ပေႃးထိုင်မႃး ဝၼ်းတီႈ 2 လိူၼ်ၾႅပ်ႉပိဝ်ႊရီႊ လိူၼ်ၼႃႈၼႆႉ ၸဝ်ႈသိၼ်ထမ်း ၶူးဝႃးဝုၼ်းၸုမ်ႉ တေလုၵ်ႉတီႈ မိူင်းၽူင်း မိူင်းတႆးပွတ်းဢွၵ်ႇသေ ဢွၵ်ႇၶၢဝ်းတၢင်း ပိုၼ်ၽႄၵၢၼ်သႃႇသၼႃႇ တီႈမိူင်းတႆး လႄႈ မိူင်းမၢၼ်ႈထုင်ႉပဵင်း တိူင်းတႃႈၵုင်ႈ၊ ၼေႇပျီႇတေႃႇ လႄႈ မၢၼ်းတလေး ဝႃႈၼႆ။

ဝၼ်းတီႈ 2/2/2026 ၼႆႉ ၸဝ်ႈသိၼ်ထမ်း ၶူးဝႃးဝုၼ်းၸုမ်ႉ တေလုၵ်ႉတီႈမိူင်းၽူင်း ဢွၵ်ႇၶၢဝ်းတၢင်းၵႂႃႇတီႈ ဝဵင်းမိူင်းပၼ်ႇသေ ၵိင်းတီႈၼၼ်ႉၶိုၼ်းၼိုင်ႈ။ ဝၼ်းတီႈ 3/2/2026 တေသိုပ်ႇယေႃးမုၼ်ဢွၵ်ႇၶၢဝ်းတၢင်းၵႂႃႇတီႈ ဝဵင်းၵုၼ်ႁဵင် မိူင်းတႆးပွတ်းၸၢၼ်း ။

ဝၢႆးလင်ၼၼ်ႉ ဝၼ်းတီႈ 5/2/2026 ၶူးဝႃးဝုၼ်းၸုမ်ႉ တေႁွတ်ႈထိုင်တီႈဝဵင်းမိူင်းၼွင် တေၵိင်းတီႈၼၼ်ႉ ၶိုၼ်းၼိုင်ႈ၊ ဝၼ်းတီႈ 6/2/2026 တေသိုပ်ႇဢွၵ်ႇၶၢဝ်းတၢင်းၵႂႃႇတီႈဝဵင်းမိူင်းသူႈ၊ ဝၼ်းတီႈ 7/2/2026 တေထိုင်တီႈ ဝဵင်းတၢင်ႉယၢၼ်းသေ လိုဝ်ႈသဝ်းၵိင်းတီႈၼၼ်ႉ ႁိုင်ၶၢဝ်းတၢင်းမွၵ်ႈ 2 ၶိုၼ်း ၼႆယဝ်ႉ။

ဝၼ်းတီႈ 9/2/2026 ၸဝ်ႈၶူးဝႃးဝုၼ်းၸုမ်ႉ တေသိုပ်ႇၶၢဝ်းတၢင်းၵႂႃႇတီႈဝဵင်းၵေးသီး၊ ဝၼ်းတီႈ 10/2/2026 တေသိုပ်ႇလိုဝ်ႈၵိင်းတီႈ ဝဵင်းမိူင်းၵိုင်၊ ဝၼ်းတီႈ 11/2/2026 တေသိုပ်ႇဢွၵ်ႇ ၶၢဝ်းတၢင်းၵႂႃႇထိုင် ဝဵင်းပၢင်လူင်၊ ဝၼ်းတီႈ 12/2/2026 ၸဝ်ႈၶူးဝႃး တေထိုင်တီႈ ဝဵင်းတူၼ်ႈတီးသေ ၵိင်းလိုဝ်ႈတႃႇၶၢဝ်းတၢင်း 3 ၶိုၼ်း။

တႄႇဝၼ်းတီႈ15/2/2026 ၸဝ်ႈၶူးဝႃးဝုၼ်းၸုမ်း တေႁွတ်ႈထိုင် ဝဵင်းမၢၼ်းတလေး၊ ဝၼ်းတီႈ 16/2/2026 မၼ်းၸဝ်ႈတေသိုပ်ႇဢွၵ်ႇၶၢဝ်းတၢင်းၵႂႃႇ မိူင်းမၢၼ်ႈထုင်ႉဝဵင်း ဝဵင်းပူးၵမ်ႇ (ပုဂံ) ယဝ်ႉတေသိုပ်ႇၶၢဝ်းတၢင်း ၵႂႃႇတီႈ ၼေႇပျီႇတေႃႇသေ လိုဝ်ႈတီႈၼၼ်ႉ ႁိုင် 2 ၶိုၼ်းယဝ်ႉ သိုပ်ႇၵႂႃႇတၢင်း ဝဵင်းတႃႈၵုင်ႈ လိုဝ်ႈၵိင်းတႃႇ 3 ၶိုၼ်း ဝႃႈၼႆ။