မိူဝ်ႈဝႃး ဝၼ်းတီႈ 28/1/2026 ယၢမ်းၵၢင်ၶမ်ႈ ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်းႁူမ်ႈတုမ် ပိုၼ်ၽၢဝ်ႇဢွၵ်ႇ ၶေႃႈတွပ်ႇပၢင်လိူၵ်ႈတင်ႈပွၵ်ႈၵမ်း 3 တႃႇတီႈၼင်ႈလုမ်းသၽႃး ၵူၼ်းမိူင်းၼၼ်ႉ တင်းသဵင်ႈ မီးယူႇ 54 တီႈ ပႃႇတီႇသၢင်ႇသီႈ လႆႈၵႂႃႇ 50 တီႈ ၼႆယဝ်ႉ။
တီႈၸႄႈမိူင်းၶၢင်၊ မိူင်းယၢင်းၽိူၵ်ႇ၊ မိူင်းတႆး၊ တိူင်းတၼၢဝ်းသီ၊ တိူင်းပႃႇၵိူဝ်၊ တိူင်းမၢၼ်းတလေး၊ တိူင်းယၼ်ႇၵုင်ႇ (တႃႈၵုင်ႈ)၊ တိူင်းဢေႇယႃႇဝတီႇၼၼ်ႉ ပႃႇတီႇသၢင်ႇသီႈ (USDP) လႆႈၵႂႃႇ 50 တီႈ။
ပႃႇတီႇသိူဝ်ၽိူၵ်ႇ (SNDP) တႄႉ ၼႂ်းမိူင်းတႆး လႆႈသွင်တီႈၼင်ႈ ပဵၼ်တီႈၸႄႈဝဵင်းသီႇပေႃႉ တင်း ဝဵင်းၵေးသီး၊ တီႈၸႄႈဝဵင်းယွင်ႁူၺ်ႈသမ်ႉ ပႃႇတီႇၼွင်ဢၢင်းသႃး(INLP)ဢွင်ႇပေႉ၊ တီႈၸႄႈဝဵင်းပၢင်လွင်းၵေႃႈ ပဵၼ်ပႃႇတီႇ ပဢူဝ်း PNO ပေႉၵႂႃႇ ။
ပၢင်လိူၵ်ႈတင်ႈၵမ်းတီႈ 1 ဢၼ်ၸတ်းယဝ်ႉတူဝ်ႈၵႂႃႇမိူဝ်ႈဝၼ်းတီႈ 28/12/2025 ၼၼ်ႉတႄႉ ၼႂ်းမိူင်းမၢၼ်ႈပတ်းပိုၼ်ႉ ၸတ်းႁဵတ်းတႃႇ 102 ဝဵင်း။ ၼၼ်ႉၵေႃႈ ပတ်းပိုၼ်ႉၸိုင်ႈမိူင်း ၼႆႉ တီႈၼင်ႈသၽႃးၵူၼ်းမိူင်း ပႃႇတီႇသၢင်ႇသီႈ ဢွင်ႇပေႉ 96 တီႈ။ NUP 1 ၊ SNDP 1 လႄႈ သုၼ်ႇတူဝ်ဢိၵ်ႇပႃႇတီႇတၢင်ႇဢၼ် 12 တီႈ။
မိူဝ်ႈပၢင်လိူၵ်ႈတင်ႈ ပွၵ်ႈၵမ်း 2 ဢၼ်ၸတ်းယဝ်ႉတူဝ်ႈၵႂႃႇမိူဝ်ႈဝၼ်းတီႈ 11/1/2026 ၼၼ်ႉၵေႃႈ သိုၵ်းမၢၼ်ႈ ၸတ်းပၢင်လိူၵ်ႈတင်ႈၵႂႃႇ 100 ၸႄႈဝဵင်း ။ တီႈၼင်ႈသၽႃးၵူၼ်းမိူင်း ပႃႇတီႇသၢင်ႇသီႈ USDP ဢွင်ႇပေႉၵႂႃႇၼမ်လိူဝ်ပိူၼ်ႈသုတ်း။
ၸွမ်းၼင်ႇ UEC ပိုၼ်ၽၢဝ်ႇဢွၵ်ႇဝႆႉၼၼ်ႉသေ သင်ႁုပ်ႈတႃႇတင်းမိူင်းႁူမ်ႈတုမ်ပတ်းပိုၼ်ႉၸိုင် ဢွင်ႈတီႈ တီႈၼင်ႈလုမ်းသၽႃးၵူၼ်းမိူင်းၼႆႉ ႁူမ်ႈသဵၼ်ႈမီးယူႇ 263 တီႈၼင်ႈ။
ၼႂ်းၼၼ်ႉပႃႇတီႇသၢင်ႇသီႈ USDP လႆႈၵႂႃႇ 231 တီႈၼင်ႈ၊ ပႃႇတီႇသိူဝ်ၽိူၵ်ႇ (SNDP) လႆႈ 7 တီႈၼင်ႈ၊ ပႃႇတီႇပဢူဝ်း (PNO) လႆႈ 5 တီႈၼင်ႈ၊ ပႃႇတီႇၽွမ်ႉႁူမ်ႈၸၢဝ်းၶိူဝ်းမွၼ်း (MUP) လႆႈ 5 တီႈ၊ ပႃႇတီႇၸိူဝ်ႉၸၢတ်ႈၸၢဝ်းၶိူဝ်းၼႃႇၵ လႆႈ 4 တီႈ၊ ပႃႇတီႇၽွမ်ႉႁူမ်ႈၸၢဝ်းၶိူဝ်း (တ.စ.ည) NUP လႆႈ 4 တီႈ၊ ပႃႇတီႇၵူၼ်းမိူင်း PP လႆႈ 1 တီႈ၊ ပႃႇတီႇၸၢဝ်းၶိူဝ်းရၶႅင်ႇ လႆႈ 1 တီႈၼင်ႈ၊ ပႃႇတီႇၽွမ်ႉႁူမ်ႈလိူတ်ႈတႆးလႅင် လႆႈ 1 တီႈ၊ ပႃႇတီႇၸိူဝ်ႉၸၢတ်ႈဢၢင်းသႃး လႆႈ 1 တီႈ၊ ပႃႇတီႇတီႇမူဝ်ႊၶရေႇၸီႇၸၢဝ်းၶိူဝ်းထၼူႉ လႆႈ 1 တီႈ၊ ပႃႇတီႇတီႇမူဝ်ႊၶရႅတ်ႉတိၵ်ႉ ၸိူဝ်ႉၸၢတ်ႈယၢၢင်းၽိူၵ်ႇ လႆႈ 1 တီႈ လႄႈ ပႃႇတီႇသုၼ်ႇလဵဝ် လႆႈ 1 တီႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ