ၼႂ်းလိူၼ်ၵျႅၼ်ႊၼိဝ်ႊရီႇ ႁူဝ်ပီ 2026 ၼႆႉ သိုၵ်းၵဝ်ႈၵၢင်ႉ ပွႆႇပၼ်ၶိုၼ်းႁၢႆးသိုၵ်းမၢၼ်ႈ (တိူင်းသိုၵ်းပွတ်းႁွင်ႇ ၸိူဝ်းၺႃးတီႉၺွပ်းၵႂႃႇ ၽွင်းသုမ်းပၢင်တိုၵ်း မိူင်းတႆးပွတ်းႁွင်ႇ မိူဝ်ႈၽႅၼ်ယၼ်ႇသိုၵ်း 1027) တႃႇ 500 ၵေႃႉ ၼႆယဝ်ႉ။
မိူဝ်ႈဝၼ်းတီႈ 25/1/2026 ၸုမ်းသိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဢွၵ်ႇတီႈၼႃႈလိၵ်ႈသိုဝ်ႇတူင်ႇဝူင်းၵူၼ်း The Kokang ၼၼ်ႉပဵၼ်တၢင်းၵၢၼ်ဝႃႈ – ပိူဝ်ႈတႃႇပဵၼ်မၢႆတွင်း ၾိင်ႈထုင်းၵိူဝ်းယမ် ၸၢဝ်းၶႄႇၵဝ်ႈၵၢင်ႉ (Da Jiao) ၼၼ်ႉသေ ၸင်ႇလႆႈလူတ်းပၼ်တူတ်ႈတၢမ်ႇသေ ပွႆႇပၼ်ၵူၼ်းတူၵ်းၶွၵ်ႈ 49 ၵေႃႉ လႄႈ ႁၢႆးသိုၵ်းမၢၼ်ႈ 500 ၵေႃႉ ဝႃႈၼႆ။
ၵူၼ်းၸိူဝ်းလႆႈဢွၵ်ႇၶွၵ်ႈၶင်မႃးၼႆႉ ၵမ်ႈၼမ်ပဵၼ်ၵူၼ်းၸိူဝ်းပၢႆးယူႇလီဢမ်ႇၶႅမ်ႉၼႆ ၵူၼ်းမိူင်းပိုၼ်ႉတီႈ လၢတ်ႈၼင်ႇၼႆ။
“ၵူၼ်းတူၵ်းၶွၵ်ႈဢၼ်ၶဝ်ၺွပ်းၵႂႃႇၼႆႉ ဢမ်ႇလႆႈၵိၼ်လီလီ။ တီႈၼွၼ်းၶဝ်ၵေႃႈဢမ်ႇၶႅမ်ႉ။ ၵွပ်ႈၼၼ် ၵူၼ်းၸိူဝ်းဢွၵ်ႇမႃးၼႆႉၵမ်ႈၼမ်ပၢႆးယူႇလီဢမ်ႇၶႅမ်ႉၵႃႈႁိုဝ်” ၼႆယဝ်ႉ။
မိူဝ်ႈၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်း 2 လိူၼ်ၵျူႊလၢႆႊ ပီ 2024 ၼၼ်ႉ သိုၵ်းမၢၼ်ႈ သုမ်းသိုၵ်းဢွင်ႈတီႈမီးတိူင်းသိုၵ်းပွတ်းႁွင်ႇ ရမခ ဝဵင်းလႃႈသဵဝ်ႈလႄႈ ၾၢႆႇသိုၵ်းၵဝ်ႈၵၢင်ႉ MNDAA လႄႈ ဢူၺ်းလီၶဝ် တီႉၺွပ်းဢဝ်ပႃး ႁၢႆးသိုၵ်းၵႂႃႇၵုမ်းၶင်ဝႆႉ မွၵ်ႈ 4000 ၵေႃႉ။
ၵူၼ်းၸိူဝ်းၺႃးတီႉၺွပ်းၵႂႃႇၼၼ်ႉ ပႃးလုၵ်ႈလၢင်းၼၢင်းမေး မုင်ႉႁေႃႁိူၼ်း ႁၢႆးသိုၵ်းမၢၼ်ႈလႄႈ ၾၢႆႇသိုၵ်းၵဝ်ႈၵၢင်ႉၸင်ႇပွႆႇမႃးပၼ်ၶိုၼ်း ၸိူဝ်းပဵၼ်မုင်ႉႁေႃႁိူၼ်းၶဝ် မိူဝ်ႈပီ 2024 ၼၼ်ႉ တႃႇ 3000 ၵေႃႉပၢႆ။ ႁူမ်ႈပႃးတင်း ၸွမ်သိုၵ်း၊ ၸဝ်ႈသိုၵ်း ၸိူဝ်းပဵၼ်ၽူႈမီးၸၼ်ႉၼႂ်းတပ်ႉသိုၵ်းမၢၼ်ႈ ၼႆယဝ်ႉ။
မိူဝ်ႈလိူၼ်ဢွၵ်ႉထူဝ်ႊပိူဝ်ႊ ပီ 2025 ၼၼ်ႉၵေႃႈ ၾၢႆႇသိုၵ်းၵဝ်ႈၵၢင်ႉ ပွႆႇပၼ်ၸုမ်းပလိၵ်ႈမၢၼ်ႈ လႄႈ ႁၢႆးသိုၵ်းမၢၼ်ႈ မွၵ်ႈ 50 ၵေႃႉ။ မိူဝ်ႈလိူၼ်ၼူဝ်ႊဝႅမ်ႊပိူဝ်ႊ 15 ဝၼ်းၼၼ်ႉၵေႃႈ ၸုမ်းပလိၵ်ႈလႄႈ ႁၢႆးသိုၵ်း မၢၼ်ႈ လႆႈဢွၵ်ႇမႃး 200 ၵေႃႉပၢႆ ၼႆယဝ်ႉ။
မိူဝ်ႈဝၼ်းတီႈ 15 လိူၼ်ၵျႅၼ်ႊၼိဝ်ႊရီႇ ပီ 2026 ၼႆႉသမ်ႉ သိုၵ်းၵဝ်ႈၵၢင်ႉပွႆႇပၼ်ႁၢႆးသိုၵ်းမၢၼ်ႈ တႃႇ 80 ၵေႃႉပၢႆသေ မိူဝ်ႈဝႃး ၶိုၼ်းပွႆႇပၼ်ထႅင်ႈ 500 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ