင်ႇၵူၼ်းသိုၵ်းပႃးၶိူင်ႈၵွင်ႈၵၢင်ႇတဵမ်ၵႃး လုၵ်ႉဢဝ်တၢင်းၼႂ်းဝဵင်းၼမ်ႉပွင်ႈ ၶိုၼ်ႈၵႂႃႇတၢင်းဝၢၼ်ႈၸေႈသေ ယၢမ်းဝၢႆးဝၼ်း 3 မူင်း သိုၵ်းၵဝ်ႈၵၢင်ႉၶဝ် ၵႂႃႇဢိုတ်းသဵၼ်ႈတၢင်းၶဝ်ႈဢွၵ်ႇတီႈမိူင်းပၢႆဝႆႉၼႆ ၵူၼ်းမိူင်း ပိုၼ်ႉတီႈလၢတ်ႈၼင်ႇၼႆ။
ၵူၼ်းမိူင်းၵေႃႉယူႇဝႆႉၼႂ်းထုင်ႉၼမ်ႉပွင်ႈသေ ႁူႉၸွမ်းလွင်ႈပၼ်ႁႃ သိုၵ်းၵဝ်ႈၵၢင်ႉ တင်း ၵူၼ်းဝၢၼ်ႈၸေႈ ထဵင်မေႃးၵၼ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ဢေးႁၢၼ်ႇ လုၵ်ႈယိင်း ၶိင်းမွၼ်းပၢင်ႇသိုၵ်းၵဝ်ႈၵၢင်ႉ ဢၼ်မႃးပဵၼ်ၵွၼ်းဢိူင်ႇမိူင်းပၢႆၼႆႉ မႃးသိုဝ်ႉတီႈလိၼ်ဝၢၼ်ႈၸေႈၼႆႉပၼ်လၢဝ်းပၢၼ်းၶႄႇၶဝ်။ ၵူၺ်းၵႃႈ ဢေးႁၢၼ်ႇၼႆႉသမ်ႉ ဢမ်ႇပၼ်ငိုၼ်းၵႃႈတီႈလိၼ်ၵူၼ်းဝၢၼ်ႈတဵမ်တဵမ်သေယဝ်ႉ သမ်ႉႁွင်ႉဢဝ်လၢဝ်းပၢၼ်းၶႄႇၶဝ် မႃးၶုတ်းဢဝ်ၶမ်းတိၵ်းတိၵ်း။ ၵူၼ်းဝၢၼ်ႈၵေႃႈ ဢမ်ႇပဵင်းပေႃးၸႂ်လႄႈ ၸင်ႇၽွမ်ႉၵၼ် ၵႂႃႇသၢၼ်ၶတ်း။ ၵွပ်ႈ ၼၼ် တင်းသိုၵ်းၵဝ်ႈၵၢင်ႉၶဝ်ႁႄ မီးလွင်ႈထဵင်မေႃးၵၼ် ၽိတ်းၵၼ်ၵၼ်ႉၵၼ်လူးၵွၼ်ႇ ” ၼႆယဝ်ႉ။
လႆႈႁူႉဝႃႈ လွင်ႈတၢင်းဢၼ်လႆႈပဵၼ်ပၼ်ႁႃၵၼ်ၼႆႉ မိူဝ်ႈဝၼ်းတီႈ (30/1/2026) သိုၵ်းၵဝ်ႈၵၢင်ႉ ၵႂႃႇတူၺ်း ၸွမ်း ႁွင်ႈၼမ်ႉပွင်ႈ ၶႂ်ႈဢဝ်ႁိူဝ်းသေ ၶုတ်းဢဝ်ၶမ်းၼႂ်းၼမ်ႉပွင်ႈ ဢၼ်မီးၾၢႆႇဢွၵ်ႇဝၢၼ်ႈၸေႈ။ ၵူၼ်းမိူင်း သမ်ႉတေၵေႃႇသၢင်ႈၶူဝ်ၶၢမ်ႈၼမ်ႉပွင်ႈ ဢၼ်လုၵ်ႉတီႈဝၢၼ်ႈၸေႈ ၶၢမ်ႈၸူး ဝၢၼ်ႈၵွင်းဝဵင်း- ပဵင်းလူင် သိုၵ်း ၵဝ်ႈၵၢင်ႉ ဢမ်ႇၶႂ်ႈပၼ်ႁဵတ်း ယွၼ်ႉ လူဝ်ႇဢဝ်ႁိူဝ်းၶိုၼ်ႈၸွမ်းၼမ်ႉ ။ ထိုင်တီႈလႆႈထဵင်မေႃးၽိတ်းၵၼ်သေ ထိုင်မႃးဝၼ်းတီႈ 2/2/2026 မႃးတီႉဢဝ်ၵူၼ်းဝၢၼ်ႈၵႂႃႇ။
ဢိင်ၼိူဝ်လွင်ႈပၼ်ႁႃသိုၵ်းၵဝ်ႈၵၢင်ႉ တင်း ၵူၼ်းမိူင်းၼႂ်းဢိူင်ႇဝၢၼ်ႈၸေႈ ထုင်ႉၼမ်ႉပွင်ႈ ပဵၼ်ပၼ်ႁႃၵၼ်ၼၼ်ႉ ၽူႈႁူႉႁၼ်ၸမ်ၸႂ်ၵၼ်တင်းသိုၵ်း SSPP/SSA ၸဝ်ႈၼိုင်ႈလၢတ်ႈ ၼႄဝႃႈ – ၼင်ႇႁိုဝ် မူဝ်ၵေႃႈယႃႇႁႂ်ႈၸမ်ႉၼမ်ႉၵေႃႈယႃႇႁႂ်ႈၶုၼ်ႇၼၼ်ႉတႄႉ လႆႈႁူႉဝႃႈ SSPP/SSA တင်း သိုၵ်းၵဝ်ႈၵၢင်ႉၶဝ် သွင်ပႃႈသွင်ၾၢႆႇ လႆႈသၢင်ႈၶိုၼ်ႈမႃး ၵေႃႇမတီႇဢုပ်ႇ ဢူဝ်းငူပ်ႉငီႉၵၼ် တႃႇၵႄႈလိတ်ႈပၼ်ႁႃယူႇ ငိၼ်းဝႃႈၼႆ- ဝႃႈၼႆ။
ၵူၺ်းၵႃႈ ၼင်ႇႁိုဝ်တေယိုၼ်ယၼ်လႆႈ လွင်ႈပိူင်ပဵၼ် လႄႈ ၵၢၼ်ၵႄႈလိတ်ႈပၼ်ႁႃ ထိုင်ၶၵ်ႉတွၼ်ႈလႂ် ပဵၼ်တၢင်းၵၢၼ်တေႉတေႉၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇႁႃ ၽူႈၶၢၼ်ပၢၵ်ႇၸုမ်းသိုၵ်းၵဝ်ႈၵၢင်ႉ လႄႈ SSPP/SSA ယူႇၵေႃႈ ဢမ်ႇပႆႇႁပ်ႉၾူၼ်းႁဝ်းၶႃႈသေၸုမ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ